Napagwile pa 22 Disemba 1929, ku Noville, m’kamusi kane kakwe kakaliji chiŵandika ni Bastogne ku Belgian Ardennes. M’kamusika mwapali mafama gakwana 9 soni nasangalalaga kutama ni achinangolo ŵangu. Lisiku lililyose unejo ni mpwanga lina lyakwe Raymond, twakamaga mkaka wa ng’ombe nambosoni twakamuchisyaga achinangolo kugowola. M’kamusi ketuka twanonyelanaga mnope mwamti twakamusyanganaga.

Achinangolo ŵangu ŵaliji ŵa Chikatolika soni ŵalipelekaga mnope ku diniji. Jemanjaji, lyamlungu lililyose ŵatendaga nawo mwambo wa Misa. Nambo cha mma 1939, mmusi mwetu mwayiche apayiniya ŵaŵili kutyochela ku England. Jemanjaji ŵapele baba magasini ja Consolation (jele apano tukusajikolanga kuti Ajimuche!). Mwachitema babaŵa ŵamanyilile kuti yajasalaga magasinijo yaliji yisyesyene mwamti yalimbikasisye kutanda kuŵalanga Baibulo. Baba paŵagambile kuleka kusimanikwa pa mwambo wa Misa, ŵandu ŵakuŵandikana nawo majumba ŵatandite kwasisya mnope. Jemanjaji ŵakanganichisyaga baba kuti apitilisyepe kuŵa mu dini ja Chikatolika.

Yambwetekaga mnope mumtima kwawona baba ali mkulagasika nganisyo ligongo lyakwasisyaku. Yeleyi ni yayandendekasisye kuti namsalile Mlungu kuti ŵakamuchisye baba mu lipopelo lyanalisasile kundanda kwa nganiji. Nasangalele mnope kwawona ŵandu ŵala ali alesile kwasisya baba, mwamti mtima wangu watemi mmalo. Yeleyi yandendekasisye kumanyilila kuti Yehofa ali Mlungu ‘jwakupikana lipopelo.’

Pa 10 Meyi 1940, asilikali ŵa Nazi ku Germany ŵajinjile m’chilambo cha Belgium, mwamti ŵandu ŵajinji ŵatisile m’chilambochi. Liŵasa lyetu lyatilile kummwela kwa chilambo cha France. Ndaŵi sine umi wetu waŵaga pangosi. Mwamti paulendo wine, twasimene ni gulu ja asilikali ŵa ku Germany jili mkumenyana ni gulu ja asilikali ŵa ku France.

 Patwawujile ku fama jetu, twasimene kuti yindu yetu yejinji yijiŵidwe. Mwamti chatwasimene chaliji mbwa jetupe lina lyakwe Babe. Mbwaji ni jijatupochele. Yeleyi yandendekasisye kuliwusya kuti, ‘Ligongo chichi kukusatendekwa ngondo soni ŵandu akusalaga?’

Pandaŵiji, M’bale Emile Schrantz, a ni juŵatulimbikasisye mnope. Jwalakwe jwaliji jwamkulungwa jwa mumpingo soni mpayiniya. M’baleju jwalondesisye kutyochela m’Baibulo ligongo lyakwe tukusasimana ni yakusawusya soni jwajanjile yiwusyo yine yanakwete. Yeleyi yangamuchisye kuŵa paunasi wambone ni Yehofa mwamti natandite kulupilila kuti jwalakwe ali Mlungu jwachinonyelo.

Pandaŵi ja ngondoji, twakolagape upile wakuwonegana soni kuŵechetana ni abale ni alongo. Mu Ogasiti 1943, M’bale José-Nicolas Minet jwayiche ku fama jetu kukuŵecheta ngani. Jwalakwe ŵawusisye kuti, “Ana ŵani ŵakusaka kubatisidwa?” Baba ni une twajimiche mikono. Mwamti twabatisidwe mu kalusulo kamwana kakaliji chiŵandika fama jetu.

Mu Disemba 1944 asilikali ŵa ku Germany ŵajimuchile kakumalisya Pangondo Jaŵili ja Pachilambo Chosope. M’weji twatamaga chiŵandika malo gagatendechelaga ngondoji, mwamti twasosekwaga kujuŵa mnyumba kwa mwesi wamtundu. Lisiku line ndili ngopweche mnyumba kuti ngayipele yakulya yilango, asilikali ŵagombele ku fama jetu ni yikasinja yamachili, mwamti malata ga pa libalani gatyosile. Ndaŵi jijojo msilikali jwa ku America jwagumisile kuti, “Mgone pasi!” Nawutwiche ni gona pasi chiŵandika jwalakwejo, mwamti ŵambwechiche chisoti chakwe kuti ngawulala.

Ngondo jili jimasile, twalinganyisye yakuti tuŵechetaneje ndaŵi syosope ni abale ni alongo ŵa mumpingo wa ku Liège. Mpingowu waliji chakumpoto palutando lwa ma kilomita 90 kutyochela kumalo gatwatamaga. Mwamti, twalinganyisye kagulu kamwana ka ŵakulijiganya Baibulo ku Bastogne. Natandite kukamula masengo gakwayana ni kusamalila mbiya sya misongo, mwamti nakwete upile wakulijiganya ya malamusi. Kaneko natandite kukamula masengo mu ofesi ja boma. Mu 1951 twalinganyisye yakola msongano wa dela wamwana ku Bastogne. Mwamti ŵandu chiŵandika 100 ŵasimanikwe pamsonganowu, kupwatikapo mlongo jwine jwakulipeleka juŵatendaga upayiniya lina lyakwe Elly  Reuter. Jwalakwe jwajesile panjinga lutando lwa makilomita 50 kuti ayiche pamsonganowu. Kaneko twatandite kunonyelana mwamti twatandite chitomelo. Pandaŵiji mlongoju jwaliji ali amŵilasile kuti akajinjile nawo Sukulu ja Giliyadi ku United States. Nambo jwalakwe jwatumisye chikalata ku likulu lyetu chakulondesya ligongo lyakwe jwalepele kuja kwinjila sukulujo. Mwamti M’bale Knorr, juŵalongolelaga mu gulu ja Yehofa pandaŵijo, jwajanjile mwachinonyelo kuti komboleka lisiku line mlongoju chachijinjila Sukulu ja Giliyadi pampepe ni ŵamkwakwe. Myoyo, twalombene mu Febuluwale 1953.

M’chaka chichichi, une ni Elly twasimanikwe nawo pamsongano wakuti Ŵandu ŵa M’chilambo Chasambano wawatendekwe ku Yankee Stadium, ku New York. Ndili pamsonganowu, nasimene ni m’bale juŵambilanjile masengo gambone mwamti jwambendile kuti samile ku United States. Panyuma pakujipopelela nganiji, une ni ŵamkwangu twakamulene kuti tukajawulako, mwamti twawujile ku Belgium kuti tukakamuchisyeje kagulu kamwana kakakwete ŵakulalichila 10 ku Bastogne. M’chaka chakuyichisya twasangalele ligongo lyakuti twakwete mwanache jwamlume jwatwampele lina lyakuti Serge. Chakutesya chanasa chaliji chakuti pali pagambile kumala miyesi 7, mwanacheju jwatandite kulwala kaneko jwawile. Twapopesile kwa Yehofa kumsalila mwatwapikanilaga, mwamti kumanyilila ya chembecheyo cha kwimuka ku chiwa kwatulimbikasisye mnope.

Mu Okotoba 1961, napatile masengo gagambaga mpata wakutenda upayiniya. Lisiku lilili mundu jwine jwanjimbile foni kutyochela ku nyambi ja Belgium. Jwalakwe jwambendile naga yili yakomboleka kutanda kutumichila mpela mtumiki jwa dela (jwele masiku agano akusati jwakulolela dela). Ni namwusisye kuti, “Ana nganiyiŵa yikomboleche kutumichila kaje mpela apayiniya mkanitutande utumiki welewu?” M’balejo jwatujanjile kuti yili yakomboleka. Twatesile upayiniya kwa miyesi 8, kaneko mu Sepitemba 1962, twatandite masengo ga kulolela dela.

Panyuma pakukamula masengo ga kulolela dela kwa yaka yiŵili, ŵatuŵilasile kuti tukatumichileje pa Beteli ja ku Brussels. Mwamti twatandite kutumichila pa Beteliji mu Okotoba 1964. Pa utumiki wasambanowu twapatile yindu yambone yejinji. Mu 1965, panyuma pakuti M’bale Knorr ajendele Beteli jetu nasimonjile mnope ali asagwile kuti mbe jwakulolela masengo ga pa nyambi. Kaneko une ni Elly ŵatuŵilasile kuti tukajinjile nawo Sukulu ja Giliyadi kalasi nambala 41. Maloŵe gaŵaŵechete M’bale Knorr yaka 13 yipiteyo gakwanilichikwe. Mwamti tuli tumalisisye Sukuluji twawujilesoni ku Beteli ja ku Belgium.

Kwa yaka yejinji nakwete upile wakamulichisya masengo majiganyo gangu pakamuchisya ŵakutumichila ŵa Yehofa kuti akole ufulu wakulambila ku Europe soni yilambo yine. (Afil. 1:7) Ligongo lya masengoga nakwete upile wakuŵechetana ni achakulungwakulungwa ŵa boma m’yilambo yakupunda 55, yele masengo getu ŵagalekasisye. Mmalo mwakwasalila achakulungwakulungwa ŵa boma kuti ngusamanyilila ya malamusi nalimanyikasyaga kuti “ndili mundu jwa Mlungu.” Ndaŵi syosope namdalilaga Yehofa soni napopelaga kwa jwalakwe ligongo namanyililaga kuti, “Mtima wa mwenye uli mpela lusulo lwa  mesi m’myala mwa AMBUJE, akuwujongolela ku yakusaka jwalakwejo.”—Mis. 21:1.

Ngusakumbuchilape yatwaŵechetene ni membala jumo jwa ku Nyumba ja Malamusi ku Europe. Namŵendaga mwakuwilisyawilisya kuti mbechetane najo mwamti kaneko jwakundile. Jwalakwe jwasasile kuti, “Chinampe maminisi 5 nambo nganjonjechesya atamose jimo.” Ni nakotimisye mtwe pasi ni kupeleka lipopelo. Panajimiche mtwe wangu mundujo mwawoga jwambusisye kuti mtesileje chichi? Ni namjanjile kuti, “Namyamichileje Mlungu ligongo lyakuti wawo ali jumo mwa ŵakutumichila ŵakwe.” Ni jwambusisyesoni kuti, “Mkugopolela chichi?” Namlosisye lilemba lya Aloma 13:4. Ligongo lyakuti munduju jwaliji jwa dini sya Chipulotesitanti, jwatesile chidwi ni lilembali. Ana yakuyichisya yakwe yaliji yamti uli? Naŵechetene najo kwa maminisi 30 soni yakambilana yetu yajesile chenene. Mwamti jwasalilesoni kuti akusachimbichisya masengo ga ŵa Mboni sya Yehofa.

Kwa yaka yejinji ŵakutumichila ŵa Yehofa ku yilambo ya ku Europe aŵele ali mkuputila ufulu pangani jakuti Aklistu akajinjililaga nawo ya ndale, kasamalile ka ŵanache, ngani sya kukoma misongo soni ngani sine. Waliji upile wekulungwa kwa une kulola yakutenda Yehofa pakutukamuchisya kuti yindu yijendeje chenene soni kuwina magambo. Mwamti ŵa Mboni sya Yehofa awinile magambo gakupunda 140 mu Koti Jakulola Ufulu wa Ŵandu ku Europe.

M’yaka ya mma 1990, twakamuchisyaga pamasengo gakuŵenda kuti abale ni alongo ŵetu ŵa ku Cuba alalichileje mwa ufulu. Masengoga twakamulaga ni M’bale Philip Brumley, jwa ku likulu lyetu lyapachilambo chosope, soni M’bale Valter Farneti, jwa ku Italy. Myoyo, nalembile chikalata ni kuchitumisya ku Belgium ku ofesi ja kasembe jwa ku Cuba. Kaneko twasimene ni achakulungwakulungwa ŵatwakambilene nawo yindu yatwasakaga. Patwakambilanaga kandanda ni jemanjaji, twalepele kumasya ngani jajatendekasisye kuti ŵaboma alekasye masengo getu m’chilambocho.

Nambo panyuma pakumŵenda lunda Yehofa, twaŵendile kuti tutumisye ku Cuba ma Baibulo gakwana 5,000, mwamti ŵatukundile. Ma Baibulogo gayiche chenene, mwamti ŵagagaŵile kwa abale ni alongo. Pelepatu, twayiweni kuti Yehofa jwajaliwe mtawu wetu. Kaneko twaŵendilesoni kuti tutumisye ku Cuba ma Baibulo gane gakwana 27,500. Apasoni ŵa boma ŵala ŵatukundile. Kwakamuchisya abale ni alongo ŵa ku Cuba kuti akole ma Baibulo gawo kwandendekasisye kuŵa jwakusangalala mnope.

Mbele ndili mkwawula ku chilambo cha Cuba kwa maulendo gejinji kukukamuchisya nawo pa ngani syakwayana ni masengo getu. Yeleyi, yangamuchisye kuti ngamulaneje ni achakulungwakulungwa ŵa boma ŵajinji.

M’chaka cha 1994 ŵandu ŵakupunda 1,000,000 ŵawulajidwe pangondo jakulimbana ni mtundu wa Chitutsi jajatendekwe m’chilambo cha Rwanda. Nambo chakutesya chanasa chaliji chakuti abale ni alongo ŵetu ŵane ŵawulajidwesoni. Mwangachelewa palinganyidwe magulu ga abale gakuti gakapelecheje yindu yakusosechela paumi kwa abale ni alongo m’chilambocho.

Kagulu ketu pakayiche mu msinda wa Kigali, wawuli likulu lyachilambochi, twasimene mapupa ga ofesi jagopolela mabuku soni malo gakuyichila mabuku getu gali gepowechepoweche ni yipolopolo. Twapikenesoni ngani syejinji syakutesya chanasa syakwayana ni abale ni alongo ŵetu ŵaŵawulajidwe pakamulichisya masengo yipula yekulungwakulungwa. Nambosoni twapikene yisyasyo yambone ya abale ni alongo ŵaŵakamusyanganaga jwine ni mjakwe pandaŵi jakusawusyaji. Mwachisyasyo, twasimene ni m’bale jwine jwamtundu wa Chitutsi jwaŵasunjidwe ku mbanga kwa masiku 28, ni liŵasa line lya mboni lyamtundu wa Chihutu. Patwasimene ni abale ni alongo ŵakupunda 900 pa malo ganegakwe mu msinda wa Kigali, twalimbikasisye mwausimu.

Kaneko twapite ku Zaire (apano akusati Democratic Republic of the Congo) kuti tukawungunye abale ni alongo ŵajinji ŵa ku Rwanda ŵaŵatilile ku kampu ja ŵandu ŵakutila kumangwawo jajaliji chiŵandika msinda wa Goma. Nambo twalepele kwapata, myoyo twamŵendile Yehofa kuti atukamuchisye kumanyilila kuŵaliji abaleŵa. Kaneko twam’weni mundu jwine ali mkwika kwatwaliji m’weji. Ni twamwusisye naga akummanyilila jwa Mboni sya Yehofa jwalijose. Mundujo jwajanjile kuti, “Unejo ni jwa mbonijo. Kwende napechesye kuti akawonegane ni abale ŵa mu komiti jakamuchisya pakutendekwe ngosi.” Panyuma pakola msongano wakulimbikasya ni abale ŵa mu komitiwo, twasimene ni ŵandu ŵane ŵaŵatisile kumangwawo ŵakwana 1,600 kuti twalimbikasye. Twaŵalanjilesoni chikalata chakutyochela ku Likuga Lyakulongolela. Abale ni alongowo, ŵasangalele mnope paŵapikene maloŵe gakuti, “Tukusitwapopelela ndaŵi syosope, soni tukumanyilila kuti Yehofa nganaŵa ŵalesile.” Maloŵegatu galiji gakuwona. Mwamti apano ku Rwanda kwana ŵa Mboni sya Yehofa ŵakupunda 30,000.

Ŵamkwangu ŵakunonyelwa Elly ŵawile mu 2011, mwamti twatemi mu ulombela yaka chiŵandika 58. Yehofa aŵele ali mkulimbikasya pangumsalila mwipopelo mwangupikanila mumtima. Chindu chine chachikusandamika mtima pasi chili kulalichila ngani syambone sya Uchimwene.

Atamose kuti apano ngwete yaka ya mma 90, wiki jilijose ngusalalichila. Apano ndili jwakusangalalasoni kuti ngusakamuchisyape ku Dipatimenti Jakulola ya Magambo ku nyambi ja Belgium. Nambosoni kwasalila ŵane yindu yakusangalasya yasimene nayo, soni kwalimbikasya ŵachinyamata ŵakutumichila pa Beteli.

Apano pamasile yaka 84, kutyochela panapopesile kandanda kwa Yehofa. Lipopeloli kwaliji kutanda kwa ulendo ŵakusangalasya wawungamuchisye kuŵa paunasi wambone ni Yehofa. Kusala yisyene, ndili jwakusangalala kuti kwa umi wangu wosope Yehofa aŵele ali mkwanga mapopelo gangu.—Sal. 66:19. b