NGANI JAKULIJIGANYA 28
NYIMBO NA. 123 Tupikanileje Mwakulupichika Mwakusajendechesya Yindu Yehofa
Ana Akusakombola Kulekanganya Yindu Yisyesyene ni Yaunami?
“Mŵeje ŵakulimba . . . mlitaŵilile m’chiwunu mwenu lamba jwa yisyesyene.”—AEF. 6:14.
CHAKULINGA CHA NGANIJI
Kutukamuchisya kuti tumanyilileje kulekangana kwakupali pasikati pa yindu yisyesyene yatulijiganyisye kutyochela kwa Yehofa ni yindu yaunami yakutyochela kwa Satana soni kwa ŵandu ŵakusatusisya.
1. Ana akusapikana mumtima uli pamanyilile yindu yayili yisyesyene?
ŴANDU ŵa Yehofawe tukusanonyela yisyesyene yayikusasimanikwa m’Maloŵe ga Mlungu. Mwamti chikulupi chetu chigonile pelepa. (Alo. 10:17) Tukusakulupilila kuti Yehofa ŵatamilikasisye mpingo wa Chiklistu kuti ‘ulimbisye soni kuchenjela yijiganyo yisyesyene.’ (1 Tim. 3:15) Soni tukusaŵa ŵakusangalala kutenda yakutusalila ŵandu ‘ŵakutulongolela’ pasikati petu, pandaŵi jakutujiganya yisyesyene ya m’Baibulo soni kutupa malangiso gakamulana ni yakusasaka Mlungu.—Ahe. 13:17.
2. Mwakamulana ni Yakobo 5:19, ana mpaka chitutendechele chichi panyuma pakulijiganya yindu yayili yisyesyene?
2 Atamose kuti tulijiganyisye yisyesyene yakwamba Mlungu soni tukumanyilila kusosekwa kwa kukuya malangiso gakutyochela ku gulu jakwe, nambope mpaka tusokonechele. (Aŵalanje Yakobo 5:19.) Satana akusasaka kuti tuleche kujikulupilila Baibulo soni kuti tukayichileje malangiso gatukusapochela kutyochela ku gulu ja Yehofa.—Aef. 4:14.
3. Ligongo chichi tukusosekwa kupikanilaga mnope yindu yayili yisyesyene? (Aefeso 6:13, 14)
3 Aŵalanje Aefeso 6:13, 14. Pachangakaŵapa Satana chakamulichisye masengo yindu yaunami pakusaka kujikopa mitundu josope ja ŵandu kuti jimjimuchile Yehofa. (Chiw. 16:13, 14) Tukumanyililasoni kuti Satana chatende chilichose champaka akombole pakusaka kwasokonasya ŵandu ŵa Yehofa. (Chiw. 12:9) Lyeleli ni ligongo lyakwe yili yakusosekwa mnope kuti tumanyilileje kulekanganya pasikati pa yindu yisyesyene ni yindu yaunami, kaneko ni kuyikulupililaga yindu yisyesyene. (Alo. 6:17; 1 Pet. 1:22) Kusala yisyene, yeleyi yili yakusosekwa mnope kuti chitukulupuche pa yakusawusya yekulungwa.
4. Ana munganiji chitulijiganye chichi?
4 Munganiji, chitulijiganye ndamo siŵili syatukusosekwa kola ni chakulinga chakuti tukombole kumanyilila yisyesyene yakutyochela m’Baibulo soni kuti tukamulichisyeje masengo malangiso gakutyochela ku gulu ja Yehofa. Kaneko chitukambilane yindu yitatu yatukusosekwa kutenda nichakulinga chakuti tukaleka kukuya yindu yayili yisyesyene.
NDAMO SYATUKUSOSEKWA KOLA KUTI TUMANYILILE YINDU YISYESYENE
5. Ana kumjogopa Yehofa mpaka kutukamuchisye chamti uli kumanyilila yindu yayili yisyesyene?
5 Kumjogopa Yehofa. Naga tukusamjogopa Yehofa mwakuŵajilwa, tukusamnonyela jwalakwe soni nganituŵa tutesile chindu chilichose champaka chimtumbilikasye. Tukusaŵa ŵakusachilila kulijiganya kuti tukomboleje kulekanganya pasikati pa chindu chambone ni chakusakala. Nambosoni kuti tulekanganyeje pasikati pa yindu yisyesyene ni yaunami, nichakulinga chakuti tuŵe pawunasi wambone ni Yehofa. (Mis. 2:3-6; Aheb. 5:14) Myoyo tukakunda kuti kumjogopa mundu kunandiye chinonyelo chetu pa Yehofa, ligongo lyakuti yindu yayikusamsangalasya mundu nganiyiŵa yimsangalesye Yehofa.
6. Ana kwajogopa ŵandu kwatendekasisye chamti uli achalume 10 ŵa Chiyisalayeli kuŵecheta yindu yaunami?
6 Naga tukusamjogopa mnope mundu kupunda Mlungu, nikuti mpaka tutande kukulupilila yindu yaunami. Mwachisyasyo aganichisye ya achalume 12 ŵaŵapite kukusonda chilambo chele Yehofa ŵasalile Ayisalayeli kuti chachapa. Achalume ŵakwana 10 ŵakundile kuti chinonyelo chawo pa Yehofa chinandipe ligongo lyakwajogopa ŵandu ŵa ku Kanani. Jemanjaji ŵasalile Ayisalayeli kuti: “Nganituŵa tukombwele kwagomeka ŵandu ŵakweleko ligongo ŵandu ŵakwe ali ŵamachili kutupunda m’wejo.” (Num. 13:27-31) Pakujigalila ni mwakusayiwonela yindu ŵandu, mpaka tujile kuti Akanani ŵaliji ŵamachili kwapunda Ayisalayeli. Nambo mundu jwalijose juŵasasile kuti Ayisalayeli nganaŵa ŵagomeche achimmagongo ŵawo, nikuti nganaganisyaga yakwamba Yehofa. Achalume 10 ŵeleŵa ŵasosekwaga kuganichisya mnope yindu yaŵasakaga Yehofa kuti Ayisalayeli atende. Jemanjaji ŵasosekwagasoni kuganichisya yindu yele Yehofa ŵaliji ali agambile kwatendela kwene munyumamo. Yeleyi yikakamuchisye kumanyilila kuti ŵandu ŵa ku Kananiŵa ngananungaga kandu pameso pa Yehofa jwamachili gosope. Nambo mwakulekangana ni achalume ŵangali chikulupiŵa, Yoswa ni Kalebe ŵasachile kuti unasi wawo ni Yehofa uŵe wambone. Jemanjaji ŵasalile Ayisalayeli kuti: “Naga Yehofa akusangalala ni m’weji nditu jwalakwe chatujinjisye m’chilambocho ni kutupa kuti chiŵe chetu.”—Num. 14:6-9.
7. Ana mpaka tutende wuli kuti tupitilisye kumjogopa Yehofa? (Alole chiwulili.)
7 Mkanitusagule kutenda yindu yine yakwe tukusosekwa tuganichisyeje kaje naga mpaka yimsangalasye Yehofa. Kutenda yeleyi kuchilosya kuti tukusamjogopa jwalakwe ndaŵi syosope. (Sal. 16:8) Patukuŵalanga ngani sine sya m’Baibulo, tuliwusyeje kuti, ‘Ana yikaŵe kuti ndili mundamo jeleji, ngasagwile kutenda chichi?’ Mwachisyasyo, tuwanichisye kuti wawojo ŵapali pandaŵi jele achalume 10 ŵachiyisalayeli ŵala ŵapelekaga lipoti lyangalimbikasya lila. Ana akalikulupilile lipotili ligongo lyakwajogopa ŵandu, kapena akalosisye kuti akusamnonyela mnope Yehofa soni kuti akusasaka kumsangalasya jwalakwe ndaŵi syosope? Nambotu m’bado wosope wa Ayisalayeli wa pandaŵijo walepele kukulupilila yisyesyene yaŵasalile Yoswa ni Kalebe. Yakuyichisya yakwe, yaliji yakuti ŵalepele kwinjila m’chilambo chele Mlungu ŵasalile kuti chachapa.—Num. 14:10, 22, 23.
Ana wawojo akakulupilile ŵani? (Alole ndime 7)
8. Ana ni ndamo japi jatukusosekwa kola soni ligongo chichi?
8 Kulinandiya. Yehofa akusiŵasalila yisyesyene ŵandu ŵali ŵakulinandiya. (Mat. 11:25) Ligongo lyakulinandiya twakundile kuti tulijiganye yindu yayili yisyesyene. (Mase. 8:30, 31) Nambope, tukusosekwa kuŵa ŵakusamala kuti tukaŵa ŵakunyada. Ligongo kunyada mpaka kututendekasye kuyiwonaga kuti yatukuganisya yili yakuŵajilwa mwamti ngayikulekangana ni mfundo sya m’Malemba nambosoni malangiso gatukusapochela kutyochela ku gulu ja Yehofa.
9. Ana tukusosekwa kumbuchila chichi kuti tupitilisyepe kukola ndamo jakulinandiya?
9 Kuti tuŵepe ŵakulinandiya, tukusosekwa tukumbuchileje kuti Yehofa ali jwamkulungwa mnope kupunda m’weji. (Sal. 8:3, 4) Nambosoni tukusosekwa tupopeleje kwa jwalakwe kuti atukamuchisye kukusya ndamo jakulinandiya soni kuti tusachilileje kulijiganya. Yehofa chachitukamuchisya kuti tusiwoneje nganisyo syakwe syakusapeleka kupitila m’Maloŵe gakwe soni ku gulu jakwe kuŵa syakusosekwa mnope kupunda syetu. Pakuŵalanga Baibulo, aloleje mfundo syasikusalosya kuti Yehofa akusanonyela ndamo jakulinandiya soni akusaŵengana ni ndamo jakunyada, soni kulikwesya. Nambosoni akusosekwa kuŵa ŵakusamala mnope naga apochele utumiki wine wakwe wampaka watendekasye kumanyika mnope kwa ŵandu.
YAMPAKA TUTENDE KUTI TUPITILISYE KUPIKANILA YINDU YISYESYENE
10. Ana Yehofa aŵele ali mkwakamulichisya masengo ŵani pakupeleka malangiso kwa ŵandu ŵakwe?
10 Tupitilisye kukulupilila malangiso ga gulu ja Yehofa. Kalakala Yehofa ŵamkamulichisye masengo Mose soni kaneko Yoswa pakupeleka malangiso kwa Ayisalayeli. (Yos. 1:16, 17) Yindu yajendelaga chenene Ayisalayeli paŵawonaga jemanjaji kuti ŵamjimilaga Yehofa Mlungu. Nambo kaneko mkupita kwa yaka mpingo wa Chiklistu pawatandite, ŵandumetume 12 ni ŵaŵapelekaga malangiso. (Mase. 8:14, 15) Kaneko kaguluka kakusile mwamti kapwatikagaposoni achakulungwa ŵane ŵa ku Yelusalemu. Kukuya malangiso gakutyochela kwa achalume ŵakulupichikaŵa kwakamuchisye kuti, ‘mipingo jipitilisye kuŵa jakulimba m’chikulupi, soni chiŵalanjilo cha ŵandu chatupilagatupilaga lisiku lililyose.’ (Mase. 16:4, 5) Masiku aganosoni, yindu yikusatujendela chenene naga tukupikanila malangiso gakutyochela ku gulu ja Yehofa. Nambope, ana Yehofa mpaka apikane uli naga tukukana kwapikanila ŵandu ŵasagwile jwalakwe kuti atulongoleleje? Kuti tujanje chiwusyochi kwende tukambilane kaje yindu yayatendechele Ayisalayeli paŵajawulaga m’chilambo chaŵasalile Mlungu kuti chachapa.
11. Ana ŵandu ŵaŵamjimuchile Mose jwele Yehofa ŵamsagwile kuti ŵalongoleleje Ayisalayeli chatendechele chichi? (Alole chiwulili.)
11 Pandaŵi jine Ayisalayeli ali mkatikati mwa ulendowu, achalume ŵane ŵakuchimbichika ŵatandite kulimbana ni Mose soni udindo wakwe waŵampele Yehofa. Jemanjaji ŵatite, “Ŵanduŵatu [ngaŵaga Mosepe] ali ŵaswela wosope ŵeneŵa, soni Yehofatu ali pasikati pawo.” (Num. 16:1-3) Atamose kuti yaliji yisyene kuti pameso pa Mlungu ‘ŵandu’ wosopeŵa ŵaliji ŵaswela, nambo Yehofa ŵamsagwile Mose kuti ŵalongolele ŵandu ŵakwe. (Num. 16:28) Kulimbana ni Mose kwagopolelaga kuti ŵandu ŵakwimuchilaŵa akulimbana ni Yehofa. Jemanjaji ŵayiwonaga yindu yaŵasakaga kuŵa yakusosekwa mnope, mmalo mwakuganichisya mnope yaŵasakaga Yehofa. Yakuyichisya yakwe yaliji yakuti Mlungu ŵawuleje achimlongola ŵakwimuchilaŵa yimpepe ni ŵandu ŵajinji ŵaŵaliji kumbali jawo. (Num. 16:30-35, 41, 49) Masiku aganosoni mpaka tuŵe ŵakusimichisya kuti Yehofa jwangasangalalaga ni ŵandu ŵele ngakusachimbichisya malangiso gajikusapeleka gulu jakwe.
Ana wawojo akaliji mbali japi? (Alole ndime 11)
12. Ligongo chichi tukusosekwa kupitilisya kujikulupilila gulu ja Yehofa?
12 Tukusosekwa kupitilisya kujikulupilila gulu ja Yehofa. Naga pana kuchenga kwa kapikaniche ka yindu yisyesyene ya m’Baibulo kapena kuchenga ni mwatukusakamulila masengo ga Uchimwene, ŵandu ŵakusatulongolela akusasosekwa kuchenga mwachitema. (Mis. 4:18) Jemanjaji akusasosekwa kutenda yeleyi pakusaka kulosya kuti akusakuwona kumsangalasya Yehofa kuŵa kwakusosekwa mnope kupunda chine chilichose. Akusatendasoni yakomboleka kuti yindu yasagwile yiŵeje yakamulana ni yajikusasala Baibulo, ligongo mwelemu ni mwagakusatyochela malangiso gele ŵandu ŵa Yehofa wosope akusapikanila.
13. Ana “maloŵe gasyesyene,” gali chichi, soni ana tukusosekwa kutenda chichi ni maloŵega?
13 “Mpitilisye kugasunga chenene maloŵe gasyesyene.” (2 Tim. 1:13) Maloŵe gakuti “maloŵe gasyesyene” gakusasala ya yijiganyo ya Chiklistu yayikusasimanikwa m’Baibulo. (Yoh. 17:17) Yindu yosope yatukusakulupilila yigonile pa yijiganyo yeleyi. Mwamti gulu ja Yehofa jikusatulimbikasya kuti tukaleka kukamulichisya masengo yijiganyoyi. Naga tukupitilisya kutenda yeleyi, Mlungu chachitupa upile.
14. Ana chichi champaka chatendekasye Aklistu ŵane kulepela kukamulichisya masengo “maloŵe gasyesyene”?
14 Ana mpaka chitendekwe chichi naga yatusagwile kutenda ngayikutyochela ‘m’maloŵe gasyesyene’? Aganichisye chisyasyo achi; Mu yaka 100 yandanda, papikaniche kangani kanekakwe kele kajendaga pasikati pa Aklistu. Kanganika kaliji kakuti lisiku lya Yehofa liyiche. Komboleka kuti papali chikalata chine chaŵachiganichisyaga kuti chalembedwe ni ndumetume Paulo, chachatendekasisye kuganisya myoyo. Mwamti Aklistu ŵane ŵa ku Tesalonika ŵatandite kukulupilila soni kwasalila ŵane yanganiji. Jemanjaji ŵatesile yeleyi atamose kuti nganawungunya naga nganiji jaliji jisyesyene. Yikaŵe kuti jemanjaji akumbuchile yindu yaŵajiganyisye Paulo pandaŵi jiŵaliji kweleko ngamkanayikulupilila yeleyi. (2 Ates. 2:1-5) Paulo jwasalile jemanjaji kuti ngakusosekwa kwambaga kukulupilila yiliyose yapikene. Mwamti pakusaka kwakamuchisya yindu yampaka yitendekwe kusogolo, mu chikalata chakwe chaŵili chakwawula kwa Atesalonika, Paulo jwamalisisye ni maloŵe gakuti, “Mpochele moni kutyochela kwa une Paulo wakulemba jika ni mkono wangu. Ndaŵi syosope ngusalemba myiyi mu yikalata yangu yosope, ni chakulinga chakuti jemanja mmanyilile kuti chikalatachi chityochele kwa une.”—2 Ates. 3:17.
15. Ana mpaka tuliteteye chamti uli ku yindu yaunami yayikusawoneka mpela yisyesyene? Apeleche chisyasyo. (Alole chiwulili.)
15 Ana mpaka tulijiganye chichi kutyochela pa maloŵe ga Pauloga gakwawula kwa Atesalonika? Naga tupikene ngani jine jakwe jakuti ngajikukamulana ni yatwalijiganyisye m’Baibulo, kapena tupikene ngani syangali maumboni, tukusosekwa kutenda yindu mwalunda. Mwachisyasyo, m’chilambo chele kala chamanyikaga kuti Soviet Union, adani ŵetu ŵawandisye chikalata chinechakwe chachawonekaga mpela kuti chityochele ku likulu lyetu lyapachilambo chosope. Chikalatachi chalimbikasyaga ŵane mwa abale ŵetu kuti apanganye kagulu kane kakwima pajika. Chikalatachi chawonekaga mpela chisyesyene. Nambope abale ŵakulupichika nganajigalika ni yeleyi. Jemanjaji ŵamanyilile kuti yayalembedwe mu chikalatachi nganiyikamulanaga ni yindu yaŵaŵele ali mkulijiganya. Masiku agano, adani ŵa Mlungu akusakamulichisya masengo yindu mpela Intaneti pakusaka kutusokonasya ni chakulinga chakuti tuŵeje ŵangakamulana. Myoyo, kuti ‘tukajanguya kusokonechela nganisyo,’ tukusosekwa tuganichisyeje mwakusamala naga yatupikene soni kuŵalanga yikukamulana ni Maloŵe ga Mlungu.—2 Ates. 2:2; 1 Yoh. 4:1.
Akajigalikaga ni yindu yaunami yayikusawoneka mpela yakuwona (Alole ndime 15) a
16. Mwakamulana ni Aloma 16:17, 18, ana tukusosekwa kutendaga chichi naga ŵane alesile kukuya yindu yayili yisyesyene?
16 Apitilisye kukamulana ni ŵandu ŵali ŵakulupichika kwa Yehofa. Mlungu akusasaka kuti tuŵeje ŵakamulana patukumtumichila. Tuchipitilisya kuŵa ŵakamulana naga tukupitilisya kukamulichisya masengo yindu yayili yisyesyene. Soni mundu jwalijose jwakusawandisya ngani syaunami akusatendekasya mpingo kuti uŵeje wagaŵikangana. Myoyo Mlungu akutukalamusya kuti ‘twaŵambaleje ŵandu ŵelewo.’ Ligongo naga ngatukusamala mpaka tutande kukulupilila yindu yawunami ni kuleka kuŵa ŵakulupichika kwa Yehofa.—Aŵalanje Aloma 16:17, 18.
17. Ana tuchipata upile wamti uli naga tukupitilisya kukuya yindu yayili yisyesyene?
17 Naga tukugakamulichisya masengo Maloŵe ga Mlungu soni ngagaleka, tuchiŵa ŵakulimba mwausimu soni mwakuchilu. (Aef. 4:15, 16) Tuchiŵambala yijiganyo yaunami ya Satana, soni Yehofa chachituteteya mundaŵi ja yakusawusya yekulungwa. Kwende tupitilisye kukuya yindu yayili yisyesyene. ‘Patukutenda yeleyi Mlungu jwamtendele chachiŵa’ ni m’weji.—Afil. 4:8, 9.
NYIMBO NA. 122 Tuŵeje Ŵakulimbangana Soni Ŵangatenganyika
a MALOŴE GAKULONDESYA CHIWULILI: M’yaka ya munyumamo, abale ŵaŵatamaga m’chilambo chachamanyikaga kuti Soviet Union ŵapochele chikalata chachawonekaga mpela chityochele ku likulu lyetu lyapachilambo chosope, nambo yili mkuti chityochele kwa adani ŵetu. Masiku agano, adaniŵa mpaka akamulichisye masengo Intaneti pakusaka kwasokonasya ŵandu pakwamba ya gulu ja Yehofa.
