“Yehofa Mlungu Jwetu Ali Jumo”
“Apikane, Ayisalayeli; Yehofa Mlungu jwetu, ali jumo.”—DEUT. 6:4.
NYIMBO: 138, 112
1, 2. (a) Ligongo cici maloŵe gakusimanikwa pa Deuteronomo 6:4 gali gakumanyikwa mnope? (b) Ligongo cici Mose ŵaŵecete maloŵega?
KWA yaka yejinji, Ayuda pakupopela aŵele ali mkukamulicisya masengo maloŵe ga pa lilemba lya Deuteronomo 6:4. Lipopeloli akusalikolanga kuti Shema. Liloŵe lyakuti Shema lili lyandanda mu lilembali m’ciŵeceto ca cihebeli. Ayuda ŵajinji akusapeleka lipopeloli lisiku lililyose, kundaŵi ni kwigulo kwakwe pakulosya kuti ali ŵakulipeleka mnope kwa Mlungu.
2 Maloŵe ga palilembali galiji maloŵe gakumalisya gaŵaŵecete Mose ku mtundu wa Yisalayeli palilambo lya Mowabu m’caka ca 1473 B.C.E. Mtundu ŵa Yisalayeli waliji ciŵandika komboka lusulo lwa Yolodani kukwinjila m’Cilambo Celagucisye. (Deut. 6:1) Mose juŵaliji mlongola jwawo kwa yaka 40, ŵasacililaga kuti ŵanduwo aŵe ŵakulimba mtima pacacinganganeje ni yakusawusya. Ayisalayeliwo ŵasosekwaga kumkulupilila Yehofa soni kuŵa ŵakulupicika kwa jwalakwe mpela Mlungu jwawo. Maloŵe gakumalisya ga Mosega gakamucisye ŵanduwo kutenda yeleyo. Ali amalisisye kwasalila Malamusi 10 ni yakusosekwa yine, Mose ŵaŵecete mwamacili maloŵe gakusimanikwa pa Deuteronomo 6:4, 5. (Aŵalanje.)
3. Ana citutagulilane yiwusyo yapi munganiji?
3 Ana Ayisalayeli ŵaŵasongenewo nganamanyililaga kuti Yehofa Mlungu jwawo ali “jumo”? Ŵamanyililaga. Ayisalayeli ŵakulupicikaŵa ŵammanyililaga soni ŵamlambilaga Mlungu jumo, jwali Mlungu jwa acinangolo ŵawo Abulahamu, Isaki, ni Yakobo. Sambano ligongo cici Mose ŵasalile jemanjajo kuti Yehofa Mlungu jwawo ali “jumo”? Ana yaŵasasile Moseyi yikukamulana catuli ni kumnonyela Yehofa ni mtima wetu wosope, umi wetu wosope, soni macili getu gosope, mpela mwajikusalila ndime 5 ja lilembali? Soni ana maloŵe ga pa Deuteronomo 6:4, 5 gakutulimbikasya kutenda cici? Citutagulilane yiwusyo yeleyi munganiji?
YEHOFA MLUNGU JWETU ALI JUMO
4, 5. (a) Ana maloŵe gakuti Yehofa ali “jumo” gakusagopolela cici? (b) Ana Yehofa ali jwakulekangana catuli ni milungu jine?
4 Ali jwakulekangana ni Milungu jine. Mose nganasala maloŵega pakusaka kusisya cijiganyo ca utatu. Nambo ŵagopolelaga kuti pangalisoni Mlungu jwine jwakulandana ni Yehofajo. Yehofa ni jwali Mkupanganya jwa kwinani, cilambo capasi soni yakupanganyikwa yosope. Pangalisoni Mlungu jwine jwakulandana ni jwalakwe. (2 Sam. 7:22) Mose ŵasakaga kwakumbusya Ayisalayeli kuti akusosekwa kumlambila Yehofa jika basi. Jemanjajo nganasosekwaga kwakuya ŵandu ŵa mitundu jine ŵaŵalambilaga milungu jakulekanganalekangana jajilume ni jajikongwe. Ŵandu ŵane ŵayiwonaga kuti jine mwa milungu jaunamiji jalamulilaga mbali jine jakwe ja yam’cipago, soni kuti milungu jine jaliji mbali ja mlungu jumo.
5 Mwambone, Aiguputo ŵalambilaga Ra mlungu jwa lyuŵa, Nut mlungu jwamkongwe jwa mwipananga, Geb mlungu jwapacilambo capasi, Hapi mlungu jwa lusulo lwa Nayilo soni milungu jine jejinji. Nambo jejinji mwa milunguji jajonasice pandaŵi jele Yehofa ŵayikasisye Milili 10 m’cilamboco. Mlungu jwakumanyika mnope jwa Akanani ŵaliji Bala mlungu jwakuŵelekasya, jwalisoni mlungu jwa mwipananga, wula soni cimbungo. Ŵam’wonagasoni mlunguju kuŵa jwakwacenjela. (Num. 25:3) Nambo Ayisalayeli ŵasosekwaga kumbucila kuti Mlungu jwawo ali “jumo,” Yehofa.—Deut. 4:35, 39.
6, 7. (a) Ana maloŵe gakuti Yehofa ali “jumo” gakusagopolelasoni cici? (b) Ana Yehofa alosisye catuli kuti ali “jumo”?
6 Ali jwakulupicika soni jwangacenga. Maloŵe gakuti Yehofa ali “jumo” gakusagopolelasoni kuti yakulinga soni yakutenda yakwe yangacenga. Yehofa nganaŵa Mlungu jwagaŵikangana kapena jwakucengacenga. Nambo ali Mlungu jwakulupicika, jwangacenga soni jusyesyene. Mwambone, jwalakwe ŵamlagucisye Abulahamu kuti ŵanace ŵakwe cacijinjila m’Cilambo Celagucisye. Kuti yeleyi yikombolece Yehofa ŵatesile yakusimonjesya yejinji. Yaŵasasile Yehofayi yakwanilicikwe pali papitile yaka yakwana 430.—Gen. 12:1, 2, 7; Eks. 12:40, 41.
7 Pali papitile yaka yejinji, Yehofa ŵasongangenye Ayisalayeli ŵaŵaliji mboni syakwe ni ŵasalile kuti, “Une nganinjenga. Mkanipaŵe une nganapagwa Mlungu jwakupanganyidwa, atamose panyuma pangu pangali jwine.” Pagombelecesya songa jakuti jwalakwe ali jwangacenga, Yehofa ŵatite, “Ndaŵi syosope une jwangacenga.” (Yes. 43:10, 13; 44:6; 48:12) Kumtumicila Yehofa jweleju waliji upile wekulungwa mnope kwa Ayisalayeli, soni uli upile wetu kumtumicila Mlungu jwangacenga soni jwakulupicika m’matala gakwe gosope.—Mal. 3:6; Yak. 1:17.
8, 9. (a) Ana Yehofa akusasaka cici kwa ŵakulambila ŵakwe? (b) Ana Yesu ŵagombelecesye catuli kusosekwa kwa maloŵe gaŵaŵecete Mose?
8 Mose ŵakumbwisye Ayisalayeli kuti Yehofa nganacenga pakwalosya cinonyelo soni pakwasamalila. M’yoyo, jemanjajo ŵasosekwaga kulipeleka mnope kwa jwalakwe, kumnonyela ni mtima wawo wosope, umi wawo wosope soni macili gawo gosope. Acinangolo ŵasosekwaga kamulicisya masengo lipesa lililyose lyapatile pakwajiganya ŵanace ŵawo kuti nombe nawo amlambileje Yehofa jika.—Deut. 6:6-9.
9 Ligongo lyakuti Yehofa jwangacenga yakulinga yakwe, akusakape kuti ŵandu aŵeje ŵakulipeleka kwa jwalakwe jika. Naga tukusaka kuti Yehofa asangalaleje ni kulambila kwetu, tukusosekwa kulipeleka kwa jwalakwe, kumnonyela ni mtima wetu wosope, umi wetu wosope soni ni macili getu gosope. Yesu ŵasasile kuti lyeleli lili lilamusi lyekulungwa mnope. (Aŵalanje Maliko 12:28-31.) Kwende sambano tulole yampaka tutende pakulosya kuti tukusakulupilila kuti “Yehofa Mlungu jwetu ali jumo.”
AŴEJE ŴAKULIPELEKA KWA YEHOFA
10, 11. (a) Ana mpaka tulosye catuli kuti tukusamlambila Yehofa jika? (b) Ana anyamata ŵacihebeli ŵalosisye catuli kuti ŵaliji ŵakulipeleka kwa Yehofa?
10 Kuti Yehofa aŵe Mlungu jwetu, tukusosekwa kulipeleka kwa jwalakwe jika. Ngatukusosekwa kulambila milungu jine, soni ngatukusosekwa kupwatika yitendo kapena yijiganyo yaunami patukumlambila Yehofa. Jwalakwe ali jwapenani, jwamacili soni jwakulekangana mnope ni milungu jinejo. M’yoyo, tukusosekwa kumlambila Yehofa jika.—Aŵalanje Ciunukuko 4:11.
11 M’buku ja Danieli tukusaŵalanga ya anyamata ŵacihebeli ŵaŵaliji Daniyele, Hananiya, Misayele ni Asaliya. Jemanjaji ŵalosisye kuti ŵaliji ŵakulipeleka kwa Yehofa mwakuŵambala kulya yakulya yangaswejela soni kutindiŵalila ciwanicisyo ca golidi caŵapanganyisye Nebukadinesala. Jemanjaji ŵamlambilaga Yehofa jika. Nganakunda cilicose kwasokonesya pakumlambila Yehofajo.—Dan. 2:1–3:30.
12. Kuti tuŵe ŵakulipeleka kwa Yehofa, ana tukusosekwa kuŵa ŵakusamala ni cici?
12 Kuti tuŵe ŵakulipeleka kwa Yehofa tukusosekwa kum’ŵika Yehofajo pamalo gandanda paumi wetu. M’yoyo, tukusosekwa kuŵa ŵakusamala mnope kuti yindu yine yikajigala malo gakwego. Ana yindu yakwe mpaka yiŵe yapi? M’Malamusi Likumi, Yehofa ŵasalile ŵandu ŵakwe kuti akakola milungu jine soni kuti akalambilaga milungu jakupanganyidwa. (Deut. 5:6-10) Moŵa agano pana milungu jine jejinji soni jine mwa milunguji jili jakusawusya kujikopocela. Nambo Yehofa nganacenga, jwalakwe ali “jumo.” Kwende sano tulole yampaka tutende kuti tuŵambale kulambila milungu jinejo.
13. Ana mpaka tutande kunonyela mnope cici m’malo mwakumnonyela Yehofa?
13 Pa lilemba lya Akolose 3:5 (aŵalanje), tukusaŵalanga ya yindu yampaka yisokonasye unasi wetu ni Yehofa. Lilembali likulosya kuti kutunduka ni kulambila milungu jine yili yakamulana. Yeleyi yili m’yoyo ligongo lyakuti mundu jwakutunduka akusasacilila mnope cipanje kapena yindu yapenani. Kusacilila mnope yindu yeleyi mpaka kuŵe mpela mlungu jwakwe. Yindu yakulemweceka yayisasile pa lilembali yikamulana mnope ni kutunduka soni kulambila milungu jine. Kuyisacilila mnope yeleyi mpaka kutulepelekasye kumnonyela Mlungu. Kunda yeleyi kututendecela mpaka kututendekasye kum’wona Yehofa kuti nganaŵa Mlungu “jumo” kwa m’weji. M’yoyo, tukakunda yeleyi kututendecela.
14. Ana ndumetume Yohane ŵakalamwisye ŵandu ya cici?
14 Nombe najo ndumetume Yohane ŵasasile yakulandana ni yeleyi. Jwalakwe ŵakalamwisye ŵandu kuti naga mundu akusanonyela yindu ya m’cilambo mpela “yakumbila ya cilu, yakumbila ya meso ni kulilosya ni yindu yakwete mundu paumi wakwe,” nikuti “jwanganonyela Atati.” (1 Yoh. 2:15, 16) M’yoyo, tukusosekwa ndaŵi ni katema kuwuwungunyaga mtima wetu kuti tulole naga tutandite kunonyela yakusangalasya yakusakala, kunguluka ni ŵandu ŵakusakala nambosoni kawale ni kalisalalisye kangaŵajilwa. Mpaka tulolesoni naga tutandite kusosasosa “yindu yekulungwa” mpela majiganyo gapenani. (Yer. 45:4, 5) Apano tuli pamlango pasyesyene pacilambo casambano. M’yoyo, tukusosekwa kumbucilaga maloŵe ga Mose gala. Naga tukupikanicisya soni kulupilila kuti “Yehofa Mlungu jwetu, ali jumo,” tucitenda yiliyose yampaka tukombole kuti tuŵe ŵakulipeleka kwa jwalakwe jika ni kumlambilaga m’litala lyakusasaka jwalakwejo.—Ahe. 12:28, 29.
TUŴEJE ŴAKAMULANA
15. Ligongo cici Paulo ŵakumbwisye Aklistu kuti Yehofa Mlungu ali “jumo”?
15 Maloŵe gakuti Yehofa Mlungu jwetu, ali “jumo,” gakutukamucisya kumanyilila kuti jwalakwe akusasaka kuti ŵakulambila ŵakwe aŵeje ŵakamulana soni akoleje cakulinga cimo. Mwambone, mu mpingo wa Aklistu ŵandanda mwaliji Ayuda, Agiliki, Aloma soni ŵandu ŵamitundu jine. Jemanjaji ŵatyocele mu dini soni ndamilo syakulekangana, nambosoni ŵanonyelaga yindu yakulekanganalekangana. Ligongo lya yeleyi, ŵandu ŵane yasawusyaga kwiticisya litala lyasambano lyakulambilila ni kuleka yitendo yawo yakala. M’yoyo, ndumetume Paulo ŵayiweni kuti kuli cenene kwakumbusya jemanjajo kuti Aklistu akwete Mlungu jumo jwali Yehofa.—Aŵalanje 1 Akolinto 8:5, 6.
16, 17. (a) Ana yakulocesya yapi yayikukwanilicikwa moŵa agano, soni ana pana yakuyicisya yatuli? (b) Ana cici campaka cisokonasye mkamulano wetu?
16 Uli pakwamba ya mpingo waciklistu moŵa agano? Yesaya ŵalocesye kuti “m’moŵa gambesi,” ŵandu ŵamitundu josope cacisongangana pampepe ni kumlambilaga Yehofa. Jemanjaji caciŵecetaga kuti, “[Yehofa] cacitujiganya matala gakwe soni m’weji tucijenda m’matala gakwego.” (Yes. 2:2, 3) Tuli ŵakusangalala mnope kuyiwona yakulocesya yeleyi yili mkwanilicikwa. Yakuyicisya yakwe yili yakuti m’mipingo jaciklistu mwana ŵandu ŵakulekangana mitundu, ndamilo soni yiŵeceto, yayikupeleka lumbili kwa Yehofa. Nambope, kulekangana kweleku mpaka kutandisye yakusawusya yine.
Ana akutenda yakomboleka pakulimbikasya mkamulano mumpingo waciklistu? (Alole ndime 16-19)
17 Mwambone, ana akusiŵawona catuli Aklistu acimjawo ŵandamilo sine? Komboleka kuti ciŵeceto cawo, kawale kawo soni yakulya yawo yili yakulekangana mnope ni yakusanonyela wawojo. Ana akusiŵagwala jemanjaji ni kungulukaga ni ŵandu ŵandamilo syakulandana ni syawawojo? Kapena uli naga acakulungwa ŵa mumpingo mwawo soni ŵa m’mipingo jine jajili mumkuli mwawo kapena ŵakutumicila pa nyambi ali ŵacinandipile kapena ŵakulekangana nawo ndamilo? Ana akusakunda kuti yeleyi yisokonasye mkamulano wawuli pasikati pa ŵandu ŵa Yehofa?
18, 19. (a) Ana pa Aefeso 4:1-3 pana maloŵe gapi gakamucisya mnope? (b) Ana mpaka tutende cici pakamucisya kuti mpingo uŵe wakamulana?
18 Ana cici campaka citukamucisye kuŵambala yakusawusya yeleyi? Paulo ŵasalile Aklistu ŵaŵatamaga mumsinda wa Efeso yindu yampaka yakamucisye. Msindawu waliji wakusicila mnope soni mwaliji ŵandu ŵakulekanganalekangana. (Aŵalanje Aefeso 4:1-3) Paulo ŵasasile ya ndamo mpela kulinandiya, kufasa, kulitimalika soni cinonyelo. Ndamo syelesi mpaka tusiwanicisye ni njalamila syasikusakamucisya kuti nyumba jikagwa. Atamose kuti nyumba jikusakola njalamila, nambope jikusasosekwa kujilinganya ndaŵi ni katema, naga ngatenda yeleyo mpaka jijonasice mwangasawusya. Paulo ŵasakaga kuti Aklistu ŵa ku Efeso atende yosope yampaka akombole kuti ‘aŵe ŵakamulana.’
19 Jwalijose jwetuwe akusosekwasoni kutenda yiliyose yampaka akombole pakamucisya kuti mpingo uŵeje wakamulana. Ana mpaka tutende catuli yeleyi? Candanda, tukusosekwa kola ndamo syaŵasasile Paulo syasili kulinandiya, kufasa, kulitimalika soni cinonyelo. Kaneko, tukusosekwa kulingalinga kuti tuŵe ‘ŵamtendele wawuli mpela cakutaŵila cakutukamulanya.’ Ungapikangana mpaka tuwuwanicisye ni midale jampaka jisokonasye mkamulano wetu. M’yoyo, tukusosekwa kutenda yakomboleka kuti tumasyeje ungapikangana ni cakulinga cakuti tuŵeje pamtendele soni ŵakamulana ni acimjetu.
20. Ana mpaka tulosye catuli kuti tukupikanicisya kuti “Yehofa Mlungu jwetu, ali jumo”?
20 “Yehofa Mlungu jwetu, ali jumo.” Gelega gali maloŵe gamacili mnope. Maloŵega gapele Ayisalayeli macili gakuti amalane ni yakusawusya yaŵasimene nawo paŵajinjilaga m’Cilambo Celagucisye. Mpaka gatukamucisyesoni m’weji patukwembeceya kusimana ni yisawusyo yekulungwa yayisigele panandi kwika. Gacitukamucisyasoni kuŵa ŵamtendele soni ŵakamulana m’Paladaiso. Kwende wosope tuŵeje ŵakulipeleka kwa Yehofa mwakumnonyela soni kumtumicila ni umi wetu wosope soni tulinjilileje mwamtawu kuti tuŵe ŵakamulana. Naga tukutenda yeleyi, Yesu cacitulamula kuti tuli ngondolo soni tucikuwona kwanilicikwa kwa maloŵe gakuti, “Yikani jemanja ŵajaliwe ni Atati ŵangu, jinjilani mu Ucimwene uŵamlinganyicisye kutandila paŵacitamilikasisye cilambo.”—Mat. 25:34.
