1. Ana munganisyo mwawo mukusayikaga chichi pakuganichisya yakwamba Yehofa?

 ANA wawojo pakwete palinjile kuganichisya mwaŵelele Yehofa? Ana munganisyo mwawo mukusayika ya chichi pakupopela kwa jwalakwe? Atamose kuti nganituŵa tum’weni Yehofa, nambope Baibulo jikusamlondesya jwalakwe m’matala gejinji. Yehofa akusakolanjidwa kuti ‘[lyuŵa soni] chakuchinjilichisya’ nambosoni “moto wakutinisya.” (Sal. 84:11; Aheb. 12:29) Kawoneche kakwe akusakolendesya mpela mwalikusawonechela liganga lya safilo, chisyano chakuŵala, nambosoni ukunje wa ula wakuŵala mnope. (Esek. 1:​26-28) Kamlondesye ka Yehofa keleka mpaka katutendekasye kuŵa ŵakusimonga soni kukola woga.

2. Ana chichi champaka chalepelekasye ŵane kuŵa paunasi ni Yehofa?

² Ligongo lyakuti nganituŵa tum’weni Yehofa, komboleka mpaka yitusawusyeje kukulupilila yakuti jwalakwe akusatunonyela. Ligongo lya yindu yaŵasimene nayo ŵandu ŵane paumi wawo mpaka yasawusyejesoni kulupilila kuti Yehofa akusiŵanonyela. Komboleka kuti ŵane mwa jemanjaji achinangolo ŵawo nganiŵanonyelaga. Yehofa akusapikanichisya mwatukupikanila soni mwayikusati pakutukwaya yeleyi. Pakusaka kutukamuchisya, Yehofa jwasasile ya ndamo syambone syakwete m’Maloŵe gakwe.

3. Ligongo chichi tukusosekewa kukambilana ya chinonyelo cha Yehofa?

³ Liloŵe limo lyalikusamlondesya chenene Yehofa lili chinonyelo. (1 Yoh. 4:8) Yehofa ali chinonyelo, mwamti akusatendaga chilichose mwachinonyelo. Chinonyelo chakwete Mlungu chili chekulungwa soni chamachili mnope. Mwamti akusakombola kwanonyela atamose ŵandu ŵangakusamnonyela jwalakwejo. (Mat. 5:​44, 45) Munganiji, chitukambilane yakwamba Yehofa soni chinonyelo chakwe. Patukulijiganya mnope yakwamba Mlungu ni patukusatandasoni kumnonyela mnope.

YEHOFA AKUSATUNONYELA MNOPE

4. Ana akusapikana uli ni chinonyelo chekulungwa chakwete Yehofa? (Alole chiwulili.)

⁴ “Yehofa akwete chinonyelo chekulungwa.” (Yak. 5:11) Mwamti  m’Baibulo Yehofa akusaliwanichisya ni nangolo jwamkongwe jwachinonyelo. (Yes. 66:​12, 13) Agambe ganichisya ya jwamkongwe jwakusamsamalila mwachinonyelo mwanache jwakwe. Jwalakwe akusamnyakula mwanachejo pangongolo syakwe ni kumŵechetelaga maloŵe ga chinonyelo. Mwanachejo pakulila kapena kupikana kupweteka, nangolojo akusalolechesya kuti ampele yakusosechela. M’wejisoni patukulagasika ni yineyakwe, Yehofa akusaŵa jwakoseka kutukamuchisya ligongo lyakuti akusatunonyela mnope. Jwamasalimo jwalembile kuti, “Pasikundupila nganisyo mu mtima mwangu, ŵalakwe akusawutulasya umi ŵangu ni kusangalasya.”—Sal. 94:19.

5. Ana Yehofa akusalosya chamtuli kuti akusatunonyela mnope?

⁵ Yehofa ali jwakulupichika. (Sal. 103:8) Mwamti jwalakwe jwangaleka kutunonyela atamose patutesile chakulemwa. Mtundu wa Ayisalayeli watendaga yindu yakumtumbilikasya Yehofa ndaŵi ni katema. Nambope, Yehofa jwapitilisyaga kwanonyela ŵandu ŵakwe ŵaŵalosyaga kugalawuka mtima. Mwachisyasyo, jwalakwe ŵasalilaga jemanjajo kuti, “Pakuti m’mwejo mli ŵangu ŵa pamtima, tinjapeleka ŵandu m’malo mwa m’mwejo. Ligongo lyakuti mli ŵamtengo wapenani pameso pangu, nipo ngusinamnonyela.” (Yes. 43:​4, 5) Nambotu chinonyelo cha Mlunguchi nganichichenga. Mwamti tukusosekwa kulupilila kuti jwalakwe chatunonyelejepe. Atamose tuli tutesile chakulemwa chekulungwa, Yehofa jwangatujasaga. Mwamti patugalawiche mtima ni kuleka yakulemwa yetu, tuchiyiwona kuti jwalakwe nganaleka kutunonyela. Jwalakwe akusatusalila kuti ‘tachitukululuchila mnope.’ (Yes. 55:7) Baibulo jikusalondesya kuti Yehofa patukululuchile yikusaŵa mpela atupele “ndaŵi jakupumula.”—Mase. 3:19.

6. Ana pa Sakaliya 2:8 pakusatujiganya yamtuli pakwamba ya Yehofa?

⁶ Aŵalanje Sakaliya 2:8. Ligongo lyakuti Yehofa akusatunonyela, jwalakwe akusamanyilila mwachitema yindu yayikututendechela, soni akusaŵa jwakusachilila kutukamuchisya. Jwalakwe akusadandawulaga payitutendechele yindu yakupweteka. Mwamti tukulupilileje kuti chachitujanga patupopesile kwa jwalakwe kuti “asunje une mpela mwampaka atendele ni liso lya ŵalakwe asyene.” (Sal. 17:8) Myoyo, Yehofa pakutulandanya m’weji ni liso lyakwe yili mpela kuti jwalakwejo akuŵecheta kuti, ‘Jwalijose jwakumwulasa jemanja ŵandu ŵangu, akuwulasya chindu chakusosekwa mnope kwa uneji.’

7. Ligongo chichi tukusosekwa kulupililaga mnope yakuti Yehofa akusatunonyela?

⁷ Yehofa akusasaka kuti jwalijose amanyilileje kuti jwalakwe akusamnonyela pajika. Nambope,  Yehofa akusamanyilila kuti ligongo lya yindu yatuŵele tuli mkusimana nayo, mpaka tukayichileje yakuti jwalakwe akusatunonyela. Kombolekasoni apano tukusimana ni yakusawusya yampaka yitutendekasye kayichila yakuti Yehofa akusatunonyela. Ana chichi champaka chitukamuchisye kuti tukakayichilaga yakuti Yehofa akusatunonyela? Chindu champaka chitukamuchisye chili kumanyilila yakusati Yehofa pakumnonyela Yesu, pakwanonyela ŵasagulwe, soni pakutunonyela wosopewe.

YAKUSATI YEHOFA PAKULOSYA CHINONYELO CHAKWE

8. Ligongo chichi Yesu jwakulupililaga mnope yakuti Atati ŵakwe akusamnonyela?

⁸ Kwa yaka yangaŵalanjika, Yehofa ni Mwanache jwakwe aŵele ali mkukamulana soni kunonyela mnope. Mwamti jemanjaji ni ŵaŵele ali mkunonyelana kwandaŵi jelewu mnope. Yehofa jwalosisye chenene chinonyelo chakwe pa Yesu mpela yatukusati pakuŵalanga pa Mateyu 17:5. Yikakomboleche Yehofa kwamba kuŵecheta kuti, ‘Aju ali mundu jwangusasangalala najo.’ Nambo mmalomwakwe, Yehofa jwamkolasile Yesu kuti “mwanangu jwapamtima,” pakusaka kutukamuchisya kumanyilila yakusati pakumnonyela Yesu. Pelepatu Yehofa jwalosisye kuti jwasangalalaga ni Yesu soni yindu yajwasigele panandi kuyitenda Yesujo. (Aef. 1:7) Yesu nganakayichilaga yakuti Atati ŵakwe akusamnonyela. Mwamti mwakuwilisyawilisya, Yesu jwasalaga kuti Atati ŵakwe akusamnonyela.—Yoh. 3:35; 10:17; 17:24.

9. Ana ni maloŵe gapi gagakusalosya chinonyelo chakwete Yehofa kwa ŵasagulwe? Alondesye. (Aloma 5:5)

⁹ Yehofa jwalosisyesoni chinonyelo chakwe kwa ŵasagulwe. (Aŵalanje Aloma 5:5.) Aganichisye ya maloŵe gakuti “agumbesye.” Pakulondesya liloŵeli buku jine jakulondesya Baibulo jasasile kuti, “Gayiche kwa m’weji mpela mesi ga mlusulo.” Maloŵe gelegatu gakulosya chinonyelo chekulungwa chakwete Yehofa kwa ŵasagulwe. Ŵasagulwe akusamanyilila kuti jemanjajo ali “ŵapamtima ŵa Mlungu.” (Yud. 1) Ndumetume Yohane pakulondesya mwakusapikanila jemanjaji jwalembile kuti, “Aganichisye ya chinonyelo chekulungwa chele Atati ŵakwinani atulosisye, kuti tukolanjidweje ŵanache ŵa Mlungu.” (1 Yoh. 3:1) Ana nikuti Yehofa akusagamba kwanonyela ŵasagulwepe? Iyayi. Yehofa alosisye kuti akusatunonyela wosopewe.

10. Ana ni chindu chekulungwa chapi chachikusichasimichisya kuti Yehofa akusiŵanonyela?

¹⁰ Ana ni chindu chekulungwa chapi chachikusatusimichisya kuti Yehofa akusatunoyela? Chili mbopesi jakutuwombola. Yehofa alosisye chinonyelo chekulungwa mnope kupitila mu mbopesi jeleji. (Yoh. 3:16; Alo. 5:8) Jwalakwe jwampeleche Mwanache jwakwe jwakusamnonyela kuti awe ligongo lya ŵandu wosope kuti atukululuchile yakulemwa yetu, soni kutukunda kuŵa najo paunasi. (1 Yoh. 4:10) Patukuganichisya mnope ya mtengo waŵapeleche Yehofa ni Yesu, ni patukusapikanichisya yakusati pakutunonyela mnope jemanjaji. (Agal. 2:20) Yehofa nganapeleka mbopesi jakutuwombola pagamba kusaka kukwanilisya chilungamo chakwe. Mmalomwakwe jwapeleche mbopesiji ligongo lya chinonyelo. Yehofa jwalosisye kuti akusatunonyela mwakutupa Yesu jwali Mwanache jwakwe jwakusosekwa mnope. Yehofa jwakundile kuti Mwanache jwakwe alaje soni kuwa ligongo lya m’weji.

11. Ana tukulijiganya chichi pa Yelemiya 31:3?

¹¹ Mpela mwatuyiwonele, Yehofa jwangagamba kulipikana kuti akusatunonyela, mmalomwakwe akusatusalilasoni yakusati pakutunonyela. (Aŵalanje Yelemiya 31:3.) Yehofa atukundile kuŵa najo paunasi wambone ligongo lyakuti akusatunonyela. (Alole Detulonomo 7:​7, 8) Pangali jwalijose soni chindu chilichose champaka chitulekanganye ni chinonyelo chelechi. (Alo. 8:​38, 39) Ana wawojo akupikana uli mumtima ligongo lya chinonyelo chelechi? Mpaka atende chenene kuŵalanga Salimo 23 kuti alole yaŵatite Yehofa pakumnonyela soni kumsamalila Daudi, nambosoni yampaka chijile chinonyelochi pakwakamuchisya wawojo.

ANA AKUSAPIKANA ULI MUMTIMA NI CHINONYELO CHA YEHOFA?

12. Ana mpaka alondesye chamtuli mwakata yayili mu Salimo 23?

¹² Aŵalanje Salimo 23:​1-6. Salimo 23 jili nyimbo jajikusalondesya chidalilo chatukusakola chakuti  Yehofa chatunonyeleje soni kutusamalila. Daudi juŵalembile salimoji jwalondesisye ya unasi wakulimba wuwapali pasikati pa jwalakwejo ni Mkuchinga jwakwe, Yehofa. Daudi jwamdalilaga mnope Yehofa mwamti jwatendaga yindu mwakulongoleledwa ni jwalakwe. Yeleyi yamkamuchisyaga kulipikana kuti ali pambone. Nambosoni jwalakwe jwamanyililaga kuti Yehofa chapitilisye kumnonyela lisiku lililyose. Ana chichi chachamkamuchisye kukulupilila kuti Yehofa chamnonyeleje lisiku lililyose?

13. Ligongo chichi Daudi jwakulupililaga kuti Yehofa akusamsamalila?

¹³ “Ngasisoŵa kandu.” Daudi jwayiwonaga kuti Yehofa akumsamalila ligongo nganasoŵaga chilichose chiŵasosechelaga paumi wakwe. Jwalakwe jwamanyililaga kuti Yehofa akumjitichisya soni kuti ali mjakwe. Ni ligongo lyakwe jwakwete chikulupi chakuti mulimose mwampaka yiŵele yindu paumi wakwe, Yehofa chachipitilisya kumsamalila. Mmalo mwakutamila kudandawula ni yakusawusya yajwasimanaga nayo, Daudi jwaliji jwakusangalala soni jwakwikutila ligongo jwakulupililaga kuti Yehofa chapitilisye kumnonyela soni kumsamalila.—Sal. 16:11.

14. Ana Yehofa akusatusamalila chamtuli mwachinonyelo?

¹⁴ Yehofa akusatunonyela soni kutusamalila mnopemnope patusimene ni yakusawusya. Mlongo jwine lina lyakwe Claire, a jwatumichile pa Beteli kwa yaka yakupunda 20, jwatengwiche mnope liŵasa lyakwe palyasimene ni yakusawusya mwakutotoganya. Babagwe ŵalwasile ulwele wakuwa yiŵalo, mpwakwe ŵamtyosisye mu mpingo, nambosoni bisinesi ni nyumba ja liŵasali yajonasiche. Ana Yehofa jwalosisye chamtuli chinonyelo chakwe ku liŵasali? Mlongoju jwatite, “Yehofa jwalolechesye kuti liŵasa lyetu likupata yakusosechela ya paumi lisiku lililyose. Mwamti ndaŵi syejinji twakolaga upile wakupata yindu yejinji kupunda pa yatwasosechelaga. Ndaŵi syejinji ngusaganichisyape  yatite Yehofa pakutulosya chinonyelo chakwe chekulungwa, mwamti nganimba ndiŵalile. Kuganichisya yeleyi kungamuchisye kuti ngawujila munyuma atamose pasimene ni yakusawusya.”

15. Ana Daudi jwapataga chamtuli machili gasambano? (Alole chiwulili.)

¹⁵ “Akusamba une machili gasambano.” Ndaŵi syejinji Daudi jwalagasikaga ligongo lya yakusawusya soni yakulingwa yajwasimanaga nayo. (Sal. 18:​4-6) Nambope jwalakwe jwapataga machili ligongo lyakuti Yehofa jwamnonyelaga soni kumsamalila. Yehofa jwamjawusyaga mjakwe juŵapesileju ku “manyasi gamaŵisi” soni “kwitamanda lya mesi ga bata.” Yeleyi yamkamuchisye Daudi kupata machili soni kupitilisya kumtumichila Yehofa mwakusangalala.—Sal. 18:​28-32.

16. Ana chinonyelo chakwete Yehofa chikusichakamuchisya chamtuli wawojo kupata machili?

¹⁶ Masiku aganosoni, ligongo lya ‘chinonyelo changachenga soni changamala cha AMBUJE ni chanasa chakwe changamala’ m’wejisoni ngatukusamala patusimene ni yakusawusya soni yakulingwa. (Mal. 3:22; Akolo. 1:11) Aganichisye chisyasyo cha Mlongo Rachel. Jwalakwe jwatengwiche mnope ŵamkwakwe paŵamlesile ulombela soni paŵalesile kumtumichila Yehofa mu ndaŵi ja mlili wa COVID-19. Ana Yehofa jwamkamuchisye chamtuli? Jwalakwe jwatite, “Yehofa jwangamuchisye kupitila mwa ŵakutumichila ŵakwe. Jemanjaji ŵaliji achimjangu ŵasyesyene mwamti ŵayikaga kukundola ndaŵi ni katema. Ŵambaga yakulya, kulembela mautenga soni malemba gakulimbikasya. Nambosoni ŵalosyaga ngope syakusangalala soni ŵapitilisye kusalila maloŵe gakulimbikasya gakuti Yehofa akusamala ya une. Ngusamyamichila mnope Yehofa ligongo lyakungunda kuŵa pasikati pa gulu jakwe jakunonyelana.”

17. Ligongo chichi Daudi ‘nganajogopaga chakusakala chilichose’?

¹⁷ “Une ngasinjogopa chakusakala chilichose pakuŵa ŵalakwe AMBUJE ali ni une.” Umi wa Daudi ndaŵi syejinji waŵaga pangosi, nambosoni jwalimbanaga ni adani ŵamachili. Nambope kumanyilila kuti Yehofa ŵamnonyelaga kwamkamuchisye kuti akalagasikaga nganisyo soni kudandawula mnope. Mwamti jwalakwe nganajogopaga ligongo jwamanyililaga kuti Yehofa akumkamuchisya soni kumnonyela. Ni ligongo lyakwe jwajimbile kuti “[Yehofa] ŵangulupwisye une ku yosope yinayijogopaga.” (Sal. 34:4) Atamose kuti ndaŵi sine Daudi wamkamulaga woga nambope kumanyilila kuti Yehofa ŵamnonyelaga kwamkamuchisye kumalana ni wogawo.

18. Ana yakusati Yehofa pakutusimichisya ya chinonyelo chakwe mpaka yitukamuchisye chamtuli patukutenda woga?

¹⁸ Ana kumanyilila kuti Yehofa akutunonyela mpaka kutulimbikasye chamtuli patusimene ni yakogoya?  Mlongo jwine lina lyakwe Susi jwalisoni mpayiniya, jwasasile muŵapikanile jwalakwe ni ŵamkwakwe paŵaliwuleje mwanagwawo. Jwatite, “Yindu yakogoya payikutendechele ukusasokonechela mnope nganisyo mwamti ukusaganisyaga kuti chindu chinesoni chakogoya kupunda pelepo chichikutendechele. Nambo chinonyelo chekulungwa cha Yehofa ni chachatukamuchisye kutamika mtima wetu pasi.” Mlongo Rachel, jwatumkolasile kundanda jula pakukumbuchila yiyamtendechele jwatite, “Chilo chine panalagasiche mnope nganisyo soni kudandawula, napopesile mwagumila kwa Yehofa. Ndaŵi jijojo nayiweni kuti Yehofa ŵangamuchisye. Mwamti mtima wangu watemi mmalo mpela mwakusatendela jwamkongwe pakumyalasya mwanache jwakwe, mwamti napatilesoni lugono. Nganimba ndiŵalile yayandendecheleyi.” Jwamkulungwa jwa mumpingo jwine lina lyakwe Tasos jwatemi yaka 4 ali mu ukayidi ligongo lyakukana kwinjila usilikali. Ana jwalakwe jwayiweni chamtuli kuti Yehofa ŵamnonyelaga soni kumsamalila? Jwalakwe jwatite, “Yehofa jwambaga yindu yanasosechelaga kupunda yanajembecheyaga. Yeleyi yangamuchisye kuti namkulupilileje mnope jwalakwe. Nambosoni msimu wakwe weswela wangamuchisye kuŵa jwakusangalala atamose kuti naliji mu ukayidi. Yeleyi yasimichisye kuti naga ngupitilisya kumtumichila nikuti yindu chiyinjendeleje chenene paumi wangu. Mwamti natandite kumtumichila jwalakwe mpela mpayiniya jwakutamilichika ndili kundende peko.”

AMŴANDICHILEJE MLUNGU JWAWO JWACHINONYELO

19. (a) Ana kumanyilila kuti Mlungu akusatunonyela mpaka kukwaye chamtuli yatukusaŵecheta m’mapopelo getu? (b) Ana ni maloŵe gapi gakulondesya chinonyelo chakwete Yehofa gagakusigayika pamtima? (Alole libokosi lyakuti “ Maloŵe Gagakusatukamuchisya Kuchiwona Chinonyelo Chakwete Yehofa.”)

¹⁹ Yakutendekwa yatukambileneyi yikulosya kuti Yehofa “Mlungu jwachinonyelo” ali ni m’weji. (2 Akoli. 13:11) Jwalakwe akusasangalalaga ni m’weji pajikapajika. Tuli ŵakusimichisya kuti ‘chinonyelo cha AMBUJE chitusyungulile.’ (Sal. 32:10) Naga tukuganichisya yakuti jwalakwe pakutunonyela ni kuti yichitukamuchisya kumwona jwalakwe kuŵa jusyesyene kwetuwe soni ni patuchimŵandichila mnope jwalakwe. Yeleyi mpaka yitukamuchisye kuti tuŵeje ŵagopoka kupopela kwa jwalakwe ni chakulinga chakuti apitilisye kutunonyela. Mpaka tumsalileje yakusawusya yetu ni chikulupi chakuti chatupikanichisye soni kuti ali jwakusachilila kutukamuchisya.—Sal. 145:​18, 19.

20. Ana chinonyelo chakwete Yehofa mpaka chitukamuchisye chamtuli kuŵa najo paunasi wambone?

²⁰ Mpela mwatukusatendela pakuŵandichila pa moto ndaŵi jakusisima, tuchiŵandichilejesoni chinonyelo cha Yehofa. Atamose kuti chinonyelo cha Yehofa chili chamachili nambo chili chambone paumi wetu. Kwende wosope tujitichisyeje chinonyelo cha Yehofa mwakusala kuti “Ngwanonyela AMBUJE.”—Sal. 116:1.