1-2. Ana ndaŵi syejinji chikusatendekwaga chichi ŵandu pakubatisidwa? Ana chitukambilane chichi munganiji?

 ANA pakwete paŵaweni ŵandu ŵakusaka kubatisidwa? Komboleka ŵapikene ali mkwanga mwakusimichisya yiwusyo yiŵili. Mwinesoni ŵaweni ŵachibale ŵawo soni achimjawo ali mkusangalala. Kombolekasoni kuti ŵakubatisidwawo paŵachuwukaga m’mesi wawojo ŵapikene kukwatila mmyala kwa ŵandu soni kusiwona ngope syawo sili syakusangalala. Wiki jilijose ŵandu masausande gejinji akusalipeleka soni kubatisidwa nikuŵa ŵakutumichila ŵa Yehofa Mlungu.

² Nambi uli wawojo? Naga akuganichisya yakuti abatisidwe, nikuti asagwile chenene ligongo akusaka “kumlambila” Yehofa. (Sal. 14:1, 2) Nganiji chijakamuchisye wawojo, chinga ali ŵachikulile kapena ŵachinandipile. Nambosoni kwa ŵandu ŵaŵabatisidwe kala chijakamuchisye kuti apitilisye kumtumichila Yehofa mwakulupichika mpaka kalakala. Sambano kwende tukambilane magongo gatatu gagakusatutendekasya kuti tumtumichileje Yehofa.

3. Ligongo chichi ŵakutumichila ŵa Yehofa akusanonyela chakuwona soni kutenda chilungamo? (Salimo 119:128, 163)

³ Yehofa ŵalamwile ŵandu ŵakwe kuti anonyeleje ‘chakuwona.’ (Sak. 8:19) Yesu jwalimbikasisye ŵakumkuya ŵakwe kuti atendeje yindu mwachilungamo. (Mat. 5:6) Yeleyi yikugopolela kuti mundu akusasosekwa kutendaga yindu yele Mlungu akusayiwona kuti yili yakuŵajilwa soni yambone. Ana wawojo akusanonyela kutenda yakuŵajilwa soni yachilungamo? Ngatukukayichila kuti akusatenda yeleyi. Akusaŵengana ni kuŵecheta yaunami soni yindu yakulemwecheka ya mchilambo chakusakalachi. (Aŵalanje Salimo 119:128, 163.) Mundu jwakusaŵecheta yaunami akusamsyasya Satana jwali jwakulamulila jwa chilambochi. (Yoh. 8:44; 12:31) Chakulinga cha Satana chili kusakasya lina lyeswela lya Yehofa Mlungu. Satana aŵele ali mkuwandisya yindu yaunami yakwamba Yehofa Mlungu kutandila paŵamjimuchile mu m’gunda wa Edeni. Jwalakwe aŵele ali mkwatendekasya ŵandu kuganisya kuti Yehofa  ali jwakulinonyela, akusalamula mwangali chilungamo, soni akusiŵajima ŵandu yindu yambone. (Gen. 3:1, 4, 5) Yindu yaunami yakusaŵecheta Satana yakwamba Yehofa, yikusiyatendekasya ŵandu kuti aganichisyeje yindu yakusakala yakwamba Yehofajo. Mwamti ŵandu pasagwile kuti ‘akanonyelaga chakuwona,’ Satana akusiŵatendekasya kuti aganisyeje soni kutenda yindu yosope yakusakala.—Alo. 1:25-31.

4. Ana Yehofa alosisye uli kuti ali “Mlungu jwakuwona”? (Alole chiwulili.)

⁴ Yehofa ali “Mlungu jwa yisyesyene, NWT.” soni jwalakwe mwakoloŵa makono akusiŵajiganya yisyesyene ŵandu ŵakusamnonyela. (Sal. 31:5) Akusatenda yeleyi mwakwakamuchisya jemanjaji kuti akajigalika ni unami wa Satana. Soni Yehofa akusiŵajiganya ŵandu ŵakwe kuti atendeje yindu mwakuwona mtima soni mwachilungamo. Mwamti jemanjaji akusakola mtendele wa mumtima . (Mis. 13:5, 6) Ana ayiweni kuti Yehofa ŵatendele yeleyi kutandila pandaŵi jaŵatandite kulijiganya Baibulo? Naga yili myoyo, nikuti alijiganyisye kuti Yehofa ali jwachilungamo mmatala gakwe gosope soni kwa wawojo. (Sal. 77:13) Myoyo wawojo akusaka kuti atendeje yindu yachilungamo yakusasaka Mlungu. (Mat. 6:33) Soni akusaka kuyichenjela yakuwona yakwamba Yehofa. Nambosoni akusaka kulosya kuti yakusaŵecheta Satana yakwamba Mlungu yili yaunami. Ana mpaka atende chamtuli yeleyi?

5. Ana chichi champaka chakamuchisye kunonyela chakuwona soni kutenda yindu mwachilungamo?

⁵ Paumi wawo akusosekwa aŵambaleje unami wa Satana soni achenjeleje chakuwona. Asacheje kuti Yehofa aŵe Jwakulamula jwawo, soni atendeje yindu yakusasala jwalakwe kuti yili yachilungamo. Ana mpaka atende chamtuli yeleyi? Amsalile Yehofa mwipopelo kuti akusaka kumtumichila mpaka kalakala, kaneko ni kubatisidwa pagulu ja ŵandu pakulosya kuti ŵalipeleche. Chindu chakusosekwa mnope champaka chakamuchisye kuti abatisidwe chili kuyinonyelaga yakuwona soni kutendega yindu yachilungamo.

6. Ana ni magongo gapi gagakusasimanikwa pa Salimo 45:4 gakwatendekasya kumnonyela Yesu Klistu?

⁶ Ligongo chichi akusamnonyela Yesu? Kwende tulole magongo gane gagakusatutendekasya kumnonyela Yesu gagakusasimanikwa pa Salimo 45:4. (Aŵalanje.) Yesu akusanonyela yisyesyene, chilungamo soni ali jwakulinandiya. Myoyo naga akusanonyela yayili yakuwona, soni chilungamo, yili yakupikanika kusala kuti akusamnonyelasoni Yesu Klistu. Aganichisye yaŵatesile Yesu pakuyichenjela yisyesyene mwakulimba mtima. (Yoh. 18:37) Nambo ana Yesu jwalosisye chamtuli kuti jwaliji chisyasyo chambone pangani jakulinandiya?

7. Ana ni yindu yapi yayikwasangalasya ligongo lya kulinandiya kwa Yesu?

 ⁷ Yaŵatendaga Yesu yakamuchisye ŵane kuŵa ŵakulinandiya. Mwachisyasyo, Yesu jwatendaga yakuti uchimbichimbi ujawule kwa Atati ŵakwe ngaŵaga kwa jwalakwejo. (Maliko 10:17, 18; Yoh. 5:19) Ana kulinandiya kwa Yesu kukusalimbikasya kutenda chichi? Mwangakayichila kukusatendekasya kutanda kumnonyela soni kumkuya jwalakwe. Yesu ali jwakulinandiya ligongo lyakuti akusanonyela soni kwasyasya Atati ŵakwe ŵali ŵakulinandiya. (Sal. 18:35; Aheb. 1:3) Yesu akusasyasya ndamo sya Yehofa. Ana yeleyi ngayikwatendekasya kusaka kuŵa paunasi ni Yesu?

8. Ligongo chichi tukusamnonyela Yesu jwali Mwenye jwetu?

⁸ Tukusamnonyela Yesu jwali Mwenye jwetu ligongo lyakuti jwalakwe ali jwakulamulila jwambone mnope. Yehofa jwamjiganyisye Mwanache jwakweju soni ŵamsagwile kuti aŵe jwakulamulila. (Yes. 50:4, 5) Aganichisyesoni chinonyelo chekulungwa chaŵalosisye Yesu. (Yoh. 13:1) Tukusosekwa kumnonyelaga Yesu ligongo lyakuti ali Mwenye jwetu. Jwalakwe jwasasile kuti ŵandu ŵakusamnonyela soni ŵali achimjakwe akusapikanila malamusi gakwe. (Yoh. 14:15; 15:14, 15) Kusala yisyene uli upile wekulungwa kuŵa mjakwe jwa Mwanache jwa Yehofa.

9. Ana ubatiso wa Yesu ukusalandana chamtuli ni wakusatenda ŵakumkuya ŵakwe?

⁹ Lilamusi limo lyaŵasalile Yesu ŵakumkuya ŵakwe lili lyakuti abatisidweje. (Mat. 28:19, 20) Mwamti jwalakwe jwatesile yeleyi. Nambope ubatiso wa Yesu waliji wakulekangana panandi ni wakusatenda ŵakumkuya ŵakwe. (Alole libokosi lyakuti “Ana Ubatiso wa Yesu Ukusalekangana Chamtuli ni Wakusatenda Ŵakumkuya Ŵakwe?”) Nambope ubatisowu ukusalandanaga mmatala gane. Kubatisidwa kwa Yesu kwalosisye kuti jwalakwe alipeleche kuti chatendeje yakusasaka Atati ŵakwe. (Aheb. 10:7) Mwakulandana ni yeleyi, ŵakumkuya ŵa Klistu akusabatisidwa pakusaka kulosya kuti ŵalipeleche kuti chatendeje yakusasaka Yehofa Mlungu. Mwamti jemanjaji pagambile kubatisidwa, kutenda yakusasaka Mlungu akusakuwona kuŵa kwakusosekwa mnope. Pakutenda yeleyi jemanjaji akusaŵa kuti akumsyasya Yesu.

10. Ana ni yindu yapi yampaka yatendekasye kuti amnonyeleje Yesu? Ana chinonyelochi chichatendekasya kutenda chichi?

¹⁰ Wawojo akusakulupilila kuti Yesu ali Mwanache jwa Yehofa, soni akusasangalala kuti Mlungu ŵamsagwile jwalakwe kuŵa Mwenye jwetu. Nambosoni akumanyilila kuti Yesu ali jwakulinandiya soni kuti akusatenda yindu mpela Atati ŵakwe. Alijiganyisyesoni kuti Yesu jwalisisye ŵasala, jwalimbikasisye ŵaŵalagasikaga nganisyo soni kuti jwaposisye ŵakulwala. (Mat. 14:14-21) Ayiwenisoni yakusatenda jwalakwe pakuwulongolela mpingo wakwe masiku agano. (Mat. 23:10) Nambosoni akumanyilila kuti mpela Mwenye jwa Uchimwene wa Mlungu, kusogoloku jwalakwe chachitenda yakupunda pelepa. Myoyo mpaka alosye kuti akusamnonyela Yesu mwakuya chisyasyo chakwe. (Yoh. 14:21) Chindu chandanda champaka atende kuti akuye chisyasyo chakwe chili kulipeleka kwa Yehofa ni kubatisidwa.

11. Ana ni chindu chapi chakusosekwa mnope chachikusamtendekasya mundu kubatisidwa, soni ligongo chichi yili myoyo?

¹¹ Ana ni chindu chapi chakusosekwa mnope chachikusamtendekasya mundu kubatisidwa? Yesu jwasasile lilamusi lyekulungwa mnope pa malamusi gosope ga Mlungu. Jwalakwe jwatite, “Mumnonyeleje Yehofa Mlungu jwenu ni mtima wenu wosope, ni umi wenu wosope, ni nganisyo syenu syosope soni ni machili genu gosope.” (Maliko 12:30) Ana yeleyi ni yakusatenda pakumnonyela Mlungu?

12. Ligongo chichi wawojo akusamnonyela Yehofa? (Alole chiwulili.)

¹² Pana magongo gejinji gakwatendekasya kumnonyela Yehofa. Mwachisyasyo, wawojo akusamanyilila kuti “umi wosope uli wakutyochela” kwa jwalakwe, soni kuti “mtuka uliwose wambone  soni wamlama ukusatyochela” kwa jwalakwe. (Sal. 36:9; Yak. 1:17) Myoyo chindu chilichose chambone chakwete wawojo chikusatyochela kwa Mlungu jwetu, jwali jwakoloŵa makono soni jwachinonyelo.

13. Ligongo chichi mbopesi ja Yesu uli mtuka wambone mnope?

¹³ Mbopesi ja Yesu uli mtuka wambone mnope waŵatupele Yehofa. Ligongo chichi tukuŵecheta yeleyi? Aganichisye ya unasi wawupali pasikati pa Yehofa ni Mwanache jwakwe. Yesu jwatite, “Atati akusanonyela une” soni une “ngusanonyela Atati.” (Yoh. 10:17; 14:31) Jemanjaji akusanonyelana mnope ligongo lyakuti atemi yaka yejinji ali yimpepe. (Mis. 8:22, 23, 30) Aganichisye yayatite pakumpweteka Yehofa paŵamwonaga Mwanache jwakwe ali mkulaga soni kuwa. Yehofa akusiŵanonyela mnope ŵandu kupwatikapo wawojo. Ni ligongo lyakwe ŵampeleche mbopesi Mwanache jwakwe ni mtima wakwe wosope. Ŵatesile yeleyi kuti wawojo soni ŵandu ŵane chatame ni umi wangamala. (Yoh. 3:16; Agal. 2:20) Yeleyi ni yayikusatutendekasya kuti tumnonyeleje mnope Mlungu.

14. Ana ni chindu chambone mnope chapi champaka asagule paumi wawo?

¹⁴ Kulijiganya yakwamba Yehofa kwatendekasisye wawojo kuti amnonyeleje mnope. Ngatukukayichila kuti akusaka kuŵa paunasi ni Yehofa mpaka kalakala. Sonitu yeleyi yili yakomboleka. Jwalakwe akwalimbikasya wawojo kuti atendeje yindu yakumsangalasya. (Mis. 23:15, 16) Yeleyi yikusawonechela mu yindu yele wawojo akusaŵecheta soni kutenda. Yakusatenda yikusalosya  naga akusamnonyela Yehofa yisyesyene. (1 Yoh. 5:3) Kutenda yeleyi chili chindu chambone mnope champaka asagule paumi wawo.

15. Ana mpaka alosye chamtuli kuti akusamnonyela Yehofa?

¹⁵ Ana mpaka alosye chamtuli kuti akusamnonyela Yehofa? Chandanda, akusasosekwa kupopela kwa Mlungu jusyesyene ni kumsalila kuti alipeleche kwa jwalakwe. (Sal. 40:8) Kaneko akusosekwa kubatisidwa pakusaka kulosya kuti ŵalipeleche kwa Mlungu. Mpela mwatuŵechetele kala kundanda kwa nganiji kubatisidwa chili chindu chakusangalasya soni chakusosekwa mnope paumi wawo. Patesile yeleyi yikusaŵa kuti sambano chatendeje yindu yakumsangalasya Yehofa ngaŵaga yakwasangalasya wawojo. (Alo. 14:8; 1 Pet. 4:1, 2) Mwine mpaka ayiwoneje kuti jeleji jili ngani jekulungwa, sonitu yili yisyene. Nambope kutenda yeleyi kukusakamuchisya kukola umi wambone. Ligongo chichi tukuti myoyo?

16. Mwakamulana ni Salimo 41:12 ana Yehofa chachatendela yindu yapi ŵandu ŵakusalipeleka kwa jwalakwe pakumtumichila?

¹⁶ Yehofa ali jwakoloŵa makono. Pampele Yehofa yindu, ndaŵi syosope chachawuchisya yindu yejinji. (Maliko 10:29, 30) Jwalakwe chachakamuchisya kola umi wakusangalala, soni chachapa yindu yambone mnope. Chachitenda yeleyi atamose apanopano pakutama mchilambo chakusakalachi. Soni chachitenda yeleyi mpaka kalakala. Yindu yambone yachachitanda kutenda pachachibatisidwa ngasasosekwa kuleka kuyitenda. Mwamti mpaka akombole kumtumichila Yehofa jwali Mlungu jwachinonyelo mpaka kalakala, soni unasi wawo ni jwalakwe uchilimba mnope. Yeleyi yichakamuchisya kuti chatame ni umi mpaka kalakala.—Aŵalanje Salimo 41:12.

17. Ana ni chindu chapi chele Yehofa nganakola champaka ampe?

¹⁷ Palipeleche kwa Yehofa ni kubatisidwa yikusaŵa kuti akwete upile wakwapa Atati ŵawo ŵakwinani chindu chinechakwe chambone mnope. Yindu yiliyose yambone yakwete yayikusiyatendekasya kuŵa ŵakusangalala, yatyochele kwa jwalakwe. Yehofa ali msyene kwinani ni chilambo chapasi. Myoyo pakulosya kuyamichila yindu yakusiŵatendela Mlungu mpaka ampe jwalakwe chindu chele nganakola. Chindu chakwe chili kumtumichila mwakulupichika. (Yob. 1:8; 41:11; Mis. 27:11) Patesile yeleyi yichiŵa kuti asagwile  chenene. Mwangakayichila kumnonyela Yehofa ni kwampaka kwatendekasye kuti abatisidwe.

18. Ana mpaka aliwusye yiwusyo yapi?

¹⁸ Pakwikana apano ana mpaka ajanje uli chiwusyo chakuti, Ana chabatisidwe? Chiwusyochi mpaka alijanjile jika. Nambo champaka chakamuchisye chili chiwusyo chakuti, ‘Ana ndili jwakoseka kubatisidwa?’ (Mase. 8:36) Aganichisye yindu yitatu yatukambilene munganiji. Chandanda wawojo akusayinonyela yakuwona soni yambone. Myoyo aliwusye kuti, ‘Ana ngusasaka lisiku line chinawone ŵandu wosope ali mkuŵecheta yakuwona soni ali mkutenda yambone?’ Chaŵili akusamnonyela Yesu. Myoyo aliwusye kuti, ‘Ana ngusasaka Mwanache jwa Mlungu kuŵa Mwenye jwangu, soni ngusasaka kusyasya chisyasyo chakwe?’ Soni chindu chatatu chachili chakusosekwa mnope chili chakuti akusamnonyela Yehofa. Myoyo aliwusye kuti, ‘Ana ngusasaka kumsangalasya Yehofa mwakutenda yakuti namtumichileje?’ Naga ajanjile yiwusyo yosopeyi kuti elo, sano ligongo chichi ngakubatisidwa? Ana chichi chachikwalepelekasya kubatisidwa?—Mase. 16:33.

19. Ligongo chichi ngakusosekwa kuchelewa kubatisidwa? Apeleche chisyasyo. (Yohane 4:34)

¹⁹ Naga akukayichila ya kubatisidwa aganichisye ya chiwanichisyo chaŵasasile Yesu. (Aŵalanje Yohane 4:34.) Yesu jwawanichisye kutenda yakusasaka Atati ŵakwe ni yakulya. Ligongo chichi jwatesile yeleyi? Ligongo lyakuti yakulya yikusatukamuchisya. Yesu jwamanyililaga kuti yiliyose yakusatusalila Yehofa kuti tutendeje yili yakamuchisya kwa m’weji. Yehofa nganaŵa asachile kuti tutendeje yindu yampaka yituwulasye. Ana yakusasaka Yehofa kuti wawojo atendeje yikupwatikapo kubatisidwa? Elo. (Mase. 2:38) Myoyo akakayichilaga yakuti kupikanila lilamusi lyakwamba kubatisidwa mpaka kwakamuchisye. Naga mpaka awutuchile kulya chakulya chinechakwe chakunong’a, sano ligongo chichi akuchelewa kubatisidwa?

20. Ana mungani jakuyichisya tuchikambilana chichi?

²⁰ Ana chichi chachikusalepelekasya ŵane kubatisidwa? Ŵajinji mpaka ajanje kuti, ‘Nganimbe kukoseka kuti mbatisidwe.’ Kusala yisyene kulipeleka kwa Yehofa kaneko ni kubatisidwa chili chindu chakusosekwa mnope champaka atende. Myoyo akusosekwa kujiganichisya chenene nganiji. Nambosoni pakusajigala ndaŵi, soni pakusasosekwa kulimbichila kuti mundu ayikane pakubatisidwa. Nambo naga akusachilila kubatisidwa, ana ni chichi champaka atende kuti yeleyi yikomboleche? Ngani jakuyichisya jichijanga chiwusyochi.