ANA Yehofa akusalola cici ŵandu ŵajinji pasongene kuti atende cakutendekwa ca Cakulya Caligulo ca Ambuje? Jwalakwe jwangagamba kulola winji wa ŵandu ŵasongene pa cikumbucilo, nambo akusatenda lung’wanu ni mundu jwalijose pajikapajika jwayice pa cikumbuciloco. Mwambone, jwalakwe akusatenda lung’wanu ni ŵandu ŵakusayika mwakulupicika pa cikumbucilo caka cilicose. Ŵane mwa jemanjaji akusaŵa kuti akusimana ni yipwetesi yejinji. Ŵanesoni ŵangayika mwakutamilicika pamisongano, nambo akusaciwona cikumbuciloci kuŵa cakusosekwa mnope. Yehofa akusatendasoni lung’wanu ni ŵandu ŵasimanikwe kandanda pa Cikumbucilo, ligongo lyakuti akusaka kumanyilila yejinji ya Cikumbuciloci.

1-2. (a) Ana Yehofa akusalola cici kwa ŵandu ŵajinji ŵasongene kuti atende cakutendekwa ca Cakulya Caligulo ca Ambuje? (Alole ciwulili papeji jandanda.) (b) Ana mungani ajino citukambilane cici?

² Kusala yisyene, Yehofa akusasangalala kwawona ŵandu ŵajinji ali ayice pa Cikumbucilo. (Luk. 22:19) Nambope, Yehofa jwangagamba kulola winji wa ŵandu ŵayice pa cikumbucilo. Jwalakwe akusatenda lung’wanu ni magongo gagakusigatendekasya kuti ayice pa cikumbucilo. Mungani ajino, citukambilane ciwusyo cakusosekwa mnope aci, Ligongo cici tukusatenda Cikumbucilo caka cilicose, nambosoni misongano ja cijuma cilicose japelece Yehofa kwa ŵandu ŵakusamnonyela jwalakwe?

3-4. (a) Ligongo cici tukusatenda misongano? (b) Ana kusimanikwa kwetu pamisongano kukusalosya cici yakwamba m’weji? (c) Mwakamulana ni yalikusala lilemba lya 1 Akolinto 11:23-26, ana ligongo cici tukusosekwa kusimanikwa pa Cikumbucilo?

³ Tukusatenda misongano ja mpingo ligongo lyakuti jili mbali jakulambila kwetu. Tukusatendasoni misongano ligongo pandaŵiji  tukusaŵa tuli mkwiganyidwa ni Yehofa. Nambo ŵandu ŵakupoka ŵangakulupilila kuti akusasosekwa kwiganyidwa cilicose. (3 Yoh. 9) Mwakulekangana ni nganisyo syelesi, m’weji tukusaŵa ŵakusacilila kwiganyidwa ni Yehofa pakamulicisya masengo likuga lyakwe.—Yes. 30:20; Yoh. 6:45.

⁴ Kusimanikwa kwetu pamisongano kukusalosya kuti tuli ŵakulinandiya, ŵakoseka soni ŵakusacilila kwiganyidwa ni Yehofa. Tukusakumbucila ciwa ca Yesu ngaŵape kuti uli ukumu wetu nambo ligongo lyakuti tukusapikanila lilamusi lya Yesu lyakuti, “Mtendeje yeleyi kuti mungumbucileje.” (Aŵalanje 1 Akolinto 11:23-26.) Cikumbucilo cikusalimbikasya cembeceyo cetu ca msogolo nambosoni cikusatukumbusya ya cinonyelo ca Yehofa. Nambope, Yehofa akusamanyilila kuti tukusasosecela cilimbikasyo ndaŵi ni katema. M’yoyo, jwalakwe atupele misongano ja cijuma cilicose soni akusatulimbikasya kuti tusimanikwejepo. Kulinandiya kukusatukamucisya kuŵa ŵakupikanila. Tukusamalila ndaŵi jejinji cijuma cilicose kuti tukosecele soni kuti tukasimanikwe pamisonganoji.

5. Ligongo cici ŵandu ŵakulinandiya akusapikanila kuŵilanga kwa Yehofa?

⁵ Yehofa akusiŵaŵilanga ŵandu kuti akajiganyidwe ni jwalakwe, mwamti ŵandu ŵajinji ŵakulinandiya akusapikanila kuŵilangaku. (Yes. 50:4) Jemanjaji akusasangalala ligongo lyakusimanikwa pa Cikumbucilo soni akusatanda kusimanikwa pamisongano jine ja mpingo. (Sak. 8:20-23) Wosopewe tukusaŵa ŵakusangalala kwiganyidwa soni kulongoleledwa ni Yehofa, jwali ‘jwakutukamucisya jwetu ni mkulupusyo jwetu.’ (Sal. 40:17) Yili yakusangalasya kukunda kuŵilanjidwa kuti tukajiganyidwe ni Yehofa soni Yesu jwali Mwanace jwakwe jwakusamnonyela mnope.—Mat. 17:5; 18:20; 28:20.

6. Ana kulinandiya kwamkamucisye camtuli mundu jwine kuti asimanikwe pa Cikumbucilo?

⁶ Caka cilicose, tukusatenda mwampaka tukombolele kwaŵilanjila ŵandu ŵajinji ku Cikumbucilo ca ciwa ca Yesu. Kuŵilanjilaku kukamucisye ŵandu ŵajinji ŵakulinandiya. Aganicisye ya cisyasyo aci. Yaka yine munyumamu, mundu jwine jwaŵilanjidwe ku mwambo wa Cikumbucilo, nambo mundujo jwamsalile m’bale juŵamŵilanjilejo kuti ngasajawulako. Nambope, palisiku lya Cikumbucilolyo, m’bale jula jwasimonjile mnope mkum’wona mundu jula ali mkwawula ku Nyumba ja Ucimwene. Munduju jwatesile lung’wanu ni yaŵatite abale pakumpocela mwamti jwatandite kusimanikwa pamisongano ja cijuma cilicose. Kwa caka cosope katatupe ni kanganasimanikwa pamisongano. Ana ni cici cacamkamucisye kuti asimanikweje pamisongano? Ligongo lyakuti jwaliji jwakusacilila kucenga nganisyo syakwe. M’bale jujwamŵilanjile munduju jwasasile kuti, “Munduju ali jwakulinandiya mnope.” Mwangakayicila, Yehofa ni juŵam’wutile munduju kuti amlambileje jwalakwe. Sambano apano munduju jwabatiswe.—2 Sam. 22:28; Yoh. 6:44.

7. Ana yatukusalijiganya pamisongano soni kuŵalanga m’Baibulo mpaka yitukamucisye camtuli kuŵa ŵakulinandiya?

⁷ Yatukusalijiganya ku misongano ja mpingo soni yatukusaŵalanga m’Baibulo mpaka yitukamucisye kuŵa ŵakulinandiya. Kuli kugambile kusigala yijuma yakuŵalanjika kuti tutende Cikumbucilo, misongano jetu jikusalondesya mnope ya cisyasyo ca Yesu cakulinandiya caŵalosisye pakupeleka umi wakwe mpela mbopesi. Nambosoni kuli kusigele masiku gakuŵalanjika kuti tutende Cikumbucilo, mpaka tutende cenene kuŵalangaga ngani sya m’Baibulo syakwamba yayatendekwe pa ndaŵi ja ciwa ca Yesu soni kwimuka kwakwe. Yatukusalijiganya pamisonganoji soni ngani syatukusaŵalanga m’Baibulo sikusatulimbikasya mnope kuti tuyamicileje mbopesi jaŵapelece Yesu. Yikusatutendekasya kuti tujigalileje cisyasyo ca Yesu cakulinandiya nambosoni kutenda yakusasaka Yehofa, atamose yindu yisawusye wuli.—Luk. 22:41, 42.

8. Ana Yesu jwalosisye camtuli kulimba mtima?

⁸ Tukusajigalila cisyasyo ca Yesu mwakulosya kulimba mtima. Aganicisye yakulimba mtima kwajwalosisye kuli kugambile kusigala masiku gakuŵalanjika kuti jwalakwe awulajidwe. Jwalakwe jwamanyililaga kuti acimmagongo ŵakwe camŵecetele maloŵe gacipongwe, kumputa soni kum’wulaga. (Mat. 20:17-19) Nambope, jwaliji jwakusacilila kuwulajidwa. Pajakwanile ndaŵi, jwalakwe jwasalile ŵandumetume ŵakwe ŵakulupicika, ŵaŵaliji nawo mumgunda wa Getisemane kuti, “Mjimuce, kwende tujawuleje. Mlole, ngati jwakwisa kukumbeleka jula aju ayice.” (Mat. 26:36, 46) Likuga lya ŵandu palyayice kukumkamula lili lijigele yida, jwalakwe jwapite pasogolo panandi, ni cakulinga cakusaka kulimanyikasya. Ni ŵasalile asilikaliwo kuti ŵasalile ŵandumetumewo ajawuleje. (Yoh. 18:3-8) Pelepatu Yesu jwalosisye kulimba mtima mnope. Masiku agano, Aklistu ŵasagulwe soni ŵangondolo sine akusalingalinga kumsyasya Yesu mwakuŵa ŵakulimba mtima. Mwamtuli?

9. (a) Ligongo cici tukusosekwa kulimba mtima kuti tutendeje misongano mwakutamilicika? (b) Ana cisyasyo cetu mpaka calimbikasye camtuli abale ŵetu ŵali kundende?

⁹ Kuti tutendeje misongano mwakutamilicika, tukusasosekwa kulosya kulimba mtima atamose patusimene ni yindu yakusawusya. Abale ni alongo ŵetu ŵane, akusatenda misongano atamose kuti jemanjaji akusasimana ni yakusawusya mpela kutenguka kapena yakusawusya ya m’cilu. Ŵanesoni mwakulimba mtima, akusatenda misongano atamose kuti ŵamwiŵasa mwawo kapena acakulungwakulungwa ŵa boma akusiŵasisya mnope. Cisyasyo cetu cikusicalimbikasya abale ni alongo ŵetu ŵali kundende. (Aheb. 13:3) Jemanjaji pakupikana kuti tukwendelecela kutumicila Yehofa, atamose kuti tukusimana ni yakulingwa, cikulupi cawo cikusajendelecela kuŵa cakulimba mnope. Ndumetume Paulo jwasimene yakulandana ni yeleyi. Jwalakwe pajwaliji mundende ku Loma, jwasangalalaga mnope papikene kuti abale akwendelecela kumtumicila Mlungu mwakulupicika. (Afil. 1:3-5, 12-14) Ali asigele panandi kopoka kundende kapena ali nakopokape, Paulo jwalembele cikalata Ahebeli. M’cikalataci, jwalimbikasisye Aklistu ŵakulupicika kuti ‘apitilisye kunonyelana jwine ni mjakwe’ soni akaleka kusongana pampepe.—Aheb. 10:24, 25; 13:1.

10-11. (a) Ana ŵani ŵatukusosekwa kwaŵilanjila ku Cikumbucilo? (b) Ana pa Aefeso 1:7 pana ligongo lyapi lyakutendela yeleyi?

¹⁰ Tukusalosya kulimba mtima patukwaŵilanjila ŵacibale ŵetu, acimjetu ŵakumasengo soni ŵandu ŵakuŵandikana nawo majumba ku Cikumbucilo. Ligongo cici tukusitwaŵilanjila ŵanduŵa? Tukusayamicila mnope pa yindu yatutendele Yehofa soni Yesu, mwamti tukusaŵa ŵakusacilila kwaŵilanjila ŵandu ŵane ku Cikumbucilo. Tukusasaka kuti jemanjaji alijiganye mwampaka apatile majali kutyocela kwa Yehofa jwali jwa “umbone mtima wekulungwa” kupitila mu mbopesi ja ciwombolo.—Aŵalanje Aefeso 1:7; Ciw 22:17.

¹¹ Patukusongana pampepe tukusalosya kulimba mtima. Tukusalosyasoni ndamo jine japajika, jele Mlungu soni Mwanagwe akujilosya m’matala gapenani mnope.

12. (a) Ana misongano jikusalimbikasya camtuli cinonyelo cetu pa Yehofa soni Yesu? (b) Ana lilemba lya 2 Akolinto 5:14, 15 likusatulimbikasya kutenda cici?

¹² Cinonyelo cetu pa Yehofa soni Yesu cikusatulimbikasya kuti tusimanikweje pamisongano. Kaneko, yatukusalijiganya ku misongano yikusalimbisya cinonyelo cetu pa Yehofa soni Mwanace jwakwe. Misongano jampingo, jikusatukumbusya yaŵatutendele Yehofa soni Yesu. (Alo. 5:8) Cikumbucilo cikusatukumbusya mwaciŵelele cinonyelo ca jemanjaji, atamose kwa ŵandu ŵangakusamanyilila kusosekwa kwa ciwombolo. Ligongo lyakuyamicila, tukusalingalinga kumsyasya Yesu pa yakutenda yetu ya lisiku lililyose. (Aŵalanje 2 Akolinto 5:14, 15.) Konjecesya pelepa, mitima jetu jikusatulimbikasya kuti tumlumbeje Yehofa ligongo lyakutupa ciwombolo. Litala limo lyampaka tulosye kumlumba jwalakwe lili kupeleka ndemanga syakutyocela pasi pa mtima patuli pamisongano.

13. Ana mpaka tulosye camtuli cinonyelo cetu pa Yehofa soni Mwanace jwakwe? Alondesye.

¹³ Mpaka tulosye cinonyelo cetu pa Yehofa soni Mwanace jwakwe mwakuŵa ŵakusacilila kwapa jemanjaji cilicose catukwete. Ndaŵi syosope, tukusatenda yeleyi kuti tusimanikweje pamisongano. Mipingo jejinji jikusatenda msongano wine kumbesi kwa lisiku, panyuma pakuŵeluka ku masengo. Nambo ŵandu ŵajinji akusaŵa ali apesile. Msongano wine ukusatendekwa ku mbesi kwa cijuma pandaŵi jele ŵandu ŵane akusaŵa ali mkupumula. Ana Yehofa akusamanyilila kuti tukusatenda misongano jetu atamose pandaŵi jatupesile? Elo akusamanyilila. Kusala yisyene, patukulaga mnope, Yehofa ni pakusayamicila mnope cinonyelo catukusalosya pa jwalakwe.—Mak. 12:41-44.

14. Ana Yesu jwapelece cisyasyo camtuli mwakulosya cinonyelo cisyesyene?

¹⁴ Yesu jwatupele cisyasyo mwakulosya cinonyelo cisyesyene. Jwalakwe jwaliji jwakusacilila kwawila ŵandumetume ŵakwe nambosoni lisiku lililyose jwaŵikaga yakusosecela ya ŵane pamalo gandanda. Mwacisyasyo, jwalakwe jwapite kukuwonegana ni ŵakumkuya ŵakwe atamose kuti jwaliji ali apesile soni jwalagaga nganisyo. (Luk. 22:39-46) Soni jwalakwe jwakamucisyaga ŵane, m’malo mwakwembeceya kuti jemanjajo amkamucisyeje. (Mat. 20:28) Naga tukusamnonyela mnope Yehofa soni abale ŵetu, tucitenda yiliyose yampaka tukombole kuti tusimanikweje pa Cakulya ca Ligulo ca Ambuje nambosoni pamisongano jine josope.

15. Ana ni ŵandu ŵapi ŵatukusosekwa kutenda nawo lung’wanu kwakamucisya?

 ¹⁵ Tuli m’likuga lya Ciklistu lya abale ni alongo ŵakamulana yisyesyene, soni tukusasangalala kukamulicisya masengo ndaŵi jetu kwaŵilanjila ŵandu ŵasambano m’likugali mwampaka tukombolele. Nambope, tukusatenda lung’wanu kwakamucisya “ŵakulupilila acimjetu” mnopemnope ŵaŵalesile kulalicila kapena kusongana. (Aga. 6:10) Mpaka tulosye kuti tukusitwanonyela jemanjaji mwakwalimbikasya kuti asimanikweje pamisongano, mnopemnope pa mwambo wa Cikumbucilo. Mpela mwakusatendela Yehofa soni Yesu, tukusasangalala mnope kwawona ŵandu ŵaŵalesile kulalicila soni kusongana pawujile kwa Yehofa, jwali Mtati jwetu jwacinonyelo soni Mkucinga jwetu.—Mat. 18:14.

16. (a) Ana mpaka tulimbikasyane camtuli, soni ana misongano jetu jikusatukamucisya camtuli? (b) Ligongo cici kukumbucila maloŵe ga Yesu ga pa Yohane 3:16 kuli kwakusosekwa, mnopemnope caka acino?

¹⁶ Yijuma yayikwisayi, naga kuli kwakomboleka kwende citwaŵilanjile ŵandu ŵajinji ku Cikumbucilo cacicitendekwa Lyamsano ligulo pa  19 April, 2019. (Alole libokosi lyakuti “Ana Cacaŵilanjila?”) Kwa caka cosopeci, kwende wosope tutende yampaka tukombole pakulimbikasyana jwine ni mjakwe, mwakusimanikwa pamisongano josope jatupele Yehofa. Mbesi ja cilamboci pajikuŵandicila, tukusosekwa kutendaga misongano ni cakulinga cakuti jitukamucisyeje kwendelecelape kuŵa ŵakulinandiya, ŵakulimba mtima soni ŵacinonyelo. (1 Ates. 5:8-11) Ni mtima wetu wosope, kwende tulosyeje mwatukusapikanila mumtima pakwamba yakusatenda pakutunonyela Yehofa soni Mwanagwe.—Aŵalanje Yohane 3:16.