1. Ana Yesu ŵapele ŵakulijiganya ŵakwe lilamusi lyakupikanika chenene lyapi? (Alole chiwulili cha pachikuto.)

PA CHILO chakumalisya Yesu mkanawe, jwapele ŵakulijiganya ŵakwe lilamusi lyakupikanika chenene. Jwalakwe jwasalile kuti, “Mpela munanonyele une mula, jemanja akuŵajilwa soni kuti anonyelaneje jwine ni mjakwe.” Yesu jwajonjechesyesoni kuti, “Naga mkunonyelana jwine ni mjakwe, pelepo ŵandu wosope tachimanyilila kuti jemanja mli ŵakulijiganya ŵangu.”—Yoh. 13:34, 35.

2. Ligongo chichi kwanonyela ŵane kuli kwakusosekwa?

² Yesu jwasasile kuti ŵakulijiganya ŵakwe ŵasyesyene chachimanyika chenene naga akulosya chinonyelo mpela chiŵalosisye jwalakwe. Yaŵaŵechete Yesuyi yatandite kamula masengo m’yaka 100 yandanda soni yikukamula masengo masiku agano. Pelepatu ni ligongo lyakwe tukusosekwa kunonyelana atamose yili yakusawusya.

3. Ana mungani ajino chitulole yindu yapi?

³ Ligongo lyakuti wosope tuli ŵangali umlama, yikusaŵa yakusawusya kuti twanonyeleje ŵane ni mtima wosope. Nambope atamose yili myoyo, tukusosekwa kumsyasya Klistu. Munganiji chitulole yampaka chinonyelo chijile pakutukamuchisya kuti tuŵe ŵandu ŵakutamilikasya mtendele, ŵangali lusagu soni ŵakwapochela ŵane. Pakulijiganya nganiji mpaka aliwusye kuti, ‘Ana mpaka nalijiganye chichi kutyochela kwa abale ni alongo ŵaŵalosisye kulimba mtima mwangasamala kandu kuti ŵasimanaga ni yakusawusya?’

4. Mwakamulana ni Mateyu 5:23, 24, ligongo chichi tukusosekwa kuŵa pamtendele ni m’bale kapena mlongo jwatutindene najo nganisyo?

⁴ Yesu jwasasile yakusosekwa kwa kutamilikasya mtendele ni mlongo mjetu jwatutindene najo nganisyo. (Aŵalanje Mateyu 5:23, 24.) Jwalakwe jwagombelechesye kuti tukusosekwa kuŵa paunasi wambone ni ŵandu ŵane naga tukusaka kumsangalasya Mlungu. Yehofa akusasangalala patukutenda yampaka tukombole kuti tuŵeje pamtendele ni ŵane. Jwalakwe nganaŵa ajitichisye kulambila  kwetu naga tuli tumtumbilile mundu jwine kapena kulepela kutamilikasya mtendele.—1 Yoh. 4:20.

5. Ligongo chichi yaliji yakusawusaya kwa m’bale jwine kutamilikasya mtendele?

⁵ Mpaka yiŵe yakusawusya kuti tutamilikasye mtendele. Ligongo chichi tukuŵecheta yeleyi? Alole yayamtendechele Mark. * Jwalakwe yampweteche mnope pandaŵi jele m’bale jwine jwasalilaga ŵandu ŵane mumpingo yindu yakusakala yakwamba jwalakwe. Ana Mark jwatesile wuli? Jwalakwe jwatite, “Nalepele kuwukamula mtima mwati natumbile mnope.” Payatendekwe yeleyi, Mark jwadandawile ni yajwatesileyi, kaneko jwapite kukumpepesya m’bale jula kuti aŵe najosoni pamtendele. Nambope m’bale jula jwakanile yeleyo. Pandanda Mark jwaganisyaga kuti, ‘Ligongo chichi ngwamba kulilagasya chitamilecho jwalakwe ngakusaka kuti tuŵesoni pamtendele?’ Nambope jwakulolela mkuli jwamlimbikasisye Mark kuti akawujila panyuma. Ana Mark jwatesile wuli?

6. (a) Ana Mark jwatesile wuli pakusaka kuti aŵe pamtendele ni m’bale jwine? (b) Ana Mark jwakamulichisye masengo chamtuli maloŵe ga pa Akolose 3:13, 14?

⁶ Panyuma pakujiganichisya nganiji, Mark jwayikopochele kuti akusaliwona kuŵa jwakulungama kwapunda ŵane. Jwalakwe jwayiweni kuti akusosekwa kuchenga kaganisye kakwe. (Akolo. 3:8, 9, 12) Mwakulinandiya jwalakwe jwapite kwa m’bale jula kuti akapepesye ligongo lya ndamo jakweji. Mark jwamlembelagasoni yikalata m’baleju, yakumsalila mwakupikanila mumtima soni kuti akusaka kuŵa najo paunasi. Mark jwayikanaga pakupeleka tumituka tuŵaganisyaga kuti mwine m’baleju chakasangalale nato. Yakutesya chanasa yaliji yakuti m’baleju nganachenga nganisyo syakwe. Nambope, Mark jwapitilisyepe kupikanila lilamusi lya Yesu lyakwanonyela ŵane nambosoni kwakululuchila. (Aŵalanje Akolose 3:13, 14.) Naga tukusitwanonyela ŵandu mpela muŵatendele Yesu, tuchipitilisya kwakululuchila soni kwapopelela achimjetu kuti tuŵe nawo pamtendele atamose jemanjajo ali ngakusaka kutenda yeleyi.—Mat. 18:21, 22; Aga. 6:9.

7. (a) Ana Yesu jwatulimbikasisye kutenda chichi? (b) Ana mlongo jwine jwasimene ni chakusawusya chamtuli?

 ⁷ Yesu jwatulimbikasisye kuti twatendeleje ŵane yindu mwatukusachila kuti nombe m’we atutendeleje. Jwalakwe jwajonjechesyesoni kuti ngatukusosekwa kwanonyelaga ŵandu ŵakusatunonyelagape. (Luk. 6:31-33) Atamose kuti yangatendekwaga kaŵilikaŵili, nambope ana mpaka atende wuli naga mundu jwine mumpingo akusiŵatilagatilaga wawojo soni kukana atamose kwapa moni? Yeleyi ni yaŵasimene nayo mlongo jwine lina lyakwe Lara. Jwalakwe jwatite, “Mlongo jwine nganasamalaga ya une, mwamti nganimanyililaga chachikumtendekasya. Yeleyi yandendekasyaga kudandawula mnope mwamti nganisakaga kwawula kumisongano.” Pandanda, Lara jwaŵechetaga kuti, ‘Nganijiŵa futo jangu jelejo. Soni kupwatika pelepa ŵandu ŵajinji mumpingo mula akusasimonga ni yitendo ya mlongoju.’

8. Ana Lara jwatesile chichi pakusaka kutamilikasya mtendele, soni tukulijiganya chichi pa yaŵatesileyi?

⁸ Lara jwatesile yakomboleka kuti aŵe pamtendele ni mlongoju. Jwalakwe ali apopesile kwa Yehofa jwaganisisye yakuja kuŵechetena ni mjakwe jula. Ŵakambilene ya chakusawusyacho, kaneko ŵakumbatilene soni ŵaŵele pamtendele. Yosope yawonekaga kuti yili chenene. Lara jwatite, “Nambope mlongoju ŵatandilesoni kutenda yindu mpela mwaŵatendelaga pandanda. Yeleyi yanguŵesye.” Pandanda pene, Lara jwaganisyaga kuti mpaka aŵe jwakusangalala akaŵe naga mjakwe ali achenjile nganisyo pa katende kakwe ka yindu. Kaneko Lara jwayiweni kuti chindu chakusosekwa chaliji kwamba kupitilisya kutenda najo mlongoju yindu mwachinonyelo soni ‘kumkululuchila.’ (Aef. 4:32–5:2) Lara jwakumbuchile kuti chinonyelo chisyesyene chakusalosya Aklistu “changasunga ngani naga jwine achilemwechesye, changalepela pakutenda yindu, chikusakulupilila ndaŵi syosope, changajasa mtima nambo soni chikusapilila ndaŵi syosope.” (1 Akoli. 13:5, 7) Lara ali akumbuchile yeleyi, nganadandawulagasoni ya nganiji. Pali papite ndaŵi jemanjaji ŵatanditesoni kutendela yindu yimpepe. Pakutenda yakomboleka kuŵa pamtendele ni abale ni alongo soni kupitilisyape kwanonyela, chachiŵa ŵakusimichisya kuti ‘Mlungu jwachinonyelo ni jwamtendele tachiŵa nawo.’—2 Akoli. 13:11.

9. Mwakamulana ni Masengo 10:34, 35, ligongo chichi tukusosekwa kuŵambala lusagu?

⁹ Yehofa jwangali lusagu. (Aŵalanje Masengo 10:34, 35.) Patukuŵambala lusagu tukusalosya kuti tuli ŵanache ŵakwe. Tukusapikanilasoni lilamusi lyakuti twanonyeleje achalongo achimjetu mpela mwatukusalinonyelela m’wejo. Pelepa tukusaŵasoni tuli mkutamilikasya mtendele pasikati pa abale ni alongo.—Alo. 12:9, 10; Yak. 2:8, 9.

10-11. Ana mlongo jwine jwamalene chamtuli ni nganisyo syakwe syakulemwecheka?

¹⁰ Kuŵambala lusagu kukusaŵaga kwakusawusya kwa ŵandu ŵane. Kwende tulole chisyasyo cha mlongo jwine lina lyakwe Ruth. Jwalakwe ali mwanache, mundu jwine jwakutyochela m’chilambo chine jwalitendele chipongwe liŵasa lya kumangwakwe. Ana yeleyi yamkwayiye wuli? Ruth jwatite, “Naŵengaga ŵandu ŵakutyochela m’chilambocho. Naganisyaga kuti ŵandu wosope ŵakutyochela m’chilambochi akusatenda yindu mwakulandana, atamose abale ni alongo.” Ana Ruth jwamalene chamtuli ni chakusawusyachi?

¹¹ Ruth jwayiweni kuti akusosekwa kulimbichila kuti amalane ni nganisyo syakulemwechekasi. Jwalakwe ŵaŵalasile ngani syakwamba yindu yasimene nayo ŵandu ŵane mu buku jine (Buku Lapachaka) jajalondesyaga ya ŵandu ŵa kuchilambochi. Ruth jwatite, “Natesile yakomboleka kuti ngole nganisyo syakuŵajilwa pakwamba ya ŵandu ŵakusatyochela m’chilambocho. Natandite kuyiwona kuti abale ni alongo ŵakusatama m’chilambochi akusamnonyela Yehofa. Soni nayiweni kuti jemanjaji ali m’likuga lyakamulana lya abale ni alongo ŵapachilambo chosope chapasi.” Mkupita kwa ndaŵi Ruth jwayiweni kuti akusosekwa kwanonyela ŵane. Jwalakwe jwatite, “Pasimene ni abale soni alongo ŵakutyochela m’chilambochi natendaga yakomboleka kuti ngamulaneje nawo. Naŵechetanaga nawo soni kumanyigana nawo chenene.” Ana yakuyichisya yakwe yaliji yamtuli? Ruth jwatite, “Kaneko nganisyo syakulemwecheka sila syamasile.”

12. Ana Sarah ŵakwete chakusawusya chamtuli?

¹² Ŵandu ŵane ŵangamanyililaga kuti akwete lusagu. Mwachisyasyo, Sarah jwaganisyaga kuti nganakola lusagu ligongo lyakuti nganiŵajelusyaga ŵandu pakujigalila mtundu wawo, mbiya syakwete kapena udindo wakwete m’likuga. Nambope Sarah jwatite, “Kaneko nayiweni kuti ngwete lusagu.” Ana jwalakwe jwakwete lusagu mwamtuli? Sarah jwatyochelaga m’liŵasa lya ŵandu ŵamlijiganye soni jwanonyelaga kunguluka ni ŵandu ŵaŵalijiganyisye mnope. Mwamti lisiku line ŵayikene pakumsalila mjakwe jwine kuti, “Ngusanonyela kunguluka ni abale soni alongo ŵaŵalijiganyisye mnope, soni jwangasakaga kunguluka ni ŵangalijiganya.” Pelepatu yikuwoneka kuti Sarah ŵasosekwaga kuchenga kaganisye kakwe. Ana akatesile yeleyi chamtuli?

13. Ana yaŵatesile Sarah pakuchenga kaganisye kakwe yikutujiganya chichi?

¹³ Jwakulolela mkuli jwine ŵamkamuchisye Sarah kuti aliwungunye mwakusatendelaga yindu. Sarah jwatite, “Jwalakwe ŵayamichile kuti ngusatenda utumiki mwakulupichika, kupeleka ndemanga syambone, soni ngusagamanyilila chenene Malemba. Kaneko ŵasalile kuti patukumanyilila chenene yindu, tukusosekwa kola ndamo sya Chiklistu mpela kulinandiya soni chanasa.” Sarah ŵakamulichisye masengo maloŵe gaŵamsalile jwakulolela mkuliju. Jwalakwe jwatite, “Namanyilile kuti chachikusosekwa mnope chili kwanonyela ŵane soni kuŵa mundu jwambone.” Yakuyichisya yakwe, jwatandite kwawona abale ni alongo mwakuŵajilwa. Jwalakwe jwatite, “Natandite ganichisya ndamo syambone syasikusatendekasya jemanjaji kuŵa ŵakusosekwa kwa Yehofa.” Nambi uli pakwamba ya m’weji? Ngatukusosekwa kuliwona mpela tuli ŵapenani mnope kupunda ŵane ligongo lya majiganyo getu. Naga ‘tukwanonyela ŵakulupilila achimjetu,’ tuchiŵambala kuŵa ŵalusagu.—1 Pet. 2:17.

14. Mwakamulana ni Ahebeli 13:16, ana Yehofa akusapikana wuli pakutuwona tuli mkwapochela chenene achalendo?

¹⁴ Yehofa akusasangalala mnope patukwapochela achalendo. (Aŵalanje Ahebeli 13:16.) Jwalakwe akusakuwona kwapochela ŵane kuŵa mbali ja kulambila kwetu mnopemnope naga tukwakamuchisya ŵandu ŵakulaga. (Yak. 1:27; 2:14-17) Kupwatika pelepa, Malemba gakusatulimbikasya kuti ‘tulinjilileje kwapochela chenene achalendo kunyumba kwetu.’ (Alo. 12:13) Patukwapochela chenene achalendo tukusalosya kuti tukusitwaganichisyaga, tukusitwanonyela mnope soni tukusasaka kuti aŵe achimjetu. Yehofa akusasangalala patukugaŵana ni ŵane yakulya nambosoni patukumalila ndaŵi jetu tuli mkukunguluka ni ŵane. (1 Pet. 4:8-10) Nambope, pana yindu yine yampaka yitendekasye kuti kwapochela achalendo kuŵeje kwakusawusya.

15-16. (a) Ligongo chichi ŵane akusalepela kwapochela achalendo? (b) Ana chichi chachamkamuchisye Mlongo Edit kuti ŵapocheleje chenene achalendo?

¹⁵ Mpaka yitusawusyeje kwapochela achalendo ligongo lya mwayiŵelele yindu pa umi wetu. Aganichisye chisyasyo cha jwamkongwe jwine jwamasije lina lyakwe Edit. Jwalakwe mkanaŵe jwamboni nganasakaga kunguluka mnope ni ŵane. Nambosoni jwayiwonaga kuti pana ŵandu ŵane ŵampaka akombole kwapochela chenene achalendo.

¹⁶ Jwamkongweju pajwaŵele jwamboni, jwachenjile kaganisye kakwe. Jwalakwe jwatandite kwapochela achalendo. Jwalakwe jwatite, “Pandaŵi jajataŵidwaga Nyumba ja Uchimwene, jwamkulungwa jwamumpingo jwine jwasalile kuti pana liŵasa line lyalikwika kuti likamule nawo masengo gakutaŵa. Kaneko ŵambusisye naga mpaka yikomboleche kuti achalendowo akayichile kunyumba, soni kuti chatame kwa mawiki gaŵili. Nakumbuchile yaŵatesile Yehofa pakumpa upile jwamkongwe jwamasije jwa ku Salefati.” (1 Ayi. 17:12-16) Mlongoju jwakamulene nayo yakuti alendowo akayichile kumangwakwe. Ana jwapatile upile? Jwalakwe jwatite, “Mmalo mwakuti alendowo atame mawiki gaŵili ŵatemi kwa miyesi jiŵili. Ndaŵi jelejo jatukamuchisye mnope kuti tukamulane mnope ni jemanjajo.” Mlongo  Edit jwakamulanagasoni ni ŵandu ŵane mumpingo. Apano mlongoju ali mpayiniya soni akusasangalala kukunguluka ni abale ni alongo ŵakusajendaga nawo mu utumiki payiche kunyumba jakwe. Jwasasilesoni kuti, “Kupeleka kukusandendekasya kuŵa jwakusangalala. Nambope yisyesyene yakwe yili yakuti ngusapata majali gejinji ligongo lya kupelekako.”—Aheb. 13:1, 2.

17. Ana Luke ni ŵamkwakwe ŵamanyilile kuti akwete chakusawusya chapi?

¹⁷ Komboleka kuti twatandite kala kwapochela ŵane, nambo ana nganituŵa tujonjechesye kutenda yeleyi kupunda mwatukusatendelaga? Mwachisyasyo, M’bale Luke ni ŵamkwakwe akusanonyela kwaŵilanjila kumangwawo achinangolo ŵawo, ŵachibale, achimjawo soni ŵakulolela mkuli. Nambope Luke jwatite, “Twayiweni kuti tugamba kwaŵilanga ŵandu ŵatukusamanyigana nawo mnope.” Ana Luke ni ŵamkwakwe ŵatesile wuli kuti akusye mtima wakwapochelasoni ŵane?

18. Ana Luke ni ŵamkwakwe ŵachenjile chamtuli kuti atande kulosya ndamo jakwapochela achalendo?

¹⁸ M’bale Luke ni ŵamkwakwe ŵachenjile ndamo jawo ali aganichisye chenene maloŵe ga Yesu gakuti, “Naga mkusanonyela ŵawowo pewo ŵakusamnonyela jemanja, ana mkwembecheya kupochela mbote jamtuli?” (Mat. 5:45-47) Jemanjaji ŵamanyilile kuti akusosekwa kuŵa ŵakoloŵa magasa kwa jwalijose mpela mwakusatendela Yehofa. Myoyo ŵalinganyisye yakwaŵilanga abale ni alongo ŵanganayicheje kumangwawo. M’bale Luke jwatite, “Apano tukusasangalala kutendela yindu yimpepe ni abale. Tukusalipikana kuti tuli paunasi wambone ni ŵane soni Yehofa.”

19. Ana mpaka tulosye chamtuli kuti tuli ŵakulijiganya ŵa Yesu, soni ana wawojo asimichisye kutenda chichi?

¹⁹ Munganiji tulijiganyisye yampaka chijile chinonyelo pakutukamuchisya kuti tuŵe ŵakutamilikasya mtendele, ŵangali lusagu soni ŵakwapochela achalendo. Tukusosekwa kumalana ni nganisyo syakulemwecheka silisyose ni kwanonyelaga abale ni alongo ŵetu ni mtima wosope. Naga tukutenda yeleyi, tuchiŵa ŵakusangalala soni tuchilosya kuti tuli ŵakulijiganya ŵa Yesu ŵasyesyene.—Yoh. 13:17, 35.