Ndamo Japenani Mnope Kupunda Dayimondi
Kutandila kalakala, ŵandu aŵele ali mkum’wona dayimondi kuŵa jwapenani mnope. Dayimondi jwine akusakomboleka kumsumisya madola gakwana mamiliyoni gejinji. Nambo ana pana cinecakwe cakusaciwona Mlungu kuŵa capenani mnope kupunda dayimondi kapena maganga gane gapenani?
Jwamkongwe jwine jwa ku Armenia, lina lyakwe Haykanush, ŵalokwete pasipoti ciŵandika nyumba jakwe. Mkati mwa pasipotimo mwaliji mbiya syejinji soni makadi ga ku banki. Jwalakwe ŵasalile yeleyi ŵamkwakwe. Haykanush soni ŵamkwakwewo ŵaliji ŵakulalicila ŵangabatiswa.
Liŵasali lyasoŵaga mbiya soni lyakwete ngongole. Nambope, jemanjaji ŵasagwile yakuti atumisye mbiya syaŵalokwetesyo ku adilesi jajaliji pa pasipotipo. Jwamlume juŵajasile mbiyasyo pampepe ni liŵasa lyakwe ŵasimonjile mnope ni yeleyi. Haykanush ni ŵamkwakwe ŵasasile kuti yakusalijiganya m’Baibulo ni yayakamucisye kuti atende yindu mwakulupicika. Jemanjaji ŵayiweni kuti akusosekwa kutenda yindu mwakulupicika, soni ŵapatilepo upile wakulisalila liŵasa linelyo yakwamba Mboni sya Yehofa soni ŵaligaŵile mabuku.
Liŵasalyo lyasakaga kumpa Haykanush mbiya mpela mtuka, nambo jwalakwe ŵakanile. Lisiku lyakuyicisya, jwamkongwe jwa m’liŵasalyo ŵapite kunyumba kwa Haykanush ali ajigele mbete ja dayimondi kuti akampe pakum’yamicila. Jwalakwe ŵamkanganicisye Haykanush kuti apocele mbetejo.
Mwakulandana ni liŵasali, ŵandu ŵajinji mpaka asimonjesoni pakulola kulupicika kwaŵalosisye Haykanush ni ŵamkwakwe. Nambo ana Yehofa mpaka asimonje nayo yeleyi? Ana jwalakwe ŵakuweni wuli kulupicika kwa jemanjaji? Ana kulupicika kwawoku kwakamucisye?
NDAMO SYAPENANI MNOPE KUPUNDA CIPANJE
Kwanga kwa yiwusyoyi kuli kwangasawusya. Yili m’yoyo ligongo lyakuti ŵakutumicila ŵa Mlungu akusayiwona kuti kulosya ndamo sya Yehofa kuli cindu capenani mnope m’meso mwakwe kulekangana ni dayimondi, golide, kapena yindu yine. Kusala yisyene yakusayiwona Yehofa kuŵa yapenani yikusalekangana ni yakusayiwona ŵandu ŵajinji kuŵa yapenani. (Yes. 55:8, 9) Soni ŵakutumicila ŵa Yehofa akusayiwona kuti kusyasya ndamo syakwe kuli cindu capenani mnope.
Mpaka tusimicisye yeleyi pakulola yajikusasala Baibulo pangani ja umanyilisi ni lunda. Lilemba lya Miyambo 3:13-15 likusasala kuti, “Jwakusangalala ali mundu jwapatile lunda soni mundu jwapatile umanyilisi, ligongo kupata lunda kuli kwambone kupunda kupata silifa, soni kulupata mpela yagowola kuli kwambone kupunda kupata golide. Luli lwapenani kupunda maganga ga kolali, soni yosope yamkusayinonyela nganiyiŵa yilandene nalo.” M’yoyo, yili yangakayikasya kuti Yehofa akusasiwona ndamo syelesi kuŵa syapenani mnope kupunda cipanje cilicose.
Nambo wuli pakwamba ya kulupicika?
Yehofa ali jwakulupicika, soni ‘nganaŵa alambwisye.’ (Tito 1:2) Jwalakwe ŵamsalile ndumetume Paulo kuti ŵalembele Aklistu ŵacihebeli ŵa m’yaka 100 yandanda kuti, “Ajendelecele kutupopelela, pakuŵa tukwete mtima wangali kandu kakuwusisya, nipo tusimicisye kutenda yosope mwacilungamo.”—Ahe. 13:18.
Yesu Klistu ŵapelece cisyasyo cambone cakuŵa jwakulupicika. Mwambone, pandaŵi jine Kayafa juŵaliji Jwamkulungwa jwa Ŵambopesi ŵamsalile Yesu kuti “Ngumlumbilisya pali Mlungu jwacijumi, mtusalile naga m’mwejo mli Klistu, Mwanace jwa Mlungu!” Yesu nganalisisa nambo mwakulupicika ŵasasile kuti jwalakwe ali Mesiya. Jwalakwe ŵasasile yeleyi atamose kuti yatendekasisye kuti amjimbe magambo gakunyosya Mlungu soni kumkomelela pacitela cakulagacisya.—Mat. 26:63-67.
Nambi wuli m’weji? Ana tuciŵa ŵakulupicika pa yindu yele naga tukulambusya panandipe mpaka yitutendekasye kupata yindu yine yakwe?
LIGONGO CICI KUŴA ŴAKULUPICIKA KULI KWAKUSAWUSYA?
Kusala yisyene yili yakusawusya kuŵa ŵakulupicika m’moŵa gambesi gano ligongo ŵandu ŵajinji ali ‘ŵakulinonyela soni ŵakunonyela mbiya.’ (2 Tim. 3:2) Kusoŵa kwa mbiya soni masengo kukwatendekasya ŵandu ŵajinji kuŵa ŵangakulupicika. Jemanjaji ŵangaciwona cakusawusya cilicose ni kwiŵa, kulambusya soni kutenda yindu yine yangakulupicika ni cakulinga cakuti apate yindu yakusaka. Nambo yakutesya canasa ni yakuti Aklistu ŵane asagwile yindu mwakulemweceka pangani jeleji soni mbili jawo jisakele mumpingo ligongo lyakutenda yindu mwangakulupicika.—1 Tim. 3:8; Tito 1:7.
Nambope, Aklistu ŵajinji akukuya cisyasyo ca Yesu. Jemanjaji akusamanyilila kuti kulosya ndamo sya Yehofa kuli kwakusosekwa mnope kupunda kupata cipanje kapena yindu yine. Ni ligongo lyakwesoni Aklistu ŵacinyamata ngakusalolela mayeso kusukulu pakusaka kuti akombole. (Miy. 20:23) Yili yisyene kuti ngaŵa ndaŵi syosope syampaka tupate cinecakwe ligongo lyakuti tutesile yindu mwakulupicika mpela muyaŵelele ni Haykanush. Nambope, kuŵa ŵakulupicika kuli kwakusosekwa m’meso mwa Yehofa, soni kukusatukamucisya kola cikumbumtima cambone, cacili cindu capenani mnope.
Cisyasyo ca Gagik cikulosya cenene yeleyi. Jwalakwe ŵatite, “Mkanimbe Mklistu, nakamulaga masengo ku kampani jekulungwa jele msyene ŵakanaga kupeleka misongo acilambusyaga kuti akusapata mbiya syamnono. Unejo naliji jwamkulungwa jwapakampanijo, m’yoyo nasosekwaga kusisa yacinyengoyi kwa mundu juŵalokotelaga msongo. Yeleyi yandendekasisye kola mbili jakuŵa jwangakulupicika. Nambo panalijiganyisye usyesyene, nakanaga kutenda yacinyengoyi, mwati nalesile masengogo atamose kuti napocelaga mbiya syejinji. Kaneko nawugwile kampani jangu, soni kutandila palisiku lyanawugwile, nalembesye kampanijo ku boma soni nalipilaga misongo josope.”—2 Akoli. 8:21.
Gagik ŵasasilesoni kuti, “Mbiya syangu syanandipe mnope mwati yasawusyaga kulisamalila liŵasa lyangu. Nambope, ngusaŵa jwakusangalala. Ngwete cikumbumtima cambone pameso pa Yehofa soni ndili cisyasyo cambone kwa ŵanace ŵangu ŵacalume ŵaŵili. Soni apano ngwete upile wakupocela maukumu gane mu mpingo. Ngwetesoni mbili jambone kwa ŵandu ŵakusalokotela misongo soni ŵangusatenda nawo malonda.”
YEHOFA MPAKA ATUKAMUCISYE
Yehofa akusiŵanonyela wosope ŵakusayikasya lumbili kwa jwalakwe mwakulosya ndamo syakwe syapenani, kupwatikapo kulupicika. (Tito 2:10) Jwalakwe ŵamsalile Mwenye Daudi kulemba maloŵe aga, “Naliji mwanace, sambano ngusile, nambo nganinam’woneje mundu jwakulungama ali amlesile, kapena ŵanace ŵakwe ali mkuŵendaŵenda yakulya.”—Sal. 37:25.
Lute ali cisyasyo cambone pangani jeleji. Jwalakwe nganasaka kwaleka akwegwe ŵakwe, Naomi ŵaŵaliji ŵacikulile. Lute ŵasagwile kusamila ku Yisalayeli kwele ŵalambilaga Mlungu jwakuwona. (Rute 1:16, 17) Paŵaliji ku Yisalayeli, Lute ŵaliji jwakulupicika soni jwamtawu pakamula masengo. Jwalakwe ŵawululaga m’migunda mwakamulana ni yacasalaga Cilamusi. (Rute 2:2-18) Yehofa ŵamtendele yejinji Lute. Konjecesya pakumpa yakusosecela yakwe, ŵamsagwile jwalakwe kuti aŵe nangolo jwa Mwenye Daudi soni Mesiya.—Rute 4:13-17; Mat. 1:5, 16.
Ŵakutumicila ŵa Yehofa ŵane akusalajilila kupata yakusosecela yapaumi. Nambo jemanjaji ngakusalinga kumasya kulaga kweleku mwakutenda Miy. 12:24; Aef. 4:28.
yindu yangakulupicika, m’malo mwakwe akusalingalinga kamula masengo mwamtawu. M’yoyo, jemanjaji akusalosya kuti akusasiwona ndamo sya Mlungu, kupwatikapo kulupicika kuŵa syapenani mnope kupunda cindu cilicose.—Mwakulandana ni Lute, Aklistu ŵajinji pacilambo cosope alosisye kuti akusamjegamila Yehofa kuti ŵakamucisyeje. Jemanjaji aŵisile cikulupi cawo mwa Mlungu juŵatulagucisye m’Maloŵe gakwe kuti, “Ngasinamleka kapena kumjasa ata panandi.” (Ahe. 13:5) Yehofa alosisye kuti mpaka ŵakamucisye ŵandu ŵakulaga ŵakusatenda yindu mwakulupicika ndaŵi syosope. Jwalakwe aŵele ali mkwanilisya maloŵe gakwe gakuti cacapa ŵandu yakusosecela yawo.—Mat. 6:33.
Ŵandu ŵajinji mpaka am’woneje dayimondi soni yindu yine kuŵa yapenani mnope. Nambo mpaka tuŵe ŵakusimicisya kuti Atati ŵetu ŵakwinani akusajiwona ndamo ja kulupicika soni ndamo sine kuŵa syakusosekwa mnope kupunda maganga gapenani.
Kuŵa ŵakulupicika kukusatukamucisya kola cikumbumtima cambone soni ngatukusakola cakutusisya patukuŵeceta ni ŵane mu undumetume