“Yagowola yipali yejinji nambo ŵamasengo ali ŵamnono. M’yoyo, amŵende Msyene yagowola kuti atumisye ŵamasengo ŵajinji kuti akamgowolele.” (Luk. 10:2) Maloŵega, ŵaŵecete Yesu yaka 2000 yipiteyo, nambope gakukamulana cenene ni yayikutendekwa m’cilambo ca Myanmar lelojino. Ana ligongo cici tukuŵeceta m’yoyo? Ligongo lyakuti cilambo ca Myanmar, cikwete ŵakulalicila ŵakwana 4,200 basi. Ŵakulalicilaŵa akusasosekwa kuwandisya ngani syambone kwa ŵandu 55 miliyoni ŵa m’cilamboci.

Nambope, “Msyene yagowola,” Yehofa, alimbikasisye mitima ja abale ni alongo ŵajinji ŵa m’yilambo yakulekanganalekangana, kwawula m’cilamboci kuti akakamucisye pamasengo gagowola gausimu. Ana cici cacikwatendekasya ŵanduŵa kuleka cilambo cawo ni kwawula m’cilamboci? Ana cici cacakamucisye kulimba mtima kusamila m’cilamboci? Soni ana akusangalala ni majali gamtuli ligongo lyakutenda yeleyi? Kwende tulole.

Mpayiniya jwine jwa ku Japan, lina lyakwe Kazuhiro, yaka yine munyumamu jwakwete ulwele wa mjilinjili mwamti mpaka ŵagonecedwe kucipatala. Adokotala ŵamsalile kuti akajendesyasoni galimoto kwa yaka yiŵili. Kazuhiro jwasoŵile cakutenda, mwamti jwaliwusyaga kuti, ‘Ana mpaka ndende wuli kuti njendelecele kutenda undumetume wangusawunonyela mnope waupayiniya?’ Jwalakwe jwapopesile kutyocela pasi pamtima, kumŵenda Yehofa kuti amkamucisye kwendelecela kutenda upayiniya.

Kazuhiro jwatite, “Pali pamasile mwesi umo, mjangu juŵatumicilaga ku Myanmar jwapikene yayandendecele. Jwanjimbile foni ni kusalila kuti, ‘Ŵandu ŵajinji m’cilambo ca Myanmar, akusajenda maulendo gawo pakamulicisya masengo mabasi. Naga mmwejo mkwika akuno, cimcijendelecela kutenda undumetume wenu, ngasimsosekwa kwendesya galimoto.’ Nawusisye adokotala ŵangu naga mpaka yikombolece kwawula ku Myanmar. Nasimonjile mnope ni mwaŵanjanjile. Ŵatite, ‘Dokotala jwa maulwele gakwayana ni ututu jwa ku Myanmar ayice m’cilambo muno. Cinamsalile ya ulwele wenu kuti akajendelecele kumkamucisya.’ Pelepa nayiweni kuti Yehofa ajanjile lipopelo lyangu.”

Mwangacelewa, Kazuhiro ŵatumisye utenga ku ofesi ja nyambi ja ku Myanmar, wakusala kuti jwalakwe ni ŵamkwakwe akusaka kutumicila mpela apayiniya m’cilamboco. Pali pamasile masiku msano, ofesi ja nyambi jajanjile pakwasalila kuti, “Ayice, tukusaka apayiniya ŵajinji!” Kazuhiro soni ŵamkwakwe lina lyawo Mari, ŵasumisye magalimoto gawo gaŵili, kupata yikalata yakwendela soni kusuma tikiti ja ndege. Masiku agano, liŵasali likutumicila mwakusangalala m’kakuga ka ciŵeceto ca makono ku Mandalay. Kazuhiro jwatite, “Kwawula ku mkuli welewu tukuyiwona kuti kulimbikasisye cikulupi cetu mwakamulana ni yalikusasala lilemba lya Salimo 37:5 kuti, ‘Mkunde kuti Yehofa amlongolele pa litala lyenu, mumjegamile, soni jwalakwe cacimkamucisya.’”

Mu 2014, m’cilambo ca Myanmar mwatendekwe msongano wapajika wa Mboni sya Yehofa. Ŵandu ŵajinji ŵakutyocela m’yilambo yakulekanganalekangana ŵayice. Mlongo jwa yaka 34 juŵayicesoni kumsonganowu, lina lyakwe Monique, jwakutyocela ku United States, jwatite, “Panawusile kumsonganowu, napopesile kwa Yehofa kuti angamucisye kwanilisya yakulinga yangu yausimu. Natagulilenesoni yeleyi ni acinangolo ŵangu. Wosope twakamulene kuti kuli cenene kuti uneji mbujilesoni ku Myanmar. Nambo kuti ndende yeleyi yanjigalile ndaŵi soni nayipopelele kwa ndaŵi jelewu.”

Pakusala ligongo lyakwe yamjigalile ndaŵi kuti atende cisagula celeci jwatite, “Yesu jwalimbikasisye ŵakumkuya ŵakwe ‘kuŵalanjila mbiya syacajonanje.’ M’yoyo, naliwusyaga kuti, ‘Ana cingwanisye kusamila ku cilamboci? Ana cingakombole kulisamalila m’cilamboci pakamula masengo kwa maawala gamnono?” Kaneko jwalakwe jwatite, “Mwacitema, nayiweni kuti nganingola mbiya syakwanila syakungamucisya kusamila kucilambo cine.” Nambope ana jwalakwe jwakombwele camtuli kusamila m’cilamboci?—Luk. 14:28.

Monique jwatite, “Lisiku line, abwana ŵangu ŵambendile kuti tuwonegane. Wangamwile woga, mwamti naganisyaga kuti basi masengo gamalile. Nambo mmalo mwakwe, abwanawo ŵayamicile ligongo lyakulimbicila pamasengo. Kaneko ŵasalile kuti cambe mbiya syakonjecesya. Winji wa mbiya syaŵambele waliji wakulandana ni winji wa mbiya syanasosecelaga kuti njawule ku cilambo ca Myanmar!”

Monique aŵele mkutumicila m’cilambo ca Myanmar kutandila mu December 2014. Ana jwalakwe akusapikana wuli pakutenda undumetume wakwe? Monique jwatite, “Ngusangalala mnope akuno. Ngwete majiganyo ga Baibulo gatatu gangusatendesya. Jumo mwa ŵakulijiganyaŵa ali jwacikulile jwa yaka 67. Ndaŵi syosope akusambocela mwakusangalala. Paŵalijiganyaga kandanda yakuti Mlungu lina lyakwe lili Yehofa, jwagwisisye misosi, ni jwatite, “Citandilile, nganimbikaneje yakuti Mlungu lina lyakwe lili Yehofa. Mmwejo mli mwanace, nambo mungamucisye mundu jwacikulile mpela une kumanyilila cindu cakusosekwa mnope cele nganinalijiganyeje citandilile.’ Unesoni pakusoŵa cakuŵeceta, natandite kugwisya misosi. Yakutendekwa mpela yeleyi yikusiyatendekasya ŵandu ŵakutumicila ku mkuli wakusosecela ŵakulalicila ŵajinji kuŵa ŵakusangalala yisyesyene.” Pacangakaŵapa Monique jwakwete upile wakwinjila nawo Sukulu ja Ŵakulalicila ya Ucimwene.

Cindu cine cacalimbikasisye ŵandu ŵajinji kwawula m’cilambo ca Myanmar, cili ngani syakwamba ya cilamboci, syasikusimanikwa mu Buku Lapachaka la Mboni za Yehova la 2013. Mlongo jwa yaka yakupunda 30, lina lyakwe Li, jwele pandanda ŵatamaga m’cilambo cine ciŵandika cilambo ca Myanmar, jwakamulaga masengo gambone. Nambope ali aŵalasile ngani sya mu Buku Lapachaka, jwaganisisye yakuja kutumicila m’cilamboci. Jwalakwe jwatite, “Mu 2014, panatendaga nawo msongano wapajika ku Yangon, m’cilambo ca Myanmar, nasimene ni liŵasa line lyalyatumicilaga ku mkuli wakusosecela ŵakulalicila ŵajinji wa ciŵeceto ca ku China. Ligongo lyakuti nacimanyililaga ciŵecetoci, naganisisye yakusamila kucilamboci kuti ngakakamucisye kakuga ka ciŵecetoci. Nasimene ni Monique ni twakamulene yakwawula ku Mandalay. Yehofa ŵatujaliwe mwakutukamucisya kupata masengo ga uticala pasukulu jimpepe. Masengoga gakusatupa lipesa lyakulalicila. Twapatile malo gakutama ciŵandika ni sukuluji. Ngusasangalala ni undumetume wangu atamose kuti kuli kwacitukuta soni ngusasimana ni yakusawusya yine. Ŵandu ŵa ku Myanmar akusatama umi wangasaka yejinji, nambope akusapikanila mwalung’wanu ngani syambone. Yili yakusangalasya kuyiwona yakutenda Yehofa pakujaliwa masengo gakulalicila kuti gajendeje mwacitema. Ngangusakayicila ata panandi kuti lyaliji lisosa lya Yehofa kuti yice akuno ku Mandalay.”

Ŵandu ŵajinji ŵakutumicila m’mikuli jakusosekwa ŵakulalicila ŵajinji, ayiweni kuti lipopelo lili lyakamucisya mnope. Mwambone, Jumpei jwa yaka 37 ni ŵamkwawo, lina lyawo Nao, ŵa yaka 35, ŵatumicilaga mumpingo ŵaciŵeceto ca makono ku Japan. Ana cici cacatendekasisye kuti ajawule m’cilambo ca Myanmar? Jumpei jwatite, “Ndaŵi syosope une ni ŵamkwangu twakwete cakulinga cakuti citutumicile ku mkuli wakusosecela ŵakulalicila ŵajinji  m’cilambo cine. M’bale jwine jwa mumpingo wetu wa ciŵeceto camakono ku Japan, jwasamile ni kwawula m’cilambo ca Myanmar. Atamose kuti twakwete mbiya syamnono, nambope mu May 2010, m’wejisoni twasamile kwawula m’cilamboci. Abale ni alongo ŵatupocele ni makono gaŵili.” Ana jemanjaji akupikana wuli ligongo lyakutumicila mumkuli wa ciŵeceto ca makono ku Myanmar? Ŵatite, “Akuno kwana ŵandu ŵajinji ŵalung’wanu. Patukulosya mafidiyo ga ciŵeceto ca makono kwa ŵandu ŵangapikana, akusasimonga mnope. Tukusasangalala ligongo lyakuti twatesile cisagula cambone ca kwika kukutumicila Yehofa akuno.”

Ana Jumpei soni Nao ŵamalene camtuli ni cakusawusya cawo cakusoŵa mbiya? Jemanjaji ŵatite, “Panyuma pa yaka yitatu, twakamulicisye masengo mbiya syosope syatwakwete, mwamti nganitukolasoni mbiya syakwanila kulipilila lendi m’caka cakuyicisya. Ndaŵi syejinji une ni ŵamkwangu, twapopelaga mwakutyocela pasi pamtima. Mwangajembeceya, twapocele cikalata kutyocela ku ofesi ja nyambi, cakutujiticisya kutumicila mpela apayiniya ŵapajika ŵa kandaŵi. Twamkulupilile Yehofa, soni tuyiweni kuti jwalakwe nganatuleka. Jwalakwe aŵele mkutusamalila m’matala gakulekanganalekangana.” Pacangakaŵapa, Jumpei soni Nao ŵajinjile nawo Sukulu ja Ŵakulalicila ya Ucimwene.

Ana cici cacamlimbikasisye Simone, m’bale jwa yaka 43, jwa m’cilambo ca Italy, soni ŵamkwawo, lina lyawo Anna, mlongo jwa yaka 37, jwa m’cilambo ca New Zealand, kusamila m’cilambo ca Myanmar? Anna jwasasile kuti, “Jaliji Buku Lapachaka la 2013.” Simone jwatite, “Uli upile wekulungwa kutumicila m’cilambo ca Myanmar. Tukusatama umi wangasaka yejinji, soni ngusamalila ndaŵi jangu jejinji pakumtumicila Yehofa. Yikusaŵa yakulimbikasya kuyiwona mwakutendela Yehofa pakutusamalila akuno kumkuli wakusosecela ŵakulalicila ŵajinji.” (Sal. 121:5) Anna jwasasilesoni kuti, “Ngusasangalala kupunda ni kalakose. Tukwete umi wangasaka yejinji. Ngusakola ndaŵi jakwanila jakunguluka ni ŵamkwangu. Yeleyi yikamucisye kuti tunonyelaneje mnope. Tupatilesoni acimjetu ŵasambano soni ŵambone. Ŵandu akuno, ŵanganyosya Ŵamboni, soni patukulalicila akusapikanila mwalung’wanu.” Ana akusatenda yeleyi mwamtuli?

Anna jwatite, “Lisiku line, namlalicilaga jwakulijiganya jwine jwa ku Unifesite pamsika, kaneko twakamulene kuti cinamjawulilesoni. Paulendo welewu jwajigele mjakwe. Paulendo wakuwilisya waŵili jwayice ni acimjakwe ŵane. Kaneko paulendo wakuwilisya watatu jwayice ni acimjakwe ŵanesoni. Apano ngusatenda majiganyo ga Baibulo ni ŵandu 5.” Simone jwatite, “Ŵandu ŵajinji mumkuliwu ali ŵakungulucika, soni akusapikanila mwalung’wanu. Ligongo lya ndaŵi, tukusalepela kwayicila ŵandu wosope ŵakusalosya lung’wanu mumkuliwu.”

Nambo ana abale ni alongo akusakuya matala gapi kuti atende cisagula cakuja kutumicila m’cilambo ca Myanmar? Mizuho, mlongo jwa ku Japan jwatite, “Une ni ŵamkwangu lina lyawo Sachio, twasakaga kutumicila m’cilambo cakusosekwa ŵakulalicila ŵajinji. Nambo nganitumanyililaga kwampaka tujawule. Nambope panyuma pakuŵalanga ngani sya mu Buku Lapachaka la 2013, syakwamba yakutendekwa ya ku Myanmar, yatulimbikasisye mnope, mwamti twaganisisye yakuti tujawule tukatumicile m’cilambo ca  Myanmar.” Sachio jwatite, “Twayiweni kuti candanda, tujawule ku Myanmar, mumsinda wakolanjidwa kuti Yangon, kuti tukamanyilile yejinji ya umi wa ŵandu m’cilamboci. Panyuma pakutenda yeleyi, twasimicisye yakwawula m’cilambo ca Myanmar.”

Rodney ni ŵamkwakwe, Jane, wosope ŵa m’yaka ya m’ma 50, ali ŵakutyocela m’cilambo ca Australia. Jemanjaji pampepe ni ŵanace ŵawo ŵaŵili, Jordan, jwali jwamlume, soni Danica jwamkongwe, aŵele ali mkutumicila m’cilambo ca Myanmar kutandila m’caka ca 2010. Rodney jwatite, “Yikusatulimbikasya kwawona ŵandu ali mkusangalala pakulijiganya yakwamba Mlungu. Maŵasa ganesoni mpaka gatende cenene kwawula ku mkuli wakusosecela ŵakulalicila ŵajinji mpela akuno ku Myanmar.” Ligongo cici? Jwalakwe jwatite, “Kutenda yeleyi kulimbikasisye liŵasa lyetu kuti tumtumicileje Yehofa mwakamulana. Ŵacinyamata ŵajinji, akusamalila ndaŵi jawo kunguluka pafoni, kwenda m’magalimoto, kamula masengo soni pa yindu yine. Mwakulekangana ni yeleyi, ŵanace ŵetu akusamalila ndaŵi jawo kulijiganya ciŵeceto casambano, kuti akalalicileje mwangasawusya. Alijiganyisyesoni mwampaka ŵajanjile ŵandu ŵane pakamulicisya masengo Baibulo, soni mwampaka apeleceleje ndemanga pamisongano ja mpingo. Nambosoni alijiganyisye kutenda yakusangalasya yakamulana ni kulambila kwetu.”

M’bale jwine lina lyakwe Oliver, jwa yaka 37, jwa ku United States, jwasasile ligongo lyakwe kutumicila kumkuli kwakusosecela ŵakulalicila ŵajinji kuli kwambone. Jwalakwe jwatite, “Kutumicila Yehofa ku mkuli wakusosecela ŵakulalicila ŵajinji kungamucisye kuti mbate majali gejinji. Kusamila akuno, kungamucisye kuti namjegamileje Yehofa soni kumkulupilila mnope pa cindu cilicose campaka simane naco. Kutumicila ni ŵandu ŵakuti citandilile nganinamanyililaga, kungamucisye kumanyilila kuti pangali cindu cine cakusosekwa m’cilamboci campaka cilandane ni Ucimwene wa Mlungu.” Apano, Oliver soni ŵakwamkwe, Anna, akwendelecela kutumicila mwamtawu mumkuli wa ciŵeceto ca ku China.

Mlongo jwine lina lyakwe Trazel, jwa yaka 52, jwakutyocela m’cilambo ca Australia, aŵele ali mkutumicila m’cilambo ca Myanmar kutandila m’caka ca 2004. Jwalakwe jwatite, “Ngwaŵenda wosope ŵampaka akombole kuti alinje kwawula kukutumicila ku mkuli wakusosecela ŵakulalicila ŵajinji. Nayiweni kuti naga mundu akwete lisosa lya kumtumicila Yehofa, jwalakwe akusajaliwa kulingalinga kwakwe. Nganinganicisyaga kuti mpaka namtumicile Yehofa m’litala lyeleli. Apano ngwete umi wambone soni wakwikutila.”

Ngatukukayicila kuti yisyasyo yakamula mtimayi, ciyalimbikasyesoni wawojo kwawula ku mkuli wakusosecela ŵakulalicila ŵajinji kuti akakamucisye ŵandu ŵamitima jambone. Abale ni Alongo m’cilambo ca Myanmar akwaŵilanga wawojo kuti, “Conde, ayice akuno ku Myanmar kuti atukamucisye!