Ligongo cici mpaka akulupilile kuti Yehofa akusiŵasamalila wawojo? Ligongo limo lili lyakuti Baibulo jikusasala yeleyi. Lilemba lya 1 Petulo 5:7 likusati, ‘Amtulile jwalakwe yakudandawula yawo yosope, pakuŵa akusiŵasamalila wawojo.’ Ana akwete maumboni gakwasimicisya kuti Yehofa Mlungu akusiŵasamalila?

Mlungu akwete ndamo syampaka tusace kuti acimjetu ŵapamtima akole. Ŵandu ŵakusatendelana yambone soni ŵakoloŵa makono akusaŵa ŵakamulana mnope. Lisiku lililyose, Yehofa akusiŵatendela yambone ŵandu wosope. Mwambone, “jwalakwe akusaŵalisya lyuŵa lyakwe pa ŵandu ŵakusakala ni ŵambone, soni akusagwicisya wula ŵandu ŵakulungama ni ŵangalungama ŵakwe.” (Mat. 5:45) Ana lyuŵa soni wula jikusatukamucisya catuli? Pakamulicisya masengo lyuŵa soni wula, Mlungu ‘akusatupa yakulya yejinji soni akusagumbasya mitima jetu ni kusangalala.’ (Mase. 14:17) Kusala yisyene, Yehofa akusalolecesya kuti cilambo capasi cikukoposya yakulya yejinji kuti tusangalaleje nayo.

Nambo ligongo cici ŵandu ŵajinji akusalaga ni sala? Ligongo lyakuti ŵandu ŵakulamulila akusanonyela kulimbilana ulamusi soni kupata cipanje m’malo mwakwakamucisya ŵandu. Yehofa camasye kutunduka kwa ŵandu kweleku mwakutyosya maulamusi ga ŵandu ni kutamilikasya ucimwene wakwe wakulamuligwa ni Mwanagwe. Pandaŵi jelejo, pangali jucacitamaga ni sala. Nambope, pandaŵi ajino Mlungu akusiŵakamucisya ŵakutumicila ŵakwe ŵakulupicika kupata yakusosecela  yapaumi. (Sal. 37:25) Ana yeleyi ngayikulosya kuti Yehofa akusatusamalila?

Mjetu jwapamtima akusapata ndaŵi jakuŵeceta nawe. Jwalakwe akusakomboleka kumalila ndaŵi jejinji ali mkuŵeceta ni m’weji ya yindu yakusangalasya kwa wosope. Mjetu jwapamtima akusatupikanila mwakusamala patukumsalila yakusawusya yetu. Ana Yehofa akusatupikanilasoni m’weji? Elo. Jwalakwe akusapikanila mapopelo getu. Ni ligongo lyakwe Baibulo jikusatulimbikasya kuti ‘tulimbicileje kupopela,’ soni kuti ‘tupopeleje mwangalecesya.’—Alo. 12:12; 1 Ates. 5:17.

Ana Yehofa akusasaka kuti tupopeleje kwa ndaŵi jelewu catuli? Cisyasyo ca m’Baibulo mpaka citukamucisye kwanga. Yesu mkanasagule ŵandumetume ŵakwe, “ŵacesisye kupopela kwa Mlungu cilo cosope.” (Luk. 6:12) M’lipopelo lyakwelyo, komboleka kuti Yesu ŵasalaga mena ŵakumkuya ŵakwe ŵajinji, kusala ndamo syawo soni yayikusalema, soni kwaŵenda Atati kuti amkamucisye pakusagula ŵandumetume pasikati pawo. Pakwacaga, Yesu ŵayiweni kuti asagwile ŵandu ŵakuŵajilwa kuŵa ŵandumetume ŵakwe. Yehofa jwali “Jwakupikana lipopelo,” akusasangalala kupikanila mapopelo gosope gakutyocela pasi pamtima. (Sal. 65:2) Atamose mundu amalile ndaŵi jejinji ali mkupopela ya ngani jakusosekwa mnope, Yehofa ngakusaŵalanjila ndaŵijo.

Pangani jakululucilana, atamose ŵandu ŵali paujakwe wambone akusalajilila kuti akululucilane. Ndaŵi sine, ŵane akusayika pakuŵengana ni mundu juŵaliji mjawo jwapamtima ligongo lyakuti yasawisye kumkululucila. Nambo Yehofa nganaŵa m’yoyo. Baibulo jikusatulimbikasya wosope kuti tum’ŵendeje jwalakwe kuti atukululucile, ‘ligongo jwalakwe cacitukululucila kwamnope.’ (Yes. 55:6, 7) Ana cici cacikusamlimbikasya Mlungu kuti atukululucileje?

Mlungu akusatukululucila ligongo lya cinonyelo cakwe. Jwalakwe ŵacinonyele mnope cilambo mwati ŵapelece Mwanagwe, Yesu kuti ciŵakulupusye ŵandu ku ulemwa soni yakusawusya yawukusayikasya  kwa ŵandu. (Yoh. 3:16) Sonitu, ciwombolo caŵapelece Yesu cikusatukamucisya m’matala gejinji. Pakamulicisya masengo ciwomboloci, Mlungu akusiŵakululucila kwamnope ŵandu ŵakusiŵanonyela. Ndumetume Yohane ŵalembile kuti, “Naga tukwiticisya ulemwa wetu, Mlungu jwali jwakulupicika ni jwakulungama cacitukululucila ulemwa wetuwo, soni cacituswejesya.” (1 Yoh. 1:9) Ligongo lyakuti Yehofa akusatukululucila, tukusasangalala kwendelecela kuŵa paunasi ni jwalakwe, soni kumanyilila kukusatukwaya mnope.

Mjetu jusyesyene akusatukamucisya patukusosecela cikamucisyo. Ana Yehofa akusatendasoni yeleyi? Maloŵe gakwe gakusasala kuti, “Atamose [jwakutumicila jwa Mlungu] akuŵale, ngasagwa, pakuŵa Yehofa amkamwile mkono.” (Sal. 37:24) Yehofa akusiŵakamucisya ŵakutumicila ŵakwe m’matala gejinji. Kwende tulole yayatendekwe ku St. Croix pa cilumba ca Caribbean.

Msikana jwine jwapasukulu ŵalagasidwaga ni acimjakwe ŵamkalasi ligongo lyakuti nganapeleka ulemu ku mbendela ligongo lya yaŵakulupililaga. Ali apopesile kwa Yehofa kuti amkamucisye, jwalakwe ŵasagwile yakwalondecesya cenene ligongo lyakwe nganapeleka ulemu ku mbendelajo. Jwalakwe ŵalinganyisye ngani jakwayana ni kupeleka ulemu ku mbendela kuti akaŵecete m’kalasi. Pakamulicisya masengo Buku Jangu ja Ngani sya M’Baibulo, jwalakwe ŵalondesye mwele ngani ja Sadileki, Misake ni Abedinego jamkamucisye kuti asagule yeleyo. Jwalakwe ŵatite, “Yehofa ŵacenjele anyamata ŵatatu ŵacihebeleŵa ligongo lyakuti ŵakanile kulambila ciwanicisyo.” Kaneko ŵasagwile yakwapa acimjakwewo bukujo, mwati acimjakwe 11 ŵapocele. Msikanajo ŵasangalele mnope pakumanyilila kuti Yehofa ŵampele macili soni lunda lwakuti ŵalalicile acimjakwe m’kalasimo pangani jeleji.

Naga akusakayicila kuti Yehofa akusiŵasamalila, akusosekwa kuganicisya Malemba mpela Salimo 34:17-19; 55:22; 145:18, 19. Ŵawusyesoni ŵandu ŵaŵele ali mkutumicila Yehofa kwandaŵi jelewu kuti ŵasalile yatesile Yehofa pakwasamalila. Soni pakusaka kuti Mlungu ŵakamucisye, akusosekwa kupopela kwa jwalakwe. Pakutenda yeleyo cacisimicisya kuti Yehofa ‘akusiŵasamalila wawojo.’