1. Ana ŵachinyamata mkusosekwa kuliwona chamtuli mumpingo?

ŴACHINYAMATAMWE pana yindu yejinji yampaka mtende. Ŵajinji mwa jemanja mkwete machili. (Mis. 20:29) Soni mkusatenda yejinji pakwakamuchisya abale ni alongo. Mwangakayichila mkusajembecheya ndaŵi jele chimchiŵa ŵakutumichila ŵakamuchisya. Komboleka mpaka mlipikaneje kuti ŵandu ŵane akusamwonagasoni kuti mli kamwanache, ŵangamanyilila yejinji, mwamti ngaŵa mkumpa yakutenda mumpingo. Atamose kuti mli mwanache, nambope pana yindu yejinji yampaka mtende kuti ŵandu mumpingo amdalileje soni kumchimbichisya.

2. Ana munganiji chitukambilane chichi?

² Munganiji, chitukambilane mnope yayamtendechele Mwenye Daudi. Chitulolesoni yayatendechele ayimwene ŵaŵili ŵa ku Yuda, Asa soni Yehoshafati. Chitukambilanesoni yakusawusya yaŵasimene nayo ŵandu ŵatatuŵa, yaŵatesile pakulimbana nayo, soni yampaka alijiganye ŵachinyamata pa yisyasyo ya jemanjaji.

3. Ana ŵachinyamata mpaka mwakamuchisye chamtuli ŵachikulile mumpingo?

³ Daudi pajwaliji jwachinyamata jwalijiganyisye maluso gane, gele ŵandu ŵane ŵagawonaga kuti gali gakusosekwa mnope. Jwalakwe jwaliji paunasi wambone ni Yehofa soni jwamanyililaga chenene kwimba, mwamti ŵamjimbilaga Sauli jwaŵaliji Mwenye jwakusagulidwa ni Mlungu. (1 Sam. 16:16, 23) Ana ŵachinyamata mkwete maluso gampaka gakamuchisye abale ni alongo  mumpingo? Ngatukukayichila amta panandi kuti mkwete. Mwachisyasyo, komboleka pakwete pamwaweni ŵachikulile ali mkuyamichila ligongo lyakwakamuchisya mwampaka akamulichisye masengo yipangiso yamakono pakulijiganya pajika kapena pakukosechela misongano. Jemanja mpaka mwakamuchisye ŵachikulileŵa ligongo mkusayimanyilila chenene yipangiso yamakono.

4. Mpela muyaŵelele ni Daudi ana ŵachinyamata mkusosekwa kola ndamo syapi? (Alole chiwulili cha pachikuto.)

⁴ Daudi, jwaliji jwakudalilichika. Mwachisyasyo, mpela jwachinyamata jwakamulaga mwakulimbichila masengo gakusamalila ngondolo sya babagwe. Ndaŵi sine masengo gelega galiji gakogoya mnope. Mwamti pandaŵi jine Daudi ŵamsalile Sauli kuti, “Mwenye une masengo gangu, gakulanga ngondolo sya baba ŵangu, nambo pati lisimba kapena chimbalangondo chikamwile mwanache jwa ngondolo, une ngisindoposyaga chilombocho nikuja kuchitanda mpaka kumpokasya mwanache jwangondolojo.” (1 Sam. 17:34, 35) Daudi jwalipikanaga kuti uli udindo wakwe kusisamalila ngondolo soni jwasichenjelaga mwakulimba mtima. Ŵachinyamata mpaka amsyasye Daudi mwakukamula mwakulipeleka utumiki uliwose wampochele.

5. Mwakamulana ni lilemba lya Salimo 25:14, ana ni chindu chakusosekwa mnope chapi champaka atende ŵachinyamata?

⁵ Daudi pajwaliji jwachinyamata jwatendaga yindu yakumkamuchisya kuti aŵe pa unasi wambone ni Yehofa. Unasi welewu waliji wakusosekwa mnope kupunda kulimba mtima kwakwe kapena luso lwakwimba lwaŵakwete. Yehofa nganagamba kuŵa Mlungu jwa Daudi, mmalo mwakwe ŵaliji mjakwe jwapamtima. (Aŵalanje Salimo 25:14.) Ŵachinyamatamwe chindu chakusosekwa mnope champaka mtende chili kulimbisya unasi wenu ni Yehofa, yampaka yitendekasye kuti mpocheleje mautumiki gane.

6. Ana ŵandu ŵane ŵamwonaga chamtuli Daudi?

⁶ Chakusawusya chine chiŵalimbanaga nacho Daudi chaliji chakuti ŵandu ŵamwonaga kuti ali mwanache. Mwachisyasyo, Daudi pa ŵalipeleche kuja kumenyana ni Goliyati, Mwenye Sauli ŵalinjile kumlekasya mwakuŵecheta kuti, “M’wejo ngati mchanda wamba.” (1 Sam. 17:31-33) Soni pandaŵi jine mkulugwe Daudi ŵamkalipile jwalakwe ligongo lyakutenda yindu ya nganiwuŵa udindo wakwe. (1 Sam. 17:26-30) Nambope Yehofa nganamwonaga Daudi kuti ali kamwanache kanganikaŵa kakwete udindo uliwose. Jwalakwe ŵammanyililaga chenene Daudi. Soni ligongo lyakuti  Daudi ŵamdalilaga mnope Yehofa, ŵakombwele kumwulaga Goliyati.—1 Sam. 17:45, 48-51.

7. Ana mpaka mlijiganye chichi pa yaŵasimene nayo Daudi?

⁷ Ana ŵachinyamata mpaka mlijiganye chichi pachisyasyo cha Daudi? Mkusosekwa kuŵa ŵakuwusimana mtima. Mpaka papite ndaŵi kuti ŵandu ŵakummanyilila chenene kutandila mli mwanache atande kumwona kuti mli jwamkulungwa. Nambope Yehofa jwangatenda yindu pakujigalila mwawuŵelele msingu wenu. Jwalakwe akusammanyilila chenene jemanja soni yindu ya mkusakombola kutenda. (1 Sam. 16:7) Mlimbisyeje unasi wenu ni Mlungu. Daudi jwatendaga yeleyi mwakulolechesya mnope yindu yaŵapanganyisye Yehofa. (Sal. 8: 3, 4; 139:14; Alo. 1:20) Chindu chine champaka mtende chili kupopela kwa Yehofa kuti ampeje machili. Mwachisyasyo, ana achimjenu ŵane ŵa kusukulu, akusamsekaga ligongo lyakuti mli ŵa Mboni sya Yehofa? Naga yili myoyo mumŵendeje Yehofa kuti amkamuchisye kumalana ni chakusawusya chelechi. Kupwatika pelepa mkamulichisyeje masengo yindu yamkusapata pamŵalasile Baibulo, mabuku getu nambosoni pamlolele mafidiyo. Pandaŵi jilijose jamkumwona Yehofa ali mkumkamuchisya pa yakusawusya yenu, ni pamkusatanda kumdalila mnope. Ŵandu akusatanda kumkulupilila mnope pakumwona kuti mkumdalila Yehofa.

8-9. Ana chichi chachamkamuchisye Daudi kwembecheya mwakuwusimana mtima mpaka paŵaŵele mwenye? Ana ŵachinyamata mpaka mlijiganye chichi kutyochela pa chisyasyo Daudi?

⁸ Alole chakusawusya chine chaŵasimene nacho Daudi. Jwalakwe ali asagulidwe kuti chaŵe mwenye, jwajembecheye kwa yaka yejinji mkanawe kutanda kulamulila mpela mwenye ku Yuda. (1 Sam. 16:13; 2 Sam. 2:3, 4) Ana chichi chachamkamuchisye kwandaŵi josopeji kuti aŵepe jwakuwusimana mtima? Mmalo mwakuti Daudi aŵe jwakutenguka jwalakwe jwaganichisyaga mnope yampaka akombole pandaŵijo. Mwachisyasyo, paŵatamaga umi wakutilatila mudela ja Afilisiti, jwapatile upile wakwachenjela Aisalaeli kwa adani ŵawo. Yaŵatesile Daudiyi yakamuchisye kuti achimmagongowo akajinjilila malo ga Aisalaeli.—1 Sam. 27:1-12.

⁹ Ana ŵachinyamata mpaka mlijiganye chichi pachisyasyo cha Daudi? Mkamulichisyeje masengo upile uliwose wamkwete pakwakamuchisya abale ni alongo. Alole chisyasyo cha m’bale jwine lina lyakwe Ricardo. * Kutandila ali ni yaka ya mma 10, jwalakwe ŵaganichisyaga yakutenda upayiniya wakutamilichika. Nambo achakulungwa ŵamumpingo ŵamwonaga kuti nganayiche pakuŵa mpayiniya. Mmalo mwa kuwujila munyuma kapena kutumbila ni yeleyi, Ricardo jwapitilisyepe kulimbichila kulalichila. Jwalakwe jwasasile kuti, “Ngusayiwona kuti yaliji chenene kundenda kuti njembecheye kaje ligongo paliji yine yanasosekwaga kongolela. Mwamti nalolechesyaga kuti ngutenda maulendo gakuwilisya kwa mundu jwalijose jwaŵalosisye chidwi soni nakosechelaga chenene maulendogo. Nayikene pakutendesya lijiganyo lya Baibulo lyandanda. Kulimbichila kulalichila kwangamuchisyaga kumasya woga.” Ricardo akutumichila mpela mpayiniya jwakutamilichika soni jwakutumichila jwakamuchisya.

10. Ana pandaŵi jine Daudi jwatesile chichi mkanaŵe kusagula yakutenda?

¹⁰ Mganichisyesoni chindu chine chachamtendechele Daudi. Pandaŵi jele Daudi yimpepe ni achalume ŵane ŵaŵatamaga umi wakutilatila ŵagalesile maŵasa gawo ni kwawula kukuputa ngondo. Jemanjaji ali atyosile, achimmagongo ŵayiche ni kugajigala maŵasa gawo kuti gakaŵe achikapolo. Pakuŵa Daudi jwamanyililaga chenene kuputa ngondo, yikaliji yangasawusya kuganisya kuti mpaka atende yakomboleka kuti agakulupusye maŵasaga ku ukapolo. Mmalo mwakwe jwalakwe ŵamŵendile Yehofa kuti amkamuchisye. Ni chikamuchisyo cha jwambopesi  jwine lina lyakwe Abiyatala, Daudi ŵawusisye kwa Yehofa kuti, “Ana nalikuye likuga lya ngondo lya Amaleki?” Yehofa ŵamsalile Daudi kuti alikuye likuga lyangondolyo soni ŵamsimichisye kuti yindu chiyikamjendele chenene. (1 Sam. 30:7-10) Ana ŵachinyamata mpaka mlijiganye chichi pelepa?

11. Ana mpaka mtende chichi mkaniŵe kusagula yakutenda?

¹¹ Mŵendeje lunda mkanimŵe kusagula yakutenda. Mwawusyeje achinangolo wenu kuti amkamuchisye. Mpaka mpatesoni malangiso gambone kwa achakulungwa ŵamumpingo ŵali ŵakumanyilila yejinji. Yehofa akusiŵakulupilila mnope achakulungwa mwamti jemanja mpaka mwakulupililesoni. Yehofa akusiŵawona jemanjaji mpela mituka jiŵajipeleche mumpingo. (Aef. 4:8) Mpaka msagule yindu mwalunda naga mkukuya chikulupi chawo soni kupikanila malangiso gakusampa. Kwende sambano tukambilane yampaka tulijiganye kwa Mwenye Asa.

12. Ana Mwenye Asa ŵakwete ndamo syamtuli paŵatandaga kulamulila?

¹² Mwenye Asa pajwaliji jwachinyamata jwaliji jwakulinandiya soni jwakulimba mtima. Mwachisyasyo, Abiya ŵaŵaliji babagwe Asa, paŵawile Asa jwatandite kulamulila, mwamti jwakasenye mafano gosope gagaliji mchilambomo. Jwalakwe “ŵalamwile ŵandu ŵa ku Yuda kuti atendeje lisosa lya Ambuje Mlungu juŵalambilaga achinangolo ŵawo kuti soni apikanileje ni malamusi ni yakwiganya.” (2 Mbi. 14:1-7) Pandaŵi jine Sela jwa ku Ifiyopiya jwayiche kukuputa ngondo ni a Yuda ali ajigele asilikali ŵakwana 1 miliyoni. Pandaŵiji Asa jwaŵendile chikamuchisyo kwa Yehofa kuti, “Ambuje Mlungu pangali ŵane ŵakwapunda wawo ŵampaka atukamuchisye uwe sikati ja ŵandu ŵamachili ni ŵandu ŵangali machili. Ambuje Mlungu atukamuchisye uwe pakuŵapo tukulupilila mwawawo.” Maloŵega gakulosya kuti Asa ŵamdalilaga mnope Yehofa kuti ni jwampaka ŵakulupusye soni Yehofa ŵamkamuchisye mnope jwalakwe ‘kwapunda ŵandu ŵa ku Ifiyopiya.’—2 Mbi. 14:8-12.

13. Ana mkupita kwandaŵi Asa ŵasimene ni yamtuli? Ligongo chichi ŵasimene ni yeleyi?

¹³ Mwangakayichila wawojosoni mpaka ajitichisye kuti kusimana ni likuga lya asilikali ŵakwana 1 miliyoni nganijiŵa ngani jamasanje. Nambotu mwenye Asa ŵakombwele kupunda ligongo lyakuti ŵamdalilaga Yehofa. Nambo chakutesya chanasa chaliji chakuti Asa ŵalepele kumdalila Yehofa paŵasimene ni chakusawusya chine. Pandaŵi jine mwenye jwakusakala  Basa jwa ku Isalaeli paŵamjogoyisye Asa, jwalakwe jwaŵendile chikamuchisyo cha mwenye jwa ku Siliya. Yeleyi yatendekasisye kuti asimane ni yakusawusya. Kupitila mwa jwakulochesya Hanani, Yehofa ŵamsalile Asa kuti, “Ligongo lyakuti mwaŵisile chikulupi chenu kwa mwenye jwa ku Siliya mmalo mwakuŵika chikulupi chenu mwa Ambuje Mlungu jwenu likuga lya asilikali ŵangondo ŵa ku Isalaeli limtisile.” Kutandila pandaŵi jeleji Asa ŵatamilaga kuputwa. (2 Mbi. 16:7, 9; 1 Ayi. 15:32) Ana tukulijiganya chichi pelepa?

14. Ana mpaka mumdalile Yehofa chamtuli? Ana kumdalila Yehofa mpaka kumkamuchisye chamtuli, mwakamulana ni 1 Timoteo 4:12?

¹⁴ Ŵachinyamata mŵeje ŵakulinandiya soni mkaleka kumdalila Yehofa. Pamwagambile kubatisidwa, mwalosisye kuti mkwete chikulupi soni mkusamdalila Yehofa. Nombe Yehofa ŵalosisye kusangalala mwakumpochela ni makono gaŵili muliŵasa lyakwe. Chamkusosekwa kutenda sambano chili kupitilisya kumdalila Yehofa. Yikusaŵa yangasawusya kumdalila Yehofa pamkusagula yakutenda yekulungwakulungwa. Nambi uli pakwamba yakusagula yamwanamwana? Mkusosekwa kumdalila mnope Yehofa pakusagula yakutenda payindu mpela, yakusangalasya, masengo gakuchilambo nambosoni yakulinga ya paumi. Mkagambaga kudalila lunda lwenu. Mmalo mwakwe msoseje yiwundo ya m’Baibulo yampaka yimkamuchisye kusagula chenene soni mtendeje yindu mwakamulana ni yapatileyo. (Mis. 3:5, 6) Naga mkutenda yeleyi Yehofa chachiŵa jwakusangalala soni ŵandu mumpingo mwenu chachitanda kumchimbichisya.—Aŵalanje 1 Timoteo 4:12.

15. Mwakamulana ni 2 Mbili 18:1-3; 19:2, ana Mwenye Yehoshafati ŵalemwisye chichi?

¹⁵ Yili yisyene kuti wosopewe kupwatikapo jemanja ŵachinyamata tuli ŵangali umlama soni ndaŵi sine yindu mpaka yituleme. Nambope lyeleli likaŵa ligongo lyakutulepelekasya kutenda yampaka tukombole pakumtumichila Yehofa. Aganichisye chisyasyo cha Mwenye Yehoshafati. Jwalakwe jwakwete ndamo syambone syejinji. Chakundanda kwa ulamusi wakwe, jwalakwe “ŵamtumichilaga Mlungu jwa baba ŵawo soni ŵagapikanilaga malamusi ga Mlungu.” Yehoshafati ŵasitumile nduna kuti sipite mchajiganya ŵandu ŵaŵatamaga mmisinda ja ku Yuda yakwamba Yehofa. (2 Mbi. 17:4, 7) Nambope ndaŵi sine Yehoshafati jwatendaga yakusagula yakulemwecheka. Ligongo lyakusagula yindu  mwa kulemwechekaku jwapochele chikamuchisyo kutyochela kwa ŵandu ŵane ŵaŵamjimilaga Yehofa pandaŵijo. (Aŵalanje 2 Mbili 18:1-3; 19:2.) Ana ŵachinyamata mpaka mlijiganye chichi panganiji?

16. Ana mpaka mlijiganye chichi kutyochela pa chisyasyo cha Rajeev?

¹⁶ Mjitichisyeje soni mkamulichisyeje masengo chamuko champochele. Mpela ŵachinyamata, mwine ndaŵi sine mpaka yiŵe yakusawusya kuti mŵicheje kutumichila Yehofa pamalo gandanda paumi wenu. Naga yeleyi yikusiyatendechela, akadandawula. Alole yayamtendechele M’bale Rajeev pajwaliji jwachinyamata, “Ndaŵi sine nganimanyililaga yangusaka kutenda ni umi wangu. Mmalo mwakwawula kukulalichila soni kumisongano nanonyelaga mnope kung’anda mpela mwakusatendala ŵachinyamata ŵane.” Ana chichi chachamkamuchisye Rajeev? Jwamkulungwa jwamumpingo jwine ŵamkamuchisye jwalakwe mwachinonyelo. Rajeev jwatite, “M’baleju ŵangamuchisye kuti nganichisye chenene maloŵe gagali pa 1 Timoteo 4:8.” Rajeev jwalinandiye nikupochela malangisoga soni jwachenjile yindu yine paumi wakwe kuti juŵicheje yindu yakusosekwa pamalo gandanda. Jwalakwe jwatite, “Nasagwile kuti mbicheje yakumtumichila Yehofa pamalo gandanda.” Ana ayimanyi yakuyichisya yakwe? Jwalakwe jwatite, “Pali pagambile kupita ndaŵi jamnono kutyochela panapochele malangiso naŵajilwe kuŵa jwakutumichila jwakamuchisya.”

17. Ana ŵachikulile akusapikana uli mumtima pakwawona ŵachinyamata ali mkumtumichila Yehofa?

¹⁷ Ŵachikulile akusamyamichila jemanja ŵachinyamata ŵamkumtumichila Yehofa yimpepe ni jemanjaji. (Sef. 3:9) Jemanjaji akusasangalala pakumwona mlimkulipeleka soni kukamula mwakulimbichila masengo gampochele.—1 Yoh. 2:14.

18. Mwakamulana ni Misyungu 27:11, ana Yehofa akusapikana uli mumtima pakwawona ŵachinyamata ali mkutumichila?

¹⁸ Jemanja ŵachinyamata, mkaliŵalilaga kuti Yehofa akusamnonyela soni kumdalila mnope. Jwalakwe ŵasasile kuti masiku gakumalisya, pachiŵa ŵachinyamata ŵajinji ŵachachilipeleka mwakusachilila. (Sal. 110:1-3) Yehofa akusamanyilila kuti mkusamnonyela soni mkusasaka kumtumichila jwalakwe mwampaka mkombolele. Mwusimaneje mtima pamkutenda yindu ni ŵandu ŵane soni mkawutukaga miyasi pamkutenda yindu. Pamlemwisye mjitichisyeje soni kupochela chikamuchisyo ni kuchiwonaga kuti chikutyochela kwa Yehofa. (Aheb. 12:6) Pampochele utumiki winewakwe mwutendeje ni mtima wenu wosope. Chakusosekwa mnope chili chakuti, mtendeje yindu yampaka yimsangalasye Yehofa.—Aŵalanje Misyungu 27:11.