Ligongo chichi “mundu jwa paulongo usyesyene ni Elimeleki” jwasasile kuti ‘mgundawo ngasiwuŵa wa ŵanache ŵakwe’ naga akumlomba Lute? (Lut. 4:1, 6)

Mundaŵi ja m’Baibulo, naga jwamlume awile ali jwangali ŵanache, paŵaga yiwusyo yakuyichisyayi: Ana mgunda wakwe chachijigala ŵani? Ana lina lyakwe ngasilipikanikasoni mpaka kalakala? Chilamusi cha Mose chajangaga yiwusyoyi.

Ana yaŵaga wuli ni mgunda wa mundu jwawile kapena mgunda wa mundu jwakulaga wawasumidwe ni mundu jwine? M’bale jwakwe kapena mundu jwine jwa paulongo ni mundujo jwasosekwaga kuwuwombola mgundawo. Yeleyi yakamuchisyaga kuti mgundawo uŵepe ku liŵasa lya mundujo.—Lef. 25:23-28; Num. 27:8-11.

Ana ŵatendaga wuli kuti lina lya liŵasa lya mundujo likamala? Papali dongosolo jajakamuchisyaga kuti yeleyi yikomboleche. Dongosolo jakwe jaliji jakuti jwamkongwe jwamasijejo alombedwe ni mlambagwe kapena jwachinasi jwalijose mpela muyaŵelele ni Lute. Jwamlumejo jwamlombaga jwamkongwe jwamasijejo kuti amŵelechele mwanache jwakuti chajigale lina lya mundu juŵawilejo soni chipanje chakwe. Jeleji jaliji dongosolo jambone jajamkamuchisyaga jwamkongwe jwamasijejo.—Det. 25:5-7; Mat. 22:23-28.

Kwende tuganichisye yayamtendechele Naomi. Jwalakwe jwalombedwe ni jwamlume jwine lina lyakwe Elimeleki. Pajwawile jwamlumeju pampepe ni ŵanache ŵakwe ŵaŵili ŵachalume, paliji pangali mundu jwakamsamalilaga Naomi. (Lut. 1:1-5) Ali awujile ku Yuda, Naomi ŵamsalile Lute kuti akamŵende Bowasi kuti akawombole mgunda wawo. Bowasi jwaliji mlongo mjakwe jwa Elimeleki. (Lut. 2:1, 19, 20; 3:1-4) Nambo Bowasi jwamanyilile kuti pana mundu jwine juŵaliji paulongo wakuŵandikana mnope ni Elimeleki, jwele Baibulo jamkolasile kuti “mundu jwa paulongo usyesyene ni Elimeleki.” Mundu jweleju ni juŵakwete upile wandanda wakuŵa jwakuwombola.—Lut. 3:9, 12, 13.

Pandanda “mundu jwa paulongo usyesyene ni Elimeleki” jwaliji jwakusachilila kuti akamuchisyepo. (Lut. 4:1-4) Atamose kuti pasosekwaga yindu yine, jwalakwe jwamanyililaga kuti Naomi nganaŵa aŵeleche mwanache jwakajigele mgunda wa Elimeleki. Myoyo, pelepa nikuti mgunda ula akajigele mundu jwa paulongo jula ni kuwupwatikanya ni wakwe, yayawonekaga kuti chapindule mnope.

Nambo kaneko mundu jwa paulongo ni Elimeleki jula jwachenjile nganisyo syakwe paŵayikopochele kuti jwakusosekwa kulombedwajo ali Lute. Jwalakwe jwatite, “Une basi ndepele kuwusuma mgundawo kuti uŵe wangu, ligongo pelepo yikulosya kuti mgundawo ngasiwuŵa wa ŵanache ŵangu.” (Lut. 4:5, 6) Ligongo chichi munduju jwachenjile nganisyo syakwe?

Yikaŵe kuti mundu jwa paulongo ni Elimeleki jula kapena mundu jwine amlombile Lute ni kumŵelechela mwanache jwamlume, nikuti mwanachejo akajigele mgunda wa Elimeleki. Ana yeleyi yikatendekasisye wuli kuti mgunda ula ukaŵa wa ŵanache ŵa mundu jwa paulongo usyesyene ni Elimeleki jula? Baibulo jangasala chilichose panganiji, nambo komboleka jwatendaga yeleyi pa magongo gakuyichisyaga.

• Ligongo lyandanda, yawonekaga kuti chagambe konanga mbiya syakwe ligongo mkupita kwandaŵi mgundawo ngamkaniwuŵa wakwe. Mgundawu ukaŵele wa mwanache jwa Lute.

• Ligongo lyaŵili, munduju akakwete udindo wakumsamalila Naomi ni Lute.

• Ligongo lyatatu, yikaŵe kuti Lute jwamŵelechele ŵanache mundu jwa paulongo usyesyene ni Elimeleki jula, nikuti ŵanachewo akagaŵene chipanjecho ni ŵanache ŵajwakwete mundu jula.

• Ligongo lyakumalisya, yikaŵe kuti mundu jwa paulongo ni Elimeleki jula nganakola ŵanache ŵakwe, nikuti mwanache jwakamŵelechele Lute akakwete ufulu wakujigala mgunda wa Elimeleki soni wa mundu jula. Yeleyi yikatendekasisye kuti pachachiwa munduju mgunda wakwe upelechedwe kwa mwanache juŵaŵeleche mu lina lya Elimeleki mmalo mwakuwupeleka kwa ŵanache ŵakwe ŵasyesyene. Myoyo, mundu jwa paulongo usyesyene ni Elimeleki jula nganasaka kupeleka chipanje chakwe kuti amkamuchisye Naomi. Mmalomwakwe jwalakwe jwapeleche upile kwa Bowasi kuti awombole mgunda wa Elimeleki. Mwamti Bowasi jwatesile yeleyo ligongo jwasakaga kuti “lina lya malemuwo likawa, pasikati pa achalongo achimjakwe.”—Lut. 4:10.

Mundu jwa paulongo usyesyene ni Elimeleki jwasakaga kuti lina lyakwe soni chipanje chakwe yikajawula kwa ŵane. Jwalakwe jwaliji jwakulinonyela. Nambo mmalo mwakusunga lina lyakwe, lelojino lina lya munduju lyangamanyikagasoni. Jwalakwe jwajasilesoni upile wambone mnope waŵawupatile Bowasi, wakuŵichidwa pa ndandanda ja msela wa achinangolo ŵa Mesiya, jwali Yesu Klistu. Kusala yisyene yaliji yakutesya chanasa kwa munduju ligongo lyakulepela kwakamuchisya ŵane ligongo lyakulinonyela.—Mat. 1:5; Luk. 3:23, 32.