1-2. Ligongo chichi chaka chilichose tukusatenda nawo chikumbuchilo?

 YAKA chiŵandika 2,000 yipiteyo, Yesu jwapeleche umi wakwe ligongo lya m’weji. Yeleyi yakamuchisye kuti tukole upile wakola umi wangamala. Pa chilo chakumalisya kutama ni umi pachilambopa, Yesu jwalamwile ŵakumkuya ŵakwe kuti akumbuchileje yaŵatendele mwakutenda mwambo wangasawusya wakwamba kola mkate ni finyo.—1 Akoli. 11:23-26.

² Tukusapikanila lilamusi lya Yesuli ligongo tukusamnonyela mnope. (Yoh. 14:15) Chaka chilichose pandaŵi ja Chikumbuchilo, tukusalosya kuyamichila kwetu yaŵatutendele Yesu mwakuganichisya kusosekwa kwa chiwa chakwe. Tukusalipelekasoni mnope pamasengo gakulalichila. Pandaŵi jeleji tukusalimbikasya ŵandu ŵajinji kuti chatende nawo mwambo wakusosekwa mnopewu. Nambosoni, tukusatenda yampaka tukombole pangakunda kuti chilichose chitulepelekasye kusimanikwa pa Chikumbuchilochi.

3. Ana chitukambilane chichi munganiji?

³ Munganiji, chitukambilane yindu yitatu yakusatenda ŵakutumichila ŵa Yehofa pakukumbuchila chiwa cha Yesu. Yindu yakwe yili, (1) kutenda Chikumbuchilo mpela muŵalamulile Yesu, (2) kwaŵilanjila ŵane ku Chikumbuchilo, soni (3) kutenda Chikumbuchilo atamose pandaŵi jakusawusya.

4. Ana chaka chilichose ngani ja Chikumbuchilo jikusatukamuchisya kumanyilila yindu yapi? Ligongo chichi tukusasosekwa kuyiwona yindu yeleyi kuŵa yakusosekwa mnope? (Luka 22:19, 20)

⁴ Chaka chilichose pandaŵi ja Chikumbuchilo, tukusapikanila ngani ja m’Baibulo jajikusajanga mwakupikanika chenene yiwusyo yejinji. Nganiji jikusatukamuchisya kumanyilila ligongo lyakwe ŵandu ŵasosekwaga kwawombola, soni mwayaŵelele kuti chiwa cha mundu jumo chawombole ŵandu ŵajinji ku ulemwa. Jikusatukamuchisyasoni  kumanyilila yayikusajimila mkate soni finyo nambosoni ŵakusasosekwa kulya mkate soni kumwa finyo. (Aŵalanje Luka 22:19, 20.) Tukusaganichisyasoni ya sogolo jambone jakwete ŵandu ŵakusajembecheya kutama pachilambopa. (Yes. 35:5, 6; 65:17, 21-23) Kwanga kwa yiwusyo yeleyi tukusakuwona kuŵa kwakusosekwa mnope. Yili myoyo, ligongo lyakuti ŵandu mabiliyoni gejinji ŵangayipikanichisya yindu yeleyi, nambosoni ŵangapikanichisya kusosekwa kwa mbopesi jaŵapeleche Yesu. Kupwatika pelepa, jemanjaji ŵangatendaga Chikumbuchilo mpela muŵalamulile Yesu. Ligongo chichi akusatenda yeleyi?

5. Ana ŵandu ŵatandite kutenda wuli Chikumbuchilo cha chiwa cha Yesu panyuma pakuti ŵandumetume ŵajinji awile?

⁵ Ŵandumetume ŵajinji ŵa Yesu ali awile, Aklistu ŵaunami ŵajinjile mumpingo. (Mat. 13:24-27, 37-39) Jemanjaji ŵaŵechetaga “yindu yakusokonasya ni chakulinga chakuti ŵasepusye ŵakulijiganya kuti ŵakuyeje jemanjajo.” (Mase. 20:29, 30) Chimo mwa yindu “yakusokonasya” yaŵajiganyaga Aklistu ŵaunamiŵa chaliji chakuti Yesu nganapeleka chilu chakwe “kampepe basi kuti anyakule ulemwa wa ŵandu ŵajinji,” mpela mwajikusaŵechetela Baibulo. Jemanjaji ŵajiganyaga kuti mbopesi ja Yesu jikusosekwa kupelechedwa mwakuwilisyawilisya. (Aheb. 9:27, 28) Masiku agano, ŵandu ŵajinji akusakulupilila chijiganyo chaunamichi. Jemanjaji akusasongana pampepe m’machalichi ndaŵi sine lisiku lililyose kuti atende nawo mwambo wa mbopesi ja Yesu wele dini ja Katolika akusati “Mbopesi ja Misa.” b Pele dini sine sikusatenda panandi mwambo wakumbuchila chiwa cha Yesu, nambope ŵandu ŵawo ŵangapikanichisyaga gopolela kwa mbopesi ja Yesu. Mwamti ŵandu ŵajinji akusaliwusya kuti, ‘Ana yisyene kuti chiwa cha Yesu chikusagopolela kuti yakulemwa yangu mpaka yikululuchidwe?’ Ndaŵi syejinji akusaliwusyaga chiwusyochi ligongo lyakuti ŵakulupilile nganisyo syakuti yakulemwa yetu nganiyiŵa yikululuchidwe kupitila mu chiwa cha Yesu. Ana ŵakumkuya ŵa Yesu ŵasyesyene akusiŵakamuchisya chamtuli ŵandu kupikanichisya mbopesi ja Yesu soni katende kakuŵajilwa ka Chikumbuchilo cha chiwa cha Yesu?

6. Ana gulu ja ŵakulijiganya Baibulo japatile yamtuli pachayikaga chaka cha 1872?

⁶ Mu 1870, gulu ja ŵakulijiganya Baibulo jajalongoleledwaga ni Charles Taze Russell jatandite kulijiganya mnope Malemba. Jemanjaji ŵasakaga kumanyilila yisyesyene yakwamba kusosekwa kwa mbopesi ja Yesu soni yatukusasosekwa kutenda pakumbuchila chiwa chakwe. Mwamti cha mma 1872, jemanjaji ŵapatile maumboni gakwanila ga m’Baibulo gakulosya kuti ngani jakuti Yesu jwawombwele ŵandu wosope jili jakuwona. Nambope, jemanjaji nganagamba kuyisunga yindu yaŵapatileyi. Mmalo mwakwe, ŵatesile yakomboleka kuti ŵamanyisye ŵane kupitila m’mabuku, m’nyusipepala, nambosoni m’magasini. Mkanipapite ndaŵi jelewu, jemanjaji ŵatandite kwasyasya Aklistu ŵa m’yaka 100 yandanda mwakutenda Chikumbuchilo kamo pachaka.

7. Ana yaŵapatile ŵakulijiganya Baibulo ŵandanda yikusatukamuchisya chamtuli?

⁷ Yindu yaŵapatile Aklistu ŵaŵakamwile masengo mwakulipelekaŵa yikusatukamuchisya mnope masiku agano. Ana yikusatukamuchisya chamtuli? Yehofa atukamuchisye kuti tukombole kupikanichisya yajikusajimila mbopesi ja Yesu soni yindu yambone yachachipata ŵandu ligongo lya mbopesiji. (1 Yoh. 2:1, 2) Tukombwelesoni kupikanichisya yajikusasala Baibulo pakwamba ya magulu gaŵili ga chembecheyo chakwete ŵandu. Ŵane akwete chembecheyo chakuja kutama kwinani mwamti chachikola umi wangakomboleka kuwa, pele ŵane chachipochela umi wangamala pachilambo chapasipa.  Tukusaŵa paunasi wambone ni Yehofa patukuganichisya yakusati jwalakwe pakutunonyela nambosoni umbone watukusapata ligongo lya mbopesi ja Yesu. (1 Pet. 3:18; 1 Yoh. 4:9) Myoyo, mpela muŵatendele abale ŵetu ŵakulupichika ŵala, m’wejisoni tukusitwaŵilanjila ŵane kuti chatende nawo Chikumbuchilo mpela muŵatulamulile Yesu.

8. Ana ŵakutumichila ŵa Yehofa atesile wuli pakusaka kwaŵilanjila ŵane ku Chikumbuchilo? (Alole chiwulili.)

⁸ Kutandila kalakala ŵakutumichila ŵa Yehofa aŵele ali mkwaŵilanjila ŵandu ŵane ku mwambo wa Chikumbuchilo. Mu 1881 abale ni alongo ŵa ku United States ŵaŵilanjidwe kuti akasongane m’nyumba jine ku Allegheny, Pennsylvania, kuti akatende mwambo wapajikawu. Mkupita kwandaŵi mpingo uliwose watandite kutenda jika mwambo wa Chikumbuchilo. Mu Malichi 1940, ŵakulalichila ŵasalilidwe kuti mpaka ŵaŵilanjileje ku mwambowu ŵandu ŵalosisye chidwi. Mwamti mu 1960 ofesi ja nyambi jalinganyisye kandanda tumapepala twakwaŵilanjila ŵandu ku Chikumbuchilo tuŵatutumisye ku mipingo. Kutyochela pandaŵiji, tumapepala twejinji twakwaŵilanjila ŵandu ku Chikumbuchilo tuŵele tuli mkugaŵidwa. Ana ligongo chichi tukusalipeleka mnope pakwaŵilanjila ŵane ku Chikumbuchilo?

9-10. Ana ŵani ŵakusapindula mnope patukwaŵilanjila ŵane ku Chikumbuchilo? (Yohane 3:16)

⁹ Ligongo limo lyalikusatutendekasyaga kuti twaŵilanjileje ŵane ku Chikumbuchilo lili lyakuti tukusasaka kuti ŵandu ŵayiche kandanda ku mwambowu alijiganye yakwamba Yehofa soni Yesu nambosoni yatutendele jemanjaji uweji. (Aŵalanje Yohane 3:16.) Tukusakulupilila kuti yindu yakusapikana ŵanduŵa soni kulola pa mwambowu mpaka yatendekasye kulijiganya  yejinji yakwamba Yehofa ni kuŵa ŵakutumichila ŵakwe. Nambosoni ŵane akusapindula m’matala gane.

¹⁰ Tukusitwaŵilanjilasoni ŵandu ŵaŵalesile kumtumichila Yehofa. Tukusitwakumbusyaga jemanjaji kuti Yehofa akusiŵanonyelape. Ŵajinji akusapochela tumapepala twakwaŵilanjilatu mwamti tukusasangalala mnope patwaweni ali ayiche. Kusimanikwa pa Chikumbuchilo kukusikwakumbusya jemanjaji yaŵatiga pakusangalala paŵamtumichilaga Yehofa munyumamo. Aganichisye chisyasyo cha Monica. c Jwalakwe jwaŵelesoni jwakulalichila mundaŵi ja mlili wa COVID-19. Panyuma pakuti atesile nawo mwambo wa Chikumbuchilo mu 2021, jwalakwe jwasasile kuti, “Chikumbuchilo achi chili chapajika kwa une. Kwandaŵi jandanda panyuma pa yaka 20, natanditesoni kwaŵilanjila ŵane ku Chikumbuchilo. Ngusatenda yeleyi ligongo lyakuyamichila yaŵandendele Yehofa soni Yesu.” (Sal. 103:1-4) Chinga ŵandu akwitichisya kapena kukana, nambope mwakusachilila tukusaŵilanjilagape ŵane ku mwambowu ligongo tukusamanyilila kuti Yehofa akusayamichila mnope kulimbichila kwetu.

11. Ana Yehofa akusajaliwa chamtuli kulingalinga kwetu kwaŵilanjila ŵane ku Chikumbuchilo? (Hagai 2:7)

¹¹ Yehofa ajaliwe kulimbichila kwetu pakwaŵilanjila ŵandu ku Chikumbuchilo. Atamose kuti m’chaka cha 2021 paliji yakusawusya yine ligongo lya mlili wa COVID-19, nambope twasongene ŵandu ŵakwana 21,367,603. Chiŵalanjilochi chakwesile ni maulendo gaŵili ni hafu pakulandanya ni chiŵalanjilo cha Mboni sya Yehofa pachilambo chosope. Yehofa ngakusatenda chidwi ni kutupa kwa ŵandu, nambo akusatenda chidwi ni mundu jwalijose pajika. (Luk. 15:7; 1 Tim. 2:3, 4) Tukusakulupilila kuti Yehofa akusakamulichisya masengo kulimbichila kwetu kuti tupate ŵandu ŵamtima wambone.—Aŵalanje Hagai 2:7.

12. Ana yakusawusya yapi yampaka yitendekasye kuti yiŵe yakusawusya kuja kusimanikwa pa Chikumbuchilo? (Alole chiwulili.)

¹² Yesu jwasasile chile kuti m’masiku gakumalisya, tuchisimanaga ni yakusawusya yejinji. Yakusawusya yakwe yili mpela kutusisya kwa ŵachibale, kulagasidwa, ngondo, yilwele yakuwanda mwachitema soni yine yejinji. (Mat. 10:36; Maliko 13:9; Luk. 21:10, 11) Ndaŵi sine yindu yeleyi yikusatendekasya kuti yiŵe yakusawusya kuja kusimanikwa pa Chikumbuchilo cha chiwa cha Yesu. Ana abale ni alongo ŵetu atesile yamtuli kuti amalane ni yakusawusya yeleyi? Ana Yehofa jwakamuchisye chamtuli jemanjaji?

13. Ana Yehofa ŵamkamuchisye chamtuli Artem ligongo lya kulimba mtima soni kusachilila kutenda Chikumbuchilo atamose kuti jwaliji mundende?

¹³ Kuŵichidwa mundende. Abale ŵetu ŵaŵaŵichidwe mundende ligongo lya chikulupi chawo akusatenda yampaka akombole kuti asimanikwe nawo pa Chikumbuchilo cha chiwa cha Yesu. Kwende tulole chisyasyo cha M’bale Artem. Mkanijiyiche wiki jakutenda Chikumbuchilo mu 2020, jwalakwe jwaliji ali aŵichidwe mundende m’chipinda chine chele m’chilewu soni m’chijipi mwakwe mwaliji mamita 17. M’chipindachi ŵaŵikaga achikayidi ŵakwana msano pandaŵi jimo. Mwangasamala kandu kuti ŵaŵichidwe mundende, jwalakwe jwakombwele kupata mkate soni finyo yakamulichisya masengo pa Chikumbuchilo soni jwalinganyisye yakuti chaŵechete ngani ja Chikumbuchilo kuti apindule. Nambo achimjakwe ŵaŵaliji nawo mundendemo ŵakwembaga sona soni kutukana. Ana Artem jwatesile chichi? Jwalakwe jwaŵendile jemanjaji kuti naga mpaka akombole ajimichile kaje kukwemba sona soni kutukana kwa awala jimope. Artem jwasimonjile mnope achimjakwe ŵala paŵakundile kuleka kukwemba sona soni kutukana pandaŵi  jaŵatendaga Chikumbuchilo. Artem jwatite, “Nasalile jemanjaji yakwamba Chikumbuchilo.” Atamose kuti jemanjaji ŵasasile kuti ngakusaka kupikanila, nambo pambesi pakwe ŵalolele soni kupikanila mwambowu. Pachamasile Chikumbuchilo jemanjaji ŵamwusisye Artem yejinji yakwamba Chikumbuchilocho.

14. Ana ŵakutumichila ŵa Yehofa ŵakombwele chamtuli kutenda Chikumbuchilo atamose kuti kwapali mlili wa COVID-19?

¹⁴ Mlili wa COVID-19. Pawagambile kutanda mliliwu, ŵakutumichila ŵa Yehofa nganakolasoni upile wakutenda Chikumbuchilo pameso ni pameso. Nambo yeleyi nganiyalepelekasya jemanjaji kutenda Chikumbuchilo. d Mipingo jajikwete upile wakola Intaneti jatendaga Chikumbuchilo pakamulichisya masengo fidiyokofelesi. Nambo ana yaliji uli kwa ŵandu ŵajinji ŵanganakola upile wa Intaneti? M’yilambo yine, maofesi ga nyambi galinganyisye yakuti ŵandu alolele kapena kupikanila ngani ja Chikumbuchilo kupitila pa TV kapena pa wayilesi. Konjechesya pelepa, ofesi sya nyambi syalinganyisye yakuti ngani ja Chikumbuchilo jijambulidwe mu yiŵecheto yakupunda 500 nichakulinga chakuti ŵandu ŵakusatama kumusi atende nawo  Chikumbuchilochi. Mwamti ngani jakwambulaji japelechedwe kwa abale ni alongo ŵaŵasosechelaga.

15. Ana tukulijiganya chichi pa chisyasyo cha Sue?

¹⁵ Kusisya kwa ŵamwiŵasa. Kwa ŵane chindu chachikusalepelekasya kusimanikwa pa Chikumbuchilo chili kusisya kwa ŵandu ŵamwiŵasa mwawo. Aganichisye chisyasyo cha jwakulijiganya Baibulo jwine lina lyakwe Sue. Kuli kusigele lisiku limo kuti tutende Chikumbuchilo cha mu 2021, Sue jwamsalile mundu juŵamjiganyaga Baibulo kuti ngakombola kusimanikwa pa Chikumbuchilo ligongo lyakuti ŵane mwiŵasa mwakwe akumsisya. Mundujo ŵamŵalanjile Sue lilemba lya Luka 22:44. Kaneko jwamsasile kuti patusimene ni yakusawusya tukusosekwa kukuya chisyasyo cha Yesu mwakupopela kwa Yehofa soni kumkulupilila ni mtima wetu wosope. Palisiku lyakuyichisya, Sue jwalinganyisye mkate soni jwapatile finyo, nambosoni jwalolelele pologalamu ja kulambila kwa kundaŵi pa jw.org. Palisikuli ligulo, jwalakwe ŵapite kuchipinda chakwe kuŵaliji jika ni kutanda kupikanila ngani ja Chikumbuchilo kupitila pa foni jakwe. Pambesi pakwe, Sue jwamlembele mundu jwaŵamjiganyaga jula kuti, “Liso mwalimbikasisye mnope. Natesile yiliyose yangakombwele kuti simanikwe pa Chikumbuchilo soni Yehofa ŵangamuchisye. Nganimba ngombwele kulondesya mwangusangalalila soni kuyamichila.” Ana akuganisya kuti Yehofa mpaka ŵakamuchisye wawojo pasimene ni yakusawusya mpela yeleyi?

16. Ligongo chichi tukwete chikulupi chakuti Yehofa chachitukamuchisya kuti chitusimanikwe pa Chikumbuchilo? (Aloma 8:31, 32)

¹⁶ Yehofa akusasangalalaga patukutenda yampaka tukombole kuti tukasimanikwe pa mwambo wakumbuchila chiwa cha Yesu. Ngatukukayichila kuti jwalakwe mpaka atendekasye kuti yindu yitujendele chenene naga tukulosya kuti tukusaka kuyamichila yindu yaŵatutendele. (Aŵalanje Aloma 8:31, 32.) Kwende tulinjelinje kutenda yampaka tukombole kuti chitusimanikwe pa Chikumbuchilo cha chaka achino. Nambosoni kutenda yakomboleka kuti chitukamule nawo masengo gakwaŵilanjila ŵandu ku Chikumbuchilochi.