1-2. Mwakamulana ni Masengo 8:27-31, 35-38, ana chichi chachatendekasisye kuti nduna ja ku Itiyopiya jibatisidwe?

ANA wawojo akusasakaga ali abatisidwe ni kuŵa jwakulijiganya jwa Klistu? Kumnonyela soni kumyamichila Yehofa kwatendekasisye ŵandu ŵajinji kuti abatisidwe. Aganichisye chisyasyo cha nduna jine ja ku Itiyopiya.

² Panyuma pakulijiganya Malemba, ndunaji jabatisidwe ndaŵi jijojo. (Aŵalanje Masengo 8:27-31, 35-38.) Ana chichi chachatendekasisye kuti ndunaji jibatisidwe? Ndunaji jagawonaga Maloŵe ga Mlungu kuŵa gakusosekwa mnope mwamti jaŵalangaga buku ja Yesaya jili jikwesile ligeleta. Nambo ndunaji pajaŵechetene ni Filipo, jalosisye kuyamichila yindu yaŵamtendele Yesu. Nambo ligongo chichi ndunaji jajawulaga ku Yelusalemu? Ligongo lyakuti jamnonyelaga mnope Yehofa. Ana tukumanyilila chamtuli yeleyi? Ndunaji jaŵele jili mkwawula ku Yelusalemu kukumlambila Yehofa. Munduju jwakopweche mu dini jakwe ni kwinjila mu mtundu wa ŵandu ŵaŵalipeleche kwa Mlungu jwakuwona. Ligongo lya kumnonyela Yehofa, ndunaji jaganisisye yakutenda chindu chakusosekwa mnope chachaliji kubatisidwa ni kuŵa jwakulijiganya jwa Klistu.—Mat. 28:19.

3. Ana chichi champaka chimlepelekasye mundu kubatisidwa? (Alole libokosi lyakuti “ Ana Mtima Wawo Wuli Mpela Litaka Lyapi?”)

³ Kumnonyela Yehofa mpaka kwatendekasye wawojo kuti abatisidwe. Nambope chinonyelopechi mpaka chalepelekasyesoni kutenda yeleyi. Ana yeleyi mpaka yikomboleche chamtuli? Aganichisye chisyasyo achi. Komboleka kuti akusiŵanonyela mnope achimjawo soni ŵachibale ŵawo. Ligongo lya yeleyi, mpaka atande kuganisya kuti pachachibatisidwa jemanjajo chachitanda kwaŵenga. (Mat. 10:37) Mwinesoni mpaka anonyeleje ndamo  jakusajiŵenga Mlungu, ni mpaka ayiwoneje kuŵa yakusawusya kujileka ndamojo. (Sal. 97:10) Mwine kwandaŵi jelewu aŵele ali mkutenda nawo yindu yakamulana ni dini syaunami. Myoyo, mwine pakumbuchile yeleyi mpaka yasangalasyeje. Yakuyichisya yakwe, mpaka yiŵe yakusawusya kuti aleche ndamo syasikusamsakalisya Yehofa. (1 Akoli. 10:20, 21) Pelepa mpaka asosekwe kuliwusya kuti, ‘Ana ngusinanonyela mnope ŵani, kapena ngusanonyela mnope chichi?’

4. Ana chindu chekulungwa champaka chatendekasye kubatisidwa ni chichi?

⁴ Komboleka kuti pana yindu yejinji yakusayinonyela soni kuyamichila. Mwachisyasyo, mkanaŵe kutanda kulijiganya ni Ŵamboni sya Ye hofa, komboleka kuti ŵajichimbichisyaga mnope Baibulo. Mwinesoni ŵamnonyelaga Yesu. Sambano apano pamanyigene ni Ŵamboni sya Yehofa, komboleka kuti akusasangalala kutendela yindu yimpepe ni jemanjaji. Nambope kuyinonyela yindu yambone mpela yeleyi nganikuŵa kwatendekasisye kuti alipeleche kwa Yehofa ni kubatisidwa. Chindu chekulungwa champaka chatendekasye wawojo kusaka kubatisidwa chili kumnonyela Yehofa Mlungu. Naga akumnonyela mnope Yehofa kupunda chilichose, nikuti ngasakunda chilichose kwalepelekasya kumtumichila jwalakwe. Kumnonyela kwawo Yehofa kuchatendekasya kuti abatisidwe nambosoni kuchakamuchisya kuti aŵepe ŵakulupichika panyuma pakuti abatisidwe.

5. Ana chitupate kwanga kwa yiwusyo yapi?

⁵ Yesu jwasasile kuti tukusosekwa tumnonyeleje Yehofa ni mtima wetu wosope, umi wetu wosope, lunda lwetu losope soni machili getu gosope. (Maliko 12:30) Ana mpaka tulijiganye chamtuli kumnonyela soni kumchimbichisya Yehofa chamti myiyi? Patukuganichisya yakusati Yehofa kutunonyela, yikusatukamuchisyaga kuti tumnonyeleje jwalakwe. (1 Yoh. 4:19) Ana patukumnonyela Mlungu m’litala lyeleli, ni yindu yine yapi yayichitendekwa paumi wetu? *

6. Mwakamulana ni Aloma 1:20, ana chichi champaka chakamuchisye kumanyilila yakwamba Yehofa?

⁶ Alijiganyeje yakwamba Yehofa kupitila mu yindu yaŵapanganyisye. (Aŵalanje Aloma 1:20; Chiw. 4:11) Aganichisyeje ya yakumela soni yinyama yaŵapanganyisye Yehofa. Yinduyi yikusalosya kuti jwalakwe ali jwalunda mnope. Mpaka aganichisyejesoni yachatite chilu chawo pakupanganyidwa mwakusimonjesya. (Sal. 139:14) Aganichisyejesoni ya machili gaŵagaŵisile Yehofa mu lyuŵa. Lyuŵa ligambile kuŵa jimo mwa ndondwa syejinji syasipali kwinani. * (Yes. 40:26) Kuganichisya yindu yeleyi, kuchatendekasya kuti amchimbichisyeje mnope Yehofa. Nambope kumanyilila kuti Yehofa ali jwalunda soni jwamachili, lili litala limo lyakuŵela paunasi wambone ni jwalakwejo. Kuti amnonyeleje mnope Yehofa akusosekwa kumanyilila yejinji yakwamba jwalakwe.

7. Ana akusosekwa kukulupilila chichi kuti amnonyeleje mnope Yehofa?

⁷ Aŵeje ŵakusimichisya kuti Yehofa akusasamalaga ya wawojo. Ana yikusiyasawusya kulupilila kuti juŵapanganyisye chilambo chapasi soni kwinani akumanyilila yakuti wawojo apali, soni kuti akusiŵaganichisyaga? Naga yili myoyo, akumbuchileje kuti Yehofa “nganaŵa kose pakutalika ni jwalijose mwa jwetuwe.” (Mase. 17:26-28) Jwalakwe “akusamanyilila nganisyo sya mundu jwalijose,” soni ‘naga akumsosasosa tachimsimana.’ (1 Mbi. 28:9) Kusala yisyene, apano akusalijiganya Baibulo ligongo lyakuti Yehofa ‘ŵawutile.’ (Yel. 31:3, NWT) Pakuyipikanichisya yindu yosope yaŵatendele Yehofa, yikusakamuchisya kuti amnonyeleje mnope jwalakwe.

8. Ana mpaka alosye chamtuli kuyamichila chinonyelo chakusatulosya Yehofa?

 ⁸ Tukusayamichila chinonyelo cha Yehofa mwakupopela kwa jwalakwe. Mpaka amnonyeleje mnope Yehofa pakumsalila yakusawusya yawo soni kuyamichila yindu yosope yaŵatendele. Konjechesya pelepa, unasi wawo mpaka uŵe wakulimba mnope pakuyiwona yakuti Yehofa kwanga mapopelo gawo. (Sal. 116:1) Chachiŵa ŵakusimichisya kuti Yehofa akusapikana mapopelo gawo. Nambo kuti unasi wawo ni Yehofa ulimbe, akusosekwa kupikanichisya mwakusatendela yindu jwalakwe. Soni akusosekwa kumanyilila yakusasaka Yehofajo kuti wawojo atendeje. Myoyo litala limo lyampaka amanyilile yakusasaka jwalakwe lili kulijiganya Baibulo.

9. Ana mpaka alosye chamtuli kuti akusajiwona Baibulo kuŵa jakusosekwa?

⁹ Alijiganye Kugawona Maloŵe ga Mlungu kuŵa gakusosekwa. Baibulope ni jajikwete usyesyene wakwamba Yehofa soni chakulinga chakwete kwa wawojo. Mpaka alosye kuti akusajiwona Baibulo kuŵa jakusosekwa mwakujiŵalanga lisiku lililyose, kukosechela yachachilijiganya ni mundu jwakwajiganyaga, soni kukamulichisya masengo yalijiganyisye. (Sal. 119:97, 99; Yoh. 17:17) Ana akwete ndandanda jakuŵalanjila Baibulo? Ana akusalingalinga kujikuya ndandandajo ni kulolechesyaga kuti lisiku lililyose akuŵalanga Baibulo?

10. Ana ni chindu chapi chachikusalosya kuti Baibulo jili japadela?

¹⁰ Chindu chimo chakulosya kuti Baibulo jili japadela chili chakuti mwana ngani syaŵalembile ŵandu ŵaŵam’weni Yesu ni meso gawo. Baibulo jili buku jajikusasala mwakulondola yindu yaŵatendele Yesu wawojo. Pakulijiganya yindu yaŵasasile soni yaŵatesile Yesu, yichakamuchisya kuti aŵe paunasi ni jwalakwe.

11. Ana chichi champaka chakamuchisye kuti amnonyeleje Yehofa?

¹¹ Kulijiganya kumnonyela Yesu mpaka kwakamuchisye kuti amnonyeleje mnope Yehofa. Tukuŵecheta myoyo ligongo lyakuti Yesu ŵasyasyaga Atati ŵakwe mwakusamala. (Yoh. 14:9) Myoyo kulijiganya yakwamba Yesu mpaka kwakamuchisye kumpikanichisya soni kumyamichila Yehofa. Aganichisye yaŵatesile Yesu pakwanonyela ŵandu ŵakulaga, ŵakulwala soni ŵangali machili. Aganichisyesoni ya malangiso gakusapeleka  jwalakwe pa umi wawo soni mwauchenjele umi wawo ligongo lyakumpikanila.—Mat. 5:1-11; 7:24-27.

12. Ana pamanyilile chenene yakwamba Yesu, yichakamuchisya kutenda chichi?

¹² Mpaka atande kumnonyela mnope Yesu pakuganichisya mnope ya mbopesi jakwawombola ku ulemwa jaŵapeleche jwalakwe. (Mat. 20:28) Pamanyilile kuti Yesu jwaliji jwakusachilila kuwa ligongo lya wawojo, mpaka yatendekasye kuleka yakulemwa yawo ni kumŵendasoni Yehofa kuti ŵakululuchile. (Mase. 3:19, 20; 1 Yoh. 1:9) Pakumnonyela mnope Yehofa nambosoni Yesu, yichiŵa yangasawusya kuti ŵanonyelejesoni abale ni alongo.

13. Ana Yehofa atupele ŵani kuti atukamuchisyeje?

¹³ Alijiganyeje kwanonyela ŵandu ŵakusamnonyela Yehofa. Mpaka yiŵe yakusawusya kuti achimjawo ŵakala soni ŵamwiŵasa mwawo ŵali ŵangakulupilila apikanichisye chachikwatendekasya wawojo kuti alipeleche kwa Yehofa. Pane mpaka ŵasisyeje. Yehofa chachakamuchisya kuti ŵawoneje abale ni alongo mpela ŵamwiŵasa mwawo. Pakutenda yindu yalumo ni abaleŵa, chachipata chikamuchisyo chakusosechela. (Maliko 10:29, 30; Aheb. 10:24, 25) Akajasa mtima, komboleka ndaŵi jine achalongo achimjawoŵa chachitanda kumtumichila Yehofa soni kupikanila malamusi gakwe.—1 Pet. 2:12.

14. Mwakamulana ni 1 Yohane 5:3, ana apatile umbone wamtuli ligongo lyakuya malamusi ga Yehofa?

¹⁴ Alijiganyeje soni kuchimbichisya soni kukamulichisya masengo malamusi ga Yehofa. Komboleka kuti mkanammanyilile Yehofa ŵasagulaga jika chachili chambone soni chakusakala. Nambo sambano akusayiwona kuti malamusi ga Yehofa gali gambone. (Sal. 1:1-3; aŵalanje 1 Yohane 5:3.) Aganichisye yajikusasala Baibulo pakwamba yakusasosekwa kutenda achalume ŵalombele, achakongwe ŵalombele, achinangolo soni ŵanache. (Aef. 5:22–6:4) Ana liŵasa lyawo litandite kusangalala ligongo lyakupikanila yajikusasala Baibuloyi? Ana wawojo achenjile ni kuŵa mundu jwambone ligongo lyakupikanila yakusasala Yehofa pangani jakusagula achimjetu ŵambone? Ana apano akusangalala? (Mis. 13:20; 1 Akoli. 15:33) Mwangakayichila mpaka ajanje yiwusyo yosopeyi kuti elo.

15. Ana mpaka atende wuli kuti akomboleje kukamulichisya masengo yiwundo ya m’Baibulo?

¹⁵ Ndaŵi sine mpaka yasawusyeje kuti akamulichisye masengo yiwundo ya m’Baibulo yalijiganyisye. Ni ligongo lyakwe Yehofa akukamulichisya masengo likuga lyakwe pakupanganya mabuku gakulondesya ngani sya m’Babulo. Nganisi mpaka syakamuchisye wawojo kulekanganya pasikati pa chambone ni chakusakala. (Aheb. 5:13, 14) Pakuŵalanga soni kulijiganya Baibuloji, chachiyiwona kuti jili jangasawusya soni jikusasala ngani syakwe mwangapita mumbali. Kupwatika pelepa, chachisachililasoni kuti aŵe m’likuga lya Yehofa.

16. Ana Yehofa akusiŵalongolelaga chamtuli ŵandu ŵakwe?

¹⁶ Alijiganyeje kulikamuchisya soni kulinonyela likuga lya Yehofa. Yehofa ŵaŵisile ŵandu ŵakwe m’mipingo, soni Mwanache jwakwe Yesu ni jwakulongolela mipingojo. (Aef. 1:22; 5:23) Yesu asagwile kagulu kamwana ka ŵasagulwe kuti kalongoleleje masengo gagakusosekwa kuti gakamulidwe apanopano. Yesu ŵakakolasile kaguluka kuti “jwamasengo [“kapolo,” NWT] jwakulupichika ni jwalunda.” Jemanjaji akusawuwona udindo wakwalisya soni kwasamalila wawojo mwausimu kuti wuli wakusosekwa mnope. (Mat. 24:45-47) Litala limo lyakusakamulichisya masengo kapoloju pakwakamuchisya wawojo, lili kulolechesya kuti achakulungwa ŵamumpingo akusagulidwa kuti ŵaloleleje soni kwalongolela wawojo. (Yes. 32:1, 2; Aheb. 13:17; 1 Pet. 5:2, 3) Achakulungwaŵa ali ŵakusachilila kutenda yampaka akombole kuti ŵalimbikasye wawojo, soni kuti ŵakamuchisye kuŵa paunasi wambone ni  Yehofa. Nambo chindu chakusosekwa mnope champaka achakulungwa atende, chili kwakamuchisya kuti akombole kwajiganya ŵane yakwamba Yehofa.—Aef. 4:11-13.

17. Mwakamulana ni Aloma 10:10, 13, 14, ligongo chichi tukusiŵasalila ŵane yakwamba Yehofa?

¹⁷ Ŵajiganyeje ŵane kumnonyela Yehofa. Yesu ŵasalile ŵakumkuya ŵakwe kuti ŵajiganyeje ŵandu yakwamba Yehofa. (Mat. 28:19, 20) Yili yakomboleka gamba kupikanila yaŵasasile Yesuyi ligongo lyakuti ni yaŵatulamwile kuti tutendeje. Nambope naga tuli mkumnonyela mnope Yehofa, ni kuti mpaka tutende mpela mwaŵatendele Petulo ni Yohane. Jemanjaji ŵatite, “Uwe ngatuleka kuŵecheta yele yitwayiweni ni kuyipikana.” (Mase. 4:20) Naga tukwakamuchisya ŵane kuti amnonyeleje Yehofa, yichitukamuchisya kuti tusangalaleje. Agambe ganisya yaŵatite pakusangalala Filipo paŵamkamuchisye mundu jwa ku Itiyopiya jula kuti alijiganye usyesyene wa m’Malemba soni panyuma pakwe ni kubatisidwa. Pakumsyasya Filipo soni kupikanila yaŵalamwile Yesu kuti ŵandu alalichileje, akusalosya kuti akusaka kuŵa Jwamboni sya Yehofa. (Aŵalanje Aloma 10:10, 13, 14.) Yeleyi, yichatendekasya kuwusya chiwusyo chajwawusisye mundu jwa ku Itiyopiya jula kuti, “Chachikulekasya kuti une ngabatisidwa ni chichi?”—Mase. 8:36.

18. Ana tuchikambilana chichi mungani jakuyichisya?

¹⁸ Pakuganisya yakuti abatisidwe, chachisosekwa kutenda chisagula chakusosekwa mnope. Myoyo ligongo lyakuti chisagula chelechi chili chakusosekwa nikuti akusosekwa kumanyilila yachikusagopolela. Mwambone chachisosekwa kuganichisya yiwusyo mpela ayi, Ana akusosekwa kumanyilila yamtuli pangani ja kubatisidwa? Ana akusosekwa kutenda chichi mkanabatisidwe soni panyumba pakuti abatisidwe? Tuchipata kwanga kwa yiwusyoyi mungani jakuyichisya.