Ngani Jakulijiganya 1
“Ŵandu Ŵakusamsosa Yehofa Ngasasoŵa Chilichose Chambone”
“Ŵandu ŵakusamsosa Yehofa ngasasoŵa chilichose chambone.”—SAL. 34:10, NWT.
NYIMBO NA. 4 “Yehofa Ali Mkuchinga Jwangu”
YACHITULIJIGANYE *
Daudi jwayiwonaga kuti ‘ngachikumsoŵa chilichose chambone’ atamose kuti jwasimanaga ni yakusawusya (Alole ndime 1-3) *
1. Ana Daudi jwasimene ni chakusawusya chamtuli?
DAUDI jwatilaga kuti akulupusye umi wakwe. Yaliji myoyo ligongo lyakuti Sauli juŵaliji mwenye jwa Aisalaeli jwasakaga kumwulaga jwalakwe. Daudi pajamkwete sala, jwajimi mumsinda wa Nobu kujwaŵendile mwakulinandiya mitanda msano ja mikate. (1 Sam. 21:1, 3) Kaneko, jwalakwe pampepe ni achalume ŵaŵaliji najo ŵajuŵile kumbanga. (1 Sam. 22:1) Ana chichi chichatendekasisye kuti Daudi asimane ni yeleyi?
2. Ana Sauli jwaŵisile chamtuli umi wakwe pangosi? (1 Samueli 23:16, 17)
2 Sauli ŵamtendelaga jelasi Daudi ligongo lyakuti jwaliji jwakumanyika soni jwapundile ngondo syejinji. Sauli jwamanyililesoni kuti Yehofa amkanile jwalakwe ligongo lya ungapikanila wakwe. Jwamanyililesoni kuti Yehofa amsagwile Daudi kuti aŵe mwenye. (Aŵalanje 1 Samueli 23:16, 17.) Ligongo lyakuti Sauli jwaliji mwenye jwakwete asilikali soni ŵandu ŵajinji ŵaŵamkuyaga. Yeleyi yamtendekasisye Daudi kutila kuti akawulajidwa. Ana Sauli jwaganisyaga kuti mpaka alepelekasye chakulinga chaŵakwete Mlungu pa Daudi? (Yes. 55:11) Baibulo jangasala yeleyi, nambo chatukumanyilila ni chakuti, Sauli jwaŵikaga umi wakwe pangosi. Ndaŵi syosope ŵandu ŵakusalimbana ni Mlungu ŵangapunda.
3. Ana Daudi jwapikanaga wuli mumtima atamose kuti jwasimanaga ni yakusawusya?
3 Daudi jwaliji mundu jwakulinandiya. Jwalakwe nganasagula kuti aŵe mwenye jwa Isalaeli. Yehofa ni juŵampele udindowu. (1 Sam. 16:1, 12, 13) Sauli jwatandite kumŵenga mnope Daudi. Nambo Daudi nganamjimba magambo Yehofa ligongo lya yakusawusya yaŵasimanaga nayo. Nganadandawulagasoni ligongo lyakola yakulya yamnono soni kutama mumbanga. Mmalo mwakwe, yikuwoneka kuti jwalakwe jwalembile nyimbo jakusangalasya ali mkutama mumbangamu. Nyimboji jakwetesoni maloŵe gagali mulilemba lyakulongolela nganiji gakuti, “Ŵandu ŵakusamsosa Yehofa ngasasoŵa chilichose chambone.”—Sal. 34:10, NWT.
4. Ana chitukambilane yiwusyo yapi? Ligongo chichi yiwusyoyi yili yakusosekwa?
4 Masiku agano, ŵakutumichila ŵa Yehofa akusalaga ligongo lya kusoŵa kwa yakulya soni yindu yine yakusosekwa paumi. * Yeleyi ni yasimene nayo ŵakutumichila ŵajinji ŵa Yehofa mundaŵi ja Covid-19. Nambosoni ligongo lyakuti kusogoloku kwana “yisawusyo yakogoya mnope,” tukwembecheya kusimana ni yakusawusya yejinji. (Mat. 24:21) Patukuganichisya yeleyi, kwende tupate kwanga kwa yiwusyo mcheche yakuyichisyayi. Ana Daudi ‘nganasoŵa chilichose chambone’ m’litala lyapi? Ligongo chichi tukusosekwa kulijiganya kuŵa ŵakwikutila ni yindu yatukwete? Ligongo chichi tukusosekwa kuŵa ŵakusimichisya kuti Yehofa chachitusamalila? Soni ana mpaka tukosechele chamtuli yamsogolo?
NGASASOŴA KANDU
5-6. Ana lilemba lya Salimo 23:1-6 likutukamuchisya chamtuli kupikanichisya maloŵe ga Daudi gakuti ŵakutumichila ŵa Mlungu “ngasasoŵa chilichose chambone”?
5 Ana Daudi jwagopolelaga chichi pajwaŵechete kuti ŵakutumichila ŵa Yehofa “ngasasoŵa chilichose chambone”? Mpaka tupate kwanga kwakwe patukuganichisya maloŵe gakulandana ni gelega gagakusasimanikwa mu Salimo chaputala 23. (Aŵalanje Salimo 23:1-6.) Muchaputalachi, Daudi jwatandite ni maloŵe gakuti, “AMBUJE ali mkuchinga jwangu; ngasisoŵa kandu.” M’chaputala chosopechi, Daudi akusala yindu yakusosekwa mnope yaŵampele Yehofa ligongo lyakuti ŵamjitichisye jwalakwe kuŵa mkuchinga jwakwe. Yehofa ŵamlongolele jwalakwe “m’matala gagoloka” soni Yehofa ŵamkamuchisye Daudi mundaŵi jambone soni jakusawusya. Daudi jwamanyililaga kuti chachisimana ni yakusawusya atamose kuti Yehofa jwangonekaga pa “manyasi gamaŵisi.” Komboleka kuti ndaŵi sine jwalakwe jwalagasikaga nganisyo mpela kuti akwenda “m’chiŵata cha chipi.” Jwalakwe jwakwetesoni achimmagongo. Nambo ligongo lyakuŵa ni Yehofa mpela mkuchinga jwakwe, Daudi ‘nganajogopa chakusakala chilichose.’
6 Sambano tupatile kwanga kwa chiwusyo chila chakuti, Ana Daudi ‘nganasoŵa chilichose chambone’ m’litala lyapi? Jwalakwe jwakwete chilichose chachikamkamuchisye kuŵa paunasi wambone ni Yehofa. Ngaŵa kuti Daudi jwasangalalaga ligongo lya yindu yakuchilu. Nambo jwalakwe jwajikutilaga ni yindu yaŵampaga Yehofa. Daudi jwayamichilaga mnope ligongo lyakuti Yehofa ŵamchenjelaga soni kumsamalila.
7. Mwakamulana ni Luka 21:20-24, ana Aklistu ŵa ku Yudeya ŵasimene ni yakusawusya yamtuli?
7 Maloŵe ga Daudiga gakutukamuchisya kumanyilila kuti ngatukusosekwa kuyiwona yindu yakuchilu kuŵa yakusosekwa mnope paumi wetu. Mpaka tusangalaleje ni yindu yakuchilu yatukwete, nambo ngatukusosekwa kuyiwonaga yinduyi kuŵa yakusosekwa mnope paumi wetu. Yeleyi ni yaŵatesile Aklistu ŵa m’yaka 100 yandanda ŵa ku Yudeya. (Aŵalanje Luka 21:20-24.) Yesu ŵakalamwisye jemanjaji kuti tijichiyika ndaŵi jele msinda wa Yelusalemu ‘tiwuchisyungulilidwa ni amagongo.’ Yeleyi payatendekwe, jemanjaji ŵasosekwaga kuti “atilile ku matumbi.” Kuti jemanjaji akulupuche ŵasosekwaga kutila soni kuleka yindu yejinji yaŵakwete. Yaka yamunyumamu, Sanja ja Mlonda jasasile kuti, “Jemanjaji ŵalesile migunda jawo soni nyumba, atamose katundu jwawo ŵamlesilesoni. Ŵakwete chikulupi chakuti Yehofa chiŵasamalile soni kwachenjela. Mwamti ŵaŵisile kumtumichila Yehofa pamalo gandanda kupunda chilichose.”
8. Ana tukulijiganya chindu chakusosekwa mnope chapi pa yindu yaŵasimene nayo Aklistu ŵa ku Yudeya?
8 Ana tukulijiganya chindu chakusosekwa mnope chapi pa yindu yaŵasimene nayo Aklistu ŵa m’yaka 100 yandanda ŵaŵatamaga ku Yudeya? Sanja ja Mlonda jatujikolasile jila jasasilesoni kuti, “Komboleka kuti kusogoloku tuchisimana ni yindu yampaka yitulinje pakwamba mwatukusayiwonela yindu yakuchilu. Ana tuchiyiwona yindu yakuchilu kuŵa yakusosekwa mnope, kapena tuchichiwona chikulupusyo chakutyochela kwa Mlungu kuŵa chakusosekwa mnope? Yisyene kuti kutila kwetu mpaka kuyikasye yakusawusya yine soni kulaga. Tuchisosekwa kuŵa ŵakoseka kutenda chilichose mpela muŵatendele Aklistu ŵa m’yaka 100 yandanda ŵaŵatisile ku Yudeya.” *
9. Ana malangiso ga Paulo gakwawula kwa Ayuda gakwalimbikasya chamtuli wawojo?
9 Ana mpaka alinje ganichisya muyaŵelele yakusawusya kwa Aklistuŵa kuti aleche chilichose chaŵakwete ni kuwutanda ulendo? Jemanjaji ŵasosekwaga kola chikulupi chakulimba kuti akombole kumdalila Yehofa kuti chiŵasamalile. Nambo papali chindu chine chachikakamuchisye. Kuli kusigele yaka msano kuti Aloma awusyungulile msinda wa Yelusalemu, ndumetume Paulo jwasalile Ahebeliŵa malangiso gakamuchisya mnope. Jwalakwe jwasalile kuti, “Mtima wenu ukaŵaga pa mbiya, nipo yele yimkweteyo, mjikutile nayo. Pakuti Mlungu ŵatite, ‘Ngasinamleka kapena kumjasa kose.’ Kwende sambano tulimbe mtima ni kuŵecheta kuti, ‘Ambuje ni ŵakungamuchisya ŵangu, ngasindenda woga. Ana mundu mpaka andendele une chichi?’” (Ahe. 13:5, 6) Mwangakayichila ŵandu ŵaŵapikanile malangiso ga Pauloga Aloma mkanaŵe kuwusyungulila msindawu, yakamuchisye kuti akalaga kusyoŵelela ndamo jasambano ja kumalo kuŵatilile. Jemanjaji nganakayichilaga yakuti Yehofa chachasamalila soni kwapa yakusosechela yawo ya paumi. Maloŵe ga Pauloga gakutukamuchisya kola chikulupi mpela chelechi.
“YELEYI YITUKWANILE”
10. Ana Paulo jwasasile chindu chapi chakusosekwa mnope?
10 Paulo jwapelechesoni malangiso gakulandana ni gelega kwa Timoteo. Malangisoga m’wejisoni mpaka gatukamuchisye. Jwalakwe jwatite, “Naga tukwete yakulya ni yakuwala yeleyi yitukwanile.” (1 Tim. 6:8) Ana yeleyi yikugopolela kuti ngatukusosekwa kulyaga yakulya yambone, kola nyumba jambone jakutama, kapena kusumaga yakuwala yambone ndaŵi syosope? Paulo nganagopolelaga yeleyo. Jwalakwe jwasasile kuti tukusosekwa kuŵa ŵakwikutila ni yindu yatukwete. (Afi. 4:12) Yeleyi ni yayamkamuchisye Paulo. Chindu chakusosekwa mnope paumi wetu chili kuŵa paunasi wambone ni Mlungu, ngaŵaga yindu yakuchilu yatukusakola.—Hab. 3:17, 18.
Aisalaeli ‘nganasoŵa chilichose’ m’yaka 40 yaŵaliji m’chipululu. Ana mpaka tuŵe ŵakwikutila ni yindu yatukwete apano? (Alole ndime 11) *
11. Ana maloŵe ga Mose gakwawula kwa Aisalaeli gakutujiganya chichi pangani ja kuŵa ŵakwikutila?
11 Yindu yatukusayiwona kuti tukusosechela paumi wetu mpaka yilekangane ni yakuyiwona Yehofa kuti tukusosechela. Aganichisye yaŵasalile Mose Aisalaeli panyuma pakutama m’chipululu yaka 40. Jwalakwe jwatite, “AMBUJE Mlungu jwenu ŵampele upile pamasengo genu gosope gimwatesile. Ŵaliji mkusamalila jemanja pa ulendo wenu wosope umjesile m’chipululu mwamukulungwamu, kwa yaka 40. Soni ŵampela yindu yosope yimwayisakaga.” (Det. 2:7) Kwa yaka 40 yosopeyi, Yehofa ŵapaga Aisalaeli mana kuti alyeje. Yehofa jwalolechesye kuti yakuwala yawo yaŵatyochele nayo ku Iguputo yikamala. (Det. 8:3, 4) Atamose kuti ŵane ŵayiwonaga yinduyi kuŵa yangakwanila, nambope Mose jwakumbwisye Aisalaeliŵa kuti ŵakwete chilichose chiŵasosechelaga. Yehofa chachiŵa jwakusangalala naga tukuŵa ŵakwikutila ni yindu yatukwete. Chachiŵa jwakusangalalasoni naga tukusayamichila atamose yindu yamnono yakusatutendela jwalakwe soni kuyiwonaga yindu yatupele jwalakwe kuŵa yambone mnope.
AKAKAYICHILAGA YAKUTI YEHOFA CHACHASAMALILA
12. Ana chichi chachikulosya kuti Daudi ŵamdalilaga mnope Yehofa?
12 Daudi jwamanyililaga kuti Yehofa ali jwakulupichika soni akusiŵasamalilaga mnope ŵandu ŵakusamnonyela. Atamose kuti umi wakwe waliji pangosi pajwalembaga Salimo 34, jwalakwe jwamkulupililaga mnope Yehofa mwamti munganisyo mwakwe ŵagawonaga “Malayika ga AMBUJE” gali gamsyungulile. (Sal. 34:7) Komboleka kuti Daudi jwalandanyaga malayika ga Yehofago ni asilikali ŵakusaŵa ŵakoseka kulimbana ni achimmagongo ŵawo. Atamose kuti Daudi jwamanyililaga kuputa ngondo, soni Yehofa ŵamsalile kuti chachiŵa mwenye, jwalakwe nganadalilaga lunda lwajwakwete lwakuponya maganga kapena kuponya mipamba pakulimbana ni achimmagongo ŵakwe. (1 Sam. 16:13; 24:12) Daudi jwamdalilaga mnope Mlungu, soni jwakwete chikulupi chakuti malayika ga Yehofa ‘gakusiŵachenjela ŵandu ŵakusamjogopa Mlungu.’ Yisyene kuti masiku agano ngatukusajembecheyaga kuti Yehofa chatuchenjeleje mwakusimonjesya. Nambo tukusamanyilila kuti ŵandu ŵakusamdalila mnope Yehofa chachipochela umi wangamala atamose apano ali awile.
Pa ndaŵi ja yisawusyo yekulungwa, Gogi jwa chilambo cha Magogi chachitujimuchila. Nambo mpaka tuŵe ŵakusimichisya kuti Yesu soni malayika gakwe chachiyiwona yachachitendagayi soni chachitukulupusya (Alole ngani jakulijiganya jandanda, ndime 13)
13. Ligongo chichi tuchiwoneka mpela pangali ŵakutuchenjela pachachitujimuchila Gogi jwa chilambo cha Magogi? Ligongo chichi tuchisosekwa ngajogopa? (Alole chiwulili chapachikuto.)
13 Pachangakaŵapa, chikulupi chetu pangani ja kumdalila Yehofa chichilinjidwa. Gogi jwa chilambo cha Magogi wawuli mkamulano wa yilambo pachachajimuchila ŵakutumichila ŵa Mlungu, umi wetu uchiwoneka kuti uli pangosi. Tuchisosekwa kola chikulupi chakuti Yehofa chatukulupusye. Kwa jemanjaji, tuchiŵa mpela ngondolo syangali jwakusichenjela. (Esek. 38:10-12) Ngasitukola yida yangondo soni tuchiŵa kuti ngatukusamanyilila kuputa ngondo. Maboma ga ŵandu gachiyiwona kuti yili yangasawusya kutugomeka. Jemanjaji ngasamanyilila kuti malayika ga Yehofa gali gakoseka kutuchenjela, nambo m’weji tuchimanyilila yeleyi ligongo lya chikulupi. Mwamti chachisimonga mnope pachachiyiwona kuti malayikaga gakutuputila ngondo.—Chiw. 19:11, 14, 15.
AJINO JILI NDAŴI JAMBONE KOSECHELA YAMSOGOLO
14. Ana tukusosekwa kutenda chichi apano kuti tukosechele yamsogolo?
14 Ana apano tukusosekwa kutenda chichi kuti tukosechele yamsogolo? Chandanda, tukusosekwa kuyiwonaga mwakuŵajilwa yindu yakuchilu, ligongo lisiku line tuchisosekwa kuyileka yindu yeleyi. Tukusosekwasoni kuŵa ŵakwikutila ni yindu yatukwete soni kusangalalaga ligongo lyakuŵa paunasi wambone ni Yehofa. Myoyo patukummanyilila chenene Mlungu jwetu, ni patukusaŵa ŵakusimichisya mnope kuti chachituchenjela pachachitujimuchila Gogi jwa chilambo cha Magogi.
15. Ana ni yakutendekwa yapi yayamkamuchisye Daudi kumanyilila kuti Yehofa ngasamleka?
15 Kuganichisya yayamkamuchisye Daudi mpaka kutukamuchisyesoni m’weji kosechela yakusawusya. Daudi jwatite, “Mlinje ni timlole kuti Mlungu ali jwambone; jwana upile mundu jwakutilila kwa AMBUJE.” (Sal. 34:8) Maloŵega gakulosya ligongo lyakwe Daudi jwasosekwe kumdalila Yehofa. Ndaŵi syosope Daudi ŵamdalilaga Yehofa, soni Mlungu ŵamkamuchisyaga. Pajwaliji mnyamata, Daudi ali asimene ni Goliyati jwamsalile kuti, “Lelo jinojino AMBUJE tachimpeleka mmwejo m’miyala mwangu.” (1 Sam. 17:46) Kaneko Daudi jwatandite kumtumichila Mwenye Sauli juŵalingagalingaga kuti amwulaje jwalakwe kwa maulendo gejinji. Nambo “AMBUJE ŵaliji ni Daudi.” (1 Sam. 18:12) Ligongo lyakuti Yehofa ŵamkamuchisye Daudi munyumamo, jwalakwe jwakwete chikulupi chakuti chamkamuchisyesoni pa yakusawusya yaŵasimanaga nayo.
16. Ana ni yakutendekwa yapi yampaka yitukamuchisye kumanyilila umbone wa Yehofa?
16 Naga tukumdalila mnope Yehofa apano, tuchikombolasoni kumdalila mnope kusogoloku kuti chachitukulupusya. Tukusasosekwa kola chikulupi soni kumdalila mnope Yehofa kuti tukombole kwaŵenda abwana ŵetu ndaŵi jakuja kutenda msongano. Tukusasosekwasoni chikulupi kuti tuchenje ndaŵi jakamulila masengo kuti tutende misongano josope ja mpingo soni kuti tukole ndaŵi jejinji jakulalichila. Ndaŵi sine mpaka yisimanikwe kuti abwana ŵetu akanile yatuŵendileyo soni atutyosisye masengo. Ana tuchikola chikulupi chakuti Yehofa ngasatuleka soni kuti ndaŵi syosope chachitupa yakusosechela yetu? (Ahe. 13:5) Ŵandu ŵajinji ŵakusatenda utumiki wandaŵi syosope mpaka asale yakusimana nayo yakulosya kuti Yehofa ŵakamuchisye pandaŵi jaŵasosechelaga kwakamuchisya. Yehofa ali jwakulupichika.
17. Ana lilemba lya chaka cha 2022 lili lyapi? Ligongo chichi lilembali lili lyakuŵajilwa?
17 Ligongo lyakuti Yehofa ali kumbali jetu, ngatukusosekwa kogopa yamsogolo. Mlungu jwetu ngasatuleka naga tukusaŵika yindu ya Uchimwene pamalo gandanda paumi wetu. Likuga Lyakulongolela lisagwile lilemba lya Salimo 34:10 kuŵa lilemba lyetu lya chaka cha 2022. Lilembali likusati, “Ŵandu ŵakusamsosa Yehofa ngasasoŵa chilichose chambone.” Atesile yeleyi pakusaka kutukosechelekasya yindu yakusawusya yayikwika kusogoloku, soni kuti tukole chikulupi chakuti Yehofa ngasatuleka.
NYIMBO NA. 38 Mlungu Chachalimbisya
^ Lilemba lyetu lya chaka cha 2022 lityochele pa Salimo 34:10, NWT. Lilembali likusati “Ŵandu ŵakusamsosa Yehofa ngasasoŵa chilichose chambone.” Ŵajinji mwa ŵakutumichila ŵa Yehofa ŵakulupichika ali ŵakulaga. Sano ligongo chichi mpaka tujile kuti jemanjaji ‘changasoŵa chilichose chambone’? Ana kupikanichisya ngopolelo ja lilembali mpaka kutukamuchisye chamtuli kukosechela yakusawusya yayikwika kusogoloku?
^ Alole “Yiwusyo Yakutyochela kwa Ŵakuŵalanga” mu Sanja ja Mlonda ja Chichewa ja Sepetemba 15, 2014.
^ Alole Sanja ja Mlonda ja Chichewa ja Meyi 1, 1999, p. 19.
