Kuti tumsangalasye Yehofa tukusasosekwa kola chikulupi. Nambope, Baibulo jikusati “chikulupi ngachikusaŵa ni ŵandu wosope.” (2 Ates. 3:2) Ndumetume Paulo pajwaŵechetaga yeleyi, jwagambaga ya “ŵandu ŵakogoya soni ŵakusakala” ŵaŵamlagasyaga. Nambo ngani ja chikulupi jaŵajikolasile Paulo jikwakwayasoni ŵandu ŵane. Ŵane ŵangasaka kwitichisya yakuti kwana Mlungu juŵapanganyisye yindu yosope. (Alo. 1:20) Nambosoni ŵane akusaŵecheta kuti akusakulupilila chindu kapena mundu jwakwete machili mnope. Nambotu chikulupi chelechi nganichiŵa chimtendekasisye Yehofa kuŵa jwakusangalala.

Tukusosekwa kukulupilila yakuti Yehofa apali soni yakuti jwalakwe “akusapeleka yindu yambone” kwa ŵandu ŵakusamkulupilila mnope. (Aheb. 11:6) Chikulupi chili ndamo jele msimu weswela ukusamkamuchisya mundu kuti akole. Kuti tukole msimu weswela, tukusasosekwa kumŵenda Yehofa. (Luk. 11:​9, 10, 13) Mwamti chindu champaka chitukamuchisye mnope kuti tukole msimu weswela chili kuŵalanga Baibulo. Kaneko tukusasosekwa kuganichisya yatuŵalasileyo ni kuyikamulichisyaga masengo. Patukutenda yeleyi, msimu wa Yehofa uchitulongolela paumi wetu, mwamti tuchikola chikulupi chachikusamsangalasya jwalakwe.