1. Ana Daudi jwapikanaga uli mumtima pakwamba ya Yehofa, soni yeleyi yamlimbikasisye kutenda cici?

MWENYE DAUDI jwalembile kuti, “Yehofa ali jwamkulungwa, soni akuŵajilwa kucimbicikwa mnope.” (Sal. 145:3, NW) Jwalakwe jwamnonyelaga Yehofa. Cinonyeloci, camtendekasisye kuti amlumbeje Mlungu “pasikati pampingo.” (Sal. 22:22; 40:5, NW) Ngatukukayicila kuti wawojosoni akusamnonyela Yehofa soni akusakamulana ni maloŵe ga Daudi gakuti, “Acimbicikwe wawo Ambuje Mlungu jwa nangolo jwetu Yakobo mpaka ku ndaŵi syangamala.”—1 Mbi. 29:10-13.

2. (a) Ana mpaka tumlumbe camtuli Yehofa? (b) Ana ni yakusawusya yapi yakusasimana nayo ŵane, soni citulijiganye cici?

² Masiku aganosoni, litala limo lyampaka tumlumbe Yehofa, lili kupeleka ndemanga pamisongano jampingo. Nambope, abale ni alongo ŵajinji yikusiyasawusya. Jemanjaji akusasaka kuti ajigaleje nawo mbali pamisongano jampingo. Nambo ligongo lya woga, ŵangatenda yeleyi. Ana mpaka atende wuli kuti amalane ni wogawu? Soni ana ni yindu yapi yampaka yitukamucisye kuti tupeleceje ndemanga syakulimbikasya? Mkanitujanje yiwusyoyi, kwende tulole magongo mcece gagakusatutendekasya kuti tupeleceje ndemanga pamisongano jampingo.

3-5. (a) Mwakamulana ni lilemba lya Ahebeli 13:15, ligongo cici tukusapeleka ndemanga pamisongano? (b) Ana tukusosekwa kupeleka ndemanga syakulandana? Alondesye.

³ Yehofa atupele upile wakuti tumlumbeje jwalakwe. (Sal. 119:108) Ndemanga syetu pamisongano sili mbali ja “mbopesi” soni pangali mundu jwalijose jwampaka atupelecele mbopesiji. (Aŵalanje Ahebeli 13:15) Ana Yehofa akusatulamula kuti tupeleceje ndemanga syakulandana ni ŵane? Iyayi.

⁴ Yehofa akusamanyilila kuti tuli ŵakulekangana soni mwayiŵelele yindu pa umi wetu yili yelekangane ni ŵane. Mwamti jwalakwe akusayamicila mnope mbopesi syatukusampaga. Aganicisye  ya mtundu wa mbopesi syaŵasijiticisyaga kutyocela kwa Aisalaeli. Aisalaeli ŵane ŵapelekaga mbopesi ja mwanace jwangondolo kapena mbusi. Mwamti Aisalaeli ŵaŵaliji ŵakulaga ŵapelekaga “ngunda siŵili kapena njuŵa siŵili.” Nambo naga Aisalaeli akulepela kupeleka yijuni yiŵili, Yehofa jwakundaga kuti apeleceje “utandi wakwanila kilogalamu jimo” (Lef. 5:7, 11) Mundaŵiji utandi wawonekaga kuŵa wangakatala, nambo Yehofa jwayamicilaga mbopesi ‘ja utandiji.’

⁵ Masiku aganosoni, Mlungu jwetu jwacinonyelo akusapikana m’litala lilili. Patukupeleka ndemanga, jwalakwe jwangajembeceya kuti wosopewe, citupeleceje ndemanga syakupikanika cenene mpela muŵatendelaga Apolo ni Paulo. (Mase. 18:24; 26:28) Yakusasaka Yehofa ni yakuti wosopewe tupeleceje ndemanga syampaka tukombole. Akumbucile ya jwamkongwe jwamasije juŵapelece tumakobili tuŵili. Jwalakwe jwaliji jwapenani mnope kwa Yehofa ligongo jwapelece yakakombwele.—Luk. 21:1-4.

6. (a) Mwakamulana ni lilemba lya Ahebeli 10:24, 25, ana ndemanga syakutusapikana pamisongano sikusatukwaya camtuli? (b) Ana mpaka tulosye camtuli kuyamicila ndemanga syelesi?

⁶ Tukusalimbikasyana jwine ni mjakwe kupitila mu ndemanga syetu. (Aŵalanje Ahebeli 10:24, 25.) Wosopewe tukusasangalala mnope kupikana ndemanga syakulekanganalekangana patuli pamisongano. Tukusasangalalasoni kupikana ndemanga syakusapeleka ŵanace mwakata. Yikusatulimbikasya kupikana ndemanga ja mundu jwine jakusala usyesyene wapatile pawungunyisyeje. Tukusayamicilasoni ŵandu ‘ŵalimbile mtima’ kupeleka ndemanga, atamose kuti akusatenda sooni kapena atandite kwene kulijiganya ciŵeceto cetu. (1 Ates. 2:2) Ana mpaka twayamicile camtuli ligongo lyakulimbicila kwawo? Panyuma pamisongano mpaka twayamicile jemanjaji ligongo lya ndemanga syakulimbikasya syapelece. Litala line lyampaka tulosye kuyamicila, lili kupeleka ndemanga syetu. Yeleyi yikulosya kuti patuli pamisongano tukajembeceyaga kuti ŵane agambeje kutulimbikasya. Nombe m’weji tukusosekwa kwalimbikasya ŵane.—Alo. 1:11, 12.

7. Ana tukusapindula camtuli ni ndemanga syatukusapeleka pamisongano?

⁷ Patukupeleka ndemanga tukusapindula. (Yes. 48:17) Mwamtuli? Candanda, naga tukusaka kuja kupeleka ndemanga pamisongano jampingo tukusakosecela mwakwanila. Patukosecele  mwakwanila ni patukusatanda kupikanicisya cenene Maloŵe ga Mlungu. Patutandite kupikanicisya, ni patukusatandasoni kuyikamulicisya masengo. Caŵili, tukusatanda kujinonyela misongano ligongo lyakujigala nawo mbali. Catatu, ligongo lyakuti tukusasosekwa kukosecela mnope kuti tukajanje, yikusaŵa yangasawusya kuti tukumbucileje yatujanjileyo pambesi pamisongano mwinesoni kwa ndaŵi jelewu.

8-9. (a) Mwakamulana ni lilemba lya Malaki 3:16, ana tukuganisya kuti Yehofa akusapikana uli mumtima patukupeleka ndemanga? (b) Ana ŵandu ŵane akusasimana ni cakusawusya camtuli?

⁸ Tukusamsangalasya Yehofa patukuŵeceta ya cikulupi cetu. Mpaka tuŵe ŵakusimicisya kuti Yehofa akusatupikanila soni akusayamicila mnope kulimbicila kwetu patukupeleka ndemanga pamisongano. (Aŵalanje Malaki 3:16.) Jwalakwe akusalosya kuyamicilaku pakutupa majali patukulingalinga kumsangalasya jwalakwe.—Mala. 3:10.

⁹ Kusala yisyene, tukwete magongo gakupikanika gakupelecela ndemanga pamisongano jampingo. Nambo ŵandu ŵane akusatenda woga kuti ajimice mkono. Naga wawojo akusapikanasoni m’yoyo, akasatenguka. Kwende tukambilane yiwundo ya m’Baibulo, yisyasyo yine, soni yindu yine yampaka yitukamucisye wosopewe kuti tupeleceje ndemanga pamisongano jampingo.

10. (a) Ana ŵajinji mwa m’weji tukusajogopa cici? (b) Naga tukusatenda woga kupeleka ndemanga, ana mpaka tujile kuti tukwete ndamo japi?

¹⁰ Ana m’matumbo mukusatotokoka pagambile kuganisya yakuti akwesye mkono kuti ajanje? Naga yili m’yoyo nganaŵa jika. Kusala yisyene, wosopewe tukusatenda woga kuti tupelece ndemanga pamisongano. Kuti amalane ni wogawu candanda akusosekwa kumanyilila cacikusicatendekasya kuti atendeje woga. Ana akusatenda woga kuti cakaliŵalile yakwanga kapena cakajanje yakulemweceka? Ana akusadandawula kuti ndemanga jawo ngajijakuŵa jakupikanika pakuwanicisya ni ndemanga sya ŵane? Kutenda woga mu litala lyeleli mpaka kuŵe kwakupikanika. Yeleyi yikulosya kuti ali ŵakulinandiya soni akusiŵawona ŵane kuŵa ŵakwapunda. Yehofa  akusanonyela ndamo jeleji. (Sal. 138:6; Afil. 2:3) Nambope, Yehofa akusasaka kuti wawojo amlumbeje jwalakwe soni ŵalimbikasyeje abale ni alongo pali pamisongano. (1 Ates. 5:11) Jwalakwe akusiŵanonyela soni cacalimbikasya pandaŵi jakusosecela.

11. Ana ni yindu yine yapi yajikusasala Baibulo yampaka yitukamucisye?

¹¹ Kwende tulole yindu yine yajikusasala Baibulo. Baibulo jikusasala kuti, wosopewe tukusalemwesya mukaŵecete ketu. (Yak. 3:2) Yehofa ngakusajembeceya kuti tutendeje yindu mwangalemwesya cilicose soni tukajembeceyaga kuti abale ni alongo catendeje yindu mwamlama. (Sal. 103:12-14) Jemanjaji ali liŵasa lyetu lyausimu soni akusatunonyela. (Mak. 10:29, 30; Yoh. 13:35) Akusatupikanicisya kuti ndaŵi sine ngaŵa mkuŵeceta yosope yatukosecele.

12-13. Ana tukulijiganya cici kutyocela ku cisyasyo ca Nehemiya soni Yona?

¹² Aganicisye ya yisyasyo yine ya m’Baibulo yampaka yitukamucisye kumalana ni woga. Akumbucile ya Nehemiya. Jwalakwe jwatumicilaga paluŵala lwa magambo lwa mwenye jwamacili. Nehemiya jwadandawulaga ligongo jwapikene kuti yipata soni mapupa ga Yelusalemu gajonasice. (Neh. 1:1-4) Jwalakwe jwatesile woga mwenye paŵamŵendile kuti asale yindu yayamtendekasyaga kuti akasangalalaga. Mwacitema Nehemiya jwapopesile kwa Yehofa kaneko jwamsalile mwenye jula yindu yayamtendekasyaga kuti akasangalalaga. Mwenye pajwapikene yeleyi, jwatesile yindu yejinji pakusaka kwakamucisya ŵandu ŵa Mlungu. (Neh. 2:1-8) Aganicisyesoni ya Yona. Yehofa paŵamtumile Yona kuti akalalicile m’cilambo ca Ninefe, jwalakwe jwatisile ni kwawula cilambo cine. (Yon. 1:1-3) Nambo ni cikamucisyo ca Yehofa, Yona jwakombwele kulalicila ku Ninefe. Mwamti utenga waŵalalicile wakamucisye mnope kwa ŵandu ŵa ku Ninefe. (Yon. 3:5-10) Kutyocela kwa Nehemiya, tukulijiganya umbone wakupopela mkanitutende yisagula yiliyose. Nambosoni kutyocela kwa Yona tukulijiganya kuti Yehofa mpaka atukamucisye kumtumicila jwalakwe mwangasamala kandu kuti tuli ŵawoga mnope. Ana kupeleka ndemanga pamisongano mpaka kuŵe kwakutesya woga pa kulandanya ni kulalicila utenga wakwelusya ku Ninefe?

¹³ Ana ni yindu yapi yampaka yitukamucisye kupeleka ndemanga syakulimbikasya patuli pamisongano? Kwende tulole yindu yakuŵalanjika.

14. Ligongo cici tukusosekwa kukosecela cenene misongano, soni ana mpaka tukosecele camtuli?

¹⁴ Tukoseceleje msongano wuliwose. Naga akukosecela cenene caciŵa ŵakulimba mtima pakupeleka ndemanga jawo. (Mis. 21:5) Wosopewe tukwete ndaŵi jakulekanganalekangana jakosecela misongano. Mlongo jwine jwamasije lina lyakwe Eloise, jwakwete yaka ya m’ma 80, akusatanda kosecela Lijiganyo lya Sanja ja Mlonda kundanda kwa cijuma. Jwalakwe jwasasile kuti, “Ngusasangalala ni misongano ligongo lyakuti ngusakosecela mkanipaŵe.” Joy jwakusakamula masengo gakulembedwa akusapata ndaŵi lisiku Lyakuŵeluka kuti akakosecele  lijiganyo lya Sanja ja Mlonda. Jwalakwe jwasasile kuti, “Ngusakumbucila mwangasawusya naga ngosecele misongano lisiku lilyolyo.” Ike jwali jwamkulungwa jwa mumpingo nambosoni mpayiniya jwayikusamtupila yakutenda jwatite, “Nayiweni kuti kuli kwambone kukosecela lijiganyo mwapanandipanandi kulekangana ni kukosecela ndaŵi jimo.”

15. Ana mpaka tukosecele camtuli misongano?

¹⁵ Ana ni cici cacikusapwatikapo patukukosecela misongano? Mkanitutande kukosecela lijiganyo lililyose tumŵendeje Yehofa kuti atupe msimu weswela. (Luk. 11:13; 1 Yoh. 5:14) Kaneko mpaka tulole mtwe wa nganijo, tumitwe twamwanamwana, yisyasyo soni mabokosi ga yiwusyo yakuwilisya. Patutandite kukosecela ndime jilijose, tulinje kuŵalanga malemba ganganagakamula maloŵe. Tuganicisyeje mwakusokoka yatukuŵalangayo soni yiwundo yatukusaka kuti tukajanje. Naga tukukosecela cenene mpaka tumanyilile yejinji soni yiciŵa yangasawusya kuti tukapelece ndemanga.—2 Akoli. 9:6.

16. Ana ni yindu yapi yasambano yatukwete soni mpaka tuyikamulicisye masengo mwamtuli?

¹⁶ Naga kuli kwakomboleka, tukamulicisyeje masengo yindu yasambano yayikusimanikwa m’ciŵeceto cetu. Kupitila m’likuga lyakwe, Yehofa atupele yindu yasambano pakusaka kutukamucisya kuti tukoseceleje cenene misongano. Pologalamu ja JW Library^® mpaka jitukamucisye kujigala mabuku ni kugaŵika m’mafoni kapena m’ma tabuleti getu. Kaneko mpaka tulijiganye, kuŵalanga kapenasoni kupikanila yindu yatujigeleyo ndaŵi jilijose soni kwine kulikose. Ŵane akusakamulicisya masengo pologalamu ja JW Library kuti alijiganyeje pa ndaŵi jakupumula ja musi pali kumasengo, kusukulu, nambosoni pakwenda. Pa Watchtower Library soni LAIBULALE JA PA INTANETI^™ ja Watchtower pali pangasawusya kuwungunya yiwundo yayili mungani jatukusaka kulijiganyajo.

17. (a) Ligongo cici mpaka yiŵe cenene kosecela ndemanga syejinji? (b) Ana twalijiganyisye cici pa fidiyo jakuti, Aŵe Mjakwe jwa Yehofa—Mkoseceleje Kwanga Pamisongano?

¹⁷ Naga yili yakomboleka tukoseceleje ndemanga syejinji. Ligongo cici? Ligongo lyakuti ngaŵa ndaŵi syosope pampaka atulanjile patukwesisye mkono. Ŵandu ŵane akusakwesya makono gawo ndaŵi jimo, ni jwakutendesya lijiganyo akusasagula jumo mwa jemanjaji. Kuti misongano jimaleje pa ndaŵi jakwe, jwakutendesya lijiganyo akusasagula kuti mbali jine jalijiganyolyo akajigala ndaŵi jelewu. M’yoyo, tukasitutenguka naga nganatulanjila kundanda kwa lijiganyolyo. Naga tukosecela ndemanga syejinji, tucikolasoni upile wakupeleka ndemanga syejinji. Jimo mwa ndemanga syampaka tukosecele mpaka jiŵe kuŵalanga lilemba. Naga mpaka tukombole mpaka tukosecele ndemanga m’maloŵe getugetupe. *

18. Ligongo cici tukusosekwa kwanga ndemanga syakata?

 ¹⁸ Tupeleceje ndemanga syakata. Ndemanga syakulimbikasya sikusaŵa syakata soni syangasawusya kusipikana. M’yoyo, cakulinga cetu ciŵeje kwanga ndemanga syakata. Tulinjeje kusiŵeceta kwa masekandi 30. (Mis. 10:19; 15:23) Naga tuŵele tuli mkupeleka ndemanga pamisongano kwa yaka yejinji, tuŵe cisyasyo cambone cakupeleka ndemanga syakata. Pakwanga ndemanga syetu tukatupiyaga yakuŵeceta ligongo mpaka yatendekasye ŵane ulesi wakwanga pakuyiwona kuti ngakwanisya kwanga mpela mwatutendele m’wejo. Nambosoni ndemanga syakata sikusapeleka upile kwa ŵandu ŵajinji kuti nombe nawo ajanje. Naga tuli ŵandanda kutulanjila, tukusosekwa kwanga ciwusyoco mwakata. Tukajangaga yiwundo yosope yayili mu ndimejo. Panyuma pakuti ciwundo cacikulungwa cijanjidwe pa ndimejo, tujanje ndemanga sine syakonjecesya.—Alole libokosi lyakuti “Ana Mpaka Tujanje Cici?”

19. Ana jwakutendesya lijiganyo mpaka atukamucisye camtuli, soni ana m’weji tukusosekwa kutenda cici?

¹⁹ Tumsalileje jwakutendesya lijiganyo kuti tukusaka kwanga pa ndime jine jakwe. Naga tusagwile kutenda yeleyi, tuwoneganeje ni jwakutendesya lijiganyolyo mkanipaŵe. Pajiyice ndaŵi jakuti tupelece ndemanga pandimejo, tukwesyeje mkono wetu mwacitema soni tukwesyeje kuti jwakutendesya lijiganyojo atuwone mwacitema.

20. Ana misongano jampingo mpaka jiŵe camtuli mpela cakulya cagaŵana ni acimjetu?

²⁰ Tujiwoneje misongano jampingo mpela cakulya cakugaŵana ni acimjetu. Tuwanicisye kuti abale ni alongo atuŵilasile kuti tukalile yimpepe cakulya, nambo akutuŵenda kuti tulinganye kacakulya kakuti tujigalile kumaloko. Ana mpaka tutende uli? Mwine pandanda mpaka tutende woga, nambo mpaka tuŵe ŵakusacilila kutenda yiliyose yampaka tukombole ni cakulinga cakuti jwalijose akasangalale. Patuli pamisongano jampingo Yehofa ni jwakusatuŵilanga. Pandaŵiji, jwalakwe akusatupa yakulya yejinji. (Sal. 23:5; Mat. 24:45) Soni jwalakwe akusasangalala pakutuwona tuli mkwisa ni mituka jetu, jampaka tukombole kupeleka. M’yoyo, tukusosekwa kukosecela cenene misongano soni tujigaleje nawo mbali. Ngatukusayika kukulya nawope patebulo ja Yehofa, nambo tukusayikasoni ni mtuka kuti twagaŵile acimjetu ŵa mumpingo.