“AJIMWICE wuli?”

Komboleka kuti pakwete pakamulicisye masengo moni wa mtundu welewu. Pakumkomasya mundu, ndaŵi sine tukusamkamula ligasa kapena kumkumbatila. Atamose kuti tukusakamulicisya masengo maloŵe gakulekanganalekangana, nambo cakulinga cetu cikusaŵa cimo. Mwamti mundu jwangapeleka kapena kwanga moni ndaŵi sine akusawoneka mpela jwamwano kapena jwangali cinonyelo.

Nambope ŵandu ŵane ŵanganonyela kupeleka moni. Ŵane akusatenda yeleyi ligongo lya sooni kapena kulikayicila. Ŵanesoni akusalepela kupeleka moni kwa ŵandu ŵamtundu wine, ŵakulekangana nawo ndamo kapena yaka, nambosoni kwa ŵandu ŵakwete ukumu. Nambope moni uli wakamucisya atamose ngaŵeceta yejinji.

Aliwusye kuti, ‘Ana moni ukusakamucisya cici? Ana Maloŵe ga Mlungu mpaka ganjiganye cici pangani jakupeleka moni?’

Koneliyo pajwatandite Ciklistu, ndumetume Petulo jwaŵecete kuti, “Mlungu jwangali lusagu.” (Mase. 10:34) Kaneko jwalembile kuti, Mlungu “akusaka kuti ŵandu wosope apitikuce mtima.” (2 Pet. 3:9) Maloŵe gosopega gakusala ya ŵandu ŵakulijiganya usyesyene. Nambope jwatulimbikasisyesoni kuti ‘twacimbicisyeje ŵandu wosope soni tulinonyeleje likuga lyosope lya abale.’ (1 Pet. 2:17) Paligongo lyeleli, mpaka yiŵe cenene kuti twakomasyeje ŵandu wosope, cinga ali ŵamtundu wine, ŵakulekangana nawo ndamo kapena kwakutyocela. Kutenda yeleyi kukusalosya kuti tukusacimbicisya soni tukusitwanonyela.

Ndumetume Paulo jwalimbikasisye Aklistu kuti, “Apocelaneje jwine ni mjakwe, mpela mwele Klistu ŵapocelele jemanja.” (Alo. 15:7) Pandaŵi jinesoni Paulo jwakolasile mena ga abale ‘ŵaŵamlimbikasisye.’ Masiku agano, Satana akulimbana mnope ni ŵandu ŵa Mlungu. M’yoyo, abale ni alongo tukusosekwa kulimbikasyana.—Akolo. 4:11; Ciu. 12:12, 17.

M’Baibulo mwana yisyasyo yejinji yakulosya kuti kwakomasya ŵane kwana umbone winesoni.

Pajakwanile ndaŵi jakuti Yehofa asamisye umi wa Mwanagwe ni kuwuŵika m’matumbo mwa Maliya, ŵatumisye lilayika kuti likaŵecetane ni Maliya. Lilayikalyo lyatandite ni maloŵe gakuti, “Mŵe ni mtendele, mmwe mli jwakunonyelwa mnope, Yehofa ali ni m’mwejo.” Maliya “jwasimonjile mnope” pakuliwona lilayika lili mkumŵecetekasya. Lilayikalyo palyayiweni kuti Maliya akusimonga lyatite, “Mkatenda woga Maliya, pakuŵa Mlungu amsalalile mtima.” Lilayikalyo lyasasile kuti caliji cakulinga ca Mlungu kuti jwalakwe aŵelece Mesiya. M’malo mwakwendelecela kusimonga, Maliya jwajanjile kuti, “Unetu ndili kapolo jwa Yehofa! Yosope yasasile yitendekwe kwa une.”—Luk. 1:26-38.

Lilayika lila lyatumidwe ni Mlungu. Atamose yaliji m’yoyo, pakuŵecetana ni Maliya, lilayikalyo lyakuweni kusosekwa kwakupeleka moni. Ana tukulijiganya cici pelepa? Tuŵeje ŵakoseka kwakomasya ŵane soni kwalimbikasya. Atamose tuli tuŵecete yamnono, yeleyo yili yakwanila kwasimicisya kuti ali mbali ja ŵandu ŵa Yehofa.

Paulo jwamanyililaga mena ga abale ni alongo ŵajinji m’mipingo ja ku Asia Minor ni Europe. M’yikalata yakwe, jwapelece moni kwa ŵandu ŵajinji. Cisyasyo cimo cili ca m’buku ja Aloma caputala 16. Mwambone, jwapelece moni kwa Febe, soni jwaŵendile abale kuti “ampocele mwa Ambuje mpela mwakusiŵapocelela ŵaswelawo soni kumpa cikamucisyo cilicose  campaka acisace.” Paulo jwapelecesoni moni kwa Pulisika ni Akula, ŵele jwalakwejo pampepe ni mipingo josope ja ŵandu ŵamitundu jine “ŵayamicilaga.” Moni wine wapite kwa Epeneto, ‘mjakwe jwa pamtima,’ nambosoni kwa ‘Tulufena ni Tulufosa, acakongwe ŵaŵakamulaga masengo mwamacili pakutumicila Ambuje.’ Kusala yisyene, Paulo ŵakwete cisyoŵe cakupeleka moni kwa abale ni alongo.​—Alo. 16:1-16.

Abale ni alongoŵa ŵasangalele mnope kuyiwona kuti Paulo jwakumbucilaga masengo gawo gambone. Yeleyi yalimbikasisye mkamulano wawo ni Paulo soni ni Aklistu acimjawo. Ŵandu ŵane mumpingo paŵapikene mena ga ŵandu ŵaŵapocele moni, yalimbikasisye mnope cikulupi cawo. Pelepatu yikuwonecela cile kuti kola lung’wanu ni ŵane, soni kwakomasya ni kwayamicila kutyocela pasi pa mtima, yikusalimbisya mkamulano pasikati pa ŵakutumicila ŵa Mlungu.

Paulo paŵayice paciko ca Potiyolo ni kuwutanda ulendo wakwawula ku Loma, abale ŵa ku Loma ŵamcingamile. Paŵagambile kwawona abalewo capakutalicila, Paulo “jwam’yamicile Mlungu soni jwalimbile mtima.” (Mase. 28:13-15) Ndaŵi sine, mpaka tugambe kummwemwetela mundu kapena kumpa bayibayi. Kwelekusoni kuli mpela kumpa moni. Yeleyi atamose yikuwoneka mpela yamwana, nambo mpaka yimlimbikasye mundu jwakulagasika nganisyo kapena jwatengwice.

Pandaŵi jine, jwakumkuya jwa Yesu lina lyakwe Yakobo jwajamwice Aklistu mwamacili. Jwatesile yeleyi ligongo Aklistu ŵane ŵatendaga cikululu mwausimu mwakuŵa paunasi ni cilambo. (Yak. 4:4) Nambo, kwende tulole maloŵe gandanda ga m’cikalata cakwe.

Yakobo jwatite, “Une Yakobo, kapolo jwa Mlungu ni jwa Ambuje Yesu Klistu, ngupeleka moni ku ngosyo 12 syasyabalalikangene.” (Yak. 1:1) Ayiweni pelepa? Mkanapelece camuko, ŵatandite ni kupeleka moni nambosoni jwawonaga Aklistuwo kuti ŵalijipe paunasi ni Mlungu. Yeleyi yakamucisye kuti apikanile camuko caŵapele. Pelepatu tukulijiganya kuti, atamose ali mkusaka kutagulilana ngani jekulungwa, nambo kutanda ni moni mpaka kuŵe kwakamucisya mnope.

Pakwakomasya ŵane, cinga cituŵecete yamnono kapena yejinji, nambo tutendeje yeleyi ni mtima wosope soni mwacinonyelo. Tukagambaga kuti bola tumalane nayo. (Mat. 22:39) Mlongo jwine jwa m’cilambo ca Ireland lisiku line jwayice ku Nyumba ja Ucimwene misongano jili jisigele panandi kuti jitande. Ali mkwinjila, m’bale jwine jwagalawice ni mkummwemwetela, ni jwatite, “Tumpocele. Tusangalele kuti m’yice.” Kaneko mlongojo jwagambile kwawula kukutama pamalo gakwe.

Pali pamasile yijuma yamnono, mlongoju jwamsalile m’bale jula kuti kwakandaŵi yindu nganiyijendaga cenene kumangwakwe. Mlongoju jwatite, “Lisiku lyelila natengwice mnope mwamti nasigele panandi kulepela kwika kumisongano. Ngangukumbucila yejinji yanalijiganyisye nambo ngukumbucila mnope moni jwawo. Nalipikene kuti mboceledwe ni magasa gaŵili. Sikomo kwejinji.”

M’baleju nganamanyililaga yakuyicisya ya maloŵe gajwaŵecete kwa mlongo jula. M’bale jula jwatite, “Pajwasalile kuti maloŵe ganaŵecete gala gamkamucisye, nasangalele mnope. Nguyiwona kuti natesile cenene kumkomasya.”

Solomoni jwatite, “Mjase mkate wenu m’mesi ligongo pali papite masiku gejinji cimciwupatasoni.” (Mlal. 11:1) Patukwakomasya ŵane, mnopemnope Aklistu acimjetu, akusaŵa ŵakusangalala soni m’weji tukusaŵa ŵakusangalala. M’yoyo, kwende wosope tukuwoneje kwakomasya ŵane kuŵa kwakusosekwa.