MU CHIGILIKI, liloŵe lyakuti “ligeleta” mu Baibulo ja Chilambo Chasambano mpaka ligopolele mitundu jakulekanganalekangana ja mageleta. (Mase. 8:​28, 29, 38) Nambope yikuwoneka kuti nduna ja ku Itiyopiya jakwesile ligeleta lyekulungwa lyakulekangana ni mageleta gaŵakamulichisyaga masengo pangondo soni pakutenda mpikisano wakuwutuka. Kwende tukambilane magongo gagakututendekasya kusala yeleyi.

Ndunaji jakwete udindo wekulungwa soni jajesile lutando lwelewu. “Munduju jwaliji nduna mu ulamusi wa Kandake, mwenye jwamkongwe jwa ku Itiyopiya, soni jwalolelaga chipanje chosope cha mwenyewo.” (Mase. 8:27) Dela ja chilambo chakala cha Itiyopiya, masiku agano jikupwatika chilambo cha Sudan mpaka kummwela kwa chilambo cha Iguputo. Atamose kuti ndunaji nganijikwela ligeleta limo pa ulendo wakwe wosopewu, nambope jwalakwe jwajigele katundu jwamjinji. Mageleta gaŵakamulichisyaga masengo m’yaka 100 yandanda pakunyakula ŵandu ŵa paulendo gakolaga ngolo ja matayala mcheche. Pakulondesya ya nganiji, buku jine jakulondesya ya buku ja m’Baibulo ja Masengo jatite, “Ngolo jeleji janyakulaga katundu jwamjinji, ŵandu ŵatamaga mwakutakasuka, soni jakombolaga kwenda lutando lwelewu.”

Filipo ŵajisimene ndunaji jili mkuŵalanga. Nganiji jikusalondesya kuti, “Pelepo Filipo ŵaliwutuchile ligeletalyo ni kwendaga mumbali mwakwe. Kaneko ŵajipikene ndunajo jili mkuŵalanga mpukutu wa jwakulochesya Yesaya.” (Mase. 8:30) Mageleta gakunyakulila ŵanduga ŵagapanganyaga kuti gakawutukaga mnope. Yeleyi yakamuchisye kuti ndunaji jikomboleje kuŵalanga jili mu ligeletali soni kuti Filipo akombole kuliwutuchila wapasi ni kulipata.

Ndunaji ‘jamŵendile Filipo kuti akwele mu ligeletamo ni kutama najo yimpepe.’ (Mase. 8:31) Ligeleta lyakutendela mpikisano wakuwutuka lyakolaga malo gakwima mundu jumope. Pele ligeleta lyakunyakulila ŵandu ŵa paulendo lyakolaga malo gekulungwa. Yeleyi yatendekasisye kuti ndunaji ni Filipo akombole kutama pasi.

Mwakamulana ni yayili mu chaputala 8 cha buku ja Masengo soni umboni wakutyochela mu yakulemba ya mu mbili, mabuku getu gapachangakaŵapa gasasile kuti ndunaji jakwesile ligeleta lyekulungwa lyakulekangana ni ligeleta lyaŵakamulichisyaga masengo pakuputa ngondo kapena pa mpikisano wakuwutuka.