1. Ana mtuka wetu wakuŵecheta watyochele kwa ŵani?

 KUŴECHETA uli mtuka waŵatupele Mlungu jwetu jwachinonyelo. Adamu ali agambile kupanganyidwa, jwalakwe jwakamulichisyaga masengo maloŵe pakuŵechetana ni Atatigwe ŵakwinani. Adamu jwapanganyisyesoni maloŵe gane gakaŵechete. Jwalakwe jwatesile yeleyi pajwapelekaga mena ku yinyama yosope. (Gen. 2:19) Soni jwalakwe jwasangalele mnope pajwaŵechetene kandanda ni mundu mjakwe juŵaliji ŵamkwakwe ŵakusalala, Hawa.—Gen. 2:22, 23.

2. Ana kalakala soni masiku agano ŵandu aŵele ali mkamulichisya masengo chamtuli maloŵe mwakulemwecheka?

² Kaneko mtukawu ŵatandite kuwukamulichisya masengo mwakulemwecheka. Satana jwamlambwisye Hawa mwamti unamiwu watendekasisye kuti ŵandu alemwe soni aŵe ŵangali umlama. (Gen. 3:1-4) Adamu jwakamulichisye masengo mwakulemwecheka mtuka wakuŵechetawu mwakumjimba magambo Hawa soni Yehofa pakulemwa kwajwatesile jika. (Gen. 3:12) Kayini jwamlambwisye Yehofa ali amwuleje mpwakwe, Abele. (Gen. 4:9) Kaneko, Lameki jwalembile ndakatulo jajalosisye kuti ŵandu ŵa mundaŵi jakwe ŵaliji ŵachiwawa. (Gen. 4:23, 24) Ana ŵandu masiku agano ali ŵamtuli? Ndaŵi sine achimlongola ŵandale ŵangatenda sooni kutukana atamose ali pa gulu ja ŵandu. Masiku agano, m’mafidiyo gejinji akusakamulichisya masengo maloŵe gakusakala. Ŵanache ŵa sukulu akusapikana maloŵe gakutukana pali kusukulu. Nombe achakulungwa akusapikana maloŵega pali kumasengo. Ligongo lyakuti kuŵecheta maloŵe gakusakala kuli kwakuwanda masiku agano, yeleyi yikulosya kuti chilambochi chisakele mnope.

3. Ana tukusosekwa kusamala ni chichi? Ana chitukambilane chichi mu ngani ajino?

³ Naga ngasamala mpaka tutande kupikanila maloŵe gakusakala ni kutanda kugakamulichisya masengo. Mpela Aklistu tukusasaka  kumsangalasya Yehofa. Myoyo tuchiŵambala kamulichisya masengo maloŵe gakusakala. Tukusasaka kamulichisya masengo mtuka wakuŵechetawu m’litala lyambone. Mu nganiji chitukambilane mwampaka tutendele yeleyi, (1) patuli mu utumiki, (2) patuli ku misongano ja mpingo, soni (3) patukuŵechetana ni ŵane lisiku lililyose. Nambo chandanda, kwende tulole ligongo lyakwe Yehofa akusalolechesya yatukusati pakamulichisya masengo mtuka wakuŵechetawu.

4. Mwakamulana ni Malaki 3:16, ligongo chichi Yehofa akusalolechesya yatukusaŵecheta?

⁴ Aŵalanje Malaki 3:16. Ana akuganisya kuti ligongo chichi Yehofa akusalemba mu “buku jachikumbukumbu” mena ga ŵandu ŵele yakuŵecheta yawo yikusalosya kuti akusamjogopa jwalakwe soni akusaganichisya ya lina lyakwe? Yakuŵecheta yetu yikusalosya yayili mumtima mwetu. Yesu jwatite, “Pakamwa pa mundu pakusaŵecheta yayigumbele mumtima mwakwe.” (Mat. 12:34) Yatukusasagula kuŵecheta yikusalosya mwatukusamnonyelela Yehofa. Soni Yehofa akusasaka kuti ŵandu ŵakusamnonyela jwalakwe chasangalale ni umi m’chilambo chasambano mpaka kalakala.

5. (a) Ana kulambila kwetu kukusakamulana chamtuli ni yatukusaŵecheta? (b) Mpela mwatukuyiwonela pa chiwulilipo ana tukusosekwa kusamala ni chichi pakwamba yatukusaŵecheta?

⁵ Yatukusaŵecheta mpaka yitendekasye kuti Yehofa ajitichisye kulambila kwetu kapena iyayi. (Yak. 1:26) Ŵandu ŵangakusamnonyela Mlungu akusaŵecheta mwaukali, soni mwakunyada. (2 Tim. 3:1-5) Mwangakayichila, m’weji ngatukusasaka kuŵa mpela jemanjaji. Tukusasaka kumsangalasya Yehofa mu kaŵechete ketu. Nambo ana Yehofa mpaka asangalale naga tukusaŵecheta maloŵe gambone patuli pamisongano ja Chiklistu kapena mu utumiki, nambo patukuŵechetana ni ŵamwiŵasa mwetu ni kuŵechetaga mwaukali soni mwachipongwe?—1 Pet. 3:7.

6. Ana papali yakuyichisya yamtuli ligongo lya yakuŵecheta ya Kimberly?

⁶ Naga tukusakamulichisya masengo chenene mtuka wetu wakuŵecheta, ŵandu chachimanyilila kuti tuli ŵakutumichila ŵa Yehofa. Tukusitwakamuchisya ŵandu kulekanganya “pasikati pa ŵandu ŵakutumichila Mlungu  ni ŵangamtumichila.” (Mala. 3:18) Yeleyi ni yayamtendechele mlongo Kimberly. * Jwalakwe jwapochele masengo ga kusukulu gajwasosekwaga kugakamula ni mjakwe jwakusukulu. Ali amalisisye masengogo, mjakwejo jwayiweni kuti Kimberly jwaliji jwakulekangana ni ŵanache ŵa sukulu ŵane. Jwalakwe nganasalaga yakusakala yakwamba ŵandu ŵane, jwaŵechetaga chenene soni nganatukanaga. Yeleyi yamsangalesye mnope mjakweju mwamti pambesi pakwe jwajitichisye lijiganyo lya Baibulo. Yehofa akusasangalala pakuyiwona kuti yakuŵecheta yetu yikwatendekasya ŵane kusaka kulijiganya yakwamba jwalakwe.

7. Ana tukusasaka kuti tukamulichisyeje chamtuli mtuka waŵatupele Mlungu wakuŵecheta?

⁷ Wosopewe tukusasaka kuti tuŵecheteje m’litala lyampaka limchimbichisye Yehofa soni lyampaka litutendekasyeje kuti tuŵe ŵakamulana ni achimjetu. Myoyo kwende tulole matala gampaka gatukamuchisye kuti tupitilisye kuŵa “chisyasyo . . . mu yakuŵecheta” yetu.

8. Ana yaŵatiga Yesu pakuŵecheta mu utumiki yikusatujiganya chichi?

⁸ Tuŵecheteje mwakuwusimana mtima soni mwaulemu ŵane patulemwechesye. Yesu pajwaliji pachilambo chapasi, ŵandu ŵaŵechetaga kuti jwalakwe akusamwa mnope ukana, akusalya mnope, jwakamulaga masengo ga Satana, nganapikanilaga lilamusi lya kupumula soni kuti nganamchimbichisyaga Mlungu. (Mat. 11:19; 26:65; Luka 11:15; Yoh. 9:16) Nambope, Yesu nganawuchisya ni maloŵe ga ukali. Mwakulandana ni Yesu, m’wejisoni ngatukusosekwa kuwuchisya ni maloŵe gachipongwe naga ŵane atuŵechetele yachipongwe. (1 Pet. 2:21-23) Nambotu kutenda yeleyi kuli kwakusawusya. (Yak. 3:2) Ana chichi champaka chitukamuchisye?

9. Ana chichi champaka chitukamuchisye kuti tuwukamuleje mtima?

⁹ Tukapyaga mtima naga mundu jwine mu utumiki atuŵechetele mwangaŵajilwa. M’bale jwine lina lyakwe Sam jwatite, “Ngusatanda kuganichisya yakuti msyenenyumbaju akusosekwa kulijiganya yakwamba Mlungu soni kuti mpaka achenje.” Ndaŵi sine msyenenyumba akusakalipa naga tumsimene pandaŵi jakulemwecheka. Naga tukuŵechetana ni mundu jwatumbile, mpaka tutende yakusatenda mlongo jwine lina lyakwe Lucia. Mpaka tupopele chamumtima, kumŵenda Yehofa kuti atukamuchisye kuti tuwusimane mtima kuti tukaŵechetana mwangali ulemu.

10. Mwakamulana ni 1 Timoteo 4:13, ana tukusosekwa kola chakulinga chamtuli?

¹⁰ Tujiganyeje mwakamula mtima. Timoteo jwalalichilaga mwakamula mtima, nambope jwasosekwaga konjechesya luso lwa kajiganye. (Aŵalanje 1 Timoteo 4:13.) Ana mpaka tujiganyeje chamtuli mwakamula mtima mu utumiki? Tukusosekwa kosechela chenene. Chakusangalasya chili chakuti, tukwete yindu yejinji yakutukamuchisya kuti tujiganyeje chenene. Mpaka  apate yejinji yakwakamuchisya kutyochela mu kabuku kakuti Ajongolele pa Kaŵalanje Soni Kajiganye. Chinesoni champaka chakamuchisye jili mbali jakuti Kulipeleka mu Utumiki wa Mumgunda” kutyochela mu kabuku ka Utumiki ni Umi Wetu Wachiklistu. Ana akusakamulichisya masengo yindu yeleyi? Naga tukukosechela chenene tuchiŵechetaga mwangali woga soni mwangakayichila.

11. Ana Aklistu ŵane akusakombola chamtuli kuŵa ŵakwiganya chenene?

¹¹ Mpaka tuŵe ŵakwiganya ŵambone patukulola yakusati pakwiganya Aklistu achimjetu. Sam, jwatumsasile kwinaniku, akusaliwusya ligongo lyakwe Aklistu ŵane akusakombola kuŵa ŵakwiganya chenene. Jwalakwe akusalolechesya mwakusajiganyila jemanjaji kaneko akusajigalila chisyasyo chawo. Mlongo jwine lina lyakwe Talia akusapikanila yakusati pakuŵecheta ngani abale ŵasyoŵelele kuŵecheta ngani. Yeleyi yikusamkamuchisya kuti akambilaneje chenene ni mundu pangani syakusanonyela ŵandu kuwusya mu utumiki.

12. Ana ŵane akusalaga kutenda chichi?

¹² Wosopewe mpaka tukamuchisye nawo kuti misongano jiŵeje jakulimbikasya mwakwimba nawo nyimbo soni patukupeleka ndemanga syetu syekosechele chenene. (Sal. 22:22) Ŵane akusatenda woga kwimba nyimbo soni kupeleka ndemanga pali kumisongano. Ana wawojo akusayiwona kuŵa yakusawusya kutenda yeleyi? Naga yili myoyo, mpaka asangalale kumanyilila yayakamuchisye ŵane kuti akombole kumalana ni woga welewu.

13. Ana chichi champaka chitukamuchisye kuti tujimbeje ni mtima wosope patuli pamisongano?

¹³ Tujimbeje ni mtima wosope. Patukwimba nyimbo sya Uchimwene, chakulinga chetu chekulungwa chikusaŵa kumchimbichisya Yehofa. Mlongo jwine lina lyakwe Sara, akusaliwona kuti jwangakombolaga kwimba. Nambope, jwalakwe akusasaka kumchimbichisya Yehofa mwa kwimba nyimbo. Myoyo, jwalakwe pakukosechela misongano akusakosechelasoni nyimbo. Nambosoni akusalola yasikuti pakamulana nyimbosyo ni ngani syachakalijiganye. Jwalakwe jwatite, “Yeleyi yikusangamuchisya kuti nganichisyeje mnope maloŵe ga mu nyimbomo mmalo mwaganichisya ya kajimbe kangu.”

14. Naga tuli ŵa woga ana chichi champaka chitukamuchisye kuti tupelecheje ndemanga patuli pamisongano?

¹⁴ Tupelecheje ndemanga ndaŵi syosope. Kusala yisyene yeleyi mpaka yiŵe yakusawusya kwa ŵane. Talia jwatumkolasile jula jwasasile kuti, “Ngusatenda woga mnope panguŵecheta pagulu ja ŵandu atamose kuti maloŵe gangu gangalosya yeleyo. Myoyo yikusaŵa yakusawusya kuti mbelecheje ndemanga.” Nambope yeleyi yangamlepelekasya mlongoju kuti apelecheje ndemanga. Jwalakwe pakukosechela misongano, akusakumbuchila kuti ndemanga jandanda kupelechedwa pa chiwusyo jikusasosekwa kuŵa  jakata soni jachindunji. Jwalakwe jwatite, “Yeleyi yikusangamuchisya kumanyilila kuti kupeleka ndemanga jakata, jangasawusya soni jachindunji kuli kwakwanila ligongo ni yakusasaka jwakutendesya lijiganyolyo.”

15. Ana tukusosekwa kumbuchila chichi patukupeleka ndemanga?

¹⁵ Nombe nawo Aklistu ŵanganakola mnope woga kapena sooni ndaŵi sine mpaka yasawusyeje kupeleka ndemanga pa misongano. Ligongo chichi mpaka yasawusyeje? Mlongo jwine lina lyakwe Juliet jwasasile kuti, “Ndaŵi sine ngusalepela kupeleka ndemanga ligongo ngusajogopa kuti mwine ndemanga jangu ngajiŵa jambone soni chijiŵe jejipi.” Tukumbuchileje kuti Yehofa akusasaka kuti tupelecheje ndemanga syambone syampaka tukombole. * Jwalakwe akusayamichila mnope patukulingalinga kupeleka ndemanga pamisongano atamose kuti ndaŵi sine tukusatenda woga.

16. Ana tukusosekwa kuŵambala kuŵecheta maloŵe gamtuli?

¹⁶ Tuŵambaleje kuŵecheta “maloŵe gachipongwe.” (Aef. 4:31) Mpela mwatuŵechetele kundanda kula, Aklistu akusasosekwa kuŵambala maloŵe gakutukana. Nambope panasoni maloŵe gane gatukusasosekwa kugaŵambala. Mwachisyasyo, tukusasosekwa kusamala mnope kuti tukakamulichisyaga masengo maloŵe gachipongwe patukuŵecheta yakwamba ŵandu ŵakutyochela m’yilambo yine, ŵa ndamo jine, kapena ŵamitundu jine. Konjechesya pelepa, tukusosekwasoni kuŵambala maloŵe gakunyosya. M’bale jwine jwasasile kuti, “Ndaŵi sine, ngusaŵecheta yindu yangusayiwona kuti yigambile kuŵa yang’anda soni yakwelegula, nambo yili mkuti yikwakuŵasya ŵane. Kwa yaka yejinji ŵamkwangu aŵele ali mkungamuchisya kuti ŵambaleje kuŵecheta maloŵe gampaka gapweteche ŵane.”

17. Mwakamulana ni Aefeso 4:29, ana mpaka twalimbikasye chamtuli ŵane?

¹⁷ Tuŵecheteje yindu yampaka yalimbikasye ŵane. Tukusosekwa twayamichileje ŵane mmalo mwakwajimba magambo kapena kudandawula. (Aŵalanje Aefeso 4:29.) Aisalaeli ŵakwete yindu yejinji yaŵasosekwaga kuyamichila, nambo jemanjajo ŵagambaga kudandawula. Naga tukusagamba kudandawula ni yiliyose yikusiyatendekasya ŵane kuti nombe nawo adandawuleje. Mpaka akumbuchile kuti maloŵe gangalimbikasya gaŵasasile ŵakusonda 10 gatendekasisye ‘Aisalaeli. . . kudandawula mwakusisyana ni Mose.’ (Num. 13:31–14:4) Nambo naga tukwayamichila ŵane mpaka yakamuchisye kuti aŵeje ŵakusangalala. Achimjakwe ŵa mwanache jwamkongwe jwa Yefita ŵayikaga kukumlola jwalakwe, mwamti ŵamyamichilaga soni kumlimbikasya. Ngatukukayichila kuti yeleyi yamkamuchisye jwalakwe kuti akombole kupitilisya utumiki  wakwe. (Ŵak. 11:40) Mlongo Sara, jwatumkolasile jula jwatite, “Patukwayamichila ŵane, tukusitwakamuchisya kuti nombe nawo alipikaneje kuti Yehofa akusiŵanonyela soni kuti ali ŵakusosekwa mnope mu gulu jakweji.” Myoyo kwende tusosesoseje mapesa gakwayamichila ŵane kutyochela pasi pamtima.

18. Mwakamulana ni Salimo 15:1, 2, ligongo chichi tukusasosekwa kuŵecheta yakuwona? Ana yeleyi yikusapwatikapo chichi?

¹⁸ Tuŵecheteje yakuwona. Nganituŵa tumsangalasye Yehofa naga tukusalepela kuŵecheta yakuwona. Jwalakwe akusaŵengana ni unami wa mtundu wuliwose. (Mis. 6:16, 17) Atamose kuti masiku agano ŵajinji akusakuwona kulambusya kuti nganikuŵa kulemwa, nambope m’weji tukusajiwona ndamoji mpela mwakusajiwonela Yehofa. (Aŵalanje Salimo 15:1, 2.) Ndaŵi sine mundu mpaka asale yindu mwangalambusya, nambo ndaŵi jijojo ni kusisaga yindu yine ni chakulinga chakuti ŵandu aganisyeje mwakulemwecheka.

19. Ana ni chindu chine chapi chatukusasosekwa kusamala nacho?

¹⁹ Tuŵambaleje kuŵecheta miseche. (Mis. 25:23; 2 Ates. 3:11) Mlongo Juliet, jwatumkolasile jula, jwasasile kuti ngani sya miseche syamkwayiye mnope. Jwalakwe jwatite, “Naga ŵane akukuŵecheta miseche yikusaŵa yangalimbikasya. Soni yikusandendekasya kuti ngamkulupililaga mundu jwambecheteje misechejo. Kupwatika pelepa, ana mpaka manyilile chamtuli kuti mundujo ngajawula kukuŵechetasoni misechejo ni mundu jwine?” Naga ayiweni kuti mundu jwine jutandite ya miseche, wawojo akusosekwa kujichenga nganijo ni kuŵechetaga yindu yine yakulimbikasya.—Akolo. 4:6.

20. Ana wawojo asimichisye kutenda chichi ni mtuka wakuŵecheta?

²⁰ Ligongo lyakuti tukutama m’chilambo chele kuŵecheta yakusakala kuli kwakuwanda mnope, tukusosekwa kulingalinga kuti tuŵecheteje yindu yakumsangalasya Yehofa. Tukumbuchileje kuti kuŵecheta uli mtuka wakutyochela kwa Yehofa, myoyo yikusamkwaya mwatukusakamulichisya masengo mtukawu. Jwalakwe chachitupa upile patukulingalinga kamulichisya masengo chenene mtuka wakuŵecheta patuli mu utumiki, patuli pa misongano soni patukutenda yindu ya lisiku lililyose. Yehofa pachachijonanga chilambo chakusakalachi, yichiŵa yangasawusya kamulichisya masengo mtuka wakuŵecheta pakumchimbichisya jwalakwejo. (Yuda 15) Nambo apano, kwende tuŵe ŵakusimichisya kumsangalasya Yehofa ni “maloŵe” getu.—Sal. 19:14.