1-2. Ligongo chichi ngakusosekwa kuwujila munyuma naga apano nganiyiŵa yikomboleche kuti abatisidwe? (Alole chiwulili cha pachikuto.)

 NAGA akusaka kubatisidwa nikuti akwete chakulinga chambone. Ana apano ali ŵakoseka kubatisidwa? Naga wawojo akoseche kuti abatisidwe soni achakulungwa ŵa mumpingo akukamulana nayo, akachelewa kutenda yeleyo. Naga akubatisidwa Yehofa chachapa upile wejinji pakumtumichila.

² Ana mundu jwine ŵasalile yindu yineyakwe yakusosekwa kuchenga mkanaŵe kubatisidwa, kapena ŵayikopochele jika kuti akusosekwa kuchenga? Naga yili myoyo akawujila munyuma. Chinga wawojo ali ŵachikulile kapena ŵachinandipile yili yakomboleka kuchenga yindu yine kuti abatisidwe.

3. Ana nduna ja ku Itiyopiya jamwusisye Filipo chichi? Ana yeleyi yatendekasisye kuti papagwe chiwusyo chamtuli? (Masengo 8:36, 38)

³ Aŵalanje Masengo 8:36, 38. Nduna ja ku Itiyopiya jamwusisye jwakulalichila Filipo kuti, “Chikundekasya chichi kubatisidwa?” Mundu jwa ku Itiyopiyaju jwasakaga kubatisidwa, nambo ana jwaliji juli jukoseche?

4. Ana nduna ja ku Itiyopiya jalosisye chamtuli kuti jasakaga kulijiganya yejinji?

⁴ Nduna ja ku Itiyopiyaji japite “ku Yelusalemu kukumtindiŵalila Mlungu.” (Mase. 8:27) Ayitu yikulosya kuti jwalakweju jwajinjile dini ja Chiyuda. Mwangakayichila komboleka kuti jalijiganyisye yakwamba Yehofa kutyochela m’Malemba ga Chihebeli. Nambope jasakaga kulijiganya yejinji. Ana Filipo ŵajisimene ndunaji jili kumtenda chichi paŵasimene najo pamsewu? Ŵajisimene jili mkuŵalanga mpukutu waŵalembile Yesaya. (Mase. 8:28) Yaŵaŵalangagayi yaliji yijiganyo yakusokoka ya m’Baibulo. Ndunaji nganijijikutilaga ni yindu yamnono yajalijiganyisye, nambo jasakaga kulijiganya yejinji.

5. Ana nduna ja ku Itiyopiya jakamulichisye masengo chamtuli yindu yaŵalijiganyisye?

⁵ Munduju jwaliji nduna mu ulamusi wa Mwenye Jwamkongwe  jwa ku Itiyopiya lina lyakwe Kandake. Mwamti ‘jwalolelaga chipanje chosope cha mwenyejo.’ (Mase. 8:27) Myoyo munduju yamtupilaga yakutenda. Nambope jwapataga ndaŵi jakwawula kukumtindiŵalila Yehofa. Jwalakwe nganagambaga kwikutila ni yindu yaŵalijiganyaga m’Baibulo nambo jwatendaga yindu yakamulana ni yaŵalijiganyagayo. Mwamti munduju jwajesile ulendo wakutyoka ku Itiyopiya kwawula ku Yelusalemu kukumtindiŵalila Yehofa ku nyumba ja Mlungu. Ulendowo wasosekwaga ndaŵi jakwanila nambosoni mbiya. Nambope munduju nganakunda kuti yeleyi yimlepelekasye kwawula kukumtindiŵalila Yehofa.

6-7. Ana nduna ja ku Itiyopiya jatesile uli kuti chinonyelo chakwe kwa Yehofa chipitilisye kulimba?

⁶ Nduna ja ku Itiyopiyaji jalijiganyisye yindu yejinji kutyochela kwa Filipo. Chindu chimo chaŵalijiganyisye chaliji chakuti Yesu ali Mesiya. (Mase. 8:34, 35) Ndunaji jayamichile yindu yaŵamtendele Yesu. Ana kaneko jatesile chichi? Yikakomboleche jwalakwe gambaga kwikutila kuti akusasongana ni Ayuda. Nambo mmalomwakwe chinonyelo chakwe kwa Yehofa soni kwa Mwanache jwakwe chalimbile mnope. Mwamti yamtendekasisye kuti abatisidwe nikuŵa jwakumkuya jwa Klistu. Filipo jwayiweni kuti munduju akoseche kubatisidwa mwamti jwam’batisye.

⁷ Kukuya yaŵatesile mundu jwa ku Itiyopiyaju mpaka kwakamuchisye kuti nombe wawojo abatisidwe. Mwamti wawojosoni chachiŵecheta ni mtima wosope kuti “chikundekasya chichi kubatisidwa?” Kwende sambano tukambilane yampaka tutende pakumsyasya mundu jwa ku Itiyopiyaju. Yindu yaŵatesile munduju yaliji, kupitilisya kulijiganya, kamulichisya masengo yindu yaŵalijiganyaga, soni kumnonyela mnope Mlungu.

8. Ana pa Yohane 17:3 pakusati wawojo akusosekwa kutenda chichi?

⁸ Aŵalanje Yohane 17:3. Ana maloŵe ga Yesu gagali pa lilembali ni gagakamuchisye wawojo kutanda kulijiganya Baibulo? Yeleyi ni yayatutendechele ŵajinji mwa m’weji. Ana maloŵega mpaka gatukamuchisye kuti tupitilisye kulijiganya? Elo. ‘Kulijiganya ya . . . Mlungu . . . jwakuwona’ ngasikumala. (Jwak. 3:11) Tuchipitilisya kulijiganya yakwamba Yehofa mpaka kalakala. Patukulijiganya yejinji yakwamba Yehofa ni patukusaŵasoni paunasi wambone ni jwalakwe.—Sal. 73:28.

9. Ana tukusosekwa kutenda chichi panyuma pakuti tulijiganyisye yijiganyo yandanda ya m’Baibulo?

⁹ Yili yisyene kuti tukusatanda ni yijiganyo yangasawusya ya m’Baibulo patukulijiganya yakwamba Yehofa. Mu chikalata chakwe chakwawula kwa Ahebeli, ndumetume Paulo jwayikolasile yijiganyoyi kuti “yijiganyo yandanda.” Jwalakwe nganagopolelaga kuti “yijiganyo  yandanda” ya m’Baibulo yili yangasosekwa. Nambo jwayiwanichisye yijiganyoyi ni mkaka wawukusamkamuchisya mwanache kuti akole chilu chambone soni kuti akule. (Aheb. 5:12; 6:1) Jwalakwe jwalimbikasisye Aklistu kuti apitilisyeje kulijiganya yejinji yakwamba Mlungu. Jwalimbikasisyesoni kuti alijiganyeje yindu yakusokoka ya m’Maloŵe ga Mlungu. Ana akusasaka kulijiganya yijiganyo yandanda ya m’Baibulo? Ana akusaka kupitilisya kulijiganya yindu yejinji yakwamba Yehofa soni yakulinga yakwe?

10. Ana ŵandu ŵajinji akusajiwona mwamtuli ngani jakulijiganya?

¹⁰ Ŵajinji mwa m’weji yikusatusawusya kulijiganya. Ana mwelemu ni mwayiŵelelesoni ni wawojo? Ana paŵaliji ku sukulu ŵayiwonaga kuŵa yangasawusya kulijiganya soni ŵaŵalangaga chenene? Ana ŵasangalalaga ni kulijiganya soni ŵakuwonaga kuti kuli kwakamuchisya? Kapena yasawusyaga kulijiganya yindu ya m’mabuku? Naga yili myoyo, nganaŵa jika, sonitu Yehofa mpaka ŵakamuchisye ligongo jwalakwe ali mtichala jwambone mnope.

11. Ana Yehofa akusalosya chamtuli kuti ali jwakutujiganya jwambone mnope?

¹¹ Yehofa akusalikolangaga msyene kuti ali ‘jwakutujiganya’ jwambone mnope. (Yes. 30:20, 21) Jwalakwe ali mtichala jwakuwusimana mtima, jwachinonyelo, soni jwakupikanichisya yindu. Yehofa akusalola yambone kwa ŵandu ŵakusiŵajiganya. (Sal. 130:3) Soni jwalakwe jwangajembecheyaga kuti chitutendeje yindu yanganituŵa tukombwele. Akumbuchileje kuti jwalakwe ni juŵapanganyisye ubongo wetu. Wawuli mtuka wakusimonjesya. (Sal. 139:14) Ŵatupanganyisye m’litala lyakuti tusacheje kulijiganya. Juŵatupanganyisye akusasaka kuti tusangalaleje patukulijiganya yindu mpaka kalakala. Myoyo mpaka luŵe lunda ‘kusachililaga’ kulijiganya yisyesyene ya m’Baibulo. (1 Pet. 2:2) Akole yakulinga yampaka ayikwanilisye, soni akuyeje ndandanda jawo jakuŵalanjila Baibulo. (Yos. 1:8) Yehofa chachakamuchisya kuti asangalaleje pakuŵalanga soni kulijiganya yakwamba jwalakwe.

12. Ligongo chichi luli lunda kulijiganya yaŵatendaga Yesu?

¹² Ndaŵi syosope tupateje ndaŵi jakuganichisya yaŵatesile Yesu. Mundaŵi jakusawusyaji yili yakusosekwa mnope kuti tusyasyeje yaŵatesile Yesu naga tukusaka kumtumichila Yehofa. (1 Pet. 2:21) Yesu jwasalile ŵakumkuya ŵakwe kuti chachisimana ni yindu yakusawusya. (Luk. 14:27, 28) Nambope Yesu jwakwete chikulupi chakuti ŵakulijiganya ŵakweŵa chachikombola kupilila mpela muŵatendele jwalakwe. (Yoh. 16:33) Alijiganyeje yaŵatendaga Yesu paumi wakwe soni aloleje yampaka atende kuti amsyasyeje jwalakwe lisiku lililyose.

13. Ana mpaka amŵende chichi Yehofa soni ligongo chichi?

¹³ Kola lundape nganikuŵa kwakwanila. Lunda mpaka lwakamuchisye kuti alijiganyeje yejinji yakwamba Yehofa soni kuti amnonyeleje jwalakwe ni kumkulupilila. (1 Akoli. 8:1-3) Pakupitilisya kulijiganya amŵendeje Yehofa kuti ŵakamuchisye kola chikulupi chakulimba. (Luk. 17:5) Jwalakwe akusaŵa jwakoseka kwanga mapopelo mpela gelega. Kukola chikulupi chisyesyene ligongo lyakummanyilila Mlungu kuchakamuchisya kuchenga yindu yine paumi wawo.—Yak. 2:26.

14. Ana ndumetume Petulo jwalosisye chamtuli kusosekwa kwakutenda yindu yatukulijiganya? (Alole chiwulili.)

¹⁴ Ndumetume Petulo jwalosisye kuti yili yakusosekwa kuti ŵakumkuya ŵa Klistu akamulichisyeje masengo yakulijiganya. Mwamti jwalakwe jwasasile ngani ja m’Baibulo jakwamba ya Nowa. Yehofa jwamsalile Nowa kuti jwalakwe chajonanje ŵandu ŵakusakala ŵa mu ndaŵijo ni chigumula. Gamba kumanyilila kuti kukwika chigumula nganikuŵa kwakwanila kuti Nowa yimpepe ni liŵasa lyakwe akulupuche. Akaliŵalila kuti Petulo jwasalaga yayatendekwaga chigumula mkanichiyiche,  soni yayatendekwaga pandaŵi jele chombo “chaliji chili mkati mwakuchipanganya.” (1 Pet. 3:20) Nowa ni liŵasa lyakwe ŵatendaga yindu yele Mlungu ŵasalile mwakutaŵa chombo chachaliji chekulungwa mnope. (Aheb. 11:7) Petulo jwawanichisye yaŵatesile Nowa ni ubatiso. Jwalakwe jwatite, “Chakulandana ni chombochi chili ubatiso, wele ukumkulupusya jemanja.” (1 Pet. 3:21) Myoyo mpaka tuwanichisye yakutenda wawojo kuti abatisidwe ni masengo gaŵakamwile Nowa kwa yaka yejinji. Ana wawojo akusosekwa kutenda yindu yamtuli kuti abatisidwe?

15. Ana tukusalosya uli kuti tugalawiche mtima yisyesyene?

¹⁵ Chindu chimo mwa yindu yakusosekwa mnope champaka atende kuti abatisidwe chili kugalawuka mtima mwakuleka kutenda yakusakala. (Mase. 2:37, 38) Kugalawuka mtima kusyesyene kuchakamuchisya kuti achenje yisyesyene. Ana alesile kutenda ndamo syosope syasikusamsakalisya Yehofa, mpela chikululu, kwemba sona, kutukana kapena kuŵecheta maloŵe gakusakala? (1 Akoli. 6:9, 10; 2 Akoli. 7:1; Aef. 4:29) Naga apano nganaŵe kuchenga atende yakuti achenje. Mpaka amŵende mundu jwakusiŵajiganya Baibulo kapena achakulungwa ŵa mumpingo kuti ŵakamuchisye. Naga ali ŵachinandipile soni akusatama ni achinangolo ŵawo, ŵaŵende kuti ŵakamuchisye kumalana ni ndamo syakusakala syasikwalepelekasya kubatisidwa.

16. Ana pakusasosekwa chichi kuti ndaŵi syosope tutendeje yindu yakwayana ni kumtumichila Yehofa?

¹⁶ Yili yakusosekwasoni kuti ndaŵi syosope atendeje yindu yakwayana ni kumtumichila Yehofa. Yeleyi yikupwatikapo kusimanikwa pamisongano ja Chiklistu soni kujigala nawo mbali. (Aheb. 10:24, 25) Nambosoni pagambile kwajitichisya kuti alalichileje, akusosekwa kutenda yakomboleka kuti alalichileje ndaŵi syosope. Pakulipeleka mnope pamasengo gakulalichila, ni pakusasangalala mnope ni masengoga. (2 Tim. 4:5) Naga wawojo ali ŵachinandipile soni akutama ni achinangolo ŵawo, mpaka aliwusye kuti, ‘Ana achinangolo ŵangu akusatamila kungumbusya kuti njawule ku misongano ja mpingo kapena kukulalichila? Kapena ngusakombola kumbuchila yeleyi pajika?’ Naga akusatenda yeleyi pajika jawo, nikuti akusalosya kuti akusamkulupilila soni kumnonyela Yehofa. Pakutenda yeleyi akusaŵa kuti akumpa Yehofa mtuka wawuli ‘kulipeleka’ kwa jwalakwe. (2 Pet. 3:11; Aheb. 13:15) Mtuka uliwose watukusapeleka  mwakusaka kwetu ukusamsangalasya Mlungu jwetu. (Alole 2 Akolinto 9:7.) Tukusatenda yeleyi ligongo lyakuti tukusakola mtima wakusaka kumpa Yehofa yindu yambone mnope.

17-18. Ana ni chichi champaka chakamuchisye kuti abatisidwe, soni mpaka chakamuchisye chamtuli? (Misyungu 3:3-6)

¹⁷ Pakutenda yindu yakuti aŵajilwe kubatisidwa, chachisimana ni yindu yakusawusya. Ŵandu ŵane mpaka ŵasisyeje, kwalagasya, soni kwaseka wawojo ligongo lya chikulupi chawo. (2 Tim. 3:12) Komboleka kuti akulingalinga kuti achenje ndamo sine syakusakala, nambo ndaŵi sine akusatendagape yakusakalayo. Mwinesoni mpaka alepeleje kuŵa ŵakuwusimana mtima kapenasoni kutenguka kwene ligongo lyakuti chakulinga chawo ngachikukomboleka. Ana chichi champaka chakamuchisye kuti akombole kupilila? Kumnonyela Yehofa ni kwampaka kwakamuchisye mnope.

¹⁸ Kumnonyela Yehofa chili chindu chambone mnope chakusosekwa kutenda. (Aŵalanje Misyungu 3:3-6.) Kumnonyela mnope Mlungu mpaka kwakamuchisye kuti akombole kumalana ni yakusawusya yakusimana nayo. Ndaŵi syejinji Baibulo jikusasala ya chinonyelo changamala chakwete Yehofa kwa ŵakutumichila ŵakwe. Yeleyi yikugopolela kuti Yehofa ngasiŵajasa kapena kuleka kwanonyela ŵakutumichila ŵakwe. (Sal. 100:5) Wawojo ŵapanganyidwe m’chiwanichisyo cha Mlungu. (Gen. 1:26) Myoyo ana mpaka asyasye chamtuli chinonyelo chakwete Yehofa?

19. Ana mpaka alosye chamtuli kuyamichila yindu yosope yaŵatendele Yehofa? (Agalatiya 2:20)

¹⁹ Atandeje ni kuyamichila. (1 Ates. 5:18) Lisiku lililyose aliwusyeje kuti, ‘Ana Yehofa alosisye chamtuli kuti akusanonyela?’ Kaneko amyamichileje mwakumsalila yindu yisyesyene yaŵatendele. Ayiwoneje kuti Yehofa akusiŵanonyela wawojo pajika mpela muŵayiwonelaga ndumetume Paulo. (Aŵalanje Agalatiya 2:20.) Aliwusye kuti, ‘Ana ngusasaka kumlosya Yehofa kuti unesoni ngusamnonyela?’ Kumnonyela kwawo Yehofa kuchakamuchisya kuti akombole kupilila yakulingwa soni yakusawusya yampaka asimane nayo. Kuchakamuchisyasoni kuti amtumichileje Yehofa ndaŵi syosope. Yeleyi yichilosya kuti akusamnonyelaga jwalakwe lisiku lililyose.

20. Ana akusosekwa kutenda chichi kuti alipeleche kwa Yehofa? Ligongo chichi kulipeleka kwa Yehofa kuli kwakusosekwa mnope?

²⁰ Mkupita kwa ndaŵi chinonyelo chawo kwa Yehofa chichatendekasya kupeleka lipopelo lyakusosekwa mnope. Lipopeloli lichiŵa lyakumsalila Yehofa kuti akulipeleka kwa jwalakwe.  Akumbuchile kuti pagambile kulipeleka kwa Yehofa akusakola chembecheyo chambone mnope. Chembecheyochi chili chakuti chachimtumichila jwalakwe kwa umi wawo wosope. Palipeleche kwa Yehofa yikusalosya kuti asimichisye kumtumichila jwalakwe pandaŵi jambone soni jakusawusya. Kulipelekaku kukusatendekwa kampepe paumi wa mundu. Kusala yisyene kulipeleka kwa Yehofa chili chindu chakusosekwa mnope champaka tutende paumi wetu. Agambe ganisya ayi, chachisosekwa kusagula yindu yejinji paumi wawo soni yine mwa yindu yeleyi yichiŵa yambone mnope. Nambope kulipeleka kwa Yehofa kuchiŵa chindu chakusosekwa mnope kupunda chindu chilichose champaka asagule paumi wawo. (Sal. 50:14) Satana chachilinga kwatendekasya kuti aleche kumnonyela Mlungu jwawo ni chakulinga chakuti akaŵa ŵakulupichika kwa jwalakwe. Nambo wawojo akasakunda kuti Satana chiŵagomeche. (Yob. 27:5) Kumnonyela yisyesyene Yehofa mpaka kwakamuchisye kuti apitilisye kumtumichila jwalakwe kwa umi wawo wosope, soni kuŵa najo paunasi wambone mnope.

21. Ligongo chichi yili yakupikanika kusala kuti kubatisidwa kuli kutanda kwa umi wawo wa kumtumichila Yehofa?

²¹ Pagambile kulipeleka kwa Yehofa akusosekwa kwasalila achakulungwa ŵa mumpingo mwawo kuti akusaka kubatisidwa. Nambo akusosekwa kumanyilila kuti kubatisidwa kugambile kuŵa pakutandila. Pelepa yikusaŵa kuti atandite umi wa kumtumichila Yehofa kwangamala. Myoyo, apano amnonyeleje mnope Yehofa. Akoleje yakulinga yampaka yakamuchisye kuti amnonyeleje mnope jwalakwe lisiku lililyose. Kutenda yeleyi kuchakamuchisya kuti abatisidwe. Mwamti lisiku lya ubatiso wawo lichiŵa lyakusangalasya mnope. Nambope chachisosekwa kumbuchila kuti kweleko kugambile kuŵa kutanda, soni ngatukukayichila kuti chachipitilisya kumnonyela Yehofa ni Mwanache jwakwe.