M’BAIBULO mwana ngani sya ŵandu ŵajinji ‘ŵaŵaliji mpela uweji.’ (Yak. 5:17) Mwacisyasyo, mpaka tupikanicisye maloŵe ga Paulo gagakusasimanikwa pa Aloma 7:21-24, gakuti, “Myoyo ngusawona kuti cele cacikusatendekwa cili cakuti, pa ndaŵi jingusaka kutenda yambone, yakusakala yikusaŵa yili papopo ni une. . . . Kongwene!” Patukulimbana ni ungali umlama wetu yikusaŵa yakulimbikasya kumanyilila kuti nombe mundu jwakulupicika Paulo yamtendecelaga yeleyi.

Nambo pana yindu yinesoni yayikusalosya muŵapikanilaga Paulo. Pa Agalatiya 2:20, Paulo jwasasile kuti, Yesu ‘ŵamnonyele [jwalakwe] ni kupeleka umi wakwe ligongo lya [jwalakwe].’ Ana nombesoni akusalipikana mwakulandanamo? Komboleka kuti akusapikana myoyo, nambo mwine ngaŵa ndaŵi syosope.

Naga tukusalipikana kuti tuli ŵangasosekwa ligongo lya yindu yatwalemwisye kalakala, nganituŵa tukulupilile kuti Yehofa akusatunonyela soni kuti akusatukululucila. Nambosoni mpaka yiŵe yakusawusya kuyiwona kuti Yesu jwatuwilile m’wejo. Ana yili yisyene kuti Yesu akusasaka kuti tuciwoneje ciwombolo kuŵa mtuka? Naga yili m’yoyo, ana cici campaka citukamucisye kutenda yeleyo? Kwende tukambilane yiwusyo yiŵili yeleyi.

Yesu akusasaka kuti jwalijose pajika ajiwoneje mbopesi jaŵapelece kuŵa jakwe. Ana mpaka tusimicisye camtuli yeleyi? Aganicisye ya ngani jajalembedwe pa Luka 23:39-43. Jwamlume amkomele pacitela cakulagacisya pakuŵandikana ni Yesu. Jwalakwe akusala kuti jwatesile cakulemwa. Komboleka kuti cakulemwaco caliji cekulungwa mnope, ligongo ŵandu ŵaŵakomelaga pacitela cakulagacisya ŵaŵaga kuti atesile cakulemwa cekulungwa mnope. Jwamlumeju akudandawula mnope soni akumŵenda Yesu kuti, “Akangumbucile pitakajinjile mu Ucimwene wawo.”

Ana Yesu ŵamjanjile camtuli? Aganisye mwakupikanila kupweteka Yesu pakugalawusya mtwe wakwe kuti amlole mundu jwakulemwajo. Atamose kuti akupikana kupweteka mnope, Yesu akumwetulila soni kumsimicisya jwamlumejo mwakumsalila kuti, “Ngumsalila lelojino kuti, m’mwejo timciŵa ni une m’Paladaiso.” Komboleka Yesu jwamkumbusyaga jwamlumejo yakuti, ‘Mwanace jwa mundu jwayice . . . kukupeleka umi wakwe kukwawombola ŵandu ŵajinji.’ (Mat. 20:28, NW) Ana ayiweni yaŵatite Yesu pakumkamucisya jwamlume jula kumanyilila kuti mbopesi jaŵapelece jikumkwaya? Jwalakwe jwaŵecete mwacinonyelo pakamulicisya masengo maloŵe gakuti, “m’mwejo” soni “une.” Nambosoni jwamsalile jwamlumejo kuti cacitama m’paladaiso pacilambo capasi.

Mwangakayicila, Yesu jwasakaga kuti jwamlumeju amanyilile kuti mbopesi ja Yesu cijimkamucisye. Naga Yesu ŵayice pakumganicisya camti myiyi mundu jwakulemwaju, jwele nganakola atamose upile wakumtumicila Mlungu, nikuti mpaka apikanesoni camti myiyi ni Mklistu jwam’batiswe jwakumtumicila Mlungu. Sano ana cici campaka citukamucisye kulupilila kuti mbopesi ja Klistu mpaka jimkamucisye jwalijose mwangasamala kandu ya ulemwa waŵatesile kalakala?

Ligongo lyakuti Yesu jwampele Paulo undumetume wakulalicila, Paulo jwapikanicisye kuti Yesu jwam’wilile. Ana yeleyi yakombolece camtuli? Jwalakwe jwatite,  “Ngumtogolela Klistu Yesu Ambuje ŵetu uŵambele macili pa masengo gangu. Ngumtogolela jwalakwejo pakumbona une kuti ndili jwakulupicika ni kumba masengo gakumtumicila jwalakwejo, atamose kuti kala namtendelaga jwalakwejo cipongwe, kumlagasya ni kumnyosya.” (1 Tim. 1:12-14) Undumetume waŵapocele Paulo wamtendekasisye jwalakwe kusimicisya ya cinonyelo ni canasa cakwete Yesu nambosoni kuti Yesujo ŵamkulupililaga jwalakwe. Nombe jwalijose jwetuwe Yesu ŵampele masengo gakulalicila ngani syambone. (Mat. 28:19, 20) Ana masengo getu gakulalicila mpaka gatukamucisye kupikanicisya yakuti Yesu ŵatuwilile ni m’we ŵakwe?

Albert jwele ŵawujile kwa Yehofa panyuma pa yaka 34 ali amtyosisye mumpingo jwatite, “Ngangusaliŵalila yakulemwa yanatesile kalakala. Nambo pandili mu undumetume, ngusalipikana kuti Yesu ambele undumetume, mpelasoni mwayaŵelele ni jwandumetume Paulo. Yeleyi yikusandendekasya kuliwona kuti ndili jwakusosekwa soni kuti ngwete umi wambone, nambosoni sogolo jambone.”—Sal. 51:3.

Allan mkanalijiganye usyesyene ŵakolaga magambo gejinji soni ŵatendaga ya ciwawa. Jwalakwe ŵatite, “Ngusaganicisyaga yindu yakuwulasya yosope yanatendelaga ŵandu. Ndaŵi sine panguganicisya yeleyi, yikusandagasyaga nganisyo. Nambo ngusamyamicila Yehofa kuti jwakundile kuti nasalileje ŵane ngani syambone atamose kuti naliji jwakulemwa. Panguyiwona yakuti ŵandu pakusipocela ngani syambone, yikusangumbusya kuti Yehofa ali jwambone nambosoni jwacinonyelo. Ngusayiwona kuti Yehofa akusangamulicisya masengo pakusaka kuti nakamucisyejesoni ŵandu ŵane ŵaŵatesile yakusakala munyumamu.”

Patujinjile mu undumetume kukulalicila yikusatutendekasya kutenda yindu yambone soni kola nganisyo syambone. Sonitu yeleyi yikusatusimicisya kuti Yesu akusatunonyela, kutulosya canasa soni kuti akusatukulupilila.

Mitima jetu mpaka jitutendekasyeje kulagasika nganisyo ligongo lya yakulemwa yatwatesile kalakala, mpaka cilambo ca Satana cakusakalaci cili cijonanjidwe. Ana cici campaka citukamucisye kumalana ni yeleyi?

Jean jwalagasikaga nganisyo mnope ni ndamo jakwe jakucengacenga. Jwalakwe pali kunyumba soni kumpingo jwatendaga yambone, nambo pali kwajika jwatendaga yakusakala. Jwalakwe jwatite, “Yikusasangalasya kumanyilila kuti ‘Mlungu ali jwamkulungwa kujipunda mitima jetu.’” (1 Yoh. 3:19, 20) M’wejisoni mpaka tulimbikasidwe pakumanyilila kuti Yehofa soni Yesu akusapikanicisya kuti tuli ŵakulemwa. Tukumbucile kuti jemanjaji, ŵapelece ciwombolo ngaŵaga kwa ŵandu ŵamlama nambo kwa ŵandu ŵakulemwa ŵali ŵakupitikuka mtima.—1 Tim. 1:15.

Tukusaŵa ŵakusimicisya kuti ciwombolo cikusatukwayaga m’weji pajika. Yeleyi yikusatendekwa naga tuli mkuganicisya yaŵatesile Yesu pakwakamucisya ŵandu ŵakulemwa. Nambosoni patukutenda yampaka tukombole pakukwanilisya undumetume waŵatupele jwalakwe. Naga tukutenda yeleyi, tuciŵeceta mpela mwaŵecetele Paulo kuti Yesu “ŵanonyele une ni kupeleka umi wakwe ligongo lya une.”