Yeleyi yikucenga mwatwapikanilaga munyumamo. Ligongo cici kucenga kweleku kuli kwakusosekwa?

Msinda wakusapuka wa Yelusalemu mkaniwujonanjikwe mu 607 B.C.E., Esekiyele ŵagaweni mesomkulola gakulosya yayicitendekwa kaje msindawo mkanawujonanje. M’mesomkulolamo, jwalakwe ŵaweni acalume 6 ali ajigele yida yakonanjila. Ŵam’wenisoni mundu jwine pasikati pawo juŵawete “yakuwala ya nguwo” soni ŵajigele “kakwama ka mlembela kakunyakulila inki.” (Ezek. 8:6-12; 9:2, 3) Mundu jweleju ŵamsalile kuti “Mjendejende mumsinda wosope . . . ni kulemba cimanyisyo pawusyo sya ŵandu ŵakulaga ni kuwuwula ligongo lya yakunyalaya yosope yayikutendekwa mumsindamo.” Kaneko acalume ŵakola yida yakonanjila ŵala ŵasalile kuti awulaje jwalijose mumsindamo jwanganakola cimanyisyo. (Ezek. 9:4-7) Ana mesomkulolaga gakutujiganya cici, soni ana mundu jwajigele kakwama ka mlembela kakunyakulila inki ali ŵani?

Esekiyele ŵagaweni mesomkulolaga mu 612 B.C.E. Mesomkulolaga gakwanilicikwe kandanda pali papitile yaka 5, pandaŵi jele asilikali ŵa ku Babulo ŵajonasile msinda wa Yelusalemu. Yehofa ŵakundile kuti Ababuloŵa ajonanje msindawu pakusaka kwapa cilango ŵandu ŵakwe ŵanganampikanilaga. (Yer. 25:9, 15-18) Nambope, Yehofa nganakunda kuti ŵandu ŵakulungama ajonanjikwe pampepe ni ŵakusakala. Jwalakwe ŵalingenye litala lyakwakulupucisya Ayuda ŵanganatendaga nawo yakusakala yayatendekwaga mumsindamo.

Esekiyele nganakamula nawo masengo gakwalemba ŵandu cimanyisyo atamosesoni gakonanga. Nambo malayika ni gagalongolele pa masengo gakonanga msinda wa Yelusalemu. M’yoyo mesomkulolaga gakutukamucisya kumanyilila yayikusatendekwa kwinani. Yehofa ŵagapele malayika masengo gakulinganya yakwajonanga ŵandu ŵakusakala nambosoni kwakulupusya ŵandu ŵakulungama. *

Pandanda, twasalaga kuti mundu jwajigele kakwama ka mlembela kakunyakulila inki akwimila Aklistu ŵasagulwe ŵali ciŵela pacilambo capasi. Twasalagasoni kuti ŵandu ŵakupikanila utenga watukulalicila akupocela cimanyisyo cakwakamucisya kuti cakulupuce. Nambo apano yiwonecele kuti pakusosekwa kucenga yatwasalagayi. Lilemba lya Matayo 25:31-33, likusasala kuti Yesu ni jwali jwakwalamula ŵandu. Jwalakwe cacalamula ŵandu kakumalisya pandaŵi ja yisawusyo yekulungwa, pacacalekanganya ŵandu ŵali mpela ngondolo kuti ŵakulupusye ni ŵandu ŵali mpela mbusi kuti ŵajonanje.

M’yoyo, mwakamulana ni kapikane kasambanoka, ana tukulijiganya cici kutyocela m’mesomkulola ga Esekiyelega? Pana yindu 5:

1. Yesaya ŵaliji ali atesile gele masengoga munyuma mwawo. Moŵa agano, Yehofa akukamulicisya masengo likuga lyamwana lya ŵakutumicila ŵakwe ŵasagulwe kuti ŵalisyeje ŵandu ŵakwe soni kwakalamusya yisawusyo yekulungwa mkaniyiyice. Nambope ŵamasengo ŵapamlango ŵa Klistu wosope akusosekwa kamula masengo gakwakalamusya ŵanduga.—Mat. 24:45-47.

2. Mwakulandanamo, ŵandu ŵa Yehofa moŵa agano ngakukamula masengo gakwalemba cimanyisyo ŵandu ŵacacikulupuka. Jemanjaji akwamba kuwandisya utenga wa Yehofa wawuli mbali ja masengo gakulalicila gagakutendekwa  mwakulongolelegwa ni malayika.—Ciu. 14:6.

3. Nambo ana ŵandu akusosekwa kutenda wuli kuti ciŵalembe cimanyisyo cakuwanicisya cakwakamucisya kuti cakulupuce? Jemanjaji akusosekwa kupikanila utenga wambone wawukulalicikwa, kuwala umundu waciklistu, kulipeleka kwa Yehofa, soni kwakamucisya acabalegwe ŵa Klistu. (Mat. 25:35-40) Ŵandu ŵakutenda yeleyi cacipocela cimanyisyo cacicakamucisya kuti cakulupuce pa yisawusyo yekulungwa.

4. Jwalakwe ni jucacalemba cimanyisyo ŵandu kuti cakulupuce. Likuga lyekulungwa lya ŵandu licipocela cimanyisyoci palicilamuligwa kuti lili mpela ngondolo pa yisawusyo yekulungwa. Jemanjaji caciŵa ŵakuŵajilwa kupocela umi wangamala pacilambo capasi.—Mat. 25:34, 46. *

5. Pacangakaŵapa, jemanjaji cajonanje cilamboci soni yakusakala yosope.—Ezek. 9:2, 6, 7; Ciu. 19:11-21.

Kupikanicisya yindu 5 yatukulijiganyayi mpaka kutukamucisye kulupilila kuti Yehofa ngakusajonanga ŵandu ŵakulungama pampepe ni ŵakusakala. (2 Pet. 2:9; 3:9) Yeleyi yikutukumbusyasoni ya kusosekwa kwakamula masengo gakulalicila mundaŵi jetu jino. Tukusosekwa kumkalamusya jwalijose mbesi mkanijiyice!—Mat. 24:14.