1. Ana Yehofa ŵatendele yamtuli wawojo?

ANA yaŵele uli kuti aŵe jwa Mboni sya Yehofa? Mwine ŵapikene “ngani syambone” kutyochela kwa achinangolo ŵawo, achimjawo ŵakumasengo, ŵakusukulu kapena ŵa Mboni ŵaŵalalichilaga nyumba ni nyumba. (Maliko 13:10) Kaneko mundu jwine jwalipeleche kuti ŵajiganyeje Baibulo. Pandaŵi jiŵalijiganyaga ŵatandite kumnonyela Yehofa soni ŵamanyilile kuti jwalakwe akusiŵanonyela wawojo. Yehofa ni juŵalongolele mu usyesyene soni apano mpela jwakulijiganya jwa Yesu Klistu, akwete chembecheyo chakutama ni umi wangamala. (Yoh. 6:44) Ngatukukayichila kuti akusayamichila kuti Yehofa ŵakamulichisye masengo mundu jwine kuti ŵajiganye usyesyene. Akusayamichilasoni kuti jwalakwe ŵakundile kuti aŵe jwakutumichila jwakwe.

2. Ana chitukambilane chichi munganiji?

² Ligongo lyakuti twawumanyilile usyesyene, tukwete upile wakwakamuchisya ŵane kuti tujendeje nawo yimpepe palitala lyakwawula ku umi. Mpaka tuyiwoneje kuŵa yangasawusya kulalichila nyumba ni nyumba. Nambo kuti tutandisye lijiganyo lya Baibulo mpaka jiŵe ngani jekulungwa. Ana wawojo akusayiwonasoni myoyo? Naga yili myoyo, nganiji chijakamuchisye kuti amalane ni chakusawusyachi. Chitukambilane yampaka yitulimbikasye kuti twakamuchisyeje ŵandu ŵane kuŵa ŵakulijiganya ŵa Yesu. Chitulolesoni yampaka tutende kuti tumalane ni chakusawusya chilichose champaka chitulepelekasye kutendesya majiganyo ga Baibulo. Nambo chandanda kwende tukambilane ligongo lyakwe ngatukusosekwa kuŵa ŵakulalichilape nambo twajiganyejesoni ŵandu ngani syambone.

3. Ligongo chichi tukusalalichilaga?

³ Yesu ali pachilambo chapasi ŵapele ŵakulijiganya ŵakwe masengo gakola mbali siŵili. Chandanda, jwalakwe ŵasalile ŵakulijiganya  ŵakwe kuti akamuleje masengo gakulalichila ngani syambone sya Uchimwene soni ŵasalile mwampaka akamulile masengoga. (Mat. 10:7; Luk. 8:1) Mwachisyasyo, Yesu ŵasalile ŵakulijiganya ŵakwe yampaka atende pandaŵi jele ŵandu akukana kapena kwitichisya utenga wa Uchimwene. (Luk. 9:2-5) Yesu ŵasalile ŵakulijiganya ŵakweŵa kuti masengo gakulalichila gachikula soni kuti ‘chachilalichila chilambo chosope chapasi.’ (Mat. 24:14; Mase. 1:8) Myoyo, chinga yaliji yakuti ŵandu chapikanileje utenga waŵalalichilaga kapena iyayi, nambope ŵasosekwaga kwasalila ŵandu ya Uchimwene wa Mlungu soni yawuchikwanilisya.

4. Mwakamulana ni lilemba lya Mateyu 28:18-20, ana tukusosekwa kutenda chindu chine chapi kupwatika pakulalichila utenga wa Uchimwene?

⁴ Ana ni chindu chine chapi chele Yesu ŵalamwile ŵakulijiganya ŵakwe kuti atendeje? Yesu ŵasalile ŵakulijiganya ŵakwe kuti ŵajiganyeje ŵandu kuti akuyeje yindu yosope yiŵajiganyisye jwalakwe. Nambo ana yili yisyene kuti masengo gakulalichilaga gasosekwaga kukamulidwa ni Aklistu ŵa m’yaka 100 yandanda basi mpela mwakusaŵechetela ŵandu ŵane? Iyayi. Yesu jwasasile kuti masengoga gachipitilisyape mpaka mbesi jachilambo chapasi chino. (Aŵalanje Mateyu 28:18-20.) Yesu jwasasile lilamusi lyeleli pandaŵi jiŵawonechele kwa ŵakulijiganya ŵakwe ŵakupunda 500. (1 Akoli. 15:6) Musagamisi sya Yohane, Yesu jwalosisye kuti ŵakulijiganya ŵakwe wosope ŵasosekwaga kwakamuchisya ŵandu ŵane kuti ammanyilile Yehofa.—Chiw. 22:17.

5. Mwakamulana ni 1 Akolinto 3:6-9, ana Paulo jwalandenye chamtuli masengo gakulalichila ni gakwiganya?

⁵ Ndumetume Paulo jwalandenye masengo gakulalichila ni mgunda. Jwalakwe jwalosisye kuti tukusosekwa kutenda yejinji, mmalo mwagamba kupanda mbeju. Nambosoni jwakumbwisye Aklistu ŵa ku Kolinto kuti, “Une napandile mbeju nipo Apolo ŵasijitilile . . . Jemanja mli mgunda wa Mlungu.” (Aŵalanje 1 Akolinto 3:6-9.) Myoyo mpela ŵamasengo ŵa mumgunda wa Mlungu, ngatukusosekwa kwamba kupanda mbeju, nambo tusijitileje soni kusilolaga mwasikulila. (Yoh. 4:35) Nambope tukusamanyilila kuti Mlungu ni jwakusatendekasya kuti mbejusi sikule.

6. Ana masengo getu gakulalichila gakusapwatikapo yindu yapi?

⁶ Tukusosasosa ŵandu ŵali ŵakuŵajilwa “umi wangamala.” (Mase. 13:48) Nambo kuti aŵe ŵakulijiganya wa Yesu tukusosekwa kwakamuchisya kuti, (1) apikanichisyeje yakulijiganya, (2) akamulaneje nayo yakulijiganyayo soni (3) ayikamulichisyeje masengo yindu yosope yalijiganyisye m’Baibulo. (Yoh. 17:3; Akolo. 2:6, 7; 1 Ates. 2:13) Ŵandu wosope mumpingo mpaka ŵakamuchisye ŵakulijiganya Baibulo, mwakwalosya chinonyelo soni kwatendekasya kuŵa ŵakugopoka payiche kumisongano jampingo. (Yoh. 13:35) Jwakwiganya akusosekwa kulimbichila mnope kuti amkamuchisye jwakulijiganya Baibulo kuti aleche yikulupi soni ndamo sine syakusakala. (2 Akoli. 10:4, 5) Pakusajigala ndaŵi kuti mundu achenje ndamo syakwe ni kwika pakubatisidwa. Nambo kutenda yeleyi kukusaŵa kwakamuchisya mnope.

7. Ana ni chichi champaka chitulimbikasye kukamula nawo masengo gakulalichila soni kwajiganya ŵandu?

⁷ Ligongo chichi tukusakamula masengo gakulalichila soni kwajiganya ŵandu kuti aŵe ŵakulijiganya ŵa Yesu? Ligongo lyandanda lili lyakuti tukusamnonyela Yehofa. Patukukuya lilamusi lya kulalichila soni kwajiganya ŵane kuti aŵe ŵakulijiganya ŵa Yesu, yikusalosya kuti tukusamnonyela Mlungu. (1 Yoh. 5:3) Aganichisye ayi, wawojo akusiŵalalichilaga ŵandu ligongo lyakuti akusamnonyela Yehofa. Ana lilamusi lyeleli lili lyangasawusya kulipikanila? Ngaŵa myoyo. Ana paŵagambile kutanda kulalichila panyumba jandanda ŵatesile woga? Mwangakayichila woga wakamwile. Nambo ŵamanyilile kuti Yesu akusaka kuti wawojo akamuleje masengoga, mwamti ŵapikanile lilamusili. Soni mkupita kwandaŵi yaŵele yangasawusya kuti  atande kukamula masengo gakulalichila. Nambi uli pakwamba yakutendesya lijiganyo lya Baibulo? Ana akusatenda woga? Mwine. Nambope naga ali amŵendile Yehofa kuti amasye woga soni kuŵa ŵakulimba mtima kuti atandisye lijiganyo lya Baibulo, jwalakwe chachakamuchisya kuti akombole kutenda yeleyi.

8. Mwakamulana ni Maliko 6:34, ana ni chindu chine chapi champaka chitukamuchisyeje kuti twajiganyeje ŵane?

⁸ Chaŵili, kwanonyela kwetu ŵandu kukusatutendekasya kuti twajiganyeje usyesyene. Pandaŵi jine Yesu ni ŵakulijiganya ŵakwe ŵapesile ligongo lyakuti ŵalalichile mnope. Jemanjaji ŵasosaga malo gakuti akapumule, nambope gulu ja ŵandu jakuyisye. Ligongo lya chanasa Yesu jwatandite kwalalichila ŵanduwo “yindu yejinji.” (Aŵalanje Maliko 6:34.) Jwalakwe jwalipeleche mnope atamose kuti jwapesile. Jwatesile yeleyi ligongo jwamanyililaga chenene mwaŵapikanilaga mumtima ŵanduŵa. Jwalakwe jwawonaga jemanjaji kuti akulaga mnope soni nganakola chembecheyo mwamti jwaliji jwakusachilila kwakamuchisya. Mwelemu ni mwaŵelelesoni ŵandu masiku agano. Kawoneche kawo kakatulambusyaga. Yisyesyene yakwe yili yakuti jemanjaji ali mpela ngondolo syasisokonechele soni syanganisikola mkuchinga. Paulo jwasasile kuti ŵandu ŵeleŵa ngakummanyilila Mlungu soni nganakola chembecheyo. (Aef. 2:12) Jemanjaji akwenda pa “litala lya kuja kuchonasiko.” (Mat. 7:13) Myoyo, patukwawonasoni mwaŵelele ŵandu ŵa mudela jetu jatukusalalichila, chinonyelo soni chanasa chikusatutendekasya kuti twakamuchisye. Litala lyambone mnope lyampaka twakamuchisye jemanjaji lili kwajiganya Baibulo.

9. Mwakamulana ni Afilipi 2:13, ana Yehofa mpaka ŵakamuchisye chamtuli?

⁹ Komboleka akutenda woga kutandisya lijiganyo lya Baibulo ligongo akumanyilila kuti kumjiganya mundu kukusasaka ndaŵi jejinji. Naga wawojosoni akusayiwona myoyo, amsalileje Yehofa mwakupikanila mumtima. Amŵendeje jwalakwe kuti ŵape mtima ŵakusachilila kupata lijiganyo lyakuti atendesyeje. (Aŵalanje Afilipi 2:13.) Ndumetume Yohane ŵatusimichisye kuti Mlungu akusajangaga mapopelo gagali gakamulana ni chakulinga chakwe. (1 Yoh. 5:14, 15) Myoyo, mpaka aŵe ŵakusimichisya kuti Yehofa mpaka ŵakamuchisye kuti aŵe ŵakusachilila kukamula nawo masengo gakwajiganya ŵandu kuti aŵe ŵakulijiganya ŵa Yesu.

10-11. Ana ni chichi champaka chitulepelekasye kutendesya lijiganyo lya Baibulo?

¹⁰ Ngatukusagawona mwachibwana masengo gaŵatulamwile Yesu, gakwajiganya ŵandu kuti aŵe ŵakulijiganya ŵakwe. Tukusakamulape masengoga atamose tuli mkusimana ni yakusawusya yampaka yituwujikasye munyuma. Kwende tukambilane yakusawusya yine soni yampaka tutende kuti tumalane nayo.

¹¹ Ndaŵi sine mpaka tulipikaneje kuti ngatukutenda yejinji ligongo lya mwayiŵelele yindu paumi wetu. Mwachisyasyo, ŵakulalichila ŵane ali ŵachekulupe soni ŵane akusalwalalwala. Ana wawojo ni mwayiŵelelesoni pa umi wawo? Naga yili myoyo, aganichisye yindu yine yatulijiganyisye mundaŵi ja kolonafayilasi. Tuyiweni kuti yili yakomboleka kutendesya majiganyo ga Baibulo pakamulichisya masengo yipangiso yamakono. Myoyo yili yakomboleka kutendesya lijiganyo lya Baibulo ali chitamile panyumba jawo. Nambo pana umbone winesoni wampaka apate. Ŵandu ŵane akusaŵa ŵakusachilila kulijiganya Baibulo, nambo yikusaŵa yakusawusya kwasimana pamlango pandaŵi jatukulalichila. Nambope ŵane akusasimanikwa panyumba cha kundaŵi mnope kapena pakuswele. Ana wawojo mpaka atende yakomboleka kuti ŵalalichileje ŵandu pandaŵi jeleji? Paja nombe Yesu ŵamjiganyisye Nikodemo chilo, ndaŵi jeleji ni jijaliji jambone kwa Nikodemo.—Yoh. 3:1, 2.

12. Ana ni yindu yapi yampaka yitukamuchisye kuti tukakayichilaga yakuti mpaka tuŵe jwakwiganya jwambone?

¹² Mwine mpaka tuganisyeje kuti nganituŵa  tukombwele kutandisya lijiganyo lya Baibulo. Mpaka tuyiwoneje kuti tukusosekwa kumanyilila yejinji soni tukole kaje luso mpela jwakwiganya, mkanituŵe kumjiganya mundu jwine. Naga mwelemu ni mwakusayiwonela wawojo aganichisye yindu yitatu yampaka yakamuchisye kuti akalikayichilaga. Chandanda, Yehofa akusiŵawona wawojo kuti ali ŵakuŵajilwa kwajiganya ŵandu ŵane Baibulo. (2 Akoli. 3:5) Chaŵili, Yesu jwele akwete “ulamusi wosope kwinani ni pasi pano,” ŵapele wawojo udindo wakuti ajiganyeje. (Mat. 28:18) Chatatu, akusosekwa kumdalila Yehofa soni ŵandu ŵane kuti ŵakamuchisyeje. Yesu ŵadalilaga yaŵamjiganyisye Atati ŵakwe, m’wesoni mpaka tutende yeleyi. (Yoh. 8:28; 12:49) Nambosoni mpaka amŵende jwakulolela kagulu ka utumiki, mpayiniya jwakuŵajilwa kapena jwakulalichila jwakumanyilila yejinji kuti ŵakamuchisye kutandisya lijiganyo lya Baibulo. Chindu chine champaka atende chili kwakuya ŵakulalichila ŵane pakwawula kukutendesya lijiganyo lya Baibulo.

13. Ligongo chichi tukososekwa kuŵa ŵakusachilila kulijiganya matala gasambano ga kajiganye?

¹³ Ndaŵi sine mpaka yiŵe yakusawusya kukamulichisya masengo matala gasambano soni yindu yakwiganyila yayikopweche kwene. Litala lyakamulichisya masengo pakutendesya majiganyo ga Baibulo apano lichenjile. Kuti tutendesye lijiganyo lya Baibulo pakamulichisya masengo buku ja Asangalaleje Mpaka Kalakala, tukusakosechela soni kutendesya mwakulekangana ni muyaŵelaga munyumamu. Tukusasosekwa kuŵalanga ndime syamnono kuti ndaŵi jejinji jiŵeje jakambilana ni jwakulijiganyajo. Patukwiganya tukusosekwa tukamulichisyeje masengo mafidiyo soni mapologalamu gane mpela JW Library^®. Naga ngakumanyilila kakamulichisye masengo ka yindu yeleyi mpaka amŵende mundu jwine kuti ŵajiganye. Ŵanduwe tukusasangalala kutenda yindu m’litala lyatusyoŵelele. Ngajikusaŵa ngani jamasanje kuti tusyoŵelele matala gasambano gakutendela yindu. Ni chikamuchisyo cha Yehofa soni cha ŵandu ŵane mpaka ŵakamuchisye kuti agasyoŵelele matala gasambano soni kugawona masengo gakwajiganya ŵandu kuŵa gakusangalasya. Mwakamulana ni yajwaŵechete mpayiniya jwine kalijiganye keleka kali “kakusangalasya kwa mundu jwakulijiganya soni jwakwiganya.”

14. Ana tukusosekwa kukumbuchila chichi patukulalichila mudela jakusawusya mnope? Nambi lilemba lya 1 Akolinto 3:6, 7, mpaka litulimbikasye chamtuli?

¹⁴ Komboleka tukusalalichila mu dela jele yikusaŵa yakusawusya kutanda kwajiganya ŵane Baibulo. Ŵandu ŵatukwalalichila mpaka awonecheje kuti ngakusaka kupikanila utenga wetu kapena kutusisya kwene. Ana ni chichi champaka chitukamuchisye kuti tukole nganisyo syakuŵajilwa patukulalichila mudela mpela jeleji? Tukumbuchileje kuti ŵandu ŵali m’chilambo chakusakalachi umi wawo mpaka uchenje mwachitema. Ŵane ŵaŵakanaga utenga wetu mpaka atande kumanyilila yakusosechela yawo yausimu. (Mat. 5:3) Sonitu ŵane ŵaŵakanaga ndaŵi syosope kupochela mabuku getu, mkupita kwandaŵi akusachenga ni kutanda kulijiganya Baibulo. Tukumanyilila kuti Yehofa ni ali msyene yagungula. (Mat. 9:38) Yehofa akusasaka kuti tupandeje mbeju soni kwitila. Nambo jwalakwe ni jwakusatendekasya kuti sikule. (1 Akoli. 3:6, 7) Yili yakulimbikasya kumanyilila kuti atamose nganitukola lijiganyo lya Baibulo apanopano, Yehofa chachitupa upile ligongo lyakulimbichila kwetu, ngaŵa ligongo lya winji wa ŵandu ŵatukwajiganya. *

15. Ana Yehofa akusapikana wuli mumtima naga mundu akulijiganya Baibulo soni akutenda yindu mwakamulana ni yalijiganyisye?

¹⁵ Yehofa akusasangalala naga mundu jwine alijiganyisye usyesyene soni akwajiganya ŵane yalijiganyisyeyo. (Mis. 23:15, 16) Jwalakwe akusasangalala mnope pakulola masengo gagakukamulidwa  masiku agano. Mwachisyasyo, atamose kuti m’chaka cha utumiki cha 2020 kwapalisoni ulwele wa kolona, nambope abale ni alongo ŵakombwele kutendesya majiganyo ga Baibulo gakwana 7,705,765. Yeleyi yakamuchisyesoni kuti ŵandu ŵakwana 241,994 alipeleche kwa Yehofa soni kubatisidwa. Ŵandu ŵabatisidwe kweneŵa chiŵajiganyejesoni Baibulo achimjawo kuti aŵe ŵakulijiganya ŵa Yesu. (Luk. 6:40) Mwangakayichila patukukamula masengo gakwajiganya ŵandu, Yehofa akusaŵaga jwakusangalala.

16. Ana tukusosekwa kukola chakulinga chambone chapi?

¹⁶ Masengo gakwajiganya ŵandu gali gakusawusya. Nambo ni chikamuchisyo cha Yehofa mpaka tukamule masengoga pakwakamuchisya ŵandu kuti atande kwanonyela Atati ŵetu ŵakwinani. Ana yili yakomboleka kuti akole chakulinga chakumjiganya mundu Baibulo? Mpaka tusimonje ni yampaka yitendekwe patulinjile kumwusya mundu jwalijose jwatusimene najo naga mpaka asangalale kuti tumjiganyeje Baibulo. Mpaka tuŵe ŵakusimichisya kuti Yehofa mpaka atupe upile ligongo lya kulimbichila kwetu.

17. Ana pachiŵa yakuyichisya yamtuli naga tukukombola kutendesya majiganyo ga Baibulo?

¹⁷ Tukwete upile wekulungwa wakulalichila soni kwajiganya ŵandu ŵane usyesyene. Masengo gelega gakusatukamuchisya kuti tuŵeje ŵakusangalala. Ndumetume Paulo jwaŵakamuchisye ŵandu ŵajinji ku Tesalonika kuti aŵe ŵakulijiganya ŵa Yesu, jwasasile mujwapikanilaga mumtima. Jwalakwe jwatite, “Ana pa meso pa Ambuje ŵetu Yesu, chichi tichichiŵa chembecheyo chetu, lukondwa lwetu, ni mbote jakuti uwe chitupochele, Ambuje Yesu patachiyikapo? Ana ngaŵa jemanjamwe? Kusyene jemanja mli ŵa lumbili ni lukondwa lwetu.” (1 Ates. 2:19, 20; Mase. 17:1-4) Abale ni alongo ŵajinji masiku agano akusasangalalasoni chamti myiyi. Mlongo Stéphanie ni ŵamkwakwe ŵakamuchisye ŵandu ŵajinji kuti abatisidwe. Mlongoju jwatite, “Pangali chindu chine chachikusasangalasya mnope kupunda kwakamuchisya ŵandu kuti alipeleche kwa Yehofa.”