1-2. Ana maloŵe ga Yehofa ga pa Yesaya 65:16, 17, gakusatulimbikasya chamtuli kuti tukawujila munyuma?

MSONGANO wachigawo wa mu 2017, wakwete mtwe wakuti “Akawujila Munyuma.” Msonganowu watukamuchisye yampaka tutende kuti tupilileje yakusawusya yatukusimana nayo. Apano yimasile yaka mcheche chitendele msonganowu, soni tukupitilisyape kupilila yakusawusya yatukusimana nayo m’chilambo chakusakalachi.

² Ana ni yakusawusya yapi yaŵele ali mkulaga nayo pachangakaŵapa? Ana chili chiwa cha jwamwiŵasa mwawo kapena mjawo jwapamtima? Ulwele wawukujigala ndaŵi jelewu? Yakusawusya yakwika ligongo lya ukalamba? Ngosi syachilengedwe, yachiwawa kapena kulagasidwa? Ana kapena akulaga ni yakusawusya yayipali ligongo lya ulwele wa kolonafayilasi (COVID-19)? Tukwembecheya ndaŵi jele yakusawusya yosopeyi kuchiŵa kwangali soni ngasituyikumbuchilaga.—Aŵalanje Yesaya 65:16, 17.

3. Ana tukusosekwa kutenda chichi apano? Nambi ligongo chichi tukusosekwa kutenda yeleyi?

³ Umi wetu apano m’chilambochi uli wakusawusya mnope. Sonitu mwine kusogoloku mpaka tusimane ni yakusawusya yakogoya mnope kupunda yatukusimana nayo apano. (Mat. 24:21) Kusala yisyene, tukusosekwa kupitilisya kulijiganya yindu yampaka yitukamuchisyeje kuŵa ŵakupilila. Yili myoyo ligongo Yesu jwatite, “Kupitila mkupilila kwenu timchikola umi usyesyene.” (Luk. 21:19) Kuganichisya yakutenda achimjetu pakumalana ni yakusawusya yakulandana ni yetu, kukusatukamuchisya kuti tupilileje mnope.

4. Ligongo chichi mpaka tusale kuti Yehofa ali chisyasyo chambone pangani jakupilila?

⁴ Ana ni ŵani ŵali chisyasyo chambone mnope pangani jakupilila? Ali Yehofa Mlungu. Ana yeleyi yikwasimonjesya? Naga ali aganichisye chenene mpaka ayiwone kuti kwanga kweleku kuli kwakuŵajilwa. Chilambochi jwakulamulila ali Satana, soni jwalakwe ni jwakutandikasya yakusawusya yosope. Nambotu Yehofa akwete  machili gakumachisya yakusawusya yosopeyi ndaŵi jilijose. Agamba kwembecheya ndaŵi jakuŵajilwa jakuti chatendele yeleyi. (Alo. 9:22) Apano Yehofa akuyipilila yosope yayikutendekwayi mpaka pajichikwanila ndaŵiji. Kwende tukambilane yindu 9, yasagwile Yehofa kuti ayipilileje.

5. Ana lina lya Mlungu linyosyedwe chamtuli? Ana wawojo akupikana uli mumtima ni yeleyi?

⁵ Ŵandu ŵane ngakusalichimbichisya lina lya Yehofa. Nambo Yehofa akusalinonyela lina lyakwe, soni akusasakaga kuti ŵandu alichimbichisyeje. (Yes. 42:8) Kwa yaka yakupunda 6,000, ŵandu aŵele ali ngakulichimbichisya linali. (Sal. 74:10, 18, 23) Yosopeyi yatandile mumgunda wa Edeni, pandaŵi jele Satana jwasasile kuti Mlungu akumjima Adamu ni Hawa yindu yambone yayikatendekasisye kuti aŵeje ŵakusangalala. (Gen. 3:1-5) Kutyochela pandaŵiji, Satana aŵele ali mkumlambuchisya Yehofa kuti akusiŵajima ŵandu yindu yakusosechela. Yesu yamkwayiye mnope ligongo lya kunyosyedwa kwa lina lya Atati ŵakwe. Paligongo lyeleli ŵajiganyisye ŵakumkuya ŵakwe kuti apopeleje chamti myi, “Atati ŵetu ŵakwinani, lina lyawo lichimbichikwe.”—Mat. 6:9.

6. Ligongo chichi Yehofa akundile kuti papite ndaŵi jelewu mkanaŵe kumasya ngani jakwayana ni ulamusi wakwe?

⁶ Ŵandu ŵajinji akusasisya ulamusi wakwe. Yehofa ni jwali jwakuŵajilwa kulamulila kwinani soni chilambo chapasi. Nambosoni litala lyakusakamulichisya masengo jwalakwe pakulamulila lili lyambone mnope. (Chiw. 4:11) Satana jwagatendekasisye malayika soni ŵandu kuganisya kuti Mlungu ngakuŵajilwa kuŵa jwakulamulila. Nambotu ngani jeleji kuti jimanyiche yisyesyene yakwe, mpaka pasosekwe kandaŵi nditu. Ni ligongo lyakwe Mlungu alosisye lunda mwakukunda kuti papite ndaŵi jelewu ni chakulinga chakuti ŵandu alilolele jika kuti nganaŵa akombwele kulilamulila jika. (Yel. 10:23) Kuwusimana mtima kwa Yehofa chikukamuchisye kuti ajimasye chenene ngani ja ulamusiji, mwakuti ngasijitandilasoni. Yehofa chachilosya kuti Uchimwene wakwe ni wampaka utendekasye kuti ŵandu atameje mwamtendele pachilambo chapasichi.

7. Ana ni ŵani ŵaŵamjimuchile Yehofa? Ana Yehofa chachitenda uli ni ŵandu ŵeleŵa?

⁷ Ŵane mwa ŵanache ŵakwe ŵamjimuchile. Yehofa jwapanganyisye malayika soni ŵandu ŵangali chakulemwa chilichose. Nambo lilayika line lina lyakwe Satana (gopolela kuti “Jwakusisya”) jwatendekasisye Adamu ni Hawa ŵaŵaliji ŵamlama kuti amjimuchile Yehofa. Kaneko nombe malayika gane soni ŵandu ŵane ŵamjimuchile Mlungu. (Yud. 6) Panyuma pakwe ŵandu ŵamtundu wa Aisalaeli, ŵaŵaliji ŵasagulidwe ni Mlungu msyenejo, ŵamlesile jwalakwe ni kutanda kulambila milungu jaunami. (Yes. 63:8, 10) Yeleyi yamsakalisye mnope Yehofa. Nambope jwapilile soni akupililape mpaka pandaŵi jele chachajonanga ŵakwimuchila wosope. Yeleyi yichiyikasya mtendele kwa ŵakutumichila ŵakwe ŵakulupichika, ŵele akupilila yimpepe ni Yehofa yakusakala yosope yayikutendekwa m’chilambochi.

8-9. Ana ni yaunami yapi yayikuŵechetedwa yakwamba Yehofa? Ana tukusatenda uli ni yindu yaunamiyi?

⁸ Unami wa Satana. Jwalakwe jwaŵechete yindu yaunami yakwamba Yobu soni ŵakutumichila ŵa Yehofa ŵane ŵakulupichika kuti akusamlambila Mlungu pakusaka yineyakwe. (Yob. 1:8-11; 2:3-5) Masiku aganosoni Satana akuŵechetape yindu yaunami yakwamba ŵakutumichila ŵa Mlungu. (Chiw. 12:10) Nambo mpaka tulosye kuti Satana ali jwaunami, mwakupilila yakulingwa yatukusimana nayo soni kuŵape ŵakulupichika kwa Yehofa ligongo lyakuti tukusamnonyelaga. Mpela muyaŵelele ni Yobu, tuchipochela upile ligongo lyakupilila kwetu.—Yak. 5:11.

⁹ Satana akusakamulichisya masengo achimlongola ŵa dini syaunami kuti aŵecheteje kuti Yehofa ali jwangasa, soni kuti ni jwakusatandisya yakusawusya yakusimana nayo ŵandu. Ŵane akusalambusya kuti ŵanache pawile, yikusaŵa kuti Mlungu ni juŵajigele pakusaka kuti ajonjechesye  malayika kwinani. Welewu uli mwano wekulungwa, ligongo yatuyimanyi ni yakuti Mlungu ali jwachinonyelo. Mundu pakulwala mnope kapena jwine pawile, ngatukusamjimba magambo Mlungu. Mmalo mwakwe tukusakulupilila kuti lisiku line Mlungu chachimasya yilwele soni kwajimusya ŵawe. Tukusalalichila ŵandu ŵakwete mtima wakusachilila kupikana yakwamba mwaŵelele Yehofa. Yeleyi yikusakamuchisya kuti Yehofa amjanje chenene jwalijose jwakumnyosya jwalakwe.—Mis. 27:11.

10. Ana lilemba lya Salimo 22:23, 24, likulosya yamtuli yakwamba Yehofa?

¹⁰ Yakusawusya yakusimana nayo ŵakutumichila ŵakwe. Yehofa ali Mlungu jwachanasa. Jwalakwe ngakusasangalalaga pakutuwona tuli mkulila ligongo lya yakusawusya yatukusimana nayo mpela kulagasidwa, kulwala soni ungali umlama wetu. (Aŵalanje Salimo 22:23, 24.) Yehofa yikusampweteka mnope patukusimana ni yakusawusya. Jwalakwe ali jwakusachilila kuyimasya, soni ngasatendela mwine. (Awanichisye ni Ekisodo 3:7, 8; Yesaya 63:9.) Jikwika ndaŵi ‘jichachipukuta misosi josope mmeso [mwetu], ngasipapagwa kulila, chanasa kapena kupikana yipwetesi.’—Chiw. 21:4.

11. Ana Yehofa akupikana wuli pakwamba ya ŵakutumichila ŵakwe ŵakulupichika ŵaŵawile?

¹¹ Chiwa cha ŵakutumichila ŵakwe. Ana Yehofa akusapikana wuli mumtima pakuganichisya ya achalume soni achakongwe ŵakulupichika ŵaŵawile? Jwalakwe akusasachilila kwawonasoni jemanjaji. (Yob. 14:15) Aganichisye yakuti Yehofa pakusachilila kumwonasoni Abulahamu juŵaliji mjakwe jwapamtima. (Yak. 2:23) Nambi uli pakwamba ya Mose jwele ŵaŵechetaga ni Yehofajo “pameso ni pameso”? (Eks. 33:11) Yehofa akwembecheya kumpikana Daudi soni ŵamasalimo ŵane ali mkwimba nyimbo syambone mnope syakumlumba jwalakwe. (Sal. 104:33) Atamose kuti jemanjaji ŵawile, nambo Mlungu nganiŵaliŵalila. (Yes. 49:15) Jwalakwe akukumbuchila chilichose chakwamba jemanjaji. Paja Baibulo jikusati,  “Kwa [Yehofa] ŵandu wosope ali ŵachijumi.” (Luk. 20:38) Lisiku line chachajimusya jemanjaji. Yehofa chachitandilasoni kupikana mapopelo ga jemanjaji gakutyochela pasi pamtima soni kukujitichisya kulambila kwawo. Naga wawojo pana mlongo mjawo juŵawile, kupikana yeleyi mpaka kwalimbikasye mnope.

12. Ana ni yindu yapi yayikusampweteka mnope Yehofa m’masiku gambesi gano?

¹² Ŵakusakala akusiŵatendela ngasa ŵandu ŵane. Pandaŵi jele kwimuchila kwatendekwe mumgunda wa Edeni, Yehofa jwamanyilile kuti yindu yichisakala mnope mkaniyiŵe kuwujila muyaŵelele pandanda. Yehofa akusaŵengana ni yakusakala, yangali chilungamo soni yachiwawa yayikutendekwa masiku agano. Ndaŵi syosope akusiŵatendela chanasa ŵandu ŵakusawoneka kuti ali ŵangali machili soni ŵakusawoneka kuti nganaŵa akombwele kulichenjela. Ŵane mwa jemanjaji ali ŵanache soni achakongwe ŵali ŵamasije. (Sak. 7:9, 10) Yehofa yikusamkwaya mnope pakwawona ŵakutumichila ŵakwe ali mkutendeledwa yindu yangali chilungamo soni kuŵichidwa mundende. Aŵeje ŵakusimichisya kuti Yehofa akusiŵanonyela jemanja wosope ŵakupilila pampepe ni jwalakwe yindu yayikutendekwa m’chilambomu.

13. Ana yindu yakusakala yapi yayikutendekwa pachilambopa? Nambi Mlungu chachitenda chichi ni yindu yeleyi?

¹³ Ŵandu akutenda ndamo syakunyalaya. Atamose kuti Mlungu ŵatupanganyisye m’chiwanichisyo chakwe, nambope Satana akwatendekasya ŵandu kuti atendeje ndamo syakusakala. Mundaŵi ja Nowa, Mlungu “piŵayiweni kuti yitendo ya ŵandu pachilambo chapasi yili yakusakala mnope,” jwalakwe ‘ŵadandawile kuti ŵapanganyisye ŵandu ni kwaŵika pachilambo chapasi, nipo yeleyi yamsakalisye mumtima.’ (Gen. 6:5, 6, 11) Ana pakwikaga apano yindu yili uli? Apano Satana ali jwakusangalala mnope pakwawona ŵandu ali mkutenda ndamo syachikululu chamtundu uliwose. Yeleyi yikupwatikapo kugonana kwa ŵandu ŵaŵili ŵanganaŵa paulombela, kapena kwa achalumepe panesoni achakongwepe. (Aef. 4:18, 19) Jwakutumichila jwa Yehofa patesile ulemwa, Satana akusaŵa jwakusangalala mnope. Kuwusimana mtima kwakulosya Yehofaku pakuchiyika pambesi, chachilosya kuti akusaŵengana ni yakusakala yosope yayikutendekwayi.

14. Ana ŵandu akutenda chichi ni yindu yaŵapanganyisye Mlungu pachilambopa?

¹⁴ Ŵandu akonanga yindu yachilengedwe. Kupwatika pa yakutenda ŵandu ‘pakwalamulila achimjawo mwangalwe,’ jemanjaji ngakuchisamalila chenene chilambochi pampepe ni yinyama yele Yehofa ŵayilesile mmyala mwawo kuti ayisamalileje. (Jwak. 8:9; Gen. 1:28) Ŵasayansi ŵane akusasala kuti yakutenda ŵandu chiyitendekasye kuti mu yaka yamnono yayikwika kusogoloku, mitundu jine ja yinyama soni yakumela chijisimanikwe kuti jimasile. Mwamti ngatukusasimonga jemanjaji pakusala kuti yindu yachilengedwe yili pangosi. Nambo chakusangalasya chili chakuti Yehofa jwasasile kala kuti jichiyika “ndaŵi jakuti ajonanje ŵandu ŵele ŵajonasile chilambo chapasi.” Nambosoni chachitendekasya chilambochi kuti chiŵe paladaiso.—Chiw. 11:18; Yes. 35:1.

15-16. Ana chichi champaka chitutendekasye kuti tupilileje mpela mwakusatendela Yehofa? Apeleche chisyasyo.

¹⁵ Aganichisye yakusawusya yosope yaŵele mkupilila Atati ŵakwinani kwa yaka masausande gejinji. (Alole libokosi lyakuti “ Yindu Yakuyipilila Yehofa.”) Ndaŵi jilijose, Yehofa chamasye yakusakala yayili mchilambochi. Nambo kuwusimana mtima kwakulosya jwalakwe, kuli kwakutukamuchisya mnope m’weji. Kuti tuyipikanichisye yeleyi, kwende tuganichisye chisyasyo achi. Tuwanichisye kuti liŵasa line alisalile kuti mwanache jwawo jwasigele panandi kupagwa, chapagwe ali jwana yakusawusya yine. Kaneko mkupita kwandaŵi jamnono mwanachejo chachiwa. Nambope mwanacheju papagwile achinangolo ali ŵakusangalala pakumsamalila atamose kuti mwanachejo akwete yakusawusya yine. Ligongo lya chinonyelo chakwete  achinangoloŵa, akulingalinga kupilila yakusawusya yosope pakumkamuchisya mwanachejo kuti mwine akole umi wakusangalala.

¹⁶ Mwakulandana ni yeleyi, ŵanache wosope ŵa Adamu ni Hawa ŵapagwile ali ŵangali umlama. Nambope Yehofa akusiŵanonyela soni kwasamalila ŵanache ŵeleŵa. (1 Yoh. 4:19) Mwakulekangana ni achinangolo ŵakukolanjidwa mu chisyasyo chila, Yehofa mpaka amasye yakusawusya yakusimana nayo ŵanache ŵakwe. Jwalakwe asagwile ndaŵi jakuti chamasye yakusawusya yosope. (Mat. 24:36) Myoyo chinonyelo chakwete Yehofa chitutendekasyeje kuŵa ŵakupilila ndaŵi syosope mpela mwakusatendela jwalakwe.

17. Ana maloŵe gakusala ya Yesu ga pa Ahebeli 12:2, 3, mpaka gatulimbikasye chamtuli kuti tupilileje?

¹⁷ Yehofa ali chisyasyo chambone pangani ja kupilila. Nombe Yesu jwakuyiye chisyasyo cha Atati ŵakwe. Pandaŵi jele Yesu ŵayiche pachilambopa, jwapilile yindu yachipongwe, yakutesya sooni ni kumkomela pachitela chakulagachisya ligongo lya kutuwombola m’weji. (Aŵalanje Ahebeli 12:2, 3.) Chisyasyo cha Yehofa ni chichamkamuchisye Yesu kuti akombole kupilila. M’wejisoni mpaka chitukamuchisye kuti tukombole kupilila.

18. Ana lilemba lya 2 Pet. 3:9, likulosya kuti kuwusimana mtima kwa Yehofa kukamuchisye kuti patendekwe yindu yapi?

¹⁸ Aŵalanje 2 Petulo 3:9. Yehofa akumanyilila ndaŵi jambone jakuti amasye yakusakala yayili m’chilambochi. Kuwusimana mtima kwa Yehofa kukamuchisye kuti ŵandu ŵajinji ammanyilile, soni apanopano likuga lyekulungwa lya ŵandu likumlambila jwalakwe. Ŵanduŵa ali ŵakusangalala kuti Yehofa aŵele mkupilila kwandaŵi jelewu, mpaka jemanjaji kwika pakupagwa, kulijiganya kumnonyela Yehofajo soni kulipeleka kwa jwalakwe. Umbone wa kuwusimana mtima kwa Yehofa uchiwonechela mnope pandaŵi jele chachapaga upile ŵandu ŵapilile mpaka kumbesi.

19. Ana tukusosekwa kuŵa ŵakusimichisya kutenda chichi? Ana tuchipata mbote jamtuli?

¹⁹ Tukusalijiganya kutyochela kwa Yehofa yampaka tutende kuti tuŵeje ŵakusangalala patukupilila yakusawusya. Atamose kuti yipali yakusawusya yejinji soni yakutesya chanasa yatandikasisye Satana, nambope Yehofa akupitilisyape kuŵa jwakusangalala. (1 Tim. 1:11) M’wejisoni mpaka tuŵe ŵakusangalala patukwembecheya mwakuwusimana mtima kuti Yehofa chaliswejesye lina lyakwe, kulosya kuti ali jwakuŵajilwa kulamulila, kwajonanga ŵakutenda yakusakala soni kutyosya yipwetesi yosope yayili pachilambopa. Kwende tuŵe ŵakusimichisya kupilila tuli mkumanyilila kuti nombe Atati ŵetu ŵakwinani akupililasoni. Naga tukutenda yeleyi tuchikuwona kwanilichikwa kwa maloŵe aga gakuti, “Jwana upile mundu jwakusapimilila [kapena kuti kupilila] ali mkulinjidwa, ligongo naga apundile tachipochela umi, jeleji jili mbote ja m’chilanga cha Mlungu kwa ŵandu wosope ŵakusamnonyela.”—Yak. 1:12.