1. Ana achinangolo akusakola mtima wakusaka kwatendela chichi ŵanache ŵawo?

 TUKUMANYILILA kuti jemanja achinangolo akwete mtima wakusaka kwakamuchisya ŵanache ŵawo kuti ammanyilile soni kumnonyela Yehofa. Nambotu Mlungu ali jwangawoneka. Sano ana mpaka ŵakamuchisye chamtuli ŵanache ŵawo kuti amwoneje Yehofa kuŵa jusyesyene soni kumŵandichila jwalakwejo?—Yak. 4:8.

2. Ana achinangolo mpaka ŵajiganye chamtuli ŵanache ŵawo ndamo syakwete Yehofa?

² Litala lyambone mnope lyakwakamuchisya ŵanache kummanyilila Yehofa lili kwajiganya Baibulo. (2 Tim. 3:14-17) Nambope, Baibulo jikusasalasoni litala line lyampaka ŵanache alijiganyile yakwamba Yehofa. Buku ja Misyungu jikusasala ya mtati jwakumkumbusya mwanache jwakwe jwamlume kusosekwa kwakuganichisya ndamo syakwete Yehofa syasikusawonechela kupitila mu yindu yajwapanganyisye. (Mis. 3:19-21) Myoyo, munganiji chitukambilane yampaka atende achinangolo pakwajiganya ŵanache ŵawo ndamo syakwete Yehofa pakamulichisya masengo yindu yachilengedwe.

3. Ana achinangolo mpaka atende uli pakwakamuchisya ŵanache ŵawo kulijiganya yakwamba Yehofa?

³ Baibulo jikusasala kuti “ndamo sya Mlungu syangawoneka ni meso sikusawonechela chenene kutyochela pa yindu yaŵapanganyisye.” (Alo. 1:20) Ngatukukayichila kuti jemanja achinangolo mkusasangalalaga pampite ni ŵanache ŵenu kukulola yindu yachilengedwe. Myoyo akamulichisyeje masengo ndaŵi jelejo pakwakamuchisya ŵanache ŵawo kulola kukamulana kwakupali pasikati pa “yindu yaŵapanganyisye” ni ndamo syambone mnope syakwete Yehofa. Sambano kwende tulole yampaka alijiganye achinangolo kutyochela pa chisyasyo cha Yesu.

4. Ana Yesu jwakamulichisye masengo chamtuli yindu yachilengedwe pakwajiganya ŵakumkuya ŵakwe? (Luka 12:24, 27-30)

 ⁴ Alole yajwatesile Yesu pakamulichisya masengo yindu yachilengedwe pakwajiganya ŵakumkuya ŵakwe. Pandaŵi jine, jwalakwe jwaŵendile ŵakulijiganya ŵakwe kuti alole makungulu soni maluŵa. (Aŵalanje Luka 12:24, 27-30.) Yikakomboleche Yesu kukamulichisya masengo chisyasyo cha chinyama soni chakumela chilichose. Nambo jwalakwe jwasagwile kukamulichisya masengo chijuni soni maluŵa yindu yayaliji yakumanyika chenene kwa ŵakulijiganya ŵakwewo. Komboleka kuti Yesu pajwasalaga ya yinduyi, jemanjajo ŵagawonaga makungulu gali mkuguluka mwinani soni ŵagawonaga maluŵa gesalale gali mwitinji. Agambe ganichisya muyaŵelele pandaŵijo Yesu pajwaŵechetaga yakwamba yinduyi kwineku ali mkuyilanjila. Ana jwalakwe jwatesile chichi panyuma pakuyisala yindu yeleyi? Yesu jwajiganyisye ŵakumkuya ŵakwe lijiganyo lyakusosekwa mnope lyakuti Atati ŵawo ŵakwinani ali ŵakoloŵa makono soni ŵachinonyelo. Yeleyitu yalosyaga kuti Yehofa ngasalepela kwapa yakulya soni yakuwala ŵakutumichila ŵakwe ŵakulupichika, mpela mwakusatendela ni makungulu soni maluŵa ga mwitinji.

5. Ana ni yisyasyo yine yapi yampaka akamulichisye masengo achinangolo pakwajiganya ŵanache yakwamba Yehofa?

⁵ Ana jemanja achinangolo mpaka asyasye chamtuli chisyasyo cha Yesu pakwajiganya ŵanache ŵawo? Mpaka amsalile mwanache jwawo ya chindu chilichose chachilengedwe chakusasangalala nacho wawojo, chinga chinyama kapena chakumela. Pakutenda yeleyi, amsalilejesoni mwanachejo yindu yatukulijiganya yakwamba Yehofa kutyochela pa yindu yeleyo. Mpaka amwusyesoni yakwamba chinyama kapena chakumela chakusachinonyela. Pakumjiganya mwanache jwawo yindu yakwamba Yehofa pakamulichisya masengo yindu yachilengedwe yakusayinonyela mwanachejo, mpaka yiŵe yangasawusya kuti ayipikanichisye.

6. Ana mpaka tulijiganye chichi kutyochela pa chisyasyo cha mamagwe Christopher?

⁶ Ana achinangolo akusosekwa kumalilaga ndaŵi jawo jejinji pakuwungunya yakwamba yinyama kapena yakumela yineyakwe kuti ayikamulichisye masengo pakwajiganya ŵanache ŵawo yakwamba Yehofa? Yesu nganalondesya yindu yakusawusya mnope yakwamba mwagakusalila makungulu kapena mwagakusakulila maluŵa. Yili yisyene kuti ndaŵi sine ŵanache ŵawo mpaka asangalale mnope pakwajiganya yindu yakusokoka mnope pakwamba ya yindu yachilengedwe. Nambo ndaŵi sine kwajiganya pakamulichisya masengo litala lyangasawusya kapena kwamba kwawusya chiwusyo changasawusya kwanga mpaka kwakamuchisye ŵanachewo kumanyilila mfundo jakusosekwa mnope. Apikane yindu yine yakusakumbuchilaga m’bale jwine lina lyakwe Christopher yayatendekwaga ali mwanache. Jwalakwe jwatite, “Mama ŵakamulichisyaga masengo maloŵe gangasawusya pakusaka kutukamuchisya kuti tuyamichileje yindu yachilengedwe yayitusyungulile. Mwachisyasyo, patupite kukwenda chiŵandika matumbi ŵagambaga kuŵecheta kuti, ‘Alole ukulu wa matumbigo soni kusalala kwakwe. Ana yeleyi ngayikulosya kuti Yehofa ali jwakusimonjesya?’ Soni patupite ku nyasa ŵagambaga kuŵecheta kuti, ‘Mlole yagakuti matumbelago. Ana yeleyo ngayikulosya kuti Yehofa ali jwamachili mnope?’” M’baleju jwasasilesoni kuti, “Maloŵe gangasawusya gaŵakamulichisyaga masengo mama gatuyikaga mnope pamtima.”

7. Ana mpaka ŵajiganye chamtuli ŵanache ŵawo kuti aganichisyeje mnope yindu yachilengedwe?

⁷ Ŵanache ŵawo pakukula, mpaka ŵajiganye kuganichisya mnope yindu yachilengedwe soni kulola yayikwajiganya yinduyo pakwamba ya ndamo syakwete Yehofa. Mpaka akamulichisye masengo chindu chimo chiŵapanganyisye Yehofa ni kwawusya kuti, “Ana chinduchi chikwajiganya chichi pakwamba ya Yehofa?” Mpaka asangalale mnope kumanyilila yakuganisya ŵanachewo.—Mat. 21:16.

8. Ana achinangolo ŵa Chiyisalayeli ŵakwete upile wakutenda chichi paŵajendaga “mwitala”?

⁸ Achinangolo ŵa Chiyisalayeli ŵasalilidwe kuti ŵajiganyeje ŵanache ŵawo malamusi ga Yehofa pakwenda “mwitala.” (Det. 11:19) Ku Isalayeli kwapali misewu jejinji jakupita mwitinji. Mwamti ŵandu  pakwenda mmisewuji ŵayiwonaga yinyama, yijuni, soni maluŵa gejinji. Myoyo, maŵasa ga Chiyisalayeli pagajendaga mmisewuji gakolaga upile wakwajiganya ŵanache ŵawo pakamulichisya masengo yindu yakusangalasya yaŵapanganyisye Yehofa. Mwakulandana ni yeleyi, jemanjasoni achinangolo akwete upile wakwajiganya ŵanache ŵawo pakamulichisya masengo yindu yachilengedwe. Alole mwatendele yeleyi achinangolo ŵane.

9. Ana akulijiganya chichi kutyochela kwa Punitha soni Katya?

⁹ Jwamkongwe jwine lina lyakwe Punitha jwakusatama mumsinda wekulungwa ku India jwatite, “Patupite kumusi kukwalola ŵandu tukusakola upile wakwakamuchisya ŵanache ŵetu kulijiganya yejinji yakwamba Yehofa pakamulichisya masengo yindu yachilengedwe. Mwamti ngusayiwona kuti ŵanache ŵangu akusapikanichisya chenene yindu yachilengedwe patutyosile kutawuni ni kwawula kumusi.” Jemanja achinangolo, mkusosekwa kumanyilila kuti ŵanache ŵenu ngasaliŵalila ya ndaŵi jimwapite kukulola malo ganegakwe gakusangalasya. Mlongo jwine jwa ku Moldova lina lyakwe Katya jwatite, “Ndaŵi syakusangalasya mnope paumi wangu syangusakumbuchila, sili ndaŵi syanapite kukulola yindu yachilengedwe yalumo ni achinangolo ŵangu. Ngusayamichila mnope kuti achinangolo ŵangu nganaleka kunjiganya kuti nammanyilile chenene Yehofa kupitila mu yindu yachilengedwe.”

10. Ana achinangolo mpaka atende chichi naga nganaŵa akombwele kwawula kumalo ganegakwe kukulola yindu yachilengedwe? (Alole libokosi lyakuti “ Yindu Yakwakamuchisya Achinangolo.”)

¹⁰ Nambi wuli naga nganaŵa akombwele kwawula kukulola yindu yachilengedwe kumalo ganegakwe? M’bale jwine jwakusatama ku India lina lyakwe Amol jwatite, “Kudela jatukusatamaga achinangolo akusatanganidwaga mnope ni masengo. Nambosoni kwawula kukulola yindu yachilengedwe kumalo ganegakwe kuli kwakudula mnope. Nambope tukusakombola kulola yindu yachilengedwe yayikusatujiganya ndamo syakwete Yehofa, mwakwima pamalo gakwela mnope kapena kwawula ku ngalango syamwanamwana.” Naga akulolechesya, atamose chiŵandika pamlango pawo mpaka ayiwone yindu yine yachilengedwe yampaka ŵalosye ŵanache  ŵawo. (Sal. 104:24) Komboleka mpaka ayiwone yindu mpela yijuni, tulombo, yakumela soni yine yejinji. Karina jwakusatama ku Germany jwatite, “Mama akusanonyela maluŵa, myoyo panaliji mwanache, mama ŵanonyelaga kulanjila maluŵa gakusalala mnope patukwenda yalumo.” Jemanja achinangolo mpaka ŵajiganye ŵanache ŵawo pakamulichisya masengo mafidiyo soni mabuku gejinji gakusala yachilengedwe gajikusakoposya gulu jetu. Mwangasamala kandu ni mwayiŵelele yindu paumi wawo, mpaka akombole kwakamuchisya ŵanache ŵawo kulola yindu yaŵapanganyisye Mlungu. Sambano kwende tulole ndamo sine syakwete Yehofa syampaka ŵasalile ŵanache ŵawo.

11. Ana achinangolo mpaka ŵakamuchisye chamtuli ŵanache ŵawo kumanyilila chinonyelo chakwete Yehofa?

¹¹ Kuti ŵakamuchisye ŵanache ŵawo kumanyilila chinonyelo chakwete Yehofa, mpaka ŵasalile yayikusatendaga yinyama pakusamalila ŵanache ŵakwe mwachinonyelo. (Mat. 23:37) Mpaka ŵasalilesoni yindu yine yachilengedwe yakusayinonyelaga wawojo. Karina jwatumkolasile jula, jwasasile kuti, “Patupite kukwenda ni mama ŵasalilaga kuti njime ni kulolechesya kusalala kwa liluŵa linelyakwe, kaneko ŵasalilaga kuti kusalala kwa liluŵalyo kukulosya chinonyelo chakwete Yehofa. Atamose kuti papitile yaka yejinji, apano ngusasangalalagape ni kusalala kwa maluŵa gejinji. Maluŵaga gakusangumbusyaga chinonyelo chekulungwa chakwete Yehofa kwa m’weji.”

12. Ana achinangolo mpaka ŵakamuchisye chamtuli ŵanache ŵawo kumanyilila lunda lwakwete Mlungu? (Salimo 139:14) (Alole chiwulili.)

¹² Ŵakamuchisyeje ŵanache ŵawo kumanyilila lunda lwakwete Mlungu. Yehofa ali jwalunda mnope kutupunda m’weji. (Alo. 11:33) Mwachisyasyo, mpaka ŵalondechesye ŵanache ŵawo mwagakusachenjela mesi kuŵa mawunde kaneko mawundego nikuŵasoni mesi. (Yob. 38:36, 37) Mpaka ŵasalilesoni yaŵatite Mlungu pakuchipanganya chilu chetuchi mwakusimonjesya. (Aŵalanje Salimo 139:14.) Yeleyi ni yajwatesile mtati jwine lina lyakwe Vladimir. Jwalakwe jwatite, “Lisiku line mwanache jwetu jwamlume jwagwile pa njinga jakwe ni jwawulele. Nambo pali pagambile kupita masiku gamnono, liŵangalyo lyaposile. Uneji ni ŵamkwangu twapatilepo upile wakumlondechesya yaŵatite Yehofa pakuchipanganya chilu chetuchi kuti chikomboleje kulilinganya chisyene. Twamsalile kuti yindu yakusapanganyaga ŵandu nganiyiŵa yikombwele kulilinganya jika. Twampele chisyasyo cha galimoto kuti pajijonasiche nganijiŵa jikombwele kulilinganya jika. Yeleyi yamkamuchisye mwanache jwetu kupikanichisya kuti Yehofa ali jwalunda mnope.”

13. Ana achinangolo mpaka ŵakamuchisye chamtuli ŵanache ŵawo kumanyilila machili gakwete Mlungu? (Yesaya 40:26)

 ¹³ Yehofa akusatuŵenda kuti tuloleje kwinani ni ganichisya ya machili gakwe gakusimonjesya gagakusatendekasya kuti yindu yakusimonjesya yaŵayipanganyisye kwinani yiŵeje mmalo gakwe. (Aŵalanje Yesaya 40:26.) Mpaka ŵalimbikasye ŵanache ŵawo kuti aloleje kwinani ni ganichisya yindu yakuyiwona. Alole yajwasasile mlongo jwine jwa ku Taiwan lina lyakwe Tingting pajwakumbuchilaga ndaŵi jiŵaliji mwanache. Jwalakwe jwatite, “Pandaŵi jine, mama ŵanjigele kwawula kukulola yindu yachilengedwe kwatwagonile kukoko. Kumaloku twakwete upile wakulola chenene ndondwa ligongo kwaliji kuli kwangali yindu yejinji yayikatulepelekasisye kulola chenene kwinani. Pandaŵi jelejo, nadandawulaga mnope naga chingombole kumtumichila Yehofa mwakulupichika ligongo lya yitendo ya achimjangu ŵa kusukulu. Mama ŵangamuchisye kuti nganichisyeje ya machili gaŵakamulichisye masengo Yehofa pakupanganya ndondwasyo. Ŵasalilesoni kuti ngumbuchileje kuti jwalakwe mpaka akamulichisye masengo machili gagogo pakungamuchisya kuti ngombole kulimbana ni yakulingwa. Panyuma pakuganichisya yindu yachilengedwe paulendowu, nammanyilile chenene Yehofa, mwamti yanimbikasisye kuti mbitilisye kumtumichila jwalakwe.”

14. Ana achinangolo mpaka akamulichisye masengo chamtuli yindu yachilengedwe pakwakamuchisya ŵanache ŵawo kumanyilila kuti Yehofa ali Mlungu jwakusangalala?

¹⁴ Yindu yaŵapanganyisye Yehofa yikusalosya kuti jwalakwe ali jwakusangalala mwamti akusasaka kuti m’wejisoni tusangalaleje. Ŵasayansi ŵayikopochele kuti yinyama yejinji kupwatikapo yijuni soni somba yikusang’andaga. (Yob. 40:20) Ana pakwete paŵaweni ŵanache ŵawo ali mkusechelela paŵayiweni yinyama yili mkung’anda? Komboleka ŵanachewo ŵasechelelaga paŵatuweni tuyome tuli mkugulukaguluka kapena paŵatuweni tupwa tuli mkugwisyana pasi. Myoyo pandaŵi jine pachachawona ŵanache ŵawo ali mkusechelela ligongo lyakuti ayiweni yinyama yili mkung’anda, chiŵasalile kuti yayikutenda yinyamayo yikulosya kuti Mlungu jwatukusamtumichila ali jwakusangalala.—1 Tim. 1:11.

15. Ana chichi champaka chakamuchisye achinangolo kumanyilila nganisyo sya ŵanache ŵawo? (Misyungu 20:5) (Alole chiwulili.)

¹⁵ Ndaŵi sine, yikusaŵa yakusawusya kwa achinangolo kumanyilila yakusawusya yakusimana nayo ŵanache ŵawo. Naga yili myoyo kwa jemanja, akusosekwa kwakamuchisya ŵanache ŵawo kuŵa  ŵagopoka kusala yayili mumtima mwawo. (Aŵalanje Misyungu 20:5.) Achinangolo ŵane akusayiwona kuŵa yangasawusya kutenda yeleyi papite kukulola yindu yachilengedwe yimpepe ni ŵanache ŵawo. Ligongo limo lyalikusilyatendekasya kuyiwona kuŵa yangasawusya lili lyakuti kumaloku kukusaŵa kuli kwangali yindu yejinji yampaka yasokonasye ŵanache soni achinangolowo. Mtati jwine jwa ku Taiwan lina lyakwe Masahiko jwasasilesoni ligongo line. Jwalakwe jwatite, “Patutyosile kunyumba ni ŵanache ŵetu ni kwawula kumalo ganegakwe, chinga kukulola matumbi kapena kukulola nyasa, wosopewe tukusaŵa ŵagopoka. Yeleyi yikusiyatendekasya ŵanache ŵetu kuŵa ŵagopoka kutusalila yayili munganisyo mwawo.” Nombe Katya jwatumkolasile jula jwatite, “Pambelwiche kusukulu, mama ŵanjigalaga kwawula kumalo gakusalala mnope. Patuli kumalo gelego, naŵaga jwagopoka kwasalila yindu yayandendechelaga kusukulu soni yakusawusya yanasimanaga nayo.”

16. Ana kulola yindu yaŵapanganyisye Yehofa kukusakamuchisya chamtuli maŵasa?

¹⁶ Yindu yaŵapanganyisye Yehofa mpaka yikamuchisye maŵasa kuŵa gakusangalala soni gakulimba. Baibulo jikusasala kuti pana “ndaŵi jakuseka” soni “ndaŵi jakusangalala.” (Jwak. 3:1,  4) Yehofa jwapanganyisye malo gejinji gakusalala pachilambopa kwampaka tukatende yindu yatukusayinonyela. Maŵasa gejinji gakusanonyela kwawula kukusangalala kumalo kwakuli yindu yachilengedwe yejinji, mpela ku ngalango, ku matumbi, nambosoni ku nyasa. Ŵanache ŵane akusanonyela kuwutuka soni kung’anda kumalo gakusalala. Ŵane akusanonyela kuja kulola yinyama, kuja koga ku lusulo kapena ku nyasa. Kusala yisyene ukusaŵa upile wekulungwa mnope kutenda yindu yakusangalasya kwineku tuli mkulola yindu yakusalala yaŵapanganyisye Yehofa.

17. Ana achinangolo mpaka ŵakamuchisye chamtuli ŵanache ŵawo kusangalala ni yindu yaŵapanganyisye Mlungu?

¹⁷ M’chilambo chasambano, achinangolo ni ŵanache chachikola upile wekulungwa wakusangalala ni yindu yaŵapanganyisye Yehofa kulekangana ni kalakose. Mwakulekangana ni masiku agano, pandaŵi jelejo ngasitujogopaga yinyama kapena yinyama kutujogopa m’weji. (Yes. 11:6-9) Tuchisangalalaga ni yindu yaŵapanganyisye Yehofa kwa umi wetu wosope. (Sal. 22:26) Nambope, jemanja achinangolo ngamkusosekwa kwembecheya kuti mpaka chijiyiche ndaŵi jelejo kuti chimwakamuchisyeje ŵanache ŵenu kusangalala ni yindu yaŵapanganyisye Yehofa. Pakukamulichisya masengo yindu yachilengedwe pakwajiganya ŵanache ŵawo yakwamba Yehofa, jemanjajo chachikamulana ni yaŵaŵechete Mwenye Daudi kuti wawo Yehofa “pangali masengo gakulandana ni masengo ga ŵalakwe.”—Sal. 86:8.