1-2. (a) Ana tukusapikana wuli patukuganichisya ya umi wa Yesu soni utumiki wakwe? (b) Ana munganiji chitukambilane chichi?

 MUNDU jwatukusamnonyela pawile tukusamsowa mnope. Pandanda, yikusatupweteka mnope patukuganichisya yaŵatiga pakulaga mundujo ali asigele panandi kuwa. Nambo pajipitile ndaŵi tukusatanda kusangalala patukuganichisya yindu yaŵatujiganyaga, yajwatendaga, soni yajwaŵechetaga pakutulimbikasya, nambosoni kututendekasya kuŵa ŵakusangalala.

² Mwakulandana ni yeleyi, yikusatupweteka mnope patukuŵalanga yaŵatite pakulaga Yesu soni chiwa chakwe. Pandaŵi ja Chikumbuchilo, ni patukusaganichisya mnope ya kusosekwa kwa mbopesi ja Yesu. (1 Akoli. 11:24, 25) Nambope, tukusasangalala mnope patukuganichisya yindu yosope yajwasasile soni kutenda Yesu pajwaliji pachilambopa. Yikusatulimbikasyasoni patukuganichisya yindu yakutenda Yesu apano soni yachachitutendela msogolomu. Mpela mwachituyiwonele munganiji, kuganichisya yachachitutendela soni yakusati pakutunonyela Yesu mpaka kutulimbikasye kulosya kuyamichila kwetu m’matala gejinji.

3. Ana tukwete magongo gapi gakututendekasya kuyamichila mbopesi jakutuwombola?

³ Tukusalosya kuyamichila patukuganichisya ya umi wa Yesu soni chiwa chakwe. Pandaŵi josope ja utumiki wakwe pachilambopa, Yesu jwajiganyaga ŵandu yakwamba yindu yambone yawuchitenda Uchimwene wa Mlungu. Tukusayamichila mnope Uchimwene welewu. Tukusayamichilasoni mbopesi jakutuwombola ligongo jikusatukamuchisya kuŵa paunasi wambone ni Yehofa soni Yesu. Ŵandu ŵakusamkulupilila Yesu nombenawo akwete chembecheyo chakutama ni umi mpaka kalakala soni kwawona ŵakunonyelwa ŵawo ŵachachijimuka kuchiwa. (Yoh. 5:28, 29; Alo. 6:23)  M’weji nganitutenda chilichose kuti tupate upile welewu sonitu pangali champaka tupeleche kwa Mlungu ni Yesu kuti tulipile yindu yaŵatutendeleyi. (Alo. 5:8, 20, 21) Nambo mpaka twalosye jemanjaji kuti tukusitwayamichila mnope. Ana mpaka tutende chamtuli yeleyi?

4. Ana Maliya jwa ku Magadala jwatesile yamtuli pakulosya kuyamichila yaŵamtendele Yesu? (Alole chiwulili.)

⁴ Aganichisye ya chisyasyo cha jwamkongwe jwine lina lyakwe Maliya jwa ku Magadala. Jwalakwe jwalagasikaga mnope ligongo jwakwete yiŵanda 7 yayamlagasyaga. Jwaganisyagasoni kuti pangali ŵampaka amkamuchisye. Myoyo aganichisye yajwatite pakuyamichila Yesu paŵamgopwele ku yiŵanda yayamlagasyagayo. Kuyamichila kwakwe kwamtendekasisye jwalakwe kuŵa jwakumkuya jwa Yesu soni kukamulichisya masengo ndaŵi jakwe, machili soni chipanje chakwe pamasengo gakulalichila. (Luk. 8:1-3) Atamose kuti Maliya jwayamichile mnope yaŵamtendele Yesu, nambope nganamanyililaga kuti Yesujo chachimtendela jwalakwe yindu yejinji msogolo. Yesu jwaliji jwakuti chachipeleka umi wakwe kuti ŵawombole ŵandu “ni chakulinga chakuti jwalijose jwakumkulupilila jwalakwe” chasangalale ni umi wangamala. (Yoh. 3:16) Nambope, Maliya jwalosisye kuti akumyamichila Yesu mwakupitilisyape kuŵa jwakulupichika. Yesu paŵalagasikaga pa chitela chakulagasichila, Maliya jwaliji chiŵandika jwalakwe. Nambosoni Maliya ni juŵamsamalilaga Yesu soni kwatondoya ŵandu ŵane ŵaŵaliji pamalopo. (Yoh. 19:25) Yesu pajwawile, Maliya soni achakongwe ŵane ŵaŵili ŵayiche nago mawuta gakununjila ku malembe ga Yesu. (Maliko 16:1, 2) Yehofa ŵamwupile Maliya ligongo lyakuŵa jwakulupichika kwa Yesu. Jwalakwe jwasangalele kusimanasoni ni Yesu pandaŵi jiŵajimwiche ku chiwa soni ŵaŵechetene najo. Welewutu waliji upile wekulungwa ligongo ŵajinji mwa ŵakulijiganya ŵa Yesu nganakola upile welewu.—Yoh. 20:11-18.

5. Ana mpaka tulosye chamtuli kuyamichila yindu yosope yatutendele Yehofa ni Yesu?

⁵ Uwejisoni mpaka tulosye kuyamichila kwetu pa yosope yatutendele Yehofa soni Yesu pakamulichisya masengo ndaŵi jetu, machili soni  yipanje pakwawusya pasogolo masengo ga Uchimwene. Mwachisyasyo, mpaka tukamule nawo masengo gakutaŵa malo gakumlambilila Yehofa soni kupitilisya kugasamalila kuti gaŵeje ga chasa.

6. Ligongo chichi mpaka tusale kuti mbopesi jakutuwombola japelechedwe kwa mundu jwalijose?

⁶ Patukuganichisya yakusati pakutunonyela Yehofa ni Yesu, yikusatutendekasya kuti m’wejisoni twanonyeleje. (1 Yoh. 4:10, 19) Patumanyilile kuti Yesu jwatuwililesoni uwejo, ni patukusamnonyela mnope Yehofa ni Yesu. Nombe ndumetume Paulo jwamanyilile yeleyi, mwamti jwalosisye kuyamichila kwakwe pajwalembele Aklistu ŵa ku Galatiya kuti, ‘Mwanache jwa Mlungu. . . jwanonyele ni kulipeleka msyene ligongo lya une.’ (Agal. 2:20) Ligongo lyakuti Yesu jwatuwilile, Yehofa mpaka ŵawute wawojo kuti aŵe najo paunasi. (Yoh. 6:44) Kusala yisyene tukusasangalalaga mnope kumanyilila kuti Yehofa ali alolite yambone mwa m’weji jwayikene pakupeleka chindu chapenani mnope kuti yiŵe yakomboleka kuŵa najo paunasi. Yeleyitu mpaka yitulimbikasye kuti tumnonyeleje mnope Yehofa ni Yesu. Mwamti mpaka tutende chenene kuliwusya kuti, ‘Ana chinonyelo chelechi chikulimbikasya kutenda chichi?’

7. Mpela mwatuyiwonele pachiwulilipo ana wosopewe mpaka tulosye chamtuli kuti tukusamnonyela Yehofa ni Yesu? (2 Akolinto 5:14, 15; 6:1, 2)

⁷ Kumnonyela kwetu Mlungu soni Klistu kukusatutendekasya kuti twanonyeleje ŵane. (Aŵalanje 2 Akolinto 5:14, 15; 6:1,  2.) Litala limo lyatukusatendela yeleyi lili kulipeleka mnope pamasengo gakulalichila. Tukusamlalichila jwalijose jwatusimene najo. Tukusamlalichilaga mundu jwalijose mwangasamala kandu ya mtundu soni chiŵecheto chakwe, nambosoni chinga ali jwamsichile kapena jwakulaga. Kutenda yeleyi kukusakamulana ni chakulinga cha Yehofa chakuti, “ŵandu ŵamtundu uliwose akulupuche ni kuŵa ŵakumanyilila chenene yayili yisyesyene.”—1 Tim. 2:4.

8. Ana mpaka tulosye chamtuli kuti tukusitwanonyela abale ni alongo ŵetu?

 ⁸ Tukusalosyasoni kuti tukusamnonyela Mlungu soni Klistu mwakwanonyela abale ni alongo ŵetu. (1 Yoh. 4:21) Tukusaganichisya mnope yakusosechela abale ni alongo ŵetu soni kwakamuchisya pasimene ni yakusawusya. Tukusitwalimbikasyaga pawile mundu jwakusamnonyela. Nambosoni tukusajawula kukwalola pakulwala, soni kwalimbikasya patengwiche. (2 Akoli. 1:3-7; 1 Ates. 5:11, 14) Tukusitwapopelelaga ligongo tukusamanyilila kuti, “lipopelo lya mundu jwakulupichika likusaŵa lyamachili.”—Yak. 5:16.

9. Ana litala line lyapi lyampaka twalosye chinonyelo abale ni alongo ŵetu?

⁹ Tukusalosyasoni kuti tukusitwanonyela abale ni alongo ŵetu mwakulingalinga kutama nawo mwamtendele. Mwamti tukusamsyasya Yehofa pangani jakwakululuchila ŵane. Naga Yehofa jwayikene pakukunda kuti Mwanache jwakwe awe ligongo lya yakulemwa yetu, ana m’weji mpaka tulepele kwakululuchila abale ni alongo ŵetu patuleŵele? Ngatukusosekwa kuŵa mpela kapolo jwakusakala juŵamkolasile Yesu muchiwanichisyo chakwe chine. Atamose kuti ambujegwe ŵamkululuchile ngongole jekulungwa mnope, kapoloju jwalepele kumkululuchila mjakwe kangongole kamwana kajwakwete. (Mat. 18:23-35) Naga atindene nganisyo ni Mklistu mjawo, ana nganaŵa atesile yakomboleka kuti aŵesoni pamtendele ni mjawojo mkanaŵe kutenda Chikumbuchilo? (Mat. 5:23, 24) Pakutenda yeleyi akusalosya kuti akusamnonyela mnope Yehofa ni Yesu.

10-11. Ana achakulungwa ŵa mumpingo mpaka alosye chamtuli kuti akusamnonyela Yehofa soni Yesu? (1 Petulo 5:1, 2)

¹⁰ Ana achakulungwa ŵa mumpingo mpaka alosye chamtuli kuti akusamnonyela Yehofa ni Yesu? Litala limo lyakusosekwa mnope lili kusisamalila ngondolo sya Yesu. (Aŵalanje 1 Petulo 5:1, 2.) Yesu jwasasile mwakupikanika chenene mfundo jeleji. Panyuma pakumkana Yesu kwa maulendo gatatu, Petulo jwakwete mtima wakusachilila kulosya kuti akusamnonyela mnope. Myoyo, Yesu ali ajimwiche kuŵawe, ŵamwusisye Petulo kuti, “Simoni mwanache jwa Yohane, ana mkusimunonyela une”? Ngatukukayichila kuti Petulo jwakwete upile wakulosya kuti ŵanonyelaga Ambuje ŵakwe. Yesu ŵamsalile Petulo kuti, “Mlisyeje tuŵanache twangu twa ngondolo.” (Yoh. 21:15-17) Mwamti kwa umi wakwe wosope, Petulo jwalosisye kuti jwasinonyelaga ngondolo sya Ambuje, yayalosisye kuti ŵamnonyelaga Yesu.

¹¹ Ana mundaŵi ja Chikumbuchilo achakulungwa ŵa mumpingo mpaka alosye chamtuli kuti akusagawona maloŵe ga Yesu gaŵamsalile Petuloga kuŵa gakusosekwa mnope? Mpaka alosye kuti akusamnonyela Yehofa soni Yesu pandaŵi jeleji mwakutenda maulendo ga ubusa soni kwakamuchisya ŵandu ŵaŵawujile munyuma kuti awujile kwa Yehofa. (Esek. 34:11, 12) Akusasosekwasoni kukola chidwi ni ŵakulijiganya Baibulo soni ŵandu ŵasambano ŵayiche ku Chikumbuchilo. Tukusasosekwa kwapochela chenene jemanjaji ligongo tukusamanyilila kuti lisiku line nombenawo chachiŵa ŵakumkuya ŵa Yesu.

12. Ligongo chichi kuganichisya mnope maloŵe gaŵaŵechete Yesu pachilo chakumalisya kutama ni umi pachilambopa mpaka kutulimbikasye? (Yohane 16:32, 33)

¹² Pachilo chakumalisya kutama ni umi pachilambopa, Yesu ŵasalile ŵakulijiganya ŵakwe kuti, “M’chilambomu chimsimane ni yakusawusya, nambo mlimbe mtima. Une nachigomeche chilambo.” (Aŵalanje Yohane 16:32, 33.) Ana ni chichi chachamkamuchisye Yesu kuti akombole kulimbana ni achimmagongo ŵakwe soni kuŵa jwakulupichika mpaka ndaŵi ja chiwa chakwe? Jwalakwetu jwamdalilaga mnope Yehofa. Ligongo lyakuti Yesu jwamanyililaga kuti ŵakulijiganya ŵakwe chachisimana ni yakusawusya,  jwalakwe jwamŵendile Yehofa kuti ŵaloleleje jemanjaji. (Yoh. 17:11) Ligongo chichi yeleyi yikusatulimbikasya? Ligongo lyakuti Yehofa ali jwamachili mnope kwapunda achimmagongo ŵetu. (1 Yoh. 4:4) Yehofa akusalola chilichose. Mwamti tukwete chikulupi chakuti naga tukumdalila mnope jwalakwe mpaka atukamuchisye kulimbana ni yakogoya yiliyose, soni mpaka tukombole kulosya kulimba mtima.

13. Ana Yosefe jwa ku Alimateya jwalosisye chamtuli kulimba mtima?

¹³ Kwende tuganichisye chisyasyo cha Yosefe jwa ku Alimateya. Jwalakwe jwamanyikaga chenene mdela ja Ayuda. Jwalakwetu jwaliji membala jwa munganya ja Sanihedilini jajaliji koti jekulungwa ja Ayuda. Pandaŵi jaŵatendaga Yesu utumiki wakwe pachilambopa, Yosefe jwalosisye kuti ali jwakulimba mtima. Yohane jwasasile kuti, “Jwalakwejo jwaliji jwakulijiganya jwa Yesu nambo nganalimanyikasyaga kwa ŵandu ligongo lyakwajogopa Ayuda.” (Yoh. 19:38) Atamose kuti Yosefe jwatendaga chidwi ni Ngani sya Uchimwene, jwalakwe jwalisisaga kuti ŵandu ŵane akamanyilila yakuti jwamkulupililaga Yesu. Ngatukukayichila kuti jwalakwe jwatendaga wogawu pakana kwasa udindo wajwakwete mu delajo. Mulimose muyaŵelele nambo Baibulo jikusatusalila kuti, panyuma pakuti Yesu awile “jwalakwe mwakulimba mtima, jwapite kwa Pilato kukuŵenda chilu cha Yesu.” (Maliko 15:42, 43) Apatu Yosefe nganalisisasoni yakuti jwaliji jwakulijiganya jwa Yesu.

14. Ana mpaka atende yamtuli naga akwajogopa ŵandu?

¹⁴ Ana wawojo akusiŵajogopa ŵandu mpela muŵatendelaga Yosefe? Pali kusukulu kapena kumasengo, ana ndaŵi sine akusatenda woga kuti alimanyikasye kuti ali jwa Mboni sya Yehofa? Ana akusalepela kuŵa jwakulalichila kapena kubatisidwa ligongo lyakudandawula yachaganisye achimjawo? Akasakunda kuti kaganisye keleka kalepelekasye kutenda yakuŵajilwa. Ndaŵi syosope apopeleje kwa Yehofa kuti jwakamuchisyeje. Amŵendeje jwalakwe kuti ŵakamuchisye kuŵa jwakulimba mtima kuti akwanilisye kutenda yakulinga yakwe. Pakuyiwona kuti Yehofa akwanga mapopelo gawo chachiŵa ŵakulimba mtima.—Yes. 41:10, 13.

15. Panyuma pakuti Yesu awonechelesoni kwa ŵakulijiganya ŵakwe, ana chisangalalo chiŵakwete jemanjaji chatendekasisye kutenda chichi? (Luka 24:52, 53)

¹⁵ Ŵakulijiganya ŵa Yesu chakamwile chanasa mnope paŵapikene kuti Yesu awile. Agambe kuwanichisya kuti wawojo ali mundamo mpela jeleji. Ngaŵa kuti jemanjaji ŵagambile kwasa mjawo juŵamnonyelaga mnope nambo ŵatanditesoni kulipikana kuti ŵangalisoni chembecheyo. (Luk. 24:17-21) Nambope pa ndaŵi jaŵawonechele Yesu kwa jemanjaji jwatemi  nawo kwakandaŵi nditu. Mwamti jwakamuchisye kupikanichisya udindo wajwakwete pakwanilisya yakulochesya ya m’Baibulo. Jwalakwe jwapelesoni masengo gakusosekwa mnope gakuti agatendeje. (Luk. 24:26, 27, 45-48) Pali pamasile masiku 40 Yesu jwapite kwinani, apatu sambano ŵakulijiganyaŵa ŵatandite kusangalala. Kumanyilila kuti Mlongola jwawo ali chiŵela chijumi soni kuti ali jwakoseka kwakamuchisya pa masengo gawo gasambano kwatendekasisye kuŵa ŵakusangalala. Chisangalalo chiŵakwete chatendekasisye kumlumba Yehofa mwangali woga.—Aŵalanje Luka 24:52, 53; Mase. 5:42.

16. Ana mpaka twasyasye chamtuli ŵakulijiganya ŵa Yesu?

¹⁶ Ana mpaka twasyasye chamtuli ŵakulijiganya ŵa Yesu? Mpaka tuŵe ŵakusangalala patukumtumichila Yehofa kwa chaka chosope ngaŵaga pandaŵi ja Chikumbuchilope basi. Kuti yeleyi yikomboleche tukusosekwa kuŵika Uchimwene wa Mlungu pandanda paumi wetu. Mwachisyasyo, ŵajinji achenjile yindu yine pandandanda jawo jakamulila masengo ni chakulinga chakuti akamuleje nawo masengo gakulalichila, asimanikweje pa misongano soni kuti atendeje kulambila kwa peŵasa mwakutamilichika. Atamose kuti ŵandu ŵane akusaganisya kuti kukola yipanje chili chindu chakusosekwa mnope, nambope ŵane ŵasagwile kuti akakola yipanje yejinji kuti atendeje yejinji mumpingo kapena kuti akatumichile kwakukusosechela ŵakulalichila ŵajinji. Atamose kuti tukusosekwa kupilila patukupitilisya kumtumichila Yehofa, nambope jwalakwe akutusalila kuti chatukamuchisyeje kuti yindu yitujendeleje chenene naga tukuŵika yindu ya Uchimwene pamalo gandanda paumi wetu.—Mis. 10:22; Mat. 6:32, 33.

17. Ana ali ŵakusimichisya mtima kutenda chichi pa ndaŵi ja Chikumbuchilo? (Alole chiwulili.)

¹⁷ Tukwembecheya mwachidwi kutenda nawo mwambo wa Chikumbuchilo lyaŵili pa Epulo, 4. Nambo tukajembecheyaga kuti mpaka ndaŵijo jiyiche kuti tuganichisyeje ya umi soni chiwa cha Yesu nambosoni chinonyelo chiŵatulosisye Yehofa. Myoyo kwende tukamulichisye masengo mpata uliwose pandaŵi ja mwambo wa Chikumbuchilo kulosya kuyamichila kwetu. Mwachisyasyo, chalinganye yakuti chaŵalanje soni kuganichisya mwakusokoka yakutendekwa yayikusimanikwa pa chati chakuti, “Wiki Jakumalisya ja Umi wa Yesu Ali Pachilambo Chapasi” chachikusimanikwa mu Utumiki ni Umi Wetu Wachiklistu wa Epulo 2019, papeji 4. Pakutenda myoyo chawungunye malemba ga m’Baibulo gagakusalimbikasya kuyamichila, chinonyelo, kulimba mtima soni kuŵa ŵakusangalala. Kaneko chapate matala gasyesyene gakulosya kuyamichila kwawo kwakutyochela pasi pa mtima. Akakayichilaga yakuti Yesu chachiyamichila yosope yakutenda pandaŵi ja Chikumbuchilo.—Chiw. 2:19.