Yehofa kupitila mwa Esekiyele ŵalocesye utenga wa cembeceyo wakuti mtundu wa Yisalayeli ucikamulanasoni pawuciwujila m’Cilambo Celagucisye. Utenga welewo wasalagasoni ya kamulana kwa ŵandu ŵa Mlungu m’moŵa gambesi gano.

Yehofa ŵamsalile Esekiyele kuti alembe pa ndodo siŵili. Pa ndodo jandanda alembe kuti, “Ndodo ja Yuda ni Ayisalayeli ŵali nawo,” soni pa jine alembe kuti, “Ndodo ja Yosefe jakwimila Efulaimu soni ŵandu wosope ŵa m’nyumba ja Yisalayeli ŵali nawo.” Ndodo siŵilisi syaliji syakuti tisiŵe ‘ndodo jimo’ m’miyala mwa Esekiyele.—Ezek. 37:15-17.

Ana “Efulaimu” akwimila cici? Yelobowamu juŵaliji mwenye jwandanda jwa ucimwene wakumpoto wa ngosyo 10 sya Yisalayeli, ŵaliji jwakutyocela mu lukosyo lwa Efulaimu. Lukosyolu lwaŵele lwamacili kupunda ngosyo sinesyo. (Deut. 33:13, 17; 1 Maf. 11:26)  Lukosyo lwelelu lwatyocele mwa mwanace jwa Yosefe lina lyakwe Efulaimu. (Num. 1:32, 33) Yosefe ŵaliji ali apocele upile wapajika kutyocela kwa babagwe Yakobo. M’yoyo, yaliji yakuŵajilwa kusala kuti ‘ndodo ja Efulaimu’ jikwimila ngosyo 10 sya ucimwene wakumpoto. Pandaŵi jele Esekiyele ŵalembaga yakulocesya yakwamba ndodo siŵili, ucimwene wakumpoto wa Yisalayeli waliji wuli wujigalidwe ni Asiliya kwawula ku ukapolo mu 740 B.C.E. (2 Maf. 17:6) Pali papitile ndaŵi ulamusi wa Babulo wagomece Asiliya ni watandite kulamulila. M’yoyo pandaŵiji Ayisalayeli ŵajinji ŵamwasangene mu ulamusi wa Babulowo.

Mu 607 B.C.E., ngosyo siŵili sya ucimwene wakum’mwela syajigalidwe kwawula ku ukapolo ku Babulo. Kombolekasoni kuti Ababuloŵa ŵajigele ŵandu ŵane ŵaŵasigele mu ucimwene wakumpoto wa Yisalayeli. Mayimwene gagalamulilaga mu ucimwene wakum’mwela gatyocelaga mu lukosyo lwa Yuda. Nombenawo ŵambopesi ŵatamaga ku Yuda ligongo ŵatumicilaga pa nyumba ja Mlungu ku Yelusalemu. (2 Mbiri 11:13, 14; 34:30) M’yoyo, yaliji yakupikanika kusala kuti “ndodo ja Yuda” jajimilaga ngosyo siŵili sya ucimwene wakum’mwela.

Ana ndodo siliŵi syakuwanicisyasi syapwatikene pampepe cakaci? Yeleyi yatendekwe pa ndaŵi jele Ayisalayeli ŵawujile ku Yelusalemu kukutaŵasoni nyumba ja Mlungu mu 537 B.C.E. Ŵandu ŵaŵajimilaga ucimwene wakum’mwela soni ucimwene wakumpoto ŵawujile yalumo kutyocela ku ukapolo. Kutandila pandaŵi jeleji nganipapagwasoni gaŵikangana pasikati pa ŵanace ŵa Yisalayeli. (Ezek. 37:21, 22) Ayisalayeli ŵatandilesoni kulambila Yehofa mwakamulana. Ŵakulocesya Yesaya soni Yelemiya ŵasasilesoni mkanipaŵe ya kamulana kweleku.—Yes. 11:12, 13; Yer. 31:1, 6, 31.

Ana yaŵalocesye Esekiyele yikusala yatuli pakwamba ya kulambila kusyesyene? Yakulocesyayi yikulosya kuti Yehofa cacatendekasya ŵakulambila ŵakwe kuŵa ŵakamulana. (Ezek. 37:18, 19) Ana yakulocesyayi yikwanilicikwa m’moŵa getu gano? Elo. Yakulocesyayi yatandite kukwanilicikwa mu 1919, pandaŵi jele ŵandu ŵa Mlungu ŵakamulenye. Pandaŵiji ŵalingenyesoni muyajendelaga yindu pasikati pa ŵandu ŵa Mlunguwo. Pelepa nikuti yakulinga ya Satana yakuti ŵalekanganye ŵandu ŵa Mlungu kwangamala yalepelece.

Pandaŵi jelejo, ŵajinji mwa ŵandu ŵaŵakamulenyewo ŵakwete cembeceyo cakuja kuŵa mayimwene soni ŵambopesi kwinani pampepe ni Yesu. (Ciu. 20:6) Mwakuwanicisya, jemanjaji ŵaliji mpela ndodo ja Yuda. Nambo mkupita kwandaŵi, ŵandu ŵajinji ŵaŵakwete cembeceyo cakutama pacilambo capasi ŵatandite kulipwatikanya kwa Aklistu ŵakwete cembeceyo cakuja kulamulila ni Yesu, ŵali mpela Ayuda ŵausimu. (Zek. 8:23) Jemanjaji ŵaliji mpela ndodo ja Yosefe, soni nganakola cembeceyo cakuja kulamulila ni Klistu.

Moŵa agano, makuga gaŵiliga gakutumicila Yehofa mwakamulana mwakulongolelegwa ni Mwenye jumo, Yesu Klistu. Mu yakulocesya ya Esekiyele ŵamkolasile Yesu kuti “jwakutumicila jwangu Daudi.” (Ezek. 37:24, 25) Yesu ŵapopelele ŵakumkuya ŵakwe kuti ‘aŵe ŵampepe mpela mwele jwalakwe ni Atati ŵakwe ali ŵakamulana.’ * (Yoh. 17:20, 21) Yesu ŵasasilesoni kuti likuga lyamwana lya Aklistu ŵasagulwe ni ‘ŵangondolo sine’ liciŵa “likuga limo” lyakulongolelegwa ni “mkucinga jumo.” (Yoh. 10:16) Mwakamulana ni yaŵasasile Yesuyi, moŵa agano ŵandu ŵa Mlungu, cinga akwete cembeceyo cakwawula kwinani kapena cakutama pacilambo capasi, wosope ali ŵakamulana.