NGANI JAKULIJIGANYA 4
Ligongo Chichi Tukusasimanikwa pa Chikumbuchilo?
“Mtendeje yeleyi kuti mungumbuchileje.”—LUK. 22:19.
NYIMBO NA. 20 Ŵatupele Mwanagwawo Jumopejo!
YACHITULIJIGANYE *
1-2. (a) Ana ni ndaŵi japi jatukusaganichisya mnope ya mundu jwatukusamnonyela juŵajasiche? (b) Ana Yesu jwatandikasisye mwambo wapi pa chilo chakuti malaŵi gakwe chawulajidwe?
ATAMOSE yili mkuti ŵandu ŵatukusitwanonyela ŵawile kalakala, nambo tukusitwakumbuchilagape. Paliyiche lisiku lyaŵajasiche jemanjaji ni patukusitwaganichisyaga mnope.
2 Chaka chilichose, tukusaŵa pampepe ni ŵandu mamiliyoni gejinji pachilambo chosope pa mwambo wakumbuchila chiwa cha mundu jwatukusamnonyela mnope, Yesu Klistu. (1 Pet. 1:8) Tukusasongana kuti tukumbuchile chiwa cha mundu juŵapeleche umi wakwe pakusaka kutuwombola ku ulemwa ni chiwa. (Mat. 20:28) Sonitu Yesu akusasaka kuti ŵakumkuya ŵakwe akumbuchileje chiwa chakwe. Pa chilo chakuti malaŵi gakwe chawulajidwe, Yesu jwatandikasisye mwambo wakusosekwa mnope wa chakulya cha ligulo. Mwamti jwalakwe jwalamwile kuti, “Mtendeje yeleyi kuti mungumbuchileje.”—Luk. 22:19.
3. Ana chitukambilane chichi munganiji?
3 Ŵandu ŵane ŵakuŵalanjikape ŵakusasimanikwa nawo pa Chikumbuchilo cha chiwa cha Klistu ni ŵakwete chembecheyo chakwawula kwinani. Nambo ŵandu ŵanesoni ŵajinji ŵakwete chembecheyo chakutama pachilambo chapasi akusasimanikwa nawosoni pa Chikumbuchilochi. Munganiji, chitukambilane ligongo lyakwe magulu gosopega gakusaŵa gakusachilila kusimanikwa nawo pa Chikumbuchilo chaka chilichose. Chitukambilanesoni umbone watukusapata ligongo lyakusimanikwa pa mwambowu. Kwende tutande kambilana magongo gagakusigatendekasya ŵasagulwe kusimanikwa pa mwambowu.
LIGONGO CHICHI ŴASAGULWE AKUSASIMANIKWA PA CHIKUMBUCHILO?
4. Ligongo chichi ŵasagulwe akusalya mkate soni kumwa finyo pa Chikumbuchilo?
4 Chaka chilichose, ŵasagulwe akusalya mkate soni kumwa finyo pa chikumbuchilo. Ligongo chichi jemanjaji akusalya mkate soni kumwa finyo? Kuti tujanje chiwusyochi, kwende tuganichisye yayatendekwe pa chilo chakumalisya cha umi wa Yesu pachilambo chapasi. Pasaka juli jumasile, Yesu jwatandikasisye mwambo wawukusakolanjidwa kuti Chakulya Chaligulo cha Ambuje. Pa mwambowu, jwalakwe jwapele mkate ni finyo ŵandumetume ŵakwe 11 ŵakulupichika. Ni ŵasalile kuti alye soni kumwa. Kaneko, Yesu jwasalile ŵandumetume ŵakwewo yakwamba yilanga yiŵili, chilanga chasambano soni chilanga cha Uchimwene. * (Luk. 22:19, 20, 28-30) Yilanga yeleyi yapeleche upile kwa ŵandumetumewo soni ŵandu ŵane ŵakuŵalanjika kuti chaŵe achayimwene soni ŵambopesi kwinani. (Chiw. 5:10; 14:1) Myoyo, ŵasagulwe ŵakusigala, * pachilambo chapasipa soni ŵali mu yilanga yeleyi ni ŵakusalya mkate soni kumwa finyo pa Chikumbuchilo.
5. Ana ŵasagulwe akusamanyilila yamtuli pakwamba ya chembecheyo chawo chakwawula kwinani?
5 Panasoni ligongo line lyalikusatendekasya ŵasagulwe kusimanikwa pa Chikumbuchilo. Kusimanikwa kwawoku kukusapa upile waganichisya ya chembecheyo chawo. Yehofa ŵapele jemanjaji chembecheyo chakusangalasya mnope chakuja kutama kwinani ni umi wangajonasika. Nambosoni kuti akatumichileje ni Yesu Klistu pampepe ni wosope ŵa 144,000. Nambosoni chakusangalasya mnope chili chakuti chachitumichilaga pameso pa Yehofa Mlungu. (1 Akoli. 15:51-53; 1 Yoh. 3:2) Ŵasagulweŵa akusamanyilila kuti aŵilanjidwe kuti akasangalale ni upile welewu kwinani. Nambo kuti jemanjaji chakombole kwawula kwinani, akusosekwa kuŵa ŵakulupichika mpaka chiwa chawo. (2 Tim. 4:7, 8) Ŵasagulwe akusaŵa ŵakusangalala mnope pakuganichisya ya chembecheyo chakwawula kwinani. (Tit. 2:13) Nambi wuli pakwamba ya ‘ŵangondolo sine’? (Yoh. 10:16) Ana ligongo chichi jemanjaji akusasimanikwa pa Chikumbuchilo?
LIGONGO CHICHI ŴANGONDOLO SINE AKUSASIMANIKWA PA CHIKUMBUCHILO?
6. Ligongo chichi ŵangondolo sine akusasimanikwa pa Chikumbuchilo chaka chilichose?
6 Ŵangondolo sine ngakusalya mkate kapena kumwa finyo pa Chikumbuchilo, nambo akusagamba kulolela. Ŵandu ŵakwete chembecheyo chakutama pachilambo chapasi ŵatandite kusimanikwa pa Chikumbuchilo mu 1938. Sanja ja Mlonda ja Malichi 1, 1938, jatite, “Mpaka yiŵe chenene kuti nombe [ŵangondolo sine] asimanikweje pa mwambowu soni kulolela yayikusatendekwapo. . . . Jikusaŵa ndaŵi jakuti nombe nawo asangalale.” Mpela mwayikusaŵela kuti achalendo ŵaŵilanjidwe pa ukwati akusasangalala, nombe ŵangondolo sine akusasangalala kusimanikwa pa Chikumbuchilo mpela ŵakulolela.
7. Ligongo chichi ŵangondolo sine akusajembecheya kupikanila ngani ja Chikumbuchilo?
7 Pandaŵiji nombe ŵangondolo sine akusaganichisya ya chembecheyo chawo. Jemanjaji akusajembecheya kupikanila ngani ja Chikumbuchilo ligongo jikusasala yachachitenda Klistu ni ŵa 144,000 kwa ŵandu ŵakulupichika mu Ulamusi wa Yaka 1000. Mu ulamusi wa Yesu Klistu, ŵa 144,000 chachikamuchisya kuchichenga chilambochi kuti chiŵe paladaiso soni kwakamuchisya ŵandu kuti aŵe ŵamlama. Kusala yisyene ŵandu mamiliyoni gejinji ŵakusasimanikwa pa Chikumbuchilo akusasangalala mnope. Jemanjaji akusasangalala pakuganichisya kwanilichikwa kwa yakulochesya ya m’Baibulo yayikusasimanikwa m’malemba gakuyichisyaga, Yesaya 35:5, 6; 65:21-23; soni Chiwunukuko 21:3, 4. Jemanjaji pakuganichisya ali m’chilambo chasambano pampepe ni ŵakunonyelwa ŵawo yikusalimbisya chikulupi chawo pa yindu yayili kusogolo. Kupwatika pelepa jemanjaji akusaŵa ŵakusimichisya kuti chapitilisye kumtumichila Yehofa.—Mat. 24:13; Agal. 6:9.
8. Ana ŵangondolo sine akusasimanikwa pa chikumbuchilo pa ligongo line lyapi?
8 Kwende tulole ligongo line lyalikusatendekasya ŵangondolo sine kusimanikwa pa Chikumbuchilo. Jemanjaji akusasaka kwalosya chinonyelo soni kwakamuchisya ŵasagulwe. Maloŵe ga Mlungu gasasile kala kuti ŵasagulwe ni ŵangondolo sine chachiŵa ŵakamulana mnope. Ana yeleyi yichikomboleka chamtuli? Kwende tukambilane yisyasyo yamnono.
9. Ana yakulochesya ya pa Sakaliya 8:23 yikusalosya chamtuli mwakusapikanila ŵangondolo sine pakwamba ya ŵasagulwe?
9 Aŵalanje Sakaliya 8:23. Yakulochesyayi yikusalosya mwakusapikanila ŵangondolo sine pakwamba ya abale ni alongo ŵasagulwe. Maloŵe gakuti “Myuda” soni “ŵalakwe” gakusasala ya ŵasagulwe ŵakusigala. (Alo. 2:28, 29) Ŵandu “likumi kutyochela ku mitundu ja ŵandu ŵakuŵecheta yiŵecheto yakulekangana” akwimila ŵangondolo sine. Jemanjaji “tachikamula” kapena kuti kulipwatika kwa ŵasagulwe. Yeleyi yikugopolela kuti tachiŵa yimpepe ni jemanjaji pakulambila kweswela. Myoyo, ŵangondolo sine pasimanikwe pa Chikumbuchilochi akusalosya kuti ali ŵakamulana mnope ni ŵasagulwe.
10. Ana Yehofa atesile yamtuli pakusaka kwanilisya yakulochesya yayili pa Esekiele 37:15-19, 24, 25?
10 Aŵalanje Esekiele 37:15-19, 24, 25. Pakusaka kukwanilisya yakulochesyayi, Yehofa atendekasisye kuti ŵasagulwe ni ŵangondolo sine akamulileje masengo yimpepe mwakamulana. Yakulochesyayi yakolasile simbo siŵili. Ŵakwete chembecheyo chakwawula kwinani ali mpela simbo “jakwimila Yuda” (kukwatyochelaga achayimwene wa Isalaeli ), soni ŵakwete chembecheyo chakutama pachilambo chapasi ali mpela simbo “jakwimila Isalaeli.” * Yehofa chachigalumbikanya maguluga kuti gaŵe ‘simbo jimo.’ Yeleyi yikugopolela kuti jemanjaji chachitumichila yimpepe mwakulongoleledwa ni Mwenye jwawo, Yesu Klistu. Chaka chilichose, ŵasagulwe ni ŵangondolo sine akusatenda Chikumbuchilo ngaŵaga mpela makuga gaŵili, nambo mpela “likuga limo” mwakulongoleledwa ni “mkuchinga jumo.”—Yoh. 10:16.
11. Ana “ngondolo” syakusasikolanga pa Mateyu 25:31-36, 40 sikusakamuchisya chamtuli ŵasagulwe?
11 Aŵalanje Mateyu 25:31-36, 40. Muchiwanichisyochi “ngondolo” sikwimila ŵandu ŵakulungama ŵachachikola chembecheyo chakutama pachilambo chapasi m’masiku gakumbesi. Jemanjaji ni ŵali ngondolo sine. Mwakulupichika jemanjaji akusiŵakamuchisyaga ŵasagulwe ŵasigalile pachilambopa kamula masengo gakusosekwa mnope. Masengoga gali gakulalichila pachilambo chosope soni kwakamuchisya ŵandu kuti aŵe ŵakumkuya ŵa Yesu.—Mat. 24:14; 28:19, 20.
12-13. Ana ŵangondolo sine akusiŵakamuchisya ŵasagulwe mmatala gane gapi?
12 Chaka chilichose, kuli kusigele ma wiki gamnono kuti chikumbuchilo chitendekwe, ŵangondolo sine akusiŵakamuchisya ŵasagulwe mwakukamula nawo masengo gakwaŵilanjila ŵandu ku Chikumbuchilo. (Alole libokosi lyakuti “Ana Akukosechela Ndaŵi ja Chikumbuchilo?”) Jemanjaji akusatendasoni yakomboleka kuti Chikumbuchilochi chitendekwe m’mipingo josope pachilambo chapasi. Akusatenda yeleyi, atamose yili yakuti m’mipingo jejinji mwangali ŵandu ŵakusalya mkate soni kumwa finyo. Ŵangondolo sineŵa akusaŵa ŵakusangalala kwakamuchisya ŵasagulwe mmatala gelega. Ŵangondolo sineŵa akusamanyilila kuti Yesu akusayiwona yakusatenda jemanjaji pakwakamuchisya ŵasagulwe, mwamti Yesu akusayiwona mpela kuti akumtendela jwalakwejo.—Mat. 25:37-40.
13 Ligongo chichi wosopewe tukusasimanikwa pa Chikumbuchilo mwangajigalila ya chembecheyo chatukwete?
LIGONGO CHICHI WOSOPE TUKUSASIMANIKWA PA CHIKUMBUCHILO?
14. Ana Yehofa ni Yesu ŵalosisye chamtuli kuti akusatunonyela?
14 Tukusayamichila chinonyelo chakusatulosya Yehofa ni Yesu. Yehofa akusatunonyela mmatala gejinji, nambo pana litala limo lyekulungwa. Mlungu jwetu jwatulosisye chinonyelo chakwe mwakutumisya Mwanache jwakwe kuti atuwombole. (Yoh. 3:16) Tukusamanyililasoni kuti Yesu jwalosisye kutunonyela mwakukunda kupeleka umi wakwe ligongo lya uweji. (Yoh. 15:13) Nganituŵa tukombwele kumwuchisya Yehofa ni Yesu chinonyelo chaŵatulosisye. Nambo mpaka tukombole kulosya kuyamichila mwatukusatendela yindu lisiku lililyose. (Akolo. 3:15) Nambosoni tukusasimanikwa pa Chikumbuchilo kuti tukumbuchileje chinonyelo chiŵatulosisye soni kulosya kuti tukusitwanonyela jemanjaji.
15. Ligongo chichi ŵasagulwe ni ŵangondolo sine akusayamichila kuwomboledwa?
15 Tukusayamichila mnope ligongo lya kutuwombola. (Mat. 20:28) Ŵasagulwe akusayamichila mnope kuwombolaku, ligongo kukusatendekasya kuti akole chembecheyo chakusangalasya. Ligongo lyakuti jemanjaji akwete chikulupi mu mbopesi ja Klistu, Yehofa akusiŵawona jemanjaji kuŵa ŵakulungama, nambosoni akusiŵawona mpela ŵanache ŵakwe. (Alo. 5:1; 8:15-17, 23) Nombe ŵangondolo sine akusayamichila ligongo lya kuwomboledwaku. Ligongo lyakulupilila mbopesi ja Klistu, Mlungu akusiŵawona jemanjaji kuŵa ŵakuŵajilwa. Jemanjaji akusamtumichilasoni Mlungu , nambosoni akwete chembecheyo chakopoka “mu yisawusyo yekulungwa.” (Chiw. 7:13-15) Ŵasagulwe ni ŵangondolo sine akusalosya kuyamichila kuwomboledwaku, mwakusimanikwa pa Chikumbuchilo chaka chilichose.
16. Ana ligongo line lyapi lyalikusatutendekasya kusimanikwa pa Chikumbuchilo?
16 Tukusasimanikwasoni pa Chikumbuchilo pakusaka kumpikanila Yesu. Chinga tukwete chembecheyo chamtuli kusogolo, tukusapikanila lilamusi lyaŵapeleche Yesu pajwatandikasyaga Chikumbuchilo. Jwalakwe jwatite, “Mtendeje yeleyi kuti mungumbuchileje.”—1 Akoli. 11:23, 24.
ANA KUSIMANIKWA PA CHIKUMBUCHILO KUKUSATUKAMUCHISYA CHAMTULI?
17. Ana Chikumbuchilo chikusatukamuchisya chamtuli kumŵandichila Yehofa?
17 Tukusamŵandichilaga Yehofa. (Yak. 4:8) Mpela mwatuyiwonele, Chikumbuchilo chikusatupa upile waganichisya chembecheyo chatupele Yehofa, soni kuganichisya chinonyelo chekulungwa chatulosisye jwalakwe. (Yel. 29:11; 1 Yoh. 4:8-10) Kusala yisyene, patukuganichisya ya chembecheyo chetu changakayikasya soni chinonyelo changamala cha Mlungu, yikusatukamuchisya kuti tumnonyeleje mnope Yehofa soni kuŵa najo paunasi wambone.—Alo. 8:38, 39.
18. Ana kuganichisya chisyasyo cha Yesu kukusatulimbikasya kutenda chichi?
18 Yikusatulimbikasya kuti tumsyasyeje Yesu . (1 Pet. 2:21) Kuli kusigele masiku gamnono kuti Chikumbuchilo chitendekwe, tukusaganichisya mnope Malemba gagakusasala ya wiki jakumalisya ja umi wa Yesu pachilambo chapasi, chiwa chakwe, soni kwimuka kwakwe. Kaneko ligulo, ngani ja Chikumbuchilo jikusatukumbusya chinonyelo chiŵatulosisye Yesu. (Aef. 5:2; 1 Yoh. 3:16) Patukuŵalanga soni kuganichisya ya chinonyelo cha Yesu, m’wejisoni tuchiŵa ŵakusachilila kutenda yindu ‘yakulandana ni yaŵatendaga’ jwalakwe.—1 Yoh 2:6.
19. Ana tukusosekwa kutenda chichi kuti Mlungu atunonyelejepe?
19 Yikusatukamuchisya kuŵa paunasi wambone ni Mlungu. (Yud. 20, 21) Tukusatenda yakuti Mlungu atunonyeleje, mwakutenda yosope yampaka tukombole pakumpikanila jwalakwe, kuswejesya lina lyakwe, nambosoni kumsangalasya jwalakwe. (Mis. 27:11; Mat. 6:9; 1 Yoh. 5:3) Kusala yisyene, kutenda nawo Chikumbuchilo kukusatulimbikasya kuŵa ŵakusachilila kuti lisiku lililyosye tutendeje yindu yampaka yiŵe mpela tukumsalila Yehofa kuti, ‘Ngusaka kuti anonyeleje mpaka kalakala.’
20. Ana tukwete magongo gakupikanika gapi gakututendekasya kusimanikwa pa Chikumbuchilo?
20 Chinga tukwete chembecheyo chakwawula kwinani kapena kutama pachilambo chapasi, wosopewe tukwete magongo gakupikanika gakututendekasya kusimanikwa pa Chikumbuchilo. Chaka chilichose, patusongene pampepe palisikuli, tukusakumbuchila chiwa cha mundu jwatukusamnonyela mnope Yesu Klistu. Kupunda yosope, tukusakumbuchila chinonyelo chiŵatulosisye Yehofa mwakutupa Mwanache jwakwe kuti atuwombole. Chaka achino, Chikumbuchilo chichitendekwa Lyamsano pa Epulo 15, 2022, ligulo. Kusala yisyene tukusamnonyela Yehofa soni Mwanache jwakwe. Myoyo, palisiku lyakumbuchila chiwa cha Yesu, ngasitukunda kuti chilichose kuti chitusokonasye kusimanikwa pa Chikumbuchilochi.
NYIMBO NA. 16 Amlumbe Yehofa Ligongo lya Jwamsagulwe Jwakwe
^ Chinga chembecheyo chetu chili chakwawula kwinani kapena kutama pachilambo chapasi, chaka chilichose wosopewe tukusasachilila kusimanikwa pa Chikumbuchilo. Nganiji chijitukamuchisye kumanyilila magongo gambone ga m’Malemba gagakusatutendekasya kusimanikwapo. Chijitukamuchisyesoni kumanyilila umbone watukusapata ligongo lyakutenda yeleyi.
^ Kuti amanyilile yejinji yakwamba chilanga chasambano soni chilanga cha Uchimwene, alole ngani jakuti, ‘Mudzakhala Ufumu wa Ansembe’ mu Sanja ja Mlonda ja Chichewa ja Okotoba 15, 2014, pp. 15-17.
^ NGOPOLELO JA MALOŴEGA: Maloŵe gakuti ŵasagulwe ŵakusigala gakugopolela Aklistu wosope ŵasagulwe ŵali chiŵela pachilambo chapasi.
^ Kuti amanyilile yejinji yakwamba yakulochesya ya simbo siŵili yayikusasimanikwa m’buku ja Esekiele chaputala 37, alole “Yiwusyo Yakutyochela kwa Ŵakuŵalanga” mu Sanja ja Mlonda ja Julayi 2016.
