Alefi ŵane ŵanganaŵa ŵa mbopesi ŵakamulaga masengo gane, gampaka tugalandanye ni gakusakamula ŵa polisi. Ŵakamulaga masengoga mwakulongoleledwa ni jwamkulungwa jwa asilikali jwa ku nyumba ja Mlungu. Pakwamba ya masengo gaŵakamulaga ŵa polisiŵa, jwakulemba mbili jwine jwa Chiyuda lina lyakwe Philo jwatite, “Alefi ŵane ŵatamaga pa mlango wakwinjilila mu nyumba ja Mlungu mpela alonda ŵa pageti. Ŵane ŵatama kusogolo mkati mwa nyumbaji. Jemanjaji ŵalolechesyaga kuti pangali mundu jwalijose jwakwawula kusogolo kwa nyumbaji mkanakundidwe. Ŵanesoni ŵalondelaga kusyungulila maloga, mwakuchenganachengana ni achimjawo chilo ni musi wakwe.”

Ŵapolisiŵa ŵaŵendedwagasoni ni luŵala lwekulungwa lwa magambo lwa Ayuda kuti ŵakamuchisye pa masengo gane. Ŵandu ŵeleŵape ni ŵaŵakundidwaga ni boma ja Aloma kuti ajendeje ni yida yangondo.

Mundu jwine jwamlijiganye ya Baibulo lina lyakwe Joachim Jeremias jwaŵechete kuti, “Pandaŵi jiŵamkamulaga Yesu, jwalakwe jwawusisye ŵapolisiŵa kuti ligongo chichi nganamkamulaga jwalakwe pandaŵi jaŵajiganyaga m’nyumba jakupopelelaji. Myoyo yikaŵe kuti jemanjaji nganaŵa m’kagulu ka ŵapolisi ŵa m’nyumba ja Mlunguji Yesu ngamkaniŵawusya chiwusyochi.” Jwamlijiganye ya Baibuloju jwakulupililagasoni kuti ŵandu ŵaŵayiche kukumkamula Yesu yeleyi mkaniyitendeche, ŵalijisoni m’kagulu ka ŵapolisi ŵa m’nyumba ja Mlunguŵa. (Yoh. 7:32, 45, 46) Kaneko luŵala lwekulungwa lwa Ayuda lwatumisye jwamkulungwa jwa asilikali yimpepe ni ŵapolisi ŵane kuti akakamule ŵandumetume. Kombolekasoni kuti ŵaliji ŵapolisipeŵa ŵaŵam’wutile ndumetume Paulo kusa kwa nyumba jakupopelela.—Mase 4:1-3; 5:17-27; 21:27-30.