1, 2. Ana Baibulo jasasile yatuli mkanipaŵe pakwamba ya kutupa kwa ŵandu ŵa Yehofa?

ŴAKUTUMICILA ŵa Yehofa pacilambo capasi ali mu likuga lyapajika mnope. Jemanjaji ali ŵandu ŵangali umlama soni akusalemwesya. Nambo atamose yili m’yoyo, msimu wa Mlungu ukamucisye kuti likugali likule mnope soni kuti likombole kutenda yindu yejinji. Kwende tulole yindu yakuŵalanjikape yatesile Yehofa kupitila mwa ŵandu ŵakulipelekaŵa, atamose kuti ali ŵangali umlama.

² Pagatandaga moŵa gambesi mu 1914, ŵakutumicila ŵa Mlungu pacilambo capasi ŵaliji ŵamnono mnope. Nambope, Yehofa ŵagajaliwe masengo gakulalicila gaŵatendaga jemanjaji. Kutandila m’caka celeco kwikana apano, ŵandu mamiliyoni gejinji alijiganyisye usyesyene wa m’Baibulo ni kuŵa Mboni sya Yehofa. Yehofa ŵasasile mkanipaŵe ya kutupa kwa ŵandu kweleku paŵatite, “Jwamwana caciŵa ŵandu 1,000, soni jwamnandi caciŵa mtundu wamacili. Une, Yehofa, cinjijanguyisya yeleyi pandaŵi jakwe.” (Yes. 60:22) Maloŵe gelega gakwanilicikwe yisyene m’masiku gakumalisya gano. Apano, ciŵalanjilo ca ŵandu ŵa Mlungu pacilambo capasi cili cekulungwa mnope kupunda ciŵalanjilo ca ŵandu ŵa m’yilambo yejinji.

3. Ana ŵakutumicila ŵa Mlungu alosisye catuli cinonyelo?

 ³ M’moŵa gambesiga, Yehofa ŵakamucisyesoni ŵandu ŵakwe kusya ndamo jakwe jekulungwa, jajili cinonyelo. (1 Yoh. 4:8) Yesu juŵajigalile cinonyelo ca Mlunguci ŵasalile ŵakumkuya ŵakwe kuti, “Ngwapa jemanja lilamusi lyasambano kuti anonyelaneje . . . Mwakutenda yeleyi, wosope cacimanyilila kuti ali ŵakulijiganya ŵangu, naga akusanonyelana.” (Yoh. 13:34, 35) Ŵandu ŵa Yehofa ŵalosisye cinonyelo celeci pandaŵi jele ŵandu ŵaputaga ngondo. Mwambone, ŵandu ciŵandika 55 miliyoni ŵawulajikwe pa Ngondo Jaŵili ja Pacilambo Cosope. Nambope, Ŵamboni sya Yehofa nganajigala nawo mbali mu ngondo jeleji. (Aŵalanje Mika 4:1, 3.) Yeleyi yakamucisye jemanjaji kuŵa “ŵaswela pa magambo ga miyasi ja ŵandu wosope.”—Mase. 20:26.

4. Ligongo cici kutupa kwa ciŵalanjilo ca ŵandu ŵa Yehofa kuli kwakutesya lung’wanu?

⁴ Ciŵalanjilo ca ŵandu ŵa Mlungu cikwendelecela kutupa atamose kuti tukutama m’cilambo cakusakala, cacikulamuligwa ni Satana jwali “mlungu jwa cilambo capasi cino.” (2 Akoli. 4:4) Jwalakwe akusalimbikasya makuga gandale kuti atusokonasye pamasengo gakulalicila ngani syambone soni ŵagulusya ngani. Nambo jwalakwe nganaŵa akombwele kutulekasya masengoga. Nambope, pakumanyilila kuti kamsigalile kandaŵi kamnono, Satana akulingalinga kwasepusya ŵandu kuti alece kulambila kusyesyene. Jwalakwe akutenda yeleyi pakamulicisya masengo matala gakulekanganalekangana.—Ciu. 12:12.

5. Ligongo cici ndaŵi sine acimjetu mpaka atende kapena kuŵeceta yindu yakutukuŵasya? (Alole ciwulili cacili kundanda kwa nganiji.)

⁵ Mpingo waciklistu ukusagombelecesya kusosekwa kwakumnonyela Mlungu soni acimjetu. Yesu ŵalosisyesoni kuti yeleyi yili yakusosekwa. Paŵajangaga ciwusyo cakwamba lilamusi lyekulungwa, jwalakwe ŵatite, “‘Mumnonyeleje Yehofa Mlungu jwenu ni mtima wenu wosope, umi wenu wosope, ni nganisyo syenu syosope.’ Lyeleli lili lilamusi lyekulungwa soni lyandanda. Lyaŵili lyakulandana nalyo ni ali, ‘Mumnonyeleje mjenu mpela mwamkusalinonyelela mwasyene.’” (Mat. 22:35-39) Nambo atamose yili m’yoyo, Baibulo jikusasala mwakupikanika cenene kuti wosopewe tuli ŵangali umlama ligongo lya kulemwa kwa Adamu. (Aŵalanje Aloma 5:12, 19.) Ligongo lya yeleyi, acimjetu mumpingo mpaka atende kapena kuŵeceta yindu yampaka yitukuŵasye. Yeleyi payitendekwe ana tucitenda cici? Ana tucijendelecela kumnonyela soni kuŵa ŵakulupicika kwa Mlungu ni kwa acimjetuwo? Baibulo jikusalosya kuti atamose ŵakutumicila ŵakulupicika ŵa Mlungu ŵakala ŵatendaga soni kuŵeceta yindu yakwakuŵasa ŵane. Kwende tulole yampaka tulijiganye kwa jemanjaji.

6. Ana Eli ŵalepele catuli kwajamuka ŵanace ŵakwe?

⁶ Mwambone, Eli juŵaliji Jwamkulungwa jwa Ŵambopesi ŵakwete ŵanace ŵacalume ŵaŵili ŵanganakuyaga malamusi ga Yehofa. Baibulo jikusasala kuti, “Ŵanace ŵacalume ŵa Eli ŵaliji ŵakusakala. Jemanjaji nganamkosyaga Yehofa.” (1 Sam. 2:12) Atamose kuti Eli ŵatesile yindu yejinji pakulimbikasya kulambila kusyesyene, nambo ŵanace ŵakweŵa ŵatendaga yakulemwa yekulungwa. Jwalakwe ŵamanyililaga ya kulemwa kwa ŵanacewo soni akakombolece kwajamuka, nambo nganayikosya. Yakuyicisya yakwe, Mlungu ŵalilamwile liŵasa lyosope lya Eli. (1 Sam. 3:10-14) Mkupita kwandaŵi ŵandu ŵa m’liŵasa lya Eli nganiŵakundaga kutumicila mpela ŵakulungwa ŵa ŵambopesi. Yikaŵe kuti wawojo ŵatemi m’ndaŵi ja Eli, ana akapikene wuli ni yaŵatendaga Eli pakwalecelela ŵanace ŵakwe kuti atendeje yakulemwa? Ana akakundile  kuti yeleyi yakuŵasye ni kwikana pakuleka kumtumicila Mlungu?

7. Ana Daudi ŵatesile yakulemwa yekulungwa yapi, soni ana Mlungu ŵatesilepo cici?

⁷ Yehofa ŵamnonyelaga mnope Daudi soni ŵaliji mundu ‘jwapamtima pakwe.’ (1 Sam. 13:13, 14; Mase. 13:22) Nambo mkupita kwa ndaŵi, Daudi ŵatesile cikululu ni Batiseba, mwati ŵakwete citumbo. Yeleyi yatendekwe pandaŵi jele Uliya, ŵamkwakwe Batisebajo ŵaliji kungondo. Uliya paŵawujile kumangwakwe kwandaŵi jamnono, Daudi ŵalinjilelinjile kumtendekasya kuti akagone ni ŵamkwakwewo kuti yiwonece mpela kuti Uliyajo ni jwapelece citumboco. Nambo Uliya nganatenda yaŵasakaga mwenyewo. M’yoyo, Daudi ŵalingenye yakuti jwalakwejo akawulajikwe kungondoko. Mlungu ŵampele cilango Daudi ligongo lya yakulemwa yaŵatesileyi. Jwalakwe pampepe ni liŵasa lyakwe ŵasimene ni yipwetesi yejinji. (2 Sam. 12:9-12) Nambope, Mlungu ŵamtendele canasa Daudi ligongo lyakuti ŵasacililaga kutenda yakuŵajilwa. (1 Maf. 9:4) Yikaŵe kuti wawojo ŵapali pandaŵi jeleji, ana akatesile cici? Ana akakundile kuŵala ni yakulemwa yaŵatesile Daudiyi?

8. (a) Ana ndumetume Petulo ŵalepele catuli kwanilisya maloŵe gakwe? (b) Ligongo cici Yehofa ŵajendelecele kumkamulicisya masengo Petulo panyuma pakulemwesya?

⁸ Cisyasyo cine cili ca ndumetume Petulo. Atamose kuti Yesu ŵamsagwile jwalakwe kuŵa jwandumetume, nambope ndaŵi sine ŵalemwesyaga. Mwambone, jwalakwe ndaŵi jine ŵasasile kuti ngasamleka Yesu atamose ŵane wosope ali amlesile. (Maliko 14:27-31, 50) Nambo Yesu ali ataŵigwe, ŵandumetume wosope kupwatikapo Petulojo, ŵamlesile. Konjecesya pelepo, jwalakwe ŵakanile katatu kose kuti ngakummanyilila Yesu. (Maliko 14:53, 54, 66-72) Nambope, Petulo ŵalitendele canasa, soni Yehofa ŵajendelecele kumkamulicisya masengo. Yikaŵe kuti wawojo ŵaliji jwakumkuya jwa Yesu pandaŵijo, ana yaŵatesile Petulo yikatendekasisye kuti alece kuŵa jwakulupicika kwa Yehofa?

9. Ligongo cici akusakulupilila kuti Yehofa akusatenda yacilungamo?

⁹ Panasoni yisyasyo yine yakala soni yamoŵa  agano ya ŵakutumicila ŵa Yehofa ŵaŵatesile yakwakuŵasya ŵane. Nambo ŵane patesile yeleyi, ana wawojo cacitenda yatuli? Ana cacikunda kuti yakulemwa yawoyo yatendekasye kuleka kusongana ni mpingo atamosesoni kuleka kumtumicila Yehofa? Kapena ana cacipikanicisya kuti Yehofa mpaka ampe ndaŵi mundujo kuti apitikuce mtima? Nambope ndaŵi sine ŵandu ŵane ŵatesile yakulemwa yekulungwakulungwa ngakusakunda kuti Yehofa ŵakamucisye mwati ngakusapitikuka mtima. Muyakutendekwa mpela yeleyi, ana caciŵa ŵakusimicisya kuti Yehofa cacalamula ŵakulemwaŵa pandaŵi jakwe, mwine mwakwatyosya mumpingo?

10. Ana Yesu ŵayiweni mwatuli yakulemwa ya Yudasi Isikaliyoti soni Petulo?

¹⁰ Baibulo jikusasalasoni yisyasyo ya ŵakutumicila ŵa Mlungu ŵaŵajendelecele kuŵa ŵakulupicika kwa Mlungu soni kwa ŵandu ŵakwe atamose kuti ŵane ŵatendaga yakulemweceka. Mwambone, panyuma pakupopela kwa Atati ŵakwe cilo cosope, Yesu ŵasagwile ŵandumetume 12. Jumo mwa ŵandumetumeŵa, jwaliji Yudasi Isikaliyoti, jwele kaneko ŵampelece Yesu kwa acimmagongo ŵakwe. Yesu nganakunda kuti yaŵatesile Yudasi soni Petulo yisokonasye unasi wakwe ni Yehofa. (Luk. 6:12-16; 22:2-6, 31, 32) Yesu ŵayimanyi kuti yakulemwa yeleyi nganatenda Mlungu kapena ŵandu ŵane. Jwalakwe ŵajendelecele kutenda masengo gakwe atamose kuti ŵandumetume ŵakwe ŵane ŵamlemwecesyaga. Yehofa ŵamjaliwe Yesu mwakumjimusya ku ŵawe ni kum’ŵika kuti caŵe mwenye mu Ucimwene wakwinani.—Mat. 28:7, 18-20.

11. Ana Baibulo jasasile yatuli mkanipaŵe pakwamba ya mwayiŵelele yindu ni ŵakutumicila ŵa Yehofa mundaŵi ajino?

¹¹ Yesu ŵaliji jwakulupicika kwa Yehofa soni kwa ŵandu ŵakwe. Kusala yisyene, tukusasimonga mnope patukuganicisya ya yindu yakutenda Yehofa kupitila mwa ŵakutumicila ŵakwe m’moŵa gambesi gano. Pangalisoni ŵandu ŵane ŵakulalicila usyesyene wa m’Baibulo pacilambo cosope, pakuŵa ngakulongolelegwa ni Yehofa. Lilemba lya Yesaya 65:14 likusala mwayiŵelele yindu pasikati pa ŵandu ŵa Mlungu. Likuti, “Ŵakutumicila ŵangu cacigumila mwakusangalala ligongo lyakola mtendele mumtima.”

12. Ana tukusosekwa kuyiwona mwatuli yakulemwa ya ŵane?

¹² Ŵakutumicila ŵa Yehofa akusangalala ni yindu yambone yakutenda ligongo lyakulongolelegwa ni Yehofa. Nambo mwakulekangana ni m’weji, ŵandu m’cilambo ca Satanaci akuwuwula ligongo lya kusakala kwa yindu. Kusala yisyene, mpaka kuŵe ungali lunda kumjimba magambo Yehofa kapena mpingo wakwe ligongo lya yakulemwa ya ŵakutumicila ŵa Mlungu ŵakuŵalanjikape. Tukusosekwa kwendelecela kuŵa ŵakulupicika kwa Yehofa soni kuya yakusatusalila. Tukusosekwasoni kulijiganya yampaka tutende ni yakulemwa ya ŵane.

13, 14. (a) Ana tukusosekwa kutenda wuli mjetu patulemwecesye? (b) Ana tukusosekwa kumbucilaga yindu yambone yapi yaŵatulagucisye Yehofa?

¹³ Sambano, ana mpaka tutende cici naga jwakutumicila jwa Mlungu mjetu atulemwecesye? Baibulo jikusatusalila songa jakusosekwa mnope. Jikusati, “Mkajanguyaga kutumbila mumtima mwenu, pakuŵa ŵandu ŵakuloŵela ni ŵakusatumbila mwacitema.” (Mlal. 7:9) Tukumbucileje kuti wosopewe tuli ŵakulemwa soni kuti mpaka yiŵe yangasawusya kulemwesya yindu. M’yoyo tukajembeceyaga kuti ŵakulambila acimjetu catendeje kapena kuŵeceta yakuŵajilwa ndaŵi syosope. Ngatusosekwasoni kunda kuti yakulemwa yawoyo yitutendekasye kuŵa ŵangasangalala patukumtumicila Mlungu  m’moŵa gambesi gano. Cekulungwa mnope cili cakuti tukakunda kuti yakulemwa ya ŵaneyi yitukuŵasye ni kwikana pakuleka likuga lya Yehofa. Nambo naga tukunda yeleyi kututendecela, tucijasa upile wakutenda lisosa lya Mlungu soni wakola umi wangamala m’cilambo casambano ca Mlungu.

¹⁴ Kuti tujendelecele kuŵa ŵakusangalala soni kola cembeceyo cakulimba, tukusosekwa kumbucilaga ndaŵi syosope yindu yambone yaŵatulagucisye Yehofa. Jwalakwe ŵatite, “Une ngupanganya kwinani kwasambano ni cilambo capasi casambano. Yindu yakala ngasiyikumbucilikwasoni, soni ngasiyiŵa ciŵela mu mtima.” (Yes. 65:17; 2 Pet. 3:13) Tukakunda kuti yakulemwa ya ŵane yitulepelekasye kupocela majali gelega.

15. Ana Yesu ŵasasile kuti tutendeje cici ŵane patulemwecesye?

¹⁵ Nambope, ligongo lyakuti nganituŵe kwinjila m’cilambo casambano, tukusosekwa kuganicisyaga yakusasaka Yehofa kuti tutendeje ŵane patulemwecesye. Mwambone, Yesu ŵasasile songa jine jatukusosekwa kujikumbucilaga paŵatite, “Naga mkwakululucila ŵandu yakulemwa yawo, Atati ŵenu ŵakwinani cacimkululucilasoni. Nambo naga ngamkwakukulucila ŵandu yakulemwa yawo, nombe nawo Atati ŵenu ngasamkululucila yakulemwa yenu.” Tukumbucilejesoni kuti Petulo paŵawusisye naga tukusosekwa kwamba kwakululucila ŵane “maulendo 7,” Yesu ŵajanjile kuti, “Ngumsalila kuti, ngaŵa maulendo 7 basi, nambo mpaka maulendo 77.” Pelepatu Yesu ŵagopolelaga kuti tuŵeje ŵakusacilila kwakululucila ŵane ndaŵi syosope.—Mat. 6:14, 15; 18:21, 22.

16. Ana Yosefe ŵapelece cisyasyo cambone capi?

¹⁶ Yosefe, mwanace jwa Yakobo, ŵapelece cisyasyo cambone pangani ja kumalana ni yakulemwa ya ŵane. Acabalegwe ŵa Yosefe ŵakwana 10 ŵamtendelaga wiwu ligongo lyakuti baba wawo ŵamnonyelaga mnope jwalakwejo. M’yoyo, jemanjajo ŵamsumisye jwalakwe ku ukapolo. Pali papitile yaka yejinji, mwenye jwa ku Iguputo ŵam’ŵisile Yosefe kuŵa jwaŵili kwa mwenyejo ligongo lyakuti ŵasangalele ni masengo gambone gaŵakamulaga m’cilamboco. Kaneko kuli kugwile sala, acabalegwe ŵa Yosefe ŵala ŵayice ku Iguputo kukusuma yakulya. Jemanjaji paŵam’weni Yosefe, nganamkumbucila, nambo jwalakwe ŵakumbucile. Yosefe akakamulicisye masengo ukumu wakwe pandaŵiji kuti ŵawucisye acabalegwewo pa yakusakala yaŵamtendele. M’malo mwakwe, jwalakwe ŵalinjile jemanjajo kuti alole naga ŵacenjile mitima jawo. Paŵayiweni kuti acabalegwewo ŵacenjile yisyene, Yosefe ŵalimanyikasisye kwa jemanjajo soni kaneko ŵasalile kuti, “Mkasimtenda woga. Cinjendelecele kumpa yakulya jemanja soni ŵanace ŵenu.” Baibulo jikusajonjecesyasoni kuti jwalakwe “ŵalimbikasisye soni kwasimicisya yeleyi.”—Gen. 50:21.

17. Ana cacitenda cici ŵane paŵalemwecesye?

¹⁷ Mpaka luŵe lunda kumbucila kuti wosopewe tukusalemwecesya ŵane. Naga tuyiweni kuti tumlemwecesye mjetu, Baibulo jikusatulimbikasya kuti tujawuleje kwa mjetujo ni kumasya nganijo. (Aŵalanje Matayo 5:23, 24.) Tukusasangalala naga ŵane ngakutusunjila cakulukosi, m’yoyo m’wejisoni tukasunjilaga cakulukosi ŵane. Lilemba lya Akolose 3:13 likusatulimbikasya kuti, “Ajendelecele kundililana ni kululucilana ni mtima wosope, naga jwine akwete ligongo lyakudandawulila ya mjakwe. Mpela Yehofa ŵakululucile ni mtima wosope, jemanjasoni atende yeleyo.” Lilemba lya 1 Akolinto 13:5 likusasalasoni kuti cinonyelo caciklistu “cangasunga magongo.” Naga tukusakululucila ŵane, Yehofa nombe najo cacitukululucila. M’yoyo, naga mundu jwine atulemwecesye, tukusosekwa kwasyasya Atati ŵetu ŵacanasa ŵakusatukululucila yakulemwa yetu.—Aŵalanje Salimo 103:12-14.