JWAMBONI SYA YEHOFA jwine jwa ku Canada lina lyakwe Don, akusalingalinga kwalalicila ŵandu ŵakusagamba kutama m’misewu. Pakusala ya mundu jwine juŵasimene najo, Don ŵatite, “Jwamlume jwine juŵagambaga kutama mumsewu lina lyakwe Peter ŵaliji jwausakwa mnope kwapunda wosope ŵakusatama m’misewu ŵanasimenepo nawo. Jwaliji jwamwano soni jwajogoyaga ŵandu. Jwalakwe ŵakanaga cikamucisyo cilicose cele ŵandu ŵampaga.” Nambo pandaŵi jilijose jakombwele, Don ŵalingagalingaga kumlosya cinonyelo munduju. Ŵatesile yeleyi kwa yaka yakupunda 14.

Lisiku line, Peter ŵam’wusisye Don kuti, “Ligongo cici mkusayikayika kwa une? Pangali jwalijose jwakusangosya. Ni ligongo cici m’mwejo mkusasamala ya une?” Mwalunda, Don ŵakamulicisye masengo malemba gatatu pakusaka kum’yika pamtima Peter. Candanda, ŵam’wusisye Peter naga akusamanyilila lina lya Mlungu soni ŵamsalile kuti aŵalanje ya linalyo m’Baibulo pa Salimo 83:18. Kaneko, pakusaka kumlosya ligongo lyakwe ŵasamalaga ya jwalakwejo, Don ŵamsalile Peter kuti aŵalanje lilemba lya Aloma 10:13, 14 lyalikusati, “Jwalijose jucaciŵilanga pa lina lya Yehofa cacikulupuka.” Pakumalisya, Don ŵaŵalasile Matayo 9:36 ni ŵamsalile Peter kuti aliŵalanjesoni. Lilembalyo likusati “Paŵaliweni likuga lya ŵandu, [Yesu] ŵatendele canasa, ligongo ŵaliji ŵagwagucegwaguce soni ŵakwasika mpela ngondolo syangali mkucinga.” Ali aŵalasile, jwalakwe ŵam’wusisye Don ali mkugwisya misosi kuti, “Ana unejo ndili jimo mwa ngondolo syelesi?”

Peter ŵatandite kucenga. Jwatandite koga, jwamyosile ndewu, soni jwawalaga yakuwala yambone yaŵampele Don. Peter ŵajendelecele kulisamalila.

Jwalakwe ŵalembaga yindu yaŵalijiganyagayo mu kabuku. Mapepala gaŵalembile cakundanda galiji gangawoneka cenene, nambo yaŵalembile pacangakaŵapa yaliji yakuwoneka cenene. Yine mwa yindu yaŵalembile yili yakuti, “ Lelo nalijiganyisye ya lina lya Mlungu. Sambano mpaka mbopeleje kwa Yehofa. Yili yakusangalasya kumanyilila lina lyakwe. Don asalile kuti Yehofa mpaka aŵe Mjangu, soni kuti akwete ndaŵi jakumbikanila, mwangajigalila  ya ndaŵi janguŵeceta najo kapena yindu yangumsalila.”

Maloŵe ga Peter gakumalisya galiji gakwawula kwa ŵacibale ŵakwe. Jwalakwe ŵalembile kuti,

“Lelo ngangupikana cenene m’cilu. Nguganisya kuti ngalambele mnope. Nambo atamose kuti lelo lili lisiku lyangu lyakumalisya, ngumanyilila kuti cinjim’wonasoni mjangu [Don] m’Paladaiso. Pakuŵalanga kabukuka, amanyilile kuti une kwangali. Nambo naga pa malilo gangu akum’wona jwamlume jwine jwacilendo, aŵecetane najo. Soni ngwaŵenda kuti aŵalanjeje buku jabuluwuji [ŵasalaga ya buku jaŵakamulicisyaga masengo pakulijiganya Baibulo jakuti “Coonadi Cimene Cimatsogolera ku Moyo Wamuyaya” jaŵapocele yaka yamunyumamo]. * Bukuji jikusasala kuti cinjim’wonasoni mjangu m’Paladaiso. Ngukulupilila yeleyi ni mtima wangu wosope. Une m’cimwene jwawo, Peter.”

Panyuma pa mwambo wa malilo, mlumbugwe Peter lina lyakwe Ummi ŵamsalile Don kuti, “Yaka yiŵili munyumamu, Peter ŵanjimbile foni. Jwalakwe ŵapikanikaga kuŵa jwakusangalala kulekangana ni kala. Ŵayikenesoni pakusecelela. Cimbalanjeje bukuji ligongo cilicose cacam’yice pamtima mcimwene jwangu cikwenela kuŵa capajika.” Ummi ŵakundilesoni kuti alijiganyeje Baibulo ni Jwamboni sya Yehofa pakamulicisya masengo buku jakuti Ana Baibulo Jikusajiganya Cici Kusyesyene?

M’wejisoni ngatukusosekwa kwamba kulola mwakuwonecela mundu, nambo tuŵeje ŵacinonyelo soni ŵakuwusimana mtima kwa ŵandu ŵamitundu josope. (1 Tim. 2:3, 4) Patukutenda yeleyi, tucikombola kwakamucisya ŵandu ŵamti mpela Peter, ŵakusaŵa ŵangawoneka cenene pameso nambo ŵakuti akwete mtima wambone. Mpaka tuŵe ŵakusimicisya kuti Mlungu, ‘jwakusalola ya mumtima,’ cacitendekasya kuti usyesyene ukule mumtima mwa ŵandu ŵakuŵajilwa.—1 Sam. 16:7; Yoh. 6:44.