Yiwusyo Yakutyochela kwa Ŵakuŵalanga
Ana maloŵe ga mu ndime 6 ni 7 gagakusasimanikwa mu Salimo 12 gakusakamulana chamti uli?
Nganiji jikusalosya kuti ndimesi sikusasala ya ŵandu.
Pa Salimo 12:1-4, pakusasala kuti “ŵandu ŵakulupichika ngakusimanikwa pasikati pa ŵandu.” Kaneko pa Salimo 12:5-7, pakusati:
“Ligongo lyakuti ŵakulaga ŵasumwile yindu yawo,
Ni ŵakulaga akudandawula.
AMBUJE akuti, ‘Tindendepo kandu sambano,
Tinakulupusye mpela mwakusachila jemanjajo.’
Yilanga ya AMBUJE yili yambone mnope
Mpela silifa jwakwenga mu ng’aso jetaka, kasano ni kaŵili.
Ŵalakwe AMBUJE, atuchenjele uwe.
Atuchenjele ndaŵi syosope kwa ŵandu ŵeleŵa.”
Ndime 5 jikulondesya yajwasasile Mlungu pakwamba ya ŵandu “ŵakulaga.” Jwalakwe chachakulupusya jemanjaji.
Nambo ndime 6 jikonjechesya kuti “Yilanga ya AMBUJE yili yambone mnope mpela silifa jwakwenga mu ng’aso jetaka.” Maloŵega gakulosya mwatukusagawonela Maloŵe ga Mlungu.—Sal. 18:30; 119:140.
Sambano aganichisye yakusala pa Salimo 12:7 ni 8. Ndimesi sikusati, “Ŵalakwe AMBUJE, atuchenjele uwe. Atuchenjele ndaŵi syosope kwa ŵandu ŵeleŵa. Ŵandu ŵangalumbana akwamba kwendajenda palipose, achimjawo akuyilumba yitendo yawo yachabe.” Ana maloŵe ga mu ndimesi gakusala ya ŵani?
Ligongo lyakuti maloŵe ga mu ndime 7 ni 8 gakwika panyuma pa maloŵe gakuti “Yilanga ya AMBUJE,” ŵane mpaka aganisyeje kuti maloŵe ga mu ndimesi gakusala ya yilanga ya Mlungu. Nambotu tukumanyilila kuti Mlungu aŵele ali mkujichenjela Baibulo atamose kuti ŵandu ŵakusisya aŵele ali mkutenda yakuti Baibulojo jikasimanikwa.—Yes. 40:8; 1 Pet. 1:25.
Nambo, yili yisyenesoni kuti Yehofa akusiŵachenjela ŵandu ŵaŵakolasile mu ndime 5. Mwamti jwalakwe chachipitilisya kwakamuchisya soni kwakulupusya ŵandu “ŵakulaga.”—Yob. 36:15; Sal. 6:4; 31:1, 2; 54:7; 145:20.
Sambano, ana maloŵe ga mu ndime 7 ni 8 gakusala ya ŵani?
Mbali jekulungwa ja Salimoji jikusala ya ŵandu.
Chakundanda kwa Salimo 12, Daudi jwasasile kuti “ŵandu ŵakulupichika” agamba kulambusidwa ni ŵandu ŵakusakala. Kaneko, mu ndime syakuyichisya tukusaŵalanga kuti Yehofa chachapa chilango ŵandu ŵakusaŵecheta yindu yakusakala. Pelepatu jwamasalimoju jwatusimichisye kuti tukusosekwa kumdalila Mlungu kuti chachachenjela ŵandu ŵakwe ligongo lyakuti yilanga yakwe yili yambone mnope.
Myoyo, maloŵe gagali mu ndime 7 gagamba kulosya kuti Yehofa chachachenjela ŵandu ŵakusalagasidwa ni ŵandu ŵakusakala.
Sambano, ligongo chichi yaŵatite kagopolele m’ma Baibulo gane maloŵe ga pandime 7 yikusapikanika paŵili mpela kuti Yehofa akwachenjela ŵandu ŵakwe soni yilanga yakwe? Kagopolele keleka, kakusalosya kuti mipukutu jaŵakamulichisye masengo ja Malemba ga Chihebeli jaliji jakudalilichika. Nambo mu Malemba ga Chigiliki ga Septuagint, maloŵega ŵagagopolele kuti: “Jwalakwe chachituchenjela.” Maloŵega gakusagambaga ya ŵandu ŵakukulupichika ŵakusalagasidwa. Mwamti jemanjaji chachakulupusya kwa “ŵandu ŵeleŵa” ŵakusatenda yakusakala. (Sal. 12:7, 8) Pagopolela malemba ga Chihebeli mu Chialamu, lilembali ŵaligopolele kuti, “Ŵalakwe AMBUJE, chachachenjela ŵandu ŵakulungama, chachachenjela ndaŵi syosope kwa ŵandu ŵeleŵa.” Maloŵega gakusapelekasoni umboni wakuti maloŵe ga pa Salimo 12:7 gangasalaga ya yilanga ya Mlungu.
Ligongo lya yeleyi, lilembali likusapeleka chembecheyo chakuti Mlungu chachakamuchisya “ŵandu ŵakulupichika.”
