1-2. Ana ŵakutumichila ŵa Yehofa ŵakulupichika akusasimana ni yakusawusya yapi?

 YAKUSAWUSYA yampaka tusimane nayo mpaka yichenje umi wetu musi napula. Mwachisyasyo, m’bale jwine jwakulupichika lina lyakwe Luis a jwasimanikwe ni kansa. Mwamti dokotala jwamsalile kuti agambile kusigala ni myesi jamnono kuti awe. Nambosoni Monika ni ŵamkwakwe ŵamtumichilaga Mlungu mwakulipeleka mnope. Nambo kaneko, Monika jwayikopochele kuti ŵamkwakweŵa ŵaŵele ali mkutenda yindu mwangakulupichika kwandaŵi jelewu. Nambosoni Mlongo Olivia, jwanganaŵa peŵasa jwasalilidwe yakuti atile pa nyumba jakwe ligongo chayikaga chimbungo soni wula jamachili. Paŵawujile ŵajisimene nyumba jakwe jili jijonasiche. Kwa kandaŵi kamnono yasimanikwe kuti umi wa ŵandu ŵatwasasileŵa wachenjile mnope. Ana jemanjaji ŵapikene uli mu mtima? Ana wawojo pakwete pasimene ni yindu yakusawusya yayachenjile mnope umi wawo?

² Ŵakutumichila ŵakulupichika ŵa Yehofawe tukusasimana ni yakusawusya yayiwandile pachilambopa. Konjechesya pelepa, tukusapililasoni ŵandu ŵakusatuŵenga pakutusisya soni kutulagasya. Atamose kuti Yehofa jwangayilekasyaga yeleyi kututendechela nambo jwalakwe akusatusalila kuti chatukamuchisyeje pa yakusawusyayi. (Yes. 41:10) Ni chikamuchisyo cha jwalakwe, mpaka tukombole kuŵa ŵakusangalala, kusagula yindu mwalunda soni kuŵape ŵakulupichika kwa jwalakwe atamose patusimene ni yindu yeleyi. Mu nganiji chitukambilane yindu mcheche yakusatenda Yehofa pakutukamuchisya patusimene ni yindu yakusawusya mnope paumi wetu. Chitukambilanesoni yatukusosekwa kutenda m’weji kuti tupinduleje ni chikamuchisyo chakusapelekachi.

YEHOFA CHACHACHENJELA

3. Ana mpaka tulajeje kutenda chichi patukusimana ni yakusawusya?

³ Yakusawusya yayikusapagwa. Yikusatulema kuti tuganisye soni  kusagula chenene yakutenda patusimene ni chakusawusya. Ligongo lyakuti mpaka yitupwetecheje mnope mumtima soni mpaka tulagasicheje mnope nganisyo. Mpaka yiŵeje mpela tukwenda mkatikati mwa lipundugulu mwamti tukulepela kulola kwakwinjilila. Mwelemu ni mwaŵapikanile alongo ŵaŵili ŵatwakolasile ŵala pandaŵi jiŵasimene ni yakusawusya. Mlongo Olivia jwatite, “Nyumba jangu jili jijonasiche ni chimbungo nalipikene mpela kuti sokonechele mwamti nalagasiche mnope mumtima.” Pakwamba ya ungakulupichika wa ŵamkwakwe, Mlongo Monika jwatite, “Yambweteche mnope mumtima. Nalipikene mpela kuti jwinejwakwe asomile ni chipula chakutema mchilu mwangu. Natengwiche mnope mwamti nalepelaga kukamula chenene masengo ga pamlango. Nganinjembecheyaga kuti yeleyi mpaka yindendechele.” Ana Yehofa mpaka atukamuchisye chamtuli patusimene ni yakusawusya mpela yeleyi?

4. Mwakamulana ni Afilipi 4:​6, 7, ana Yehofa jwasasile kuti chachitutendela chichi?

⁴ Yakusatenda Yehofa pakutukamuchisya. Jwalakwe akutusalila yakutupa yakusayikolanga m’Baibulo kuti “mtendele wa Mlungu.” (Aŵalanje Afilipi 4:​6, 7.) Mtendelewu ukugopolela ungalagasika nganisyo soni mtima kwakukusayika ligongo lyakuŵa paunasi wambone ni Yehofa. Mtendele welewu “ukusapunda kupikanichisya yindu kulikose,” soni uli wapadela mnope. Ana pakwete palipikene myiyi panyuma pakupopela kwa Yehofa mwakutyochela pasi pa mtima? Yaŵatite pakulipikanayo ni wawuli “mtendele wa Mlungu” welewo.

5. Ana mtendele wa Mlungu ukusachenjela chamtuli nganisyo ni mitima jetu?

⁵ Pa Afilipi 4:7 pakusasalasoni kuti mtendele wa Mlungu welewu “wuchichenjela mitima jenu soni nganisyo syenu.” Liloŵe lya Chigiliki lyaŵaligopolele kuti ‘kuchenjela’ likusagopolela yakusatenda asilikali pakuwulolela msinda kuti adani akawujimuchila. Yeleyi yikusatendekasya kuti ŵandu ŵa mumsindamo agoneje mwangali woga pakumanyilila kuti asilikali akwalondela. Mwakulandana ni yeleyi, mtendele wa Mlungu ukusalondela mtima soni nganisyo syetu mwamti mtima soni nganisyo syetu yikusaŵa mmalo pakumanyilila kuti tuli pambone. (Sal. 4:8) Atamose yili mkuti yakusawusya yetu ngayikumala mwachitema mpela mwayaŵelele ni Hana, tukusapikanape chenene mumtima. (1 Sam. 1:​16-18) Yikusaŵa yangasawusyasoni kuganisya chenene soni kusagula yindu mwalunda nganisyo syetu pasitamilichiche.

6. Ana tukusosekwa kutenda chichi kuti mtendele wa Mlungu utukamuchisyeje? (Alole chiwulili.)

⁶ Yatukusosekwa kutenda. Patusimene ni yakusawusya tumŵilanjeje ‘jwakutuchenjela.’ Ana yeleyi yikugopelela chichi? Tupopeleje mpaka tuli tuwupatile mtendele wa Mlungu. (Luk. 11:9; 1 Ates. 5:17) M’bale Luis jwatumkolasile kundanda jula pakulondesya yijwatite jwalakwe ni ŵamkwakwe pakupilila ali asalilidwe kuti asigele ni myesi jamnono kuti awe, jwatite, “Pandaŵi jakusawusya mpela jeleji yatusawusyaga kusagula  yakutenda pa ngani jakulisamalila nambosoni ngani sine. Nambope twakombolaga kukola mtendele wa mumtima panyuma pakupopela kwa Mlungu.” M’baleju ni ŵamkwakwe ŵasasile kuti ŵapopelaga mwangalechesya kumŵenda Yehofa kuti ŵape mtendele wa munganisyo, mtima wakutamilichika soni lunda kuti asaguleje chenene yindu. Mwamti Yehofa ŵakamuchisye. Naga akulimbana ni yakusawusya apopeleje kwa Yehofa mwangalechesya mwamti chachiwuwona mtendele wa Yehofa uli mkuchenjela mtima soni nganisyo syawo.—Alo. 12:12.

YEHOFA CHACHALIMBISYA

7. Ana mpaka tulipikaneje uli patukusimana ni yakusawusya?

⁷ Yakusawusya yayikusapagwa. Kaganisye soni katende ketu ka yindu kakusasokonechela patusimene ni yakusawusya. Tukusalipikana mpela kuti jwine akututyosya pa chakusawusya chine ni kutujawusya pa chine. Mlongo Ana, jwamtukolasile kundanda jula jwasasile kuti jwalagasiche m’matala gakulekanganalekangana panyuma pa chiwa cha ŵamkwakwe. Jwalakwe jwatite, “Pandanda nalipikanaga kuti jwangali pakamula ni kaneko natandaga kulitendela chanasa. Pambesi pakwe yangumbusyaga ya chiwa cha ŵamkwangu yayandendekasyaga kuŵa jwakudandawula mnope.” Konjechesya pelepa, Mlongo Ana jwalagaga ni lipowo soni jwalakwe jwalagasikaga nganisyo pakuganisya kuti chasaguleje yakutenda pa ngani syele ŵamkwakwe ŵasisamalilaga chenene. Ndaŵi sine jwalipikanaga mpela ali panyasa pachikupuga chimbungo chamachili mnope. Ana Yehofa akusatukamuchisya chamtuli patutandite kulaga ni nganisyo mpela syelesi?

8. Mwakamulana ni 1 Petulo 5:​10, ana Yehofa akutusimichisya chichi?

⁸ Yakusatenda Yehofa pakutukamuchisya. Jwalakwe akutusalila kuti chachitukamuchisya kuti tukatenganyika. (Aŵalanje 1 Petulo 5:10.) Sitima pajisimene ni chimbungo chamachili pa nyasa mpaka chikasiche mwangasawusya. Kuti sitimaji jikakasika akusajipanganyichisya chindu kusi kwakwe chachikusakamuchisya kuti jikajigalwaga mwachisawawa ni mbungo. Yeleyi yikusakamuchisya kuti sitimajo jikatenganyikaga yayikusiyatendekasya ŵandu ŵakwesile kulipikana kuti ali pambone. Nambope yindu yeleyi yikusakamula chenene masengo sitimajo pajikwenda kwawula kusogolo. Mwakulandana ni yeleyi, Yehofa akusatukamuchisyasoni kuti tukatenganyikaga patukusimana ni yakusawusya naga tukupitilisya kumtumichila jwalakwe mwakulupichika.

9. Ana yindu yakuwungunyila mpaka yitukamuchisye chamtuli? (Alole chiwulili.)

⁹ Yatukusosekwa kutenda. Patukulagasika mnope nganisyo ligongo lya yakusawusya yatukusimana nayo, tutendeje yiliyose yampaka tukombole kuti tukaleka kutenda yakwayana ni kumtumichila Mlungu. Yili yisyene kuti pandaŵi mpela jeleji nganituŵa tukombwele kutenda yindu mpela mutwatendelaga pandanda. Nambope tukumbuchileje kuti Yehofa jwangajembecheyaga kuti tutendeje  yindu yanganituŵa tukombwele. (Alole Luka 21:​1-4) Pandaŵi jeleji, akaliŵalila kupataga ndaŵi jakulijiganya pajika Maloŵe ga Mlungu soni jakuganichisya yalijiganyisyeyo. Ligongo chichi kutenda yeleyi kuli kwakusosekwa? Kupitila mu gulu jakwe, Yehofa akusapeleka ngani sya m’Malemba syampaka situkamuchisye kuti tukatenganyika mwausimu. Kuti tupate ngani jakamulana ni yakusawusya yatukusimana nayo tukusosekwa kuwungunya pakamulichisya masengo yindu yayipali mu chiŵecheto chetu, mpela JW Library^® soni Kabuku Kakamuchisya Kuwungunya Ngani ka Mboni sya Yehofa. Mlongo Monika, jwatumkolasile kundanda jula jwasasile kuti jwajawulaga pa yindu yakuwungunyila kuti apate malangiso pakuyiwona kuti atandite kulagasika nganisyo. Mwachisyasyo, jwawungunyaga liloŵe lyakuti “kutumbila.” Ndaŵi sine jwawungunyaga liloŵe lyakuti “yangali chilungamo” kapena “kulupichika.” Kaneko jwaŵalangaga mpaka nganisyo syakwe sili sitamilichiche. Jwalakwe jwatite, “Panatandaga kuwungunya naŵaga ndili mkulagasika nganisyo nambo pangupitilisya kuŵalanga nalipikanaga kuti Yehofa angumbatile mwachinonyelo. Namanyililaga kuti Yehofa akumbikanichisya soni kuti akungamuchisya.” Chikamuchisyo chakutyochela kwa Yehofachi ni champaka chakamuchisyesoni wawojo kuti akatenganyikaga soni kuti akoleje mtendele wa mumtima.—Sal. 119:​143, 144.

YEHOFA CHACHAKAMUCHISYA

10. Ana mpaka tupikaneje uli mumtima panyuma pakusimana ni chakusawusya chekulungwa?

¹⁰ Yakusawusya yayikusapagwa. Ndaŵi sine mpaka tulagasicheje mnope nganisyo soni kulipikana kuti nganitukola machili panyuma pakuti tusimene ni yakusawusya yekulungwa. Mpaka tulipikaneje mpela mundu jwamwulale jwakwendela ndodo juŵawutukaga mnope pa mpikisano wakuwutuka. Mpaka tulajeje kukamula masengo gatwagatendaga mwangalajilila. Mwinesoni mpaka tuleche kumbila kutenda yindu yine yatwasangalalaga kuyitenda pandanda. Mwakulandana ni Eliya, mpaka tuyiwoneje kuŵa yakusawusya kwimuka, mwamti mpaka tugambeje kusaka kugona basi. (1 Ayi. 19:​5-7) Ana Yehofa akusatusalila kuti chachitutendela chichi pandaŵi jatukulipikana kuti nganitukola machili?

11. Ana Yehofa akusatukamuchisya m’litala line lyapi? (Salimo 94:18)

¹¹ Yakusatenda Yehofa pakutukamuchisya. Jwalakwe jwasasile kuti chachitukamuchisya. (Aŵalanje Salimo 94:18.) Mpela mwayikusaŵela kuti mundu jwakusatenda mpikisano wakuwutuka pawulele akusasosekwa kumkamuchisya kuti akombole kwenda, m’wejisoni mpaka tusosekwe chikamuchisyo kuti tupitilisye kumtumichila Yehofa. Mwamti pandaŵi mpela jelejo, Yehofa akutusimichisya kuti, “Une, AMBUJE Mlungu jwenu,  ngumlimbisya ni kumsalila kuti, ‘Mkatenda woga; tinjimkamuchisya.’” (Yes. 41:13) Mwenye Daudi jwapatile chikamuchisyo chelechi. Pandaŵi jine ali asimene ni yakusawusya soni adani ŵakwe, jwalakwe jwamsalile Yehofa kuti, “Mkono wawo wamlyo unjenjele.” (Sal. 18:35) Nambo ana Yehofa akusatukamuchisya chamtuli?

12. Ana Yehofa mpaka ŵakamulichisye masengo ŵani pakusaka kutukamuchisya pandaŵi janganitukola machili?

¹² Ndaŵi syejinji Yehofa akusatukamuchisya mwakwatendekasya ŵandu ŵane kuti atukamuchisye. Mwachisyayo, pandaŵi jine Daudi gali gammalile machili, mjakwe jwapamtima Yonatani jwapite kukumkamuchisya soni kumlimbikasya. (1 Sam. 23:​16, 17) Nambosoni pandaŵi jine, Yehofa ŵamsagwile Elisha kuti akamkamuchisye Eliya. (1 Ayi. 19:​16, 21; 2 Ayi. 2:2) Masiku aganosoni, Yehofa akusakamulichisya masengo ŵandu ŵa mwiŵasa mwetu, achimjetu kapena achakulungwa ŵa mumpingo pakusaka kutukamuchisya. Nambope, patukulaga mnope ligongo lya yakusawusya yatusimene nayo, mpaka tusacheje kwamba kutama kwajika. Kutenda yeleyi nganikuŵa kulemwa. Nambo ana mpaka tutende chichi kuti tupate chikamuchisyo chakutyochela kwa Yehofa?

13. Ana tukusosekwa kutenda chichi kuti Yehofa atukamuchisyeje? (Alole chiwulili.)

¹³ Yatukusosekwa kutenda. Tulinjelinjeje kumalana ni nganisyo syakusaka kutama kwajika. Patutemi kwajika, tukusatanda kuganisya mwakupelembela, mwamti tukusatanda ganichisya mnope yakusawusya yetu. Kaganisye keleka mpaka kalongolele pa yindu yampaka tusagule kutenda. (Mis. 18:1) Yisyene kuti ndaŵi sine wosopewe tukusasosekwa kandaŵi kakutama pajika, mnopemnope patusimene ni yakusawusya yekulungwa. Nambope, naga tukutama kwajika kwandaŵi jelewu, mpaka tusyembane ni chikamuchisyo chakusaka kutupa Yehofa kupitila mwa ŵandu ŵakusaka kwakamulichisya masengo. Myoyo, atamose tuli mkulaga mnope ni yakusawusya yatukusimana nayo, mpaka tutende chenene kupochela chikamuchisyo kutyochela kwa ŵandu ŵa mwiŵasa mwetu, achimjetu, soni achakulungwa ŵa mumpingo. Twawoneje jemanjajo kuti ali litala lyakukamulichisya masengo Yehofa pakusaka kutukamuchisya.—Mis. 17:17; Yes. 32:​1, 2.

YEHOFA CHACHIMYALASYA

14. Ana ni yakutendekwa yapi yakogoya yampaka tusimane nayo?

¹⁴ Yakusawusya yayikusapagwa. Ndaŵi sine mpaka tusimane ni yindu yakutesya woga. Baibulo jikusalosya kuti ndaŵi sine ŵakutumichila ŵane ŵa Mlungu ŵalagasikaga nganisyo soni kutenda woga ligongo lya adani ŵawo kapena yakusawusya yine. (Sal. 18:4; 55:​1, 5) Mwakulandana ni yeleyi, m’wejisoni ŵane mpaka atusisyeje. Jemanjaji  mpaka aŵe achimjetu ŵa kusukulu, ŵa kumasengo, ŵandu ŵa mwiŵasa mwetu, kapena achakulungwakulungwa ŵa boma. Nambosoni mpaka tutendeje woga kuti chituwe patukulwala. Pandaŵi mpela syelesi, mpaka tuyiwoneje kuti nganitukola chitela chakamula. Ana Yehofa mpaka atukamuchisye chamtuli pandaŵi mpela syelesi?

15. Ana lilemba lya Salimo 94:19 likutusimichisya ya chichi?

¹⁵ Yakusatenda Yehofa pakutukamuchisya. Jwalakwe akusatumyalasya soni kututamika mtima mmalo. (Aŵalanje Salimo 94:19.) Yeleyi mpaka tuyilandanye ni kamsikana kakakutenda woga soni kulepela kugona ligongo lya kulindima soni kumesya kwa njasi. Kaneko babagwe akwika ni akukanyakula myala mpaka kali kagonile. Atamose kuti kulindimako nganikuŵe kumala, kamsikanako kakulipikana kuti kali pambone ligongo lyakuti babagwe akanyakwile ni kukakumbatila. M’wejisoni patusimene ni yindu yakutesya woga, mpaka tusosekwe kuti Atati ŵetu ŵakwinani atunyakule mwakuwanichisya mpaka woga wetuwo uli umasile. Ana tukusosekwa kutenda chichi kuti Yehofa atumyalasye m’litala lyeleli?

16. Ana tukusosekwa kutenda chichi kuti Yehofa atumyalasyeje? (Alole chiwulili.)

¹⁶ Yatukusosekwa kutenda. Tupopeleje kwa Yehofa mwakutamilichika soni tuŵalanjeje Maloŵe gakwe ndaŵi syosope. (Sal. 77:​1, 12-14) Naga akutenda yeleyi, nikuti pasimene ni yindu yakulagasya nganisyo, chandanda chachiganisya yakumŵenda Yehofa kuti ŵakamuchisye. Amsalileje Yehofa yindu yakudandawula soni yayikwajogoya. Kaneko, ampikanileje jwalakwe mwakuŵalanga Maloŵe gakwe, ni chachiyiwona yakutenda jwalakwe pakwamyalasya. (Sal. 119:28) Pakuŵalanga Baibulo kapena mabuku getu, mpaka apate malo ganegakwe gampaka galimbikasye pandaŵi jakutenda woga. Mwachisyasyo, mpaka alimbikasidwe pakuŵalanga buku ja Yobu, Masalimo, soni Misyungu nambosoni maloŵe ga Yesu gagakusasimanikwa m’buku ja Mateyu chaputala 6. Pakupopela kwa Yehofa soni kuŵalanga Maloŵe gakwe, ni pachachiyiwona yakuti jwalakwe pakwamyalasya.

17. Ana tukusosekwa tukakayichilaga ya chichi?

¹⁷ Tukakayichilaga yakuti Yehofa chachitukamuchisya pandaŵi jatusimene ni yakusawusya. Jwalakwe ngasatuleka jika. (Sal. 23:4; 94:14) Yehofa jwasasile kuti chachituchenjela, kutulimbisya, kutukamuchisya, soni kutumyalasya. Pakwamba ya Yehofa, pa Yesaya 26:3 pakusati, “Ŵalakwe AMBUJE, akusapeleka mtendele usyesyene kwa ŵele ŵakwete umi wakutamilichika, ligongo lya chikulupi chawo pa ŵalakwe.” Myoyo, ndaŵi syosope amdalileje Yehofa, soni akamulichisyeje masengo yindu yosope yapeleche jwalakwe pakusaka kwakamuchisya. Naga akutenda yeleyi, chachipatasoni machili atamose pandaŵi jakusawusya.