NGANI JAKULIJIGANYA 49
Yili Yakomboleka Kutama ni Umi Mpaka Kalakala
“Umi wangamala.”—YOH. 17:3.
NYIMBO NA. 147 Chilanga cha Umi Wangamala
YACHITULIJIGANYE a
1. Ana kuganichisya ya umi wangamala wachachitupa Yehofa kukusatukamuchisya chamtuli?
YEHOFA jwasasile kuti ŵandu ŵakusampikanila chachipochela “umi wangamala.” (Alo. 6:23) Patukuganichisya yachachitutendela Yehofayi yikusatukamuchisya kuti tumnonyeleje mnope. Kusala yisyene, Atati ŵetu ŵakwinani akusatunonyela mnope. Yeleyi yikusatutendekasya kuti tukakunda kuti chilichose chitulekanganye ni jwalakwe.
2. Ana chembecheyo cha umi wangamala chikusatukamuchisya chamtuli?
2 Chembecheyo chatupele Mlungu chakwamba umi wangamala chikusatukamuchisya kupilila yakusawusya yatukusasimana nayo. Atamose adani ŵetu ali atujogoyisye kuti chatuwulaje ngasitukunda kuti tuleche kumtumichila Yehofa. Tukuŵecheta yeleyi ligongo lyakuti tukumanyilila kuti naga tukuwa tuli ŵakulupichika kwa Yehofa, jwalakwe chachitujimusya kuŵawe mwamti ngasituwasoni. (Yoh. 5:28, 29; 1 Akoli. 15:55-58; Aheb. 2:15) Ligongo chichi ngatukusosekwa kukayichila yakuti tuchitamaga ni umi mpaka kalakala? Kwende tuganichisye magongo gakuyichisyaga.
YEHOFA CHACHISIMANIKWA MPAKA KALAKALA
3. Ligongo chichi ngatukukayichila yakuti Yehofa mpaka atukamuchisye kutama ni umi mpaka kalakala? (Salimo 102:12, 24, 27)
3 Tukumanyilila kuti Yehofa mpaka atukamuchisye kutama ni umi mpaka kalakala ligongo jwalakwe ni juŵatupele umi soni chachisimanikwa mpaka kalakala. (Sal. 36:9) Aganichisye ya malemba gakuyichisyaga gagakusatusimichisya kuti Yehofa jwapali kutandila kalakala soni chachisimanikwa mpaka kalakala. Pa Salimo 90:2 pakusasala kuti Yehofa jwapali “kutandilila kwa yaka mpaka yaka yosope.” Buku ja Salimo chaputala 102 jikusasalasoni mfundo jakulandanaji. (Aŵalanje Salimo 102:12, 24, 27.) Nombe jwakulochesya Habakuku pakwamba ya Atati ŵetu ŵakwinani jwalembile kuti, “AMBUJE, kutyochela pandanda wawo ali Mlungu. Wawo ali Mlungu jwangu, jwamswela ni jwangali mbesi.”—Hab. 1:12.
4. Ana tudandawuleje naga ngatukupikanichisya yakuti Yehofa jwapali kutandila kalakala soni chachisimanikwa mpaka kalakala? Alondesye.
4 Ana akusalaga kupikanichisya yakuti Yehofa ali “jwachitamile” mpaka kalakala? (Yes. 40:28) Naga akusayiwona myoyo amanyilile kuti nganaŵa jika. Elihu pakusala ya Mlungu jwatite, “Ngaŵa mkumanyilila atamose panandi chiŵalanjilo cha yaka yakwe.” (Yob. 36:26) Nambo kulepela kupikanichisya yindu yine ngayikusagopolela kuti yinduyo nganiŵa yisyesyene. Mwachisyasyo, atamose kuti ngatukusapikanichisya mwayikusaŵela kuti kusa kulangucheje, yeleyi yangatutendekasya kuganisya kuti kwangali lilanguka. Mwakulandana ni yeleyi, ŵanduwe nganituŵa tupikanichisye yosope pangani jakuti Yehofa jwapali kutandila kalakala soni chachisimanikwa mpaka kalakala. Nambo kungapikanichisyaku kwangagopolelaga kuti Mlungu ngasasimanikwa mpaka kalakala. Kupikanichisya kapena ngapikanichisya yakwamba Mlungu, kwangachengaga chilichose kwa Mlungujo. (Alo. 11:33-36) Jwalakwe jwapali yindu yosope kupwatikapo lyuŵa soni ndondwa mkaniyiŵe kupanganyidwa. Yehofa akusatusimichisya kuti jwalakwe ‘ni juŵapanganyisye chilambo chapasi ni machili gakwe.’ Jwalakwe jwapali mkanaŵe ‘kutandika mawunde kwinani.’ (Yel. 51:15; Mase. 17:24) Ana ni ligongo line lyapi lyakututendekasya kuti tukakayichilaga kuti yili yakomboleka kutama ni umi mpaka kalakala?
TWAPANGANYIDWE KUTI TUTAMEJE NI UMI MPAKA KALAKALA
5. Ana ŵandu ŵandanda ŵapanganyidwe m’litala lyamtuli?
5 Kupatulapo ŵandu, Yehofa jwapanganyisye yaumi yosope pachilambo chapasi m’litala lyakuti yitameje ni umi kwandaŵi jamnono. Nambo jwalakwe jwapanganyisye ŵandu m’litala lyakuti akawaga. Nambope Yehofa ŵamkalamwisye Adamu kuti, “Mkasimlya yisogosi ya chitela chakumanyisya yindu yambone ni yakusakala. Mkasimlya yisogosi ya chele chitelacho. Naga timlye, pa lisiku litimchilyalyo, timchiwa.” (Gen. 2:17) Yikaŵe kuti Adamu ni Hawa ŵampikanile Yehofa nikuti ngamkanawa. Pelepatu mpaka yiŵe yakupikanika kuganisya kuti pandaŵi jine jakwe komboleka kuti Yehofa akakundile jemanjaji kulya yisogosi ya “chitela chakupeleka umi.” Yeleyi yikugopolela kuti Mlungu ŵasimichisye yakuti jemanjaji atame ni “umi wampaka kalakala.” b—Gen. 3:22.
6-7. (a) Ana ni chindu chine chapi chachikusalosya kuti ŵandu nganiŵapanganya kuti aweje? (b) Ana wawojo akusaka chatende chichi m’chilambo chasambano? (Alole chiwulili.)
6 Ŵasayansi ŵane ŵapatile umboni wakulosya kuti ubongo wetu mpaka usunje yindu yejinji kupunda yindu yampaka usunjile ubongo wa mundu pakulijiganya yindu kwa umi wakwe wosope. Magasini jine (Scientific American Mind) jajakopweche mu 2010 jasasile kuti ubongo wetu mpaka usunje yindu yele winji wakwe mpaka yikwane ma gb chiŵandika 2.5 miliyoni. Nambosoni winji wa yindu yeleyi mpaka ulandane ni winji wa yindu yampaka ayigulusye pa TV kwa yaka yakupunda 300. Nambotu ubongo wetu mpaka ukombole kusunga yindu yejinji kupunda yindu yeleyi. Yeleyitu yikutukamuchisya kumanyilila kuti Yehofa ŵapanganyisye ubongo wetu kuti usunjileje yindu yejinji kupunda yindu yampaka tulijiganye kwa yaka 70 kapena 80.—Sal. 90:10.
7 Yehofa ŵatupanganyisyesoni m’litala lyakuti tusachilileje kutama ni umi mpaka kalakala. Pakwamba ya ŵandu, Baibulo jikusasala kuti Mlungu “ŵapele ŵandu mtima wakusachilila kutama ni umi mpaka kalakala.” (Jwak. 3:11, NWT.) Alitu lili ligongo limo lyalikusatutendekasya kuchiwona chiwa kuŵa mdani jwetu. (1 Akoli. 15:26) Naga tulwasile mnope, ana tukusagamba kutama ni kwembecheyaga kuwa basi? Iyayi. Ndaŵi syosope tukusajawulaga kuchipatala kuti tukapate mtela wampaka utukamuchisye kuti tuŵesoni chenene. Tukusatenda yampaka tukombole pakuliwambasya ku chiwa. Nambosoni naga mundu jwatukusamnonyela awile, chinga ali mwanache kapena jwachikulile yikusatupweteka mnope. (Yoh. 11:32, 33) Myoyo, tukusakola mtima wakusachilila kutama ni umi kwangamala ligongo lyakuti Mlungu jwetu jwatupanganyisye m’litala lyakuti tutameje ni umi mpaka kalakala. Nambotu pana magongo gane gejinji gampaka gatutendekasye kulupilila kuti Mlungu jwatupanganyisye kuti tutameje ni umi mpaka kalakala. Kwende tulole yindu yine yaŵatesile Yehofa kala soni yakutenda masiku agano yayikusalosya kuti nganachenga chakulinga chakwe.
Patukwembecheya umi wangamala watuchisangalala nawo kusogoloku, tukusosekwa kuganichisya yindu yachitutendaga pandaŵijo (Alole ndime 7) c
CHAKULINGA CHA YEHOFA NGANICHICHENGA
8. Pakwamba ya chakulinga cha Yehofa kwa uweji, ana lilemba lya Yesaya 55:11 likutusimichisya ya chichi?
8 Atamose kuti Adamu ni Hawa jwalemwisye soni ŵayikasisye chiwa kwa ŵanache ŵawo, nambo Yehofa nganachenga chakulinga chakwe. (Aŵalanje Yesaya 55:11.) Chakulinga chakwe chakuti ŵandu ŵakulupichika chatame ni umi mpaka kalakala chipalipe. Tukumanyilila yeleyi ligongo lya yindu yaŵasasile kala Yehofa soni yatesile kuti akwanilisye chakulinga chakwechi.
9. Ana Mlungu jwasasile ya chichi? (Daniele 12:2, 13)
9 Yehofa jwasasile kuti chachajimusya ŵandu ŵawe soni kwakamuchisya kuti atame ni umi mpaka kalakala. (Mase. 24:15; Tit. 1:1, 2) Mundu jwakulupichika Yobu jwasasile kuti Yehofa ali jwakusachilila kwajimusya ŵandu ŵaŵawile. (Yob. 14:14, 15) Jwakulochesya Daniyele, jwamanyililaga kuti ŵandu chachijimuka kuŵawe ni kutama ni umi mpaka kalakala. (Sal. 37:29; Aŵalanje Daniele 12:2, 13.) Ayuda ŵa mundaŵi ja Yesu ŵamanyililagasoni kuti Yehofa chachapa ŵakutumichila ŵakwe ŵakulupichika “umi wangamala.” (Luk. 10:25; 18:18) Yesu jwaŵechete mwakuwilisyawilisya ngani jakwamba kwimuka kuŵawe, soni Atati ŵakwe ŵamjimwisye jwalakwe kuŵawe.—Mat. 19:29; 22:31, 32; Luk. 18:30; Yoh. 11:25.
Ana yaŵatesile Eliya pakumjimusya mundu kuŵawe yikwasimichisya wawojo ya chichi? (Alole ndime 10)
10. Ana kwimuka kuŵawe kwa ŵandu ŵakala kukwasimichisya ya chichi? (Alole chiwulili.)
10 Yehofa ni jwakusapeleka umi soni akwete machili gakwajimusya ŵandu ŵawe. Jwalakwe ŵampele machili jwakulochesya Eliya kuti amjimusye mwanache jwamlume jwa jwamkongwe jwamasije jwa ku Selefati. (1 Ayi. 17:21-23) Kaneko, Mlungu ŵamkamuchisye jwakulochesya Elisha kumjimusya kuŵawe mwanache jwamlume jwa jwamkongwe jwa ku Shunemu. (2 Ayi. 4:18-20, 34-37) Kwimuka kuŵawe kwa ŵandu ŵeleŵa soni ŵane kukutusimichisya kuti Yehofa akwete machili gakwajimusya ŵandu kuŵawe. Yesu pajwaliji pachilambo chapasi jwalosisyesoni kuti Atatigwe ŵampele machili. (Yoh. 11:23-25, 43, 44) Jwalakwe apano ali kwinani soni ampele “ulamusi pa yindu yosope kwinani soni pachilambo chapasi.” Myoyo, jwalakwe chachikwanilisya maloŵe gakuti “ŵandu wosope ŵali m’malembe” chachijimuka kuti atame ni umi mpaka kalakala.—Mat. 28:18; Yoh. 5:25-29.
11. Ana kutuwombola kwakamuchisye chamtuli kuti yiŵe yakomboleka kutama ni umi mpaka kalakala?
11 Ligongo chichi Yehofa ŵakundile kuti Mwanache jwakwe jwapamtima awe chiwa chakupweteka? Yesu jwasasile ligongo lyakwe pajwatite, “Pakuŵa Mlungu ŵachinonyele mnope chilambo chapasi mwamti ŵapeleche Mwanache jwakwe jumopejo, ni chakulinga chakuti jwalijose jwakumkulupilila jwalakwe akajonanjidwa nambo akole umi wangamala.” (Yoh. 3:16) Mlungu paŵapeleche mwanache jwakwe kuti atuwombole ku ulemwa wetu, yakamuchisye kuti yiŵe yakomboleka kwa m’weji kupochela umi wangamala. (Mat. 20:28) Ndumetume Paulo jwasasile ya kusosekwa kwa chakulinga cha Mlungu pajwalembile kuti, “Pakuŵa chiwa chayiche kupitila mwa mundu jumo, kwimuka kwa ŵandu ŵawe kwayichesoni kupitila mwa mundu jumo. Mpela mwayiŵelele kuti ŵandu wosope akuwa ligongo lya Adamu, myoyosoni wosope chachikola umi ligongo lya Klistu.”—1 Akoli. 15:21, 22.
12. Ana Yehofa chachikwanilisya chamtuli chakulinga chakwe?
12 Yesu ŵajiganyisye ŵakumkuya ŵakwe kupopelela Uchimwene ŵa Mlungu kuti uyiche soni kuti chakulinga cha Mlungu chitendekwe pachilambo chapasi. (Mat. 6:9, 10) Mbali jine ja chakulinga cha Mlungu jili jakuti ŵandu chatame ni umi mpaka kalakala pachilambopa. Kuti yeleyi yikomboleche, Yehofa amsagwile Mwanache jwakwe kuti aŵe Mwenye jwa Uchimwene wa Umesiya. Mlungu asongangenye ŵandu pachilambopa ŵakwana 144,000 kuti akamule masengo ni Yesu pakukwanilisya chakulinga cha Mlungu.—Chiw. 5:9, 10.
13. Ana apano Yehofa akutenda chichi? Ana wawojo akusosekwa kutenda chichi?
13 Apano Yehofa akusonganganya “gulu jekulungwa” ja ŵandu soni kwajiganya jemanjaji kuti chakole upile wakutama mu Uchimwene wakwe. (Chiw. 7:9, 10; Yak. 2:8) Atamose kuti guluji jikutama mchilambo chele ŵandu ŵakwe ali ŵagaŵikangana ligongo lya woga soni ngondo syasikutendekwa ligongo lya uŵengani, kulekangana mtundu, kapena mbumba, nambope guluji jikulingalinga kuŵambala ndamo syelesi. Jemanjaji alosisye kala kuti asyanile maupanga gawo kuti gaŵe majela gakulimila. (Mik. 4:3) Mmalo mwakujigala nawo mbali pa ngondo syasikutendekasya kuti ŵandu ŵajinji aweje, jemanjaji akwakamuchisya ŵandu kupata “umi usyesyene.” Akutenda yeleyi mwakwajiganya ŵandu yakwamba Mlungu jusyesyene soni yakulinga yakwe. (1 Tim. 6:19) Komboleka kuti ŵandu ŵamwiŵasa mwawo mpaka ŵasisyeje jemanjaji kapena mpaka alajeje ligongo lya kusoŵa kwa mbiya pakutenda yindu yakamuchisya Uchimwene wa Mlungu. Nambope, Yehofa akusalolechesya kuti jemanjaji akupata yindu yakusosechela paumi. (Mat. 6:25, 30-33; Luk. 18:29, 30) Yeleyi yikusatusimichisya kuti Uchimwene wa Mlungu uli usyesyene soni uchikwanilisya chakulinga cha Mlungujo.
SOGOLO JAMBONE MNOPE JIŴANDICHILE
14-15. Ana maloŵe gakuti Yehofa chachimasya chiwa mpaka kalakala gachikwanilichikwa chamtuli?
14 Apano Yesu ali Mwenye jwa Uchimwene wa Mlungu kwinani soni jwalakwe chachikwanilisya yindu yosope yasasile Yehofa. (2 Akoli. 1:20) Kutandila mu 1914, Yesu aŵele ali mkwagomeka adani ŵakwe. (Sal. 110:1, 2) Pachangakaŵapa jwalakwe pampepe ni ŵa 144,000 chachimalisya kwagomeka soni kwajonanga ŵandu wosope ŵakusakala.—Chiw. 6:2.
15 Mkati mwa Ulamusi wa Yaka 1,000 wa Yesu, ŵandu ŵaŵawile chachajimusya, soni ŵandu ŵakupikanila chachiyika pakuŵa ŵamlama. Panyuma pakulinjidwa kwa kumalisya, ŵandu ŵachachalamula Yehofa kuti ali ŵakulungama “tachipochela chilambo, ni tachitama mwelemo kwa yaka yosope.” (Sal. 37:10, 11, 29) Chakusangalasya mnope chili chakuti “chiwa, chachili mdani jwakumalisya chachichigomeka.”—1 Akoli. 15:26.
16. Ana chakulinga chetu chekulungwa patukumtumichila Yehofa chiŵeje chichi?
16 Munganiji tuyiweni kuti chembecheyo chetu chakutama ni umi mpaka kalakala chili chisyesyene mwakamulana ni yagakusasala Maloŵe ga Mlungu. Chembecheyochi mpaka chitukamuchisye kupitilisya kuŵa ŵakulupichika m’masiku gakumalisya gakusawusyaga. Nambo kuti tumsangalasye Yehofa tukusosekwa kutenda yejinji kupunda kwamba kusachilila kuti chitutame ni umi mpaka kalakala. Chakulinga chetu chekulungwa patukupitilisya kuŵa ŵakulupichika, chiŵeje kumnonyela mnope Yehofa soni Yesu. (2 Akoli. 5:14, 15) Chinonyelochi chitutendekasyeje kusachilila kwasyasya jemanjaji soni kwasalila ŵane ya chembecheyo chatukwete. (Alo. 10:13-15) Yehofa pakutuwona tuli mkulijiganya ndamo ja chinonyelo soni kuŵa ŵakoloŵa magasa, akusasaka kuti tuŵe najo paunasi wambone mpaka kalakala.—Aheb. 13:16.
17. Ana jwalijose akwete udindo wamtuli? (Mateyu 7:13, 14)
17 Ana tuchiŵa mgulu ja ŵandu ŵachachipochela umi wangamala? Yehofatu atupele m’weji upile welewo. Myoyo uli udindo wetu kusagula kwenda palitala lyakutulongolela ku umi wangamala. (Aŵalanje Mateyu 7:13, 14.) Ana umi uchiŵa wamtuli patuchitamaga mpaka kalakala? Mungani jakuyichisya tuchipata kwanga kwa chiwusyo chelechi.
NYIMBO NA. 141 Mtuka Wakusimonjesya wa Umi
a Ana akusajembecheya kutama ni umi mpaka kalakala? Yehofa jwasasile kuti lisiku line tuchitama ni umi mpaka kalakala, mwamti ngasitudandawulagasoni ya chiwa. Munganiji chitulole magongo gane gagakututendekasya kuti tukakayichilaga yakuti Yehofa chachikwanilisya yeleyi.
b Alole libokosi lyakuti “ Ana Liloŵe Lyakuti ‘Mpaka Kalakala’ Akusalikamulichisya Masengo Chamtuli M’Baibulo?”
c KULONDESYA CHIWULILI: M’bale jwachikulile akuganichisya yindu yine yachachitendaga pachachipochela umi wangamala kusogoloku
