NGANI JAKULIJIGANYA 14
“Wosope Chachimanyilila Kuti Mli Ŵakulijiganya Ŵangu”
“Wosope chachimanyilila kuti mli ŵakulijiganya ŵangu naga mkunonyelana.”—YOH. 13:35.
NYIMBO NA. 106 Tukusyeje Ndamo ja Chinonyelo
YACHITULIJIGANYE a
Ana ŵandu ŵajinji ŵanganaŵa ŵa Mboni sya Yehofa akusaganisya yamtuli pachiweni chinonyelo chakusalosyana ŵa Mboni sya Yehofa? (Alole ndime 1)
1. Ana ŵandu ŵajinji payiche kumisongano jetu kandanda akusasangalala mnope ni chichi? (Alole chiwulili.)
TUWANICHISYE kuti liŵasa line lipite kukusongana kandanda ni ŵa Mboni sya Yehofa. Jemanjaji asangalele mnope ni yaŵatite ŵamboniwo pakwapochela soni chinonyelo chiŵalosyanaga jwine ni mjakwe. Pakuwujila kunyumba jwamkongwe akwasalila ŵamkwakwe kuti, ‘Ŵa Mboni sya Yehofa ali ŵakulekangana mnope ni ŵandu ŵatuŵele tuli mkusimana nawo. Mwamti lelo sangalele mnope kuŵa ni jemanjaji.’
2. Ligongo chichi ŵandu ŵane akusaleka kumtumichila Yehofa?
2 Yisyene kuti chinonyelo chachikusaŵa pasikati pa Aklistu ŵasyesyene chikusaŵa chakusimonjesya. Nambotu jemanjaji ali ŵandu ŵangali umlama. (1 Yoh. 1:8) Myoyo patutandite kwamanyilila chenene abale ni alongo ŵetu, nipatukusatandasoni kumanyilila yindu yejinji yakusalepela. (Alo. 3:23) Chakutesya chanasa chili chakuti, ŵane ayikene pakuleka kumtumichila Yehofa ligongo lya yakulepela ya Aklistu achimjawo.
3. Ana chichi chachikusichamanyikasya ŵakumkuya ŵa Yesu ŵasyesyene? (Yohane 13:34, 35)
3 Aganichisyesoni ya mtwe wa ngani jetuji. (Aŵalanje Yohane 13:34, 35.) Ana chichi chachikusichamanyikasya ŵakumkuya ŵa Klistu ŵasyesyene? Chili chinonyelo ngaŵaga umlama. Yesu nganasala kuti ‘Jemanja chimchimanyilila kuti mli ŵakulijiganya ŵangu.’ Mmalomwakwe, jwalakwe jwatite, “Wosope chachimanyilila kuti mli ŵakulijiganya ŵangu.” Pelepatu Yesu jwalosisye kuti atamose ŵandu ŵali kusa kwa mpingo wa Chiklistu chachamanyilila ŵakumkuya ŵakwe ŵasyesyene ŵakusanonyelana ni mtima wosope.
4. Ana ŵandu ŵane mpaka asache kumanyilila yamtuli yakwamba Aklistu ŵasyesyene?
4 Ŵandu ŵane ŵanganaŵa ŵa Mboni sya Yehofa mpaka akole yiwusyo mpela yakuti, ‘Ana chinonyelo mpaka chitukamuchisye chamtuli kwamanyilila ŵakumkuya ŵa Yesu ŵasyesyene? Ana Yesu jwalosisye chamtuli kuti jwanonyelaga ŵandumetume ŵakwe? Soni ana masiku agano mpaka tukombole chamtuli kusyasya chisyasyo cha Yesuchi?’ Nombe m’weji ŵatuli ŵamboni mpaka tutende chenene kupata kwanga kwa yiwusyo yeleyi. Kutenda yeleyi kuchitukamuchisya kuti tukombole kulosya chenene chinonyelo mnopemnope patukutenda yindu ni abale ni alongo ŵetu ŵali ŵangali umlama.—Aef. 5:2.
LIGONGO CHICHI CHINONYELO NI CHAMPAKA CHAMANYIKASYE ŴAKUMKUYA ŴA YESU ŴASYESYENE?
5. Ana maloŵe ga Yesu gagakusasimanikwa pa Yohane 15:12, 13 gakusagopolela chichi?
5 Yesu jwasasile kuti ŵakumkuya ŵakwe chachimanyika ligongo lyakunonyelana m’litala lyapadela. (Aŵalanje Yohane 15:12, 13.) Jwalakwe jwalamwile ŵakumkuya ŵakwe kuti, “Mnonyelaneje mpela munamnonyelele jemanja.” Ana yeleyi yagopolelaga chichi? Yesu jwapitilisye kulondesya kuti chelechi chili chinonyelo chakulijima, chinonyelo chachikusamtendekasya Mklistu kukunda kuwa ligongo lyakwanonyela ŵakulupilila achimjakwe naga yili yakuŵajilwa. b
6. Ana Maloŵe ga Mlungu gakusalosya chamtuli kusosekwa kwa chinonyelo?
6 Maloŵe ga Mlungu gakusatujiganya kuti chinonyelo chili chakusosekwa mnope. Ŵandu ŵajinji akusaganonyela Malemba gakuyichisyaga: “Mlungu ali chinonyelo.” (1 Yoh. 4:8) “Mumnonyeleje mjenu mpela mwamkusalinonyelela mwasyene.” (Mat. 22:39) “Kunonyelana kukusasiŵa yakulemwa yejinji.” (1 Pet. 4:8) “Chinonyelo changalepela.” (1 Akoli. 13:8) Malemba gelega soni gane gakusatukamuchisya kumanyilila kuti kunonyelana kuli kwakusosekwa mnope.
7. Ligongo chichi Satana nganaŵa akombwele kwakamuchisya ŵandu kuŵa ŵakamulana soni ŵakunonyelana?
7 Ŵandu ŵajinji akusaliwusya kuti, ‘Pakuŵapo dini syosope sikusasala kuti sikusajiganya yisyesyene chitamilecho yili yakuti dini jilijose jikusajiganya yindu yakulekangana yakwamba Mlungu, ana pelepa mpaka tujimanyilile chamtuli dini jisyesyene?’ Satana atendekasisye kuti papagwe dini syejinji syaunami, yayitendekasisye kuti ŵandu alajeje kujimanyilila dini jisyesyene. Atamose kuti jwalakwe atesile yeleyi nganaŵa akombwele kwatendekasya ŵandu pachilambopa kuti anonyelaneje mnope. Yehofape ni jwampaka akombole kutenda yeleyi. Tukuŵecheta yeleyi ligongo lyakuti chinonyelo chisyesyene chikusatyochela kwa Yehofa. Mwamti ŵandu ŵelepewo ŵakwete msimu wa Yehofa ni ŵakusanonyelana yisyesyene. (1 Yoh. 4:7) Alitu ni ligongo lyakwe Yesu jwasasile kuti ŵakumkuya ŵakwe ŵasyesyene ni ŵachachinonyelanaga yisyesyene jwine ni mjakwe.
8-9. Ana chinonyelo chakusalosya ŵa Mboni sya Yehofa chakwayiye chamtuli ŵandu ŵane?
8 Mpela muŵaŵechetele Yesu, ŵandu ŵajinji masiku agano akusiŵamanyililaga ŵakumkuya ŵakwe ŵasyesyene ligongo lyakuti akusanonyelana mnope. Mwachisyasyo, m’bale jwine lina lyakwe Ian akusakumbuchila yayatendekwe pandaŵi jaŵasimanikwe kandanda pamsongano wachigawo wawatendechele ku sitediyamu jine jajaliji chiŵandika ni kumangwakwe. Kwa myesi jamnono msonganowu mkaniwutendekwe, Ian jwaliji kumalo gagogo kukulolela masewela. Jwalakwe jwatite, “Ŵandu ŵaŵaliji pamsonganowo ŵaliji ŵakulekangana mnope ni ŵandu ŵaŵayiche kukulolela masewela gala. Ŵamboni ŵaŵaliji pamsonganowo ŵaliji ŵa ulemu, ŵawete mwakulichimbichisya soni ŵanache ŵatendaga yindu mwaulemu.” M’baleju jwasasilesoni kuti, “Ŵandu ŵaŵaliji pamsonganowu, ŵaliji ŵakwikutila soni ŵatendaga yindu mwamtendele, yeleyi ni yanayisakaga mnope paumi wangu. Jwangakumbuchilaga ngani syasyaŵechetedwe pamsonganowu, nambo ngusakumbuchila muŵatendelaga yindu ŵamboniwo.” c Kusala yisyene, ndamo syelesitu sikusayika ligongo lyakunonyelana yisyesyene jwine ni mjakwe. Tukusitwatendelaga yindu yambone soni kwachimbichisya abale ni alongo ŵetu ligongo lyakwanonyela.
9 M’bale jwine lina lyakwe John jwasimenesoni ni yindu mpela yeleyi pajwatandite kusimanikwa pa misongano ja mpingo. Jwalakwe jwatite, “Nasangalele mnope ni yaŵatiga pakunonyelana . . . jemanjaji, mwamti nagambaga kwawona mpela kuti ali ŵandu ŵangalemwa. Chinonyelo chisyesyene chiŵalosyanaga jemanjaji chandendekasisye kuyiwona kuti mbatile dini jisyesyene.” d Maloŵe mpela gelega gakusalosya kuti ŵakutumichila ŵa Yehofa ali Aklistu ŵasyesyene.
10. Ana ni ndaŵi jine japi jatukusosekwa kulosya kuti tukusitwanonyelaga yisyesyene Aklistu achimjetu? (Alole maloŵe ga mwiŵanda.)
10 Mpela mwatuyiwonele kundanda kula, abale ni alongo ŵetu wosope ali ŵangali umlama. Mwamti mpaka atuŵechetele kapena kutenda yindu yampaka yitutumbilikasye. e (Yak. 3:2) Payitutendechele yeleyi, yakuŵecheta soni yitendo yetu yilosyeje kuti tukusitwanonyelaga yisyesyene jemanjaji. Ana mpaka tumsyasye chamtuli Yesu mu yakutendekwa mpela yeleyi?—Yoh. 13:15.
ANA YESU JWALOSISYE CHAMTULI KUTI JWANONYELAGA ŴANDUMETUMWE ŴAKWE?
Yesu jwatendaga yindu mwachinonyelo ni ŵandumetume ŵakwe atamose kuti ŵalemwesyaga yindu yejinji (Alole ndime 11-13)
11. Ana ni ndamo jakulemwecheka japi jiŵalosisye Yakobo ni Yohane? (Alole chiwulili.)
11 Yesu nganajembecheyaga kuti ŵakumkuya ŵakwe chatendeje yindu mwangalemwesya. Mmalomwakwe, mwachinonyelo jwalakwe jwajongolelaga jemanjajo pa yindu yaŵalemwesyaga kuti aŵe paunasi wambone ni Yehofa. Pandaŵi jine ŵandumetume ŵakwe ŵaŵili, Yakobo ni Yohane ŵasalile mama ŵawo kuti akamsalile Yesu kuti akape malo gapenani mu Uchimwene wa Mlungu. (Mat. 20:20, 21) Pelepatu Yakobo ni Yohane ŵalosisye kuti ŵaliji ŵandu ŵakulikwesya.—Mis. 16:18.
12. Ana Yakobo ni Yohanepe ni ŵaŵalosisye ndamo jakusakala? Alondesye.
12 Ngaŵa kuti Yakobo ni Yohanepe ni ŵaŵalosisye ndamo jakusakala pandaŵiji. Alole muŵatendelesoni ŵandumetume ŵane. Baibulo jikusati, “Ŵakulijiganya 10 ŵane ŵala paŵapikene yeleyi, ŵatumbilile achalume ŵaŵili ŵapaulongowo.” (Mat. 20:24) Komboleka kuti Yakobo ni Yohane ni ŵandumetume ŵane ŵala ŵaŵechetene maloŵe gakupweteka. Mwine ŵandumetume ŵanewo ŵaŵechetaga maloŵe mpela aga: ‘Ana jemanja mkuliwona kuti mli ŵani kuti mŵende malo gapenani mu Uchimwene wa Mlungu? Ana jemanja mkulipikana kuti ni ŵamkamwile masengo gejinji ni Yesu. M’wesonitu tuli ŵakuŵajilwa kupochela malo gapenani!’ Mulimose muyaŵelele, yaŵatesile jemanjaji yalosisye kuti ŵaliŵalile kulosyana chinonyelo.
13. Ana Yesu jwatendaga uli ni yakulepela ya ŵandumetume ŵakwe? (Mateyu 20:25-28)
13 Ana Yesu jwatesile uli ni ngani jeleji? Jwalakwe nganatumbila. Nambosoni nganasala kuti chapate ŵandumetume ŵane ŵachachiŵa ŵakulinandiya mnope soni ŵachachitendelanaga yindu mwachinonyelo jwine ni mjakwe. Mmalomwakwe, Yesu jwakamuchisye jemanjajo mwakuwusimana mtima. (Aŵalanje Mateyu 20:25-28.) Jwalakwe jwapitilisye kutenda nawo yindu mwachinonyelo atamose kuti jemanjaji ŵakanganagape pangani jakuti jwamkulungwa ali ŵani pasikati pawo.—Maliko 9:34; Luk. 22:24.
14. Ana ŵandumetume ŵa Yesu ŵakulile mundamo jamtuli?
14 Yili yangakayikasya kuti Yesu jwakumbuchilaga ndamo jaŵakulile ŵandumetume ŵakweŵa. (Yoh. 2:24, 25) Ŵandumetumeŵa ŵakulile mundamo jele achimlongola ŵadini ŵalimbikasyaga yakusosekwa kwakukola udindo soni malo gapenani. (Mat. 23:6; alole ngani ja Chichewa jakuti “Sunagogi Anali Malo Amene Yesu ndi Ophunzira Ake Amkakonda Kulalikila,” mu Sanja ja Mlonda ja Epulo 1, 2010, pp. 16-18.) Achimlongola ŵadiniŵa ŵaliwonagasoni kuti ali ŵakusosekwa kwapunda ŵane. f (Luk. 18:9-12) Yesu jwamanyililaga kuti ndamo jeleji jakwayiyesoni ŵandumetume ŵakwewo. (Mis. 19:11) Yesu nganajembecheyaga kuti ŵandumetume ŵakwewo ngalemwesyaga chilichose, mwamti jwatendaga nawo yindu mwakuwusimana mtima palemwisye yineyakwe. Jwalakwe jwamanyililaga kuti ŵandumetume ŵakwewo ŵakwete mtima ŵakusaka kutenda yindu yambone. Myoyo jwakamuchisyaga mwakuwusimana mtima kuti anonyelaneje mmalo mwaganichisya ya malo gapenani.
ANA MPAKA TUSYASYE CHAMTULI CHISYASYO CHA YESU?
15. Ana ngani ja Yakobo ni Yohane jikutujiganya chichi?
15 Ngani ja Yakobo ni Yohane mpaka jitujiganye yindu yejinji. Jemanjaji ŵalemwisye pakumŵenda Yesu kuti chiŵape malo gapenani mnope mu Uchimwene wakwe. Nombe ŵandumetume ŵanewo ŵalemwisyesoni pakukunda kuti ngani jelejo jisokonasye mkamulano pasikati pawo. Nambo Yesu jwalinjile kutenda yindu mwachinonyelo soni mwachanasa ni ŵandumetume 12 wosopewo. Ana pelepa tukulijiganya chichi? Tukulijiganya kuti tukagambaga kuganichisya mnope yakulemwecheka yatesile ŵandu ŵane, nambo tuganichisyejesoni mwampaka tutendele m’weji ni yakulemwechekayo. Ana chichi champaka chitukamuchisye kutenda yeleyi? Mklistu mjetu patulemwechesye, mpaka tutende chenene kuliwusya kuti, ‘Ligongo chichi yatesile munduju yisakalisye mnope? Ana yeleyi yikulosya kuti ngwete ndamo jinejakwe jakusakala jangusosekwa kongolela? Ana komboleka kuti mundu jwandemwechesyeju akulaga ni yineyakwe munganisyo mwakwe? Atamose kuti ngwete magongo ganegakwe gakundendekasya kutumbila, ana mpaka ngombole kulosya chinonyelo mwakumkululuchila munduju?’ Patukulingalinga kwalosya chinonyelo ŵane ni patukusalosyasoni kuti tuli ŵakumkuya ŵasyesyene ŵa Yesu.
16. Ana ni yindu yine yapi yampaka tulijiganye kutyochela mu chisyasyo cha Yesu?
16 Chisyasyo cha Yesu chikutukamuchisya kumanyilila kusosekwa kwakulingalinga kwapikanichisya Aklistu achimjetu. (Mis. 20:5) Yili yangakayikasya kuti Yesu jwamanyililaga yayili mumtima. Nambo m’weji nganituŵa tukombwele kutenda yeleyo. Nambope mpaka tukombole kwatendela chanasa Aklistu achimjetu patulemwechesye. (Aef. 4:1, 2; 1 Pet. 3:8) Mpaka yiŵe yangasawusya kutenda yeleyi naga tukwamanyilila chenene Aklistu achimjetu. Kwende tulole chisyasyo cha mwampaka tutendele yeleyi.
17. Ana kummanyilila chenene m’bale jwine kwamkamuchisye chamtuli jwakulolela dela?
17 Jwakulolela dela jwine jwakusatumichila kungopokolyuŵa kwa Africa, akusakumbuchila ya m’bale jwine jwaŵamwonaga kuti ali jwangali chinonyelo. Ana jwakulolela delaju jwatesile yamtuli? Jwalakwe jwatite, “Mmalo mwakuti namŵambaleje m’baleju nalinganyisye yakuti nammanyilile chenene.” Yeleyi yamkamuchisye jwakulolela delajo kumanyilila yayamtendekasyaga m’balejo kuti awonecheje m’litala lyeleli. Jwakulolela delaju jwapitilisye kuti, “Panamanyilile kuti m’baleju jwalingagalingaga kuti amalane ni ndamo jeleji nambosoni kuti jwalinjilelinjile kwandaŵi jelewu, natandite kusyoŵekana najo, mwamti jwaŵele mjangu jwapamtima.” Kusala yisyene naga tukutenda yakomboleka kuti twamanyilileje chenene abale ni alongo ŵetu tuchiyiwona kuŵa yangasawusya kuti twalosyeje chinonyelo.
18. Ana tukusosekwa kuliwusya yiwusyo yapi naga mjetu atuleŵele? (Misyungu 26:20)
18 Ndaŵi sine mpaka tuyiwoneje kuti mpaka yiŵe chenene kuŵechetana ni mundu jwatuleŵele. Nambo mkanitutende yeleyi tukusosekwa kuliwusya yiwusyo yakuyichisyayi: ‘Ana ngwete maumboni gosope ga nganiji?’ (Mis. 18:13) ‘Ana munduju atesile mwamelepe?’ (Jwak. 7:20) ‘Ana uneji nganindendeje chakulemwa mpela chelechi?’ (Jwak. 7:21, 22) ‘Ana kuja kambilana ni munduju chikukamuchisye kuti nganiji jimale kapena chikugambe kukusya nganiji?’ (Aŵalanje Misyungu 26:20.) Kuganichisya yiwusyo yeleyi mpaka kutukamuchisye kuti tugambe kujiliŵalila nganijo.
19. Ana wawojo ali ŵakusimichisya mtima kutenda chichi?
19 Ŵa Mboni sya Yehofawe tukusalosya kuti tuli ŵakumkuya ŵasyesyene ŵa Yesu naga tukunonyelana jwine ni mjakwe. Tukusalosya kuti tuli ŵakumkuya ŵa Yesu ŵasyesyene mwakwanonyela yisyesyene abale ni alongo ŵetu atamose kuti akusatulemwechesyaga. Kutenda yeleyi, kukusakamuchisya ŵandu ŵane kuti ajimanyilile dini jisyesyene soni kuti atande kumtumichila Yehofa jwali Mlungu jwachinonyelo. Myoyo kwende tulinjejelinjeje kulosyana chinonyelo chachikusatumanyikasya kuti tuli Aklistu ŵasyesyene.
NYIMBO NA. 17 “Ngusaka”
a Ŵandu ŵajinji akusatanda kulijiganya yakwamba Yehofa ligongo lya chinonyelo chakusachiwona pasikati petu. Nambope m’weji tuli ŵangali umlama, mwamti ndaŵi sine yikusatusawusyaga kuti twatendele ŵane yindu mwachinonyelo. Myoyo chitukambilane ligongo lyakwe chinonyelo chili chakusosekwa mnope soni yampaka tutende pakumsyasya Yesu patukutenda yindu yine ni abale ni alongo ŵetu ŵali ŵangali umlama.
b Alole buku ja Chichewa jakuti “Bwera Ukhale Otsatira Wanga,” mtwe 17, ndime 10-11.
c Alole ngani jakuti, “Tsopano Ndinapeza Cholinga cha Moyo Wanga,” mu Sanja ja Mlongo ja Chichewa ja Nofemba 1, 2012, pp. 13-14.
d Alole ngani jakuti, “Zinthu Zinkaoneka Ngati Zikundiyendera Bwino,” mu Sanja ja Mlonda ja Chichewa ja Meyi 1, 2012, pp. 18-19.
e Nganiji ngajikusala ya yakulemwa yekulungwakulungwa yakusasamalilaga achakulungwa ŵa mumpingo mpela yayikolasile pa 1 Akolinto 6:9, 10.
f Pali papitile ndaŵi, mwalimu jwine jwasasile kuti, “Pachilambopa pana ŵandu ŵangapunda 30 ŵali ŵakulungama mpela Abulahamu. Naga pana ŵandu 30 nikuti unejo ni mwanache jwangu jwamlume tuli mu gulu jelejo. Naga pana ŵandu 10 nikutisoni unejo ni mwanache jwangu jwamlume tuli mu gulu jelejo. Naga pana ŵandu 5, mwanache jwangu jwamlume ni unejo tulisoni mu gulu jelejo. Naga pana ŵandu ŵaŵili nikuti tuli unejo ni mwanache jwangu jwamlume. Naga pana mundu jumpepe nikuti ndili unejo.”
