Ana Akukumbucila?
Ana aŵalasile mwakusamala magasini ga Sanja ja Mlonda gapacangakaŵapa? Kwende tulole naga cakombole kwanga yiwusyo yakuyicisyayi:
Ligongo cici Yehofa ŵakundaga Ayisalayeli kuputa ngondo?
Yehofa ali jwacinonyelo. Nambope, ndaŵi sine ŵakundaga ŵandu ŵakwe kuputa ngondo pakusaka kwacenjela ku yakusakala soni yangalwe. Nambo Mlungujo ni juŵasagulaga jwakusosekwa kuputa ngondo soni ndaŵi jakuputila ngondojo.—w15 11/1, peji 3-4.
Ana acinangolo akusosekwa kutenda yatuli kuti ŵakamucisye ŵanace ŵawo ŵacinyamata kuti amtumicileje Yehofa?
Yili yakusosekwa kuti acinangolo ŵanonyeleje ŵanace ŵawo ŵacinyamata soni kutenda yindu yakulosya kuti ali ŵakulinandiya. Akusosekwasoni kuŵa ŵaumanyilisi soni alinjejelinjeje kwapikanicisya.—w15 11/15, peji 9-11.
Ligongo cici ngatukusosekwa kum’wona papa mpela jwakwinjila m’malo mwa Petulo?
Lilemba lya Matayo 16:17, 18 lyangasala kuti ndumetume Petulo ni juŵaliji mtwe wa mpingo waciklistu. Nambo Baibulo jikusalosya kuti Yesu ni jwali liganga lyapandumba lya mpingo. (1 Pet. 2:4-8)—w15 12/1, peji 12-14.
Ana tukusosekwa kuganicisya yindu yapi mkanituŵe kuŵeceta?
Kuti tukamulicisyeje masengo cenene lulumi lwetu, tukusosekwa kuganicisyaga (1) ndaŵi jakuŵecetela (Mlal. 3:7), (2) yatukusosekwa kuŵeceta (Miy. 12:18), soni (3) mwampaka tuŵecetele (Miy. 25:15).—w15 12/15, peji 19-22.
Ana mitundu japi ja ungakulupicika jele Aklistu akusajiŵambala?
Aklistu ŵasyesyene akusaŵambala unami soni kusogoda. Jemanjaji ngakusaŵeceta yaunami kapena yakusakala ya mundu jwine pakusaka konanga mbili jakwe. Ngakusatendasoni yaulamba kapena kwiŵa.—wp16.1, peji 5.
Ana “acakulungwa ŵambopesi” ŵakusakolanjidwa m’Baibulo ali ŵani?
“Acakulungwa ŵambopesi” ŵajimilaga likuga lya acakulungwa ŵambopesi, kupwatikapo ŵambopesi ŵacakulungwa ŵaŵatyosyegwe pa ukumuwu.—wp16.1, peji 10.
Ana tukusosekwa kum’wona mwatuli mundu jwakusalya soni kumwa yiwanicisyo ya pa Cikumbucilo?
Aklistu ngakusiŵawona ŵandu ŵakusalya soni kumwa yiwanicisyo mpela ŵandu ŵapenani. Mundu jwali jwamsagulwe yisyesyene nganaŵa asacile kuti ŵane amcimbicisyeje mwakupundaganya, soni nganaŵa alilosisye kuti ali jwamsagulwe. (Mat. 23:8-12)—w16.01, peji 23-24.
Ana tukulijiganya yatuli pa yaŵatesile Abulahamu kuti aŵe mjakwe jwa Mlungu?
Komboleka kuti Abulahamu ŵalijiganyisye yakwamba Mlungu kutyocela kwa Semu. Yaŵatendaga Mlungu ni Abulahamu soni liŵasa lyakwe yamkamucisyesoni jwalakwe kuti amanyilile yejinji. M’wejisoni mpaka tutende yakulandanayo.—w16.02, peji 9-10.
Ana yaŵele wuli kuti m’Baibulo muŵeje macaputala ni ndime?
M’yaka ya m’ma 1200 C.E, Stephen Langton ŵaŵisile macaputala m’Baibulo. Ŵakopela Baibulo Ŵaciyuda ŵaŵisile ndime m’Baibulo Jacihebeli, soni m’yaka ya m’ma 1500 C.E, mundu jwine lina lyakwe Robert Estienne ŵaŵisile ndime m’Malemba Gacigiliki Gaciklistu.—wp16.2, peji 14-15.
Ana Satana ŵamjigele Yesu mwakucilu ni kwawula najo kunyumba ja Mlungu kuti akamlinje?
Ngatukumanyilila yisyesyene yakwe. Lilemba lya Matayo 4:5 soni Luka 4:9 mpaka ligopelele kuti Satana ŵamjigele Yesu m’mesomkulola kapenasoni kuti Yesujo ŵajimi pamalo gapajika m’nyumba ja Mlungu.—w16.03, peji 31-32.
Ana undumetume wetu Waciklistu mpaka uŵe mpela mangame m’matala gapi?
Mangame gakusapanganyikwa panandipandi, gakusajoloŵesya soni gakusakamucisya kuti yakumela yikawa. Mangame galisoni majali gakutyocela kwa Mlungu. (Deut. 33:13) Mwakulandanamo, yakusatenda ŵandu ŵa Mlungu wosope mu undumetume mpaka tuyiwanicisye ni mangame.—w16.04, peji 4.