NGANI JAKULIJIGANYA 2
Yampaka Tulijiganye kwa Yakobo Juŵaliji Mpwakwe Yesu
“Yakobo, jwakutumichila jwa Mlungu ni Ambuje Yesu Klistu.”—YAK. 1:1.
NYIMBO NA. 88 Amanyisye Matala Gawo
YACHITULIJIGANYE *
1. Ana Yakobo jwapagwile m’liŵasa lyamtuli?
YAKOBO mpwakwe Yesu, jwakulile m’liŵasa lyakulimba mwausimu. Yosefe ni Maliya, ŵaŵaliji achinangolo ŵakwe, ŵamnonyelaga mnope Yehofa. Mwamti jemanjaji ŵatesile yiliyose yakakombwele pakumtumichila Yehofa. Yakobo jwakwetesoni upile wine ligongo lyakuti mkulugwe juŵaliji Yesu jwaliji jwakuti chachiŵa Mesiya. Kusala yisyene, Yakobo jwakwete upile wekulungwa kulila m’liŵasali.
Yakobo jwammanyilile chenene Yesu pajwakulilaga yimpepe (Alole ndime 2)
2. Ana yindu yapi yayikamtendekasisye Yakobo kummanyilila chenene mkulugwe?
2 Yakobo jwakwete magongo gejinji gakumtendekasya kujigalila ndamo sya mkulugweju. (Mat. 13:55) Mwachisyasyo, Yesu jwamanyililaga chenene Malemba, mwamti ali akwete yaka 12 jwasimonjesye achakulungwakulungwa ŵa ku Yelusalemu. (Luk. 2:46, 47) Komboleka kuti Yakobo jwakamulaga masengo ga ukalipentala ni Yesu. Yeleyi, yikatendekasisye kuti ammanyilile chenene mkulugweju. Ndaŵi syejinji, Nathan H. Knorr jwaŵechetaga kuti, “Ukusalijiganya yejinji yakwamba mundu jwine pawukukamula najo masengo.” * Kombolekasoni kuti Yakobo ŵamwonaga ‘Yesu paŵapitilisye kukula mwa lunda ni mwamachili, mwakuti Mlungu ni ŵandu ŵakwe ŵamnonyelaga mnope.’ (Luk. 2:52) Yeleyi mpaka yitutendekasye kuganisya kuti Yakobo jwaliji jumo jwa ŵakulijiganya ŵa Yesu ŵandanda. Nambo nganiyiŵa myoyo.
3. Ana Yakobo jwatesile wuli Yesu pajwatandaga utumiki wakwe?
3 Yesu pajwatendaga utumiki wakwe pachilambo chapasi, Yakobo nganaŵa jumo mwa ŵakulijiganya ŵakwe. (Yoh. 7:3-5) Komboleka kuti Yakobo jwaliji jumo mwa ŵachibale ŵa Yesu ŵaŵasalaga kuti Yesu “asyungulile mtwe.” (Maliko 3:21) Nambosoni pangali umboni wakulosya kuti Yakobo jwaliji yalumo ni Maliya pandaŵi jele Yesu ŵawulajidwaga pachitela chakulagachisya.—Yoh. 19:25-27.
4. Ana chitukambilane yindu yapi?
4 Pali papitile ndaŵi, Yakobo jwamkulupilile Yesu soni jwaŵele mundu jwakuchimbichikwa mumpingo wa Chiklistu. Mungani ajino, chitulole yindu yiŵili yampaka tulijiganye kutyochela kwa Yakobo. Yindu yakwe yili, (1) ligongo lyakwe tukusosekwa kuŵa ŵakulinandiya soni (2) yampaka tutende kuti tujiganyeje mwakamula mtima.
TUŴEJE ŴAKULINANDIYA MPELA YAKOBO
Yakobo jwalosisye kulinandiya Yesu pajwawonechele kwa jwalakwe, soni kutandila ndaŵi jelejo jwaŵele jwakumkuya jwa Yesu jwakulupichika (Alole ndime 5-7)
5. Ana Yakobo jwatesile wuli Yesu pajwawonechele kwa jwalakwe ali ajimwiche ku ŵawe?
5 Ana Yakobo jwaŵele jwakumkuya jwa Yesu jwakulupichika chakachi? Yesu ali ajimwiche ku ŵawe “ŵawonechelesoni kwa Yakobo, kaneko kwa ŵandumetume wosope.” (1 Akoli. 15:7) Kusimana ni Yesu kweleku kwachenjile mnope umi wa Yakobo. Jwalakwe jwapalisoni pandaŵi jele ŵandumetume ŵajembecheyaga kupochela msimu weswela m’chipinda chamwinani ku Yelusalemu. (Mase. 1:13, 14) Kaneko, Yakobo jwasangalele mnope kutumichila m’likuga lyakulongolela lya m’yaka 100 yandanda. (Mase. 15:6, 13-22; Aga. 2:9) Soni mkanichiŵe kwika chaka cha 62 C.E., Yakobo jwasalilidwe kuti ŵalembele chikalata Aklistu ŵasagulwe. Chikalatachi chikusatukamuchisya m’wejisoni masiku agano, chinga tukwete chembecheyo chakwawula kwinani kapena chakutama pachilambopa. (Yak. 1:1) Jwakulola ya mbili jakala jwine jwa m’yaka 100 yandanda, lina lyakwe Josephus, jwalembile kuti, Ananiya jwamnandi juŵaliji Jwamkulungwa jwa Ŵakutaga Mbopesi jwalamwile kuti Yakobo awulajidwe. Yakobo jwaŵelepe jwakulupichika kwa Yehofa mpaka pajwamalisisye umi wakwe wapachilambo chapasi.
6. Ana Yakobo jwalekanganaga chamtuli ni achimlongola ŵa dini ŵa mundaŵi jakwe?
6 Yakobo jwaliji jwakulinandiya. Ligongo chichi tukuŵecheta yeleyi? Agambe ganisya kulekangana kwakupali pasikati pa muŵatendele Yakobo pakumpikanila Yesu ni muŵatendelaga achimlongola ŵajinji ŵadini. Yakobo ali awuweni umboni wakuti Yesu ali Mwanache jwa Mlungu, mwakulinandiya jwajitichisye yeleyi. Yeleyi yili yakulekangana ni yaŵatesile achakulungwa ŵakutaga mbopesi ŵa ku Yelusalemu. Mwachisyasyo, jemanjaji nganakana yakuti Yesu ŵamjimwisye Lasalo ku ŵawe. Nambo mmalo mwakuti ajitichisye yakuti Yesu ali jwakumjimila Yehofa, jemanjaji ŵasakaga kumwulaga Yesu ni Lasalo. (Yoh. 11:53; 12:9-11) Kaneko Yesu ali ajimwiche ku ŵawe, jemanjaji ŵalinganyisye yakuti ŵandu akamanyilila yeleyi. (Mat. 28:11-15) Kunyada kwatendekasisye kuti achimlongola ŵadiniŵa amkane Mesiya.
7. Ligongo chichi tukusosekwa kuŵambala kunyada?
7 Yatukulijiganya: Tuŵambaleje kunyada soni tukundeje kwiganyidwa ni Yehofa. Mpela mwayikusaŵela kuti ulwele mpaka utendekasye kuti mtima wa mundu ukakamulaga chenene masengo, kunyada mpaka kutulepelekasye kupikanila malangiso ga Yehofa. Afalisi ŵalimbisye mitima jawo, mwamti ŵalepele kumanyilila maumboni gakuwoneka chenene gawapaga msimu wa Mlungu. (Yoh. 12:37-40) Kutenda yeleyi kwaliji kwakogoya mnope ligongo kwakwayaga sogolo jawo. (Mat. 23:13, 33) Kusala yisyene chili chindu chakusosekwa mnope kukunda kuti Maloŵe ga Mlungu gatukamuchisyeje kusagula, kuganisya, soni kutenda yindu yambone. (Yak. 3:17) Ligongo lyakuti Yakobo jwaliji jwakulinandiya, jwakundile kwiganyidwa ni Yehofa. Soni mpela mwatuyiwonele, kulinandiya kwamkamuchisye Yakobo kuŵa jwakwiganya jwambone.
TUJIGANYEJE MWAKAMULA MTIMA MPELA YAKOBO
8. Ana chichi champaka chitukamuchisye kuti tuŵe ŵakwiganya ŵambone?
8 Yakobo nganaŵa jwakulijiganya mnope. Achimlongola ŵadini ŵa mundaŵi jakwe ŵamwonaga jwalakwe mpela muŵawonelaga ŵandumetume ŵane mpela Petulo ni Yohane. Jemanjaji ŵawonaga kuti “ŵaliji ŵandu wamba ni ŵangalijiganya mnope.” (Mase. 4:13) Nambo Yakobo jwaliji jwakwiganya jwakamula mtima. Yeleyi yikusawonechela patukuŵalanga buku ja m’Baibulo jakumanyika ni lina lyakwe. Mwakulandana ni Yakobo, komboleka m’wejisoni nganitulijiganya mnope. Atamose yili myoyo, ni chikamuchisyo cha msimu wa Yehofa, soni majiganyo gatukusapochela kutyochela m’gulu jakwe, mpaka tuŵe ŵakwiganya ŵakamula mtima. Kwende tulole yindu yine yaŵatesile Yakobo mpela jwakwiganya soni tulole yampaka tulijiganye.
9. Ana Yakobo jwajiganyaga chamtuli? Alondesye.
9 Yakobo nganakamulichisyaga masengo maloŵe gakusawusya kugapikana. Yeleyi, yakamuchisyaga ŵandu ŵaŵampikanilaga kuti amanyilile yakusosekwa kutenda soni mwampaka ayitendele. Mwachisyasyo, Yakobo jwajiganyisye mwangasawusya mfundo jakuti Aklistu pakusimana ni yakusawusya ngakusosekwa kutumbila. Jwalakwe jwalembile kuti, “Ŵandu ŵitukusiŵakolanga kuti ŵana upile, ŵelewo ni ŵaliji ŵakupimilila. Mwayipikene ya kupimilila kwa Yobu, nipo mwayiwenisoni yiŵatesile Ambuje pakumalisya, pakuŵa Ambuje ali ŵachanasa soni ŵakusalala mtima.” (Yak. 5:11) Yakobo jwakamulichisyaga masengo Malemba pakwajiganya achimjakwe. Jwalakwe jwakamulichisye masengo Maloŵe ga Mlungu pakwakamuchisya ŵakupikanila ŵakwe kumanyilila kuti ndaŵi syosope Yehofa akusiŵapa upile ŵandu ŵakulupichika kwa jwalakwe mpela Yobu. Yakobo jwajiganyisye mfundo jeleji pakamulichisya masengo maloŵe gangasawusya kugapikana. Yeleyi yatendekasisye kuti ŵandu amchimbichisyeje Yehofa mmalo mwakumchimbichisya jwalakwejo.
10. Ana litala limo lyapi lyampaka tumsyasye Yakobo patukwiganya?
10 Yatukulijiganya: Ajiganyeje mmatala gangasawusya, soni ajiganyeje kutyochela m’Maloŵe ga Mlungu. Patukwajiganya ŵane, chakulinga chetu chikaŵaga kwalosya ŵane yindu yatukusamanyilila. Nambo chiŵeje kwalosya jemanjajo kuti Yehofa akusamanyilila yejinji soni akusiŵasamalila mnope jemanjajo. (Alo. 11:33) Mpaka tukombole kutenda yeleyi naga ndaŵi syosope tukusajiganya kutyochela m’Baibulo. Mwachisyasyo, mmalo mwakwasalila ŵakulijiganya Baibulo ŵetu yakuti atende, tukusosekwa kwakamuchisya jemanjajo kulola yisyasyo ya m’Baibulo soni kupikanichisya nganisyo sya Yehofa nambosoni mwakusapikanila mumtima jwalakwejo. Yeleyi yichakamuchisya kuti amchimbichisyeje Yehofa mmalo mwakutuchimbichisya m’weji.
11. Ana Aklistu ŵane ŵasimanaga ni yakusawusya yamtuli mundaŵi ja Yakobo? Ana Yakobo jwapele malangiso gamtuli? (Yakobo 5:13-15)
11 Yakobo jwasalaga yindu mwangapita mumbali. M’chikalata chakwechi, yikuwoneka kuti Yakobo jwamanyililaga yakusawusya yaŵasimanaga nayo wakulupilila achimjakwe. Soni jwapele malangiso gakwakamuchisya kumalana ni yeleyi. Mwachisyasyo, Aklistu ŵane yasawusyaga kuti apikanile malangiso mwachitema. (Yak. 1:22) Pele ŵane ŵatendaga lusagu mwakwanonyela mnope ŵandu ŵakusichila. (Yak. 2:1-3) Papali ŵanesoni ŵaŵalagaga kuti alamulileje lulumi lwawo. (Yak. 3:8-10) Aklistu ŵeleŵa ŵakwete yakusawusya yekulungwakulungwa, nambo Yakobo nganaleka kwakamuchisya. Jwalakwe jwapelekaga malangiso gakwe mwachinonyelo nambo mwangapita mumbali. Kupwatika pelepa jwalimbikasisye ŵandu ŵaŵakwete yakusawusya yausimu kuti akaŵende chikamuchisyo kwa achakulungwa ŵa mumpingo.—Aŵalanje Yakobo 5:13-15.
12. Ana mpaka tukole chamtuli nganisyo syambone patukwakamuchisya ŵakulijiganya Baibulo ŵetu?
12 Yatukulijiganya: Tusaleje yindu mwangapita mumbali, nambo twawoneje ŵane mwakuŵajilwa. Ŵajinji mwa ŵandu ŵatukusitwajiganya Baibulo, mpaka alajeje kamulichisya masengo yakulijiganya. (Yak. 4:1-4) Mpaka yijigale ndaŵi kuti aleche ndamo syawo syakusakala ni kutanda kuya ndamo syambone. Mpela muŵatendelaga Yakobo tukusosekwa kulimba mtima kuti tukombole kwasalila ŵakulijiganya ŵetu yindu yakusosekwa kuchenga. Tukusosekwasoni kola nganisyo syambone, mwakulupilila kuti Yehofa chachawuta ŵandu ŵakulinandiya kuti ayiche kwa jwalakwe soni kwakamuchisya kuti akombole kuchenga ndamo syawo.—Yak. 4:10.
13. Mwakamulana ni lilemba lya Yakobo 3:2, ana Yakobo jwamanyililaga chichi?
13 Yakobo jwaliwonaga mwakuŵajilwa. Yakobo nganalipikanaga kuti liŵasa lyaŵatyochele soni utumiki wakwe yikumtendekasya kuŵa jwakusosekwa mnope kwapunda abale ni alongo ŵane. Jwalakwe jwakolasile ŵakulambila achimjakwe kuti “achalongo achimjangu ŵakunonyelwa.” (Yak. 1:16, 19; 2:5) Jwalakwe nganatendaga yindu mpela kuti ali jwamlama. Mmalo mwakwe, Yakobo jwalipwatiche pajwasasile kuti “wosopewe tukusalemwa mu yindu yejinji.”—Aŵalanje Yakobo 3:2.
14. Ligongo chichi tukusosekwa kwitichisya kuti tukusalemwaga?
14 Yatukulijiganya: Tukumbuchileje kuti wosopewe tuli ŵakulemwa. Tukaliwonaga kuti tuli ŵapenani mnope kupunda ŵandu ŵatukwajiganya Baibulo. Ligongo chichi ngatukusosekwa kutenda yeleyi? Naga tukumtendekasya jwakulijiganya jwetu kuyiwona kuti ngatukusalemwaga, mpaka yimkuŵasye. Mwamti mpaka ayiwoneje kuti nganaŵa akombwele kumtumichila Mlungu mwangalemwesya chilichose. Nambo naga tukusajitichisya kuti nombe uweji ndaŵi sine yikusatusawusya kukuya mfundo sya m’Baibulo, soni yajwatesile Yehofa pakutukamuchisya kumalana ni yakusawusya yetu, tuchimkamuchisya jwakulijiganyajo kuti ayiwoneje kuti nombe najo mpaka akombole kumtumichila Yehofa.
Yiwanichisyo ya Yakobo yaŵaga yangasawusya kupikana soni yakamula mtima (Alole ndime 15-16) *
15. Ana yiwanichisyo yaŵakamulichisyaga masengo Yakobo yaliji yamtuli? (Yakobo 3:2-6, 10-12)
15 Yakobo jwakamulichisyaga masengo yiwanichisyo yakwayika pamtima ŵakupikanila. Mwangakayichila msimu weswela wamkamuchisye. Nambo yikuwonekasoni kuti, jwalakwe jwalijiganyisye kutyochela ku yiwanichisyo yaŵakamulichisyaga masengo Yesu. Yiwanichisyo yaŵakamulichisye masengo Yakobo m’chikalata chakwe, yili yangasawusya kuyipikana soni yangasawusya kuyikamulichisya masengo.—Aŵalanje Yakobo 3:2-6, 10-12.
16. Ligongo chichi tukusosekwa kamulichisya masengo yiwanichisyo yakamula mtima?
16 Yatukulijiganya: Tukamulichisyeje masengo yiwanichisyo yakamula mtima. Naga tukukamulichisya masengo yiwanichisyo mwakuŵajilwa, tukusitwakamuchisya ŵakupikanila kuti ayiwoneje munganisyo mwawo yakulijiganyayo. Yeleyi yikusakamuchisya kuti jemanjajo akumbuchileje usyesyene wa m’Baibulo. Yesu jwamanyililaga chenene kamulichisya masengo yiwanichisyo mwakamula mtima, mwamti Yakobo jwajigalile chisyasyo chakwe. Kwende tulole chiwanichisyo chimo chiŵakamulichisye masengo Yakobo soni ligongo lyakwe chili chakamula mtima.
17. Ligongo chichi chiwanichisyo cha pa Yakobo 1:22-25 chili chakamula mtima?
17 Aŵalanje Yakobo 1:22-25. Chiwanichisyo cha Yakobo chakwamba ligalasi chili chakamula mtima mmatala gejinji. Jwalakwe, jwajiganyaga mfundo jakuti, kuti tupinduleje ni Maloŵe ga Mlungu tukusosekwa kutenda yejinji kupunda kwamba kuŵalanga Baibulo. Tukusosekwa kutenda yatuŵalasileyo. Yakobo jwakamulichisye masengo chiwanichisyo cha mundu jwakulilolela paligalasi. Chiwanichisyochi chaliji changasawusya kuchipikanichisya. Ana jwalakwe jwagopolelaga chichi? Mpaka kuŵe kupwambwana naga mundu akulilolela paligalasi ni akulola kuti pana yakusosekwa kulinganya nambo ni ngatenda chilichose. Mwakulandana ni yeleyi, kuli kupwambwanasoni, naga mundu akuŵalanga Maloŵe ga Mlungu, ni kupawona pakusosekwa kulinganya pakwamba ya ndamo syakwe nambo ni ngatenda chilichose.
18. Ana ni yindu yitatu yapi yatukusosekwa kutenda patukukamulichisya masengo yiwanichisyo?
18 Mpaka tumsyasye Yakobo patukukamulichisya masengo yiwanichisyo mwakutenda yindu yitatu yakuyichisyayi. (1) Alolechesyeje kuti chiwanichisyocho chikukamulana ni mfundo jakukambilana. (2) Akamulichisyeje masengo chiwanichisyo changasawusya kuchipikana. (3) Asaleje mwakupikanika chenene mwampaka mundujo akamulichisye masengo chiwanichisyocho. Naga yikwasawusya kupata yiwanichisyo yambone, alole mu Watch Tower Publications Index. Pasi pa kamtwe kakuti “Yiwanichisyo,” chachipata yiwanichisyo yejinji yampaka ayikamulichisye masengo. Akumbuchileje kuti yiwanichisyo yili mpela mayikofoni, yikusajonjechesya machili ga mfundo jakwiganya. Myoyo akusosekwa kupeleka chiwanichisyo pa mfundo syakusosekwa mnope syakusaka kwiganya. Chakulinga chetu chekulungwa chakututendekasya kongolela kajiganye ketu chili kwakamuchisya ŵandu ŵajinji kuti aŵe m’liŵasa lya Yehofa, ngaŵaga kuti atulapilileje uweji.
19. Ana tukusalosya chamtuli kuti tukusayamichila liŵasa lyetu lya Chiklistu?
19 Yakobo jwakwete mkulugwe juŵaliji jwamlama, nambo uweji nganitukola. Nambope tukwete upile wakumtumichila Yehofa pampepe ni abale ni alongo ŵajinji ŵa m’liŵasa lya Chiklistu. Tukusalosya kuti tukusitwanonyela jemanjaji, mwakunguluka nawo, kulijiganya kutyochela kwa jemanjaji, soni patukulalichila yimpepe. Naga tukulingalinga kumsyasya Yakobo, mu ndamo, katende ketu ka yindu, nambosoni pakajiganye ketu tuchimsangalasya Yehofa soni tuchakamuchisya ŵandu ŵamtima wambone kuti amŵandichile Yehofa Mlungu jwetu jwachinonyelo.
NYIMBO NA. 114 Tuŵeje Ŵakuwusimana Mtima
^ Yakobo jwakulile m’liŵasa lyaŵakulile Yesu. Yakobo jwammanyililaga chenene Mwanache jwa Mlungu kupunda ŵandu ŵajinji ŵa pandaŵijo. Munganiji chitulole yampaka tulijiganye kutyochela pa yindu yaŵatesile Yakobo soni yaŵajiganyisye jwalakwe. Mpwakwe jwa Yesuju jwaliji njanamila ja mpingo wa Chiklistu m’yaka 100 yandanda.
^ Nathan H. Knorr jwaliji jwa M’likuga Lyakulongolela. Jwalakwe jwamalisisye umi wakwe wa pachilambo chapasi mu 1977.
^ KULONDESYA CHIWULILI: Yakobo jwakamulichisye masengo chiwanichisyo cha moto wamnono pakusala ya kogoya kwa kamulichisya masengo lulumi mwangaŵajilwa. Chiwanichisyochi chaliji changasawusya kuchipikana.
