1-2. Ana mundu akusasosekwa kutenda chichi mkanaŵe kubatisidwa?

 YAKA msano yipiteyi, ŵandu ŵakupunda 1 miliyoni abatisidwe nikuŵa ŵa Mboni sya Yehofa. Mwamti ŵajinji mwa jemanjaji ŵalijiganyisye yisyesyene ‘kutandila paŵaliji ŵanache’ mpela muyaŵelele ni Timoteyo. (2 Tim. 3:​14, 15) Nambo ŵane mwa jemanjaji ŵatandite kulijiganya ali akusile, soni ŵane ali akalambele. Munyumamu, jwamkongwe jwine juŵalijiganyaga Baibulo ni ŵa Mboni sya Yehofa jwabatisidwe ali akwete yaka 97.

² Naga wawojo ali jwakulijiganya Baibulo kapena ŵapagwile m’liŵasa lya Mboni sya Yehofa, ana akuganisya ya kubatisidwa? Naga yili myoyo, nikuti akusagula kutenda chindu chakusosekwa mnope. Nambope, mkanaŵe kubatisidwa akusosekwa chandanda kulipeleka kaje kwa Yehofa. Mwamti nganiji chijakamuchisye kumanyilila ngopolelo ja kulipeleka. Chijakamuchisyesoni kumanyilila ligongo lyakwe ngakusosekwa kogopa kulipeleka kwa Yehofa soni kubatisidwa pakuyiwona kuti akoseche kutenda yeleyi.

ANA KULIPELEKA KWA YEHOFA KUKUSAGOPOLELA CHICHI?

3. Asale yisyasyo ya m’Baibulo ya ŵandu ŵaŵalipeleche kwa Yehofa.

³ Mundaŵi ja m’Baibulo, mundu juŵalipeleche kwa Yehofa jwaŵaga kuti asagulidwe kuti amtumichileje Yehofajo. Ayisalayeli ŵaliji mtundu wawalipeleche kwa Yehofa. Nambope Ayisalayeli ŵane ŵalipelekaga kwa Yehofa m’litala lyapadela. Jumo mwajemanjaji jwaliji Aloni juŵakwete “chimanyisyo cheswela chakulosya kulipeleka” mwakuŵika kachisyano kakunyesima ka golide pa nduŵila jakwe. Kachisyano ka golideka kalosyaga kuti jwasagulidwe kuti atende utumiki wapadela wakuŵa jwamkulungwa jwa ŵakutaga mbopesi jwa Ayisalayeli. (Lef. 8:9) Nombe Anasili ŵalipelekaga kwa Yehofa m’litala lyapadela. Maloŵe gakuti “Mnasili” gatyochele ku liloŵe lya Chihebeli lyalikusagopolela mundu “Jwasagulidwe,” kapena “Jwalipeleche.” Mwamti Anasili ŵasosekwaga kupikanila  malamusi gapadela gagalembedwe mu Chilamusi cha Mose kuti jemanjajo agakuyeje.—Num. 6:​2-8.

4. (a) Pagambile kulipeleka kwa Yehofa, ana chindu chakusosekwa mnope paumi wawo chikusaŵa chichi? (b) Ana “kuleka yakusaka ya mtima” kukusagopolela chichi? (Alole chiwulili.)

⁴ Mundu palipeleche kwa Yehofa, yikusaŵa kuti asagwile kuŵa jwakumkuya jwa Yesu Klistu soni kutenda yakusasaka Mlungu kukusaŵa chindu chikusosekwa mnope paumi wakwe. Ana kulipeleka kwa Yehofa kukusapwatikapo kutenda chichi? Yesu jwatite, “Jwalijose jwakusaka kunguya une, akusosekwa kuleka yakusaka ya mtima wakwe.” (Mat. 16:24) Maloŵe ga Chigiliki gaŵagagopolele kuti “kuleka yakusaka ya mtima wakwe” gakusalandana ni maloŵe gakuti “kulikana jika.” Mundu jwalipeleche kwa Yehofa akusosekwa kukana kutenda chindu chilichose chakusachiŵenga Yehofajo. (2 Akoli. 5:​14, 15) Yeleyi yikupwatikapo kuŵambala “masengo ga chilu” mpela chikululu. (Agal. 5:​19-21; 1 Akoli. 6:18) Ana kukuya yeleyi kukusaŵa kwakusawusya kwa wawojo? Iyayi, naga akusamnonyela Yehofa chachiyiwona kuti kupikanila malamusi gakwe kuli kwakamuchisya kwa wawojo. (Sal. 119:97; Yes. 48:​17, 18) M’bale jwine lina lyakwe Nicholas pakulondesya mfundoji jwatite, “Mpaka agawoneje malamusi ga Yehofa mpela lutenje lwa yisyano lwa kundende lwalukwalepelekasya kutenda yindu yakusaka, kapena mpaka agawoneje mpela yisyano ya kumalo kwakusunjila masimba yayikwachenjela ku yindu yakogoya.”

5. (a) Ana mpaka alipeleche chamtuli kwa Yehofa? (b) Ana pana kulekangana kwamtuli pasikati pa kulipeleka ni kubatisidwa? (Alole chiwulili.)

⁵ Ana mundu mpaka alipeleche chamtuli kwa Yehofa? Akusamsalila Yehofa mwipopelo kuti chachimtumichilaga jwalakwe soni kuti chachiŵikaga yakusasaka Yehofa pamalo gandanda paumi wakwe. Patesile yeleyi yikusaŵa kuti atesile chilanga kwa Yehofa chakuti chachipitilisya kumnonyela jwalakwe ‘ni mtima wawo wosope, ni umi wawo wosope, ni nganisyo syawo  syosope soni ni machili gawo gosope.’ (Maliko 12:30) Mundu akusalipeleka kwa Yehofa pali kwajika. Mwakulekangana ni yeleyi, kubatisidwa kukusatendekwa pameso pa ŵandu, kwalosya jemanjajo kuti ŵalipeleche kwa Yehofa. Kulipeleka kwawo chili chilanga chakusosekwa mnope kwa Yehofa. Mwamti Yehofa akusajembecheya kuti wawojo chatendeje yindu mwakamulana ni chilanga chawo.—Jwak. 5:​4, 5.

LIGONGO CHICHI AKUSOSEKWA KULIPELEKA KWA YEHOFA?

6. Ana ni chichi chachikusamtendekasya mundu kulipeleka kwa Yehofa?

⁶ Ligongo lyekulungwa lyampaka lyatendekasye kulipeleka kwa Yehofa lili lyakuti akusamnonyela jwalakwe. Chinonyelo chawo pa Yehofa changagamba kwegamila mwakupikanila mumtima. Mmalomwakwe akusatanda kumnonyela Yehofa ligongo ‘lyakumanyilila chenene’ soni “kupikanichisya chenene yindu” yakwamba Mlungujo soni yakusasaka jwalakwe. (Akolo. 1:9) Kulijiganya kwawo Baibulo kwakamuchisye kukulupilila kuti (1) Yehofa ali jusyesyene, (2) Baibulo jili Maloŵe ga Mlungu, soni (3) kuti jwalakwe akukamulichisya masengo gulu jakwe pakukwanilisya yakulinga yakwe.

7. Ana tukusasosekwa kutenda chichi mkanituŵe kulipeleka kwa Mlungu?

⁷ Ŵandu ŵaŵalipeleche kwa Yehofa akusasosekwa kumanyilila yijiganyo yandanda ya m’Baibulo soni kutendaga yindu mwakamulana ni malamusi ga Mlungu. Akusatendasoni yampaka akombole pakwasalila ŵane yakusakulupilila. (Mat. 28:​19, 20) Jemanjaji akusamnonyela mnope Yehofa soni akusaŵa ŵakusachilila kumtumichila jwalakwe jikape. Ana mwelemu ni mwayiŵelelesoni ni wawojo? Kumnonyela kwawo mnope Yehofa kuchakamuchisya kuti akagamba kulipeleka kwa jwalakwe soni kubatisidwa  pakwamba kusaka kwasangalasya ŵakwajiganya Baibulo, achinangolo ŵawo kapena pakwamba kujigalila yakutenda achimjawo.

8. Ana kuyamichila kwakamuchisye chamtuli wawojo kuti alipeleche kwa Yehofa? (Salimo 116:​12-14)

⁸ Naga akuganichisya soni kuyamichila yindu yosope yambone yaŵatendele Yehofa yichiŵa yangasawusya kulinganya yakuti alipeleche kwa jwalakwe. (Aŵalanje Salimo 116:​12-14.) Yili yakupikanika kuti Baibulo jikusamkolanga Yehofa kuti ali Jwakupeleka “mtuka uliwose wambone soni wamlama.” (Yak. 1:17) Mtuka wekulungwa pa mitukaji uli mbopesi jakutuwombola jaŵapeleche jwalakwe kupitila mwa Yesu jwali Mwanache jwakwe. Aganichisye kusosekwa kwa mtukawu. Mbopesiji jakamuchisye wawojo kuti aŵe paunasi wakulimba soni wambone ni Yehofa. Nambosoni jakamuchisye wawojo kuti akole chembecheyo chakutama ni umi mpaka kalakala. (1 Yoh. 4:​9, 10, 19) Kulipeleka kwa Yehofa chili chindu chambone mnope chakusatenda mundu pakulosya kuyamichila mbopesi jakutuwombolaji soni yindu yambone yosope yaŵele ali mkumtendela Yehofajo. (Det. 16:17; 2 Akoli. 5:15) Kuyamichila kweleku akulondesisye chenene mu buku ja Asangalaleje Mpaka Kalakala, mu lijiganyo 46, kamtwe 4, kakakwete fidiyo ja maminisi gatatu jakuti Kupeleka Mtuka Wawo kwa Mlungu.

ANA ALI ŴAKOSEKA KULIPELEKA SONI KUBATISIDWA?

9. Ligongo chichi mundu ngakusosekwa kogopa kulipeleka kwa Yehofa?

⁹ Komboleka ndaŵi sine mpaka ayiwoneje kuti nganaŵe kukoseka kuti alipeleche soni kubatisidwa. Mwine mpaka akole nganisyosi ligongo lyakuti pana yindu yine yakusosekwa kuchenga paumi wawo kuti apikanileje malamusi ga Yehofa. Kapena akusosekwa ndaŵi jakwanila kuti alimbisye chikulupi chawo. (Akolo. 2:​6, 7) Ngaŵa kuti ŵakulijiganya wosope akusatanda kumnonyela Yehofa pandaŵi jakulandana. Nambosoni ŵachinyamata wosope ŵangalipelekaga soni kubatisidwa ali akwete yaka yakulandana. Myoyo, pakulola yindu yakusosekwa kuchenga paumi wawo soni yampaka akombole kutenda aŵambaleje kulilandanya ni ŵane.—Agal. 6:​4, 5.

10. Ana mpaka atende chichi naga akuyiwona kuti nganaŵe kukoseka kuti alipeleche soni kubatisidwa? (Alole libokosi lyakuti “ Yampaka Yakamuchisye Ŵanache Ŵaŵapagwile m’Liŵasa lya Mboni sya Yehofa.”)

¹⁰ Atamose pakuyiwona kuti nganaŵe koseka kuti alipeleche kwa Yehofa akusosekwa kola chakulinga chakuti lisiku line chalipeleche. Amŵendeje Yehofa kuti ŵakamuchisye kuchenga yindu paumi wawo. (Afil. 2:13; 3:16) Akakayichilaga yakuti Yehofa chachipikana lipopelo lyawo ni kwakamuchisya.—1 Yoh. 5:14.

YINDU YAYIKUSIYATENDEKASYA ŴANE KUCHELEWA KULIPELEKA SONI KUBATISIDWA

11. Ana Yehofa chachitukamuchisya chamtuli kuti tupitilisye kuŵa ŵakulupichika kwa jwalakwe?

¹¹ Ŵandu ŵane akusatenda chisyewu kuti alipeleche soni kubatisidwa. Komboleka jemanjaji akusaganisyaga kuti, ‘Ana yichimalila uli naga chindende ulemwa wekulungwa soni kutyosyedwa mumpingo?’ Naga wawojo akogopa yeleyi, aŵe ŵakusimichisya kuti Yehofa chachakamuchisya mwakwapa yiliyose yakusosechela ‘kuti ajendeje mwakamulana ni yakusasaka [jwalakwe].’ (Akolo. 1:10) Jwalakwe chachapasoni machili gakwakamuchisya kuti atendeje yambone. Yehofa alosisye kala kuti ali jwakoseka kwakamuchisya wawojo ligongo ŵakamuchisye ŵandu ŵane kuti atendeje yambone. (1 Akoli. 10:13) Ni ligongo lyakwe ŵandu ŵakutyosyedwe mumpingo akusaŵaga ŵamnono. Yeleyi yikusakomboleka ligongo lyakuti Yehofa akusiŵakamuchisya ŵandu ŵakwe kuti apitilisye kuŵa ŵakulupichika.

12. Ana mpaka tuŵambale chamtuli kutenda ulemwa wekulungwa?

¹² Mundu jwalijose jwangali umlama akusalinjidwa kuti atende yakusakala. (Yak. 1:14) Nambope, mundu jwalijose akusakola ufulu wakusagula  yakutenda pandaŵi jakulinjidwa. Kusala yisyene wawojo ni ŵakwete udindo wakusagula yakutenda, chinga yambone kapena yakusakala. Ŵandu ŵane akusasalaga kuti mundu nganaŵa akombwele kulilekasya yakuganisya kapena yakusaka kutenda. Nambo yeleyi yili yaunami. Mundu mpaka akombole kulilekasya ku yindu yakusakala yakusaganisya. Atamose pakulinjidwa, yili yakomboleka kulilekasya kuti akatenda yakusakala. Nambo kuti akombole kutenda yeleyi, akusosekwa kupopela kwa Yehofa lisiku lililyose. Akusosekwasoni kulijiganyaga Maloŵe ga Mlungu ndaŵi syosope soni kusongana. Nambosoni akusosekwa alalichileje. Pakutenda yindu yeleyi ndaŵi syosope, yichakamuchisya kuti apitilisye kuŵa ŵakulupichika kwa Yehofa. Akusosekwa kukumbuchila kuti Yehofa chachakamuchisya kuti akombole kutenda yeleyi.—Agal. 5:16.

13. Ana Yosefe jwapeleche chisyasyo chambone chamtuli kwa m’weji?

¹³ Naga akutendela chile pulani pa yindu yampaka atende pasimene ni chakulingwa, yichakamuchisya kuti chakombole kuŵa ŵakulupichika kwa Yehofa. Baibulo jikusasala ya ŵandu ŵajinji ŵaŵakombwele kutenda yeleyi atamose kuti ŵaliji ŵangali umlama. Mwachisyasyo, ŵamkwakwe Potifala ŵamnyenjelelaga Yosefe mwakuwilisyawilisya kuti agone najo. Nambo Yosefe jwaliji ali atesile kala pulani ja yampaka atende pasimene ni chakulingwa mpela chelechi. Baibulo jikusatusalila kuti, “jwalakwe ŵakanile” mwamti jwatite, “Ana mpaka ndende uli chakulemwa chekulungwa chelechi ni kumleŵela Mlungu?” (Gen. 39:​8-10) Pelepatu yikulosya kuti Yosefe jwalinganyile chile pulani ja yindu yampaka atende jwamkongweju mkanaŵe kutanda kumnyenjelela. Yeleyi yamkamuchisye Yosefe kuti atende yindu mwalunda pandaŵi jaŵasimene ni chakulingwachi.

14. Ana mpaka tuŵambale chamtuli kutenda yakusakala?

¹⁴ Ana wawojo mpaka amsyasye chamtuli Yosefe? Mpaka alinganyile chile pulani ja yampaka atende pasimene ni chakulingwa. Alijiganyeje kukana mwachitema kutenda yindu yakusaŵengana nayo Yehofa, soni kuŵambala kuyiganichisya. (Sal. 97:10; 119:165) Kutenda yeleyi kuchakamuchisya kuti akatenda ulemwa pakulinjidwa, ligongo yichiŵa kuti akumanyilila kala yakutenda.

15. Ana mundu mpaka alosye chamtuli kuti ‘akumsosasosa [Yehofa] ni mtima wosope’? (Ahebeli 11:6)

¹⁵ Komboleka wawojo akumanyilila kuti ŵapatile yisyesyene soni akusaka kumtumichila Yehofa ni mtima wawo wosope. Nambope akuyiwona  kuti nganaŵe koseka kuti alipeleche soni kubatisidwa. Chisyasyo cha Mwenye Daudi mpaka chakamuchisye mnope. Mpaka amŵende Yehofa kuti, “Andolechesye, ŵalakwe Mlungu, kuti awumanyilile mtima wangu. Alinje une, kuti amanyilile nganisyo syangu. Andolechesye naga ngukuya matala gangalumbana galigose, ni alongolele mwitala lyawo lyangamala.” (Sal. 139:​23, 24) Kusala yisyene, Yehofa akusiŵapa upile ŵandu “ŵakusamsosasosa ni mtima wosope.” Mwamti kulingalinga kwawo kuti alipeleche soni kubatisidwa kukusalosya kuti akumsosasosa jwalakwe.—Aŵalanje Ahebeli 11:6.

APITILISYE KUMŴANDICHILA YEHOFA

16-17. Ana Yehofa akusiŵawutila chamtuli mu gulu jakwe ŵandu ŵaŵapagwile m’liŵasa lya Mboni sya Yehofa? (Yohane 6:44)

¹⁶ Yesu jwasasile kuti Yehofa ni jwakusiŵawutila ŵakumkuya ŵakwe mu gulu jakwe. (Aŵalanje Yohane 6:44.) Aganichisye kusosekwa kwa maloŵega soni yagakuti pakwakwaya wawojo. Yehofa akusaŵa kuti jwalolite kandu kanekakwe kambone mwa mundu jwalijose juŵamwutile kwa jwalakwe. Jwalakwe akusamwona mundu jwalijose kuŵa “chipanje chakwe chapajika.” (Det. 7:​6, NWT.) Mwamti wawojosoni akusiŵawona kuti ali chipanje chakwe chapajika.

¹⁷ Komboleka kuti wawojo ali mwanache jwakukulila m’liŵasa lya Mboni sya Yehofa. Naga yili myoyo, mwine mpaka aganisyeje kuti akumtumichila Yehofa ligongo lyakwakuya achinangolo ŵawo ngaŵaga ligongo lyakuti Yehofa ŵawutile wawojo mgulu jakwe. Nambotu Baibulo jikusati, “Mumŵandichile Mlungu, soni jwalakwe chachimŵandichila jemanja.” (Yak. 4:8; 1 Mbi. 28:9) Pelepa mfundo jakwe jili jakuti, wawojo pakulingalinga kumŵandichila Yehofa, nombe jwalakwejo chachaŵandichila. Yehofa akusiŵaŵalanjila wawojo pajika. Jwalakwe akusamwutila mundu jwalijose mgulu jakwe kuti amtumichileje kupwatikapo mundu jwalijose jwakulile m’liŵasa lya Mboni sya Yehofa. Mwamti munduju pakulingalinga kumŵandichila Yehofa, nombe jwalakwejo akusamŵandichila mpela mwaŵechetele pa Yakobo 4:8.—Alole 2 Atesalonika 2:13.

18. Ana mungani jakuyichisya tuchikambilana yamtuli? (Salimo 40:8)

¹⁸ Palipeleche kwa Yehofa soni kubatisidwa, akusaŵa kuti akumsyasya Yesu. Jwalakwe jwalipeleche kwa Atati ŵakwe mwakutenda chilichose chaŵasakaga Atati ŵakwewo. (Aŵalanje Salimo 40:8; Aheb. 10:7) Mungani jakuyichisya, tuchikambilana yampaka yakamuchisye wawojo kuti chakombole kumtumichila Yehofa mwakulupichika panyuma pakubatisidwa.