1. Ana ŵakutumichila ŵa Mlungu ŵane ŵakulupichika akusakayichilaga ya chichi?

 KUSALA yisyene, yili yakusangalasya mnope kumanyilila kuti Yehofa akusasangalala ni ŵakutumichila ŵakwe wosope. Mwamti Baibulo jikusati, “AMBUJE akusasangalala nawo ŵandu ŵakwe.” (Sal. 149:4) Nambope, ndaŵi sine ŵandu ŵane akusakayichila yakuti Yehofa akusasangalala ni jemanjajo. Atamose m’Baibulo, mwana ŵandu ŵajinji ŵaŵamtumichilaga Yehofa mwakulupichika ŵele pandaŵi jine yasawusyaga kulupilila yakuti Yehofa akusasangalala ni jemanjajo.—1 Sam. 1:​6-10; Yob. 29:​2, 4; Sal. 51:11.

2. Ana Yehofa akusasangalala ni ŵani?

² Baibulo jikusasala mwakupikanika chenene kuti ŵandu ŵangali umlama mpaka akombole kumsangalasya Yehofa. Ana yeleyi mpaka yikomboleche chamtuli? Tukusasosekwa kumkulupilila Yesu Klistu soni kubatisidwa. (Yoh. 3:16) Patutesile yeleyi, tukusalosya kuti tulesile yakulemwa yetu soni tumsalile Mlungu kuti tukusaka kutenda yakusasaka jwalakwe. (Mase. 2:38; 3:19) Yehofa akusasangalala mnope patutesile yeleyi pakusaka kuŵa najo paunasi wambone. Myoyo, patukupitilisya kumtumichila Yehofa mwakulupichika, jwalakwe akusasangalala ni m’weji mwamti akusatuwona kuŵa achimjakwe.—Sal. 25:14.

3. Ana chitukambilane yiwusyo yitatu yapi?

³ Munganiji chitupate kwanga kwa yiwusyo yakuyichisyayi: Ligongo chichi ndaŵi sine ŵane akusakayichila yakuti Yehofa akusasangalala ni jemanjajo? Ana Yehofa akusalosya chamtuli kuti akusasangalala ni m’weji? Soni ana Mklistu mpaka atende chichi kuti akulupilileje mnope yakuti Yehofa akusasangalala najo?

 YAYIKUSIYATENDEKASYA ŴANE KUYIWONA KUTI YEHOFA JWANGASANGALALA NI JEMANJAJO

4-5. Atamose kuti mpaka tulipikaneje kuŵa ŵangasosekwa, ana tukusosekwa kuŵa ŵakusimichisya ya chichi?

⁴ Ŵajinji mwa m’weji tuŵele tuli mkuliwona kuŵa ŵangasosekwa kutandila tuli ŵanache. (Sal. 88:15) M’bale jwine lina lyakwe Adrián jwatite, “Ndaŵi syosope ngusaliwona kuŵa jwangasosekwa. Ngusakumbuchila kuti panaliji kamnyamata, napopelaga kuti liŵasa lyetu chilijinjile mu Paladaiso chitamilecho nayiwonaga kuti unejo nganimba jwakuŵajilwa kwinjilamo.” Nombe M’bale Tony jwanganapagwila m’liŵasa lya Mboni sya Yehofa jwatite, “Pangali ndaŵi jaŵaŵechete achinangolo ŵangu kuti akusanonyela kapena kuyamichila pa yindu yineyakwe. Yeleyi yandendekasyaga kuganisya kuti pangali champaka ndende chakwasangalasya jemanjajo.”

⁵ Naga ndaŵi sine sikusatuyichila nganisyo syakuliwona kuŵa jwangasosekwa, tukumbuchileje kuti twasimanikwe mu guluji ligongo lyakuti Yehofa ni juŵatuwutile kwa jwalakwe. (Yoh. 6:44) Jwalakwe jwalolite yambone mwa m’weji soni akusamanyilila mwatuŵelele. (1 Sam. 16:7; 2 Mbi. 6:30) Myoyo, tukakayichilaga jwalakwejo pakutusalila kuti tuli ŵakusosekwa mnope.—1 Yoh. 3:​19, 20.

6. Ana ndumetume Paulo jwalipikanaga chamtuli ni yakulemwa yaŵatesile kala?

⁶ Mkanitutande kulijiganya Baibulo, komboleka ŵane mwa m’weji twatendaga yindu yayikusatutendekasya kutamila kulijimba magambo. (1 Pet. 4:3) Atamose ŵandu ŵane ŵakusamtumichila Yehofa mwakulupichika, ndaŵi sine akusalagasika nganisyo ligongo lya yakulepela yawo. Ana wawojo ndaŵi sine akusayiwona kuti Yehofa nganaŵa ŵakululuchile? Naga akusaganisya myoyo, amanyilile kuti nganaŵa jika. Nombe ŵakutumichila ŵane ŵa Yehofa ŵakulupichika ŵalagaga ni nganisyo syelesi. Mwachisyasyo, ndumetume Paulo jwaliwonaga kuŵa mundu jwakutesya chanasa pajwaganichisyaga ya yakulemwa yakwe. (Alo. 7:24) Nambotu Paulo jwaliji ali alesile yakulemwa yakwe soni jwaliji ali abatisidwe. Atamose kuti yaliji myoyo, jwalakwe jwasasile kuti jwaliji “jwamnandi mnope mwa ŵandumetume wosope” soni “jwakulemwa mnope.”—1 Akoli. 15:9; 1 Tim. 1:15.

7. Ana tukusosekwa tukumbuchileje ya chichi pa yakulemwa yatwatesile kala?

⁷ Atati ŵetu ŵakwinani, akusaŵa ŵakoseka kutukululuchila patulesile kutenda yakulemwa. (Sal. 86:5) Myoyo naga tukulitendela chanasa yisyesyene pa yakulemwa yatutesile, tukakayichilaga yakuti Yehofa atukululuchile.—Akolo. 2:13.

8-9. Ana mpaka tumalane chamtuli ni nganisyo syakulipikana kuti nganituŵa tutesile yejinji pakumtumichila Yehofa?

⁸ Wosopewe tukusasaka kumtumichila Yehofa m’matala gejinji. Nambope, ŵandu ŵane akusayiwona kuti nganaŵa akombwele kutenda yindu yakumsangalasya Yehofa. Mlongo jwine lina lyakwe Amanda jwatite, “Naganisyaga kuti kutenda yampaka ngombole pakumtumichila Yehofa kukusagopolela kutenda yejinji. Yeleyi yandendekasyaga kuti sacheje kutenda yindu yejinji yanganimba ngombwele. Mwamti pandepele kutenda yineyakwe naganisyaga kuti Yehofa ngakusangalala ni uneji.”

⁹ Ana chichi champaka chitukamuchisye kumalana ni nganisyo syakuti nganituŵa tukombwele kutenda yindu yakumsangalasya Yehofa? Tukumbuchileje kuti Yehofa ali jwakundilila. Jwalakwe jwangajembecheyaga kuti chitutendeje yindu kupunda yampaka tukombole. Mmalomwakwe, jwalakwe akusayamichila mnope patukutenda yindu yampaka tukombole. Kuganichisya yisyasyo ya m’Baibulo ya ŵandu ŵaŵamtumichile Yehofa ni mtima wosope mpaka kutukamuchisye mnope. Aganichisye ya Paulo. Kwa yaka yejinji, Paulo jwakamwile masengo mwakulipeleka pakumtumichila Yehofa. Jwalakwe jwajendaga maulendo gelewu mnope soni jwatamilikasisye mipingo jejinji. Nambo, ana Yehofa jwalesile kusangalala ni Paulo pajwalepelaga kutenda yejinji pamasengo gakulalichila mpela mujwatendelaga pandanda? Iyayi. Mmalomwakwe, Paulo pajwapitilisye kutenda yampaka akombole, mwamti Yehofa jwampaga upile. (Mase. 28:​30, 31) Yeleyitu, yikutukamuchisya  kumanyilila kuti ndaŵi sine nganituŵa tukombwele kumtumichila Yehofa mpela mutwatendelaga pandanda. Nambo chakusosekwa mnope kwa Yehofa chikusaŵa magongo gagakututendekasya kuti tumtumichileje. Kwende tulole matala gane gakusakamulichisya masengo Yehofa pakulosya kuti akusangalala ni m’weji.

YAKUSATENDA YEHOFA PAKULOSYA KUTI AKUSASANGALALA NI M’WEJI

10. Ana mpaka tumanyilile chamtuli kuti Yehofa akusasangalala ni m’weji? (Yohane 16:27)

¹⁰ Jwalakwe jwatupele Baibulo. Yehofa akusalosya kuti akusatunonyela soni kuti akusasangalala ni m’weji kupitila m’matala gejinji. M’Baibulo, Yehofa ŵamsalile Yesu kwa maulendo gaŵili kuti ali Mwanache jwakwe jwapamtima soni kuti akusasangalala najo. (Mat. 3:17; 17:5) Ana akusasaka ali ampikene Yehofa ali mkwasalila kuti akusasangalala ni wawojo? Yehofa nganaŵa aŵechete ni m’wejo kutyochela kwinani, nambo akusaŵecheta ni m’weji kupitila m’Maloŵe gakwe Baibulo. Patukuŵalanga maloŵe gaŵaŵechete Yesu kwa ŵandumetume ŵakwe, yikusaŵa mpela ‘tukumpikana’ Yehofa ali mkutusalila maloŵe gachinonyelogo m’weji. (Aŵalanje Yohane 16:27.) Mwamti Yesu jwasyasyaga umundu wa Atati ŵakwe. Myoyo, patukuŵalanga maloŵe gaŵaŵechete Yesu kwa ŵakulijiganya ŵakwe ŵaŵaliji ŵakulupichika gakulosya kuti ŵasangalalaga nawo atamose kuti ŵaliji ŵangali umlama, mpaka tuyiwoneje kuti Yehofa akuŵecheta maloŵego kwa m’weji.—Yoh. 15:​9, 15.

11. Ligongo chichi yakusawusya yatukusasimana nayo yangagopolela kuti Yehofa alesile kutunonyela? (Yakobo 1:12)

¹¹ Yehofa akusatupa yindu yatukusosechela. Yehofa ali jwakusachilila kutupa yindu yakusosechela yakuchilu. Nambotu ndaŵi sine jwalakwe akusakunda kuti tusimane ni yakusawusya mpela muyaŵelele ni mundu jwakulungama Yobu. (Yob. 1:​8-11) Patukusimana ni yakusawusya yangagopolela kuti Mlungu alesile kusangalala ni m’weji. Mmalomwakwe, yakusawusyayo yikusatupa upile wakulosya kuti tukusamnonyela mnope soni kuti tukusamdalila jwalakwe. (Aŵalanje Yakobo 1:12.) Mwamti patukusimana ni yakulingwa ni patukusalola yakusati jwalakwe pakutunonyela soni kutukamuchisya kuti tupitilisyepe kupilila.

12. Ana tukulijiganya chichi kutyochela pa yindu yaŵasimene nayo M’bale Dmitrii?

¹² Aganichisye yayamtendechele m’bale jwine jwakusatama ku Asia lina lyakwe Dmitrii. Jwalakwe masengo gammalile soni kwa myesi jejinji nganapataga masengo gane. M’baleju jwalosisye kumdalila mnope Yehofa mwakulimbichila pamasengo ga kulalichila kupunda mujwatendelaga pajwaliji pamasengo. Myesi jejinji jamasile mkanapate masengo. Kaneko jwatandite kulwala ulwele  wekulungwa mwamti nganakombolaga kwimuka pa bedi jakwe. Jwalakwe jwatandite kuganisya kuti akulepela kukwanilisya udindo wakwe mpela mtwe wa liŵasa soni kuti Yehofa ngakusangalala najo. Lisiku line kamwanache kakwe kakakongwe kalembile pachipepala lilemba lya Yesaya 30:15 lyalikusati, ‘Chimchikolasoni machili naga mkutenda yindu mwakuwusimana mtima, soni naga mkulosya chikulupi.’ Ni kajigele chipepalacho kwawula nacho pabedi jiŵagonile babagwewo ni ŵasalile kuti, “Baba pakupikana kupweteka mnope aganichisyeje lilemba ali.” Yeleyi yamkamuchisye m’baleju kuyamichila yindu yambone yaŵatendaga Yehofa ku liŵasa lyakwe mpela kwakamuchisya kuti apateje yakuwala, yakulya soni malo gagona. Jwalakwe jwatite, “Chindu chinasosechelaga chaliji, kutenda yindu mwakuwusimana mtima, soni kulosya chikulupi pa Mlungu.” Naga akusimana ni chakusawusya mpelaga chelechi amdalileje Yehofa mwamti chachakamuchisya kuti akombole kupilila.

13. Ana Yehofa mpaka akamulichisye masengo ŵani pakusaka kutulosya kuti akusasangalala ni m’weji?

¹³ Jwalakwe atupele abale ni alongo. Yehofa akusakamulichisya masengo abale ni alongo pakusaka kutulosya kuti akusasangalala ni m’weji. Mwachisyasyo, jwalakwe mpaka atendekasye mundu jwine kutusalila maloŵe gakulimbikasya. Yeleyi ni yayamtendechele mlongo jwine jwa ku Asia ali alagasiche nganisyo. Jwalakwe masengo gammalile soni jwatandite kulwala ulwele wekulungwa. Kaneko ŵamkwakwe ŵatesile ulemwa wekulungwa mwamti ŵalesile kutumichila mpela jwamkulungwa jwa mumpingo. Mlongoju jwatite, “Nganimbikanichisyaga ligongo lyakwe yeleyi yandendechelaga. Mwamti naganisyaga kuti natesile chindu chakulemwecheka soni kuti Yehofa ŵalesile kunonyela.” Mlongoju jwamŵendile Yehofa kuti amsimichisye kuti akusasangalala najo. Ana jwamsimichisye chamtuli yeleyi? Jwalakwe jwasasile kuti, “Achakulungwa ŵa mumpingo ŵandimbikasisye soni ŵasimichisye kuti Yehofa akusanonyela.” Nambo pali papitile ndaŵi mlongoju jwamŵendilesoni Yehofa kuti  amlosye naga akusangalala najo. Jwalakwe jwatite, “Lisiku lili napochele chikalata kutyochela kwa abale ni alongo. Maloŵe ganaŵalasile m’chikalatachi gandimbikasisye mnope soni namanyilile kuti Yehofa akusambikana. Kusala yisyene Yehofa akusalosya kuti akusatunonyela kupitila m’maloŵe gachinonyelo gakusatusalilaga ŵandu ŵane.—Sal. 10:17.

14. Ana ni litala line lyapi lyakusakamulichisya masengo Yehofa pakulosya kuti akusasangalala ni m’weji?

¹⁴ Yehofa akusalosyasoni kuti akusangalala ni m’weji kupitila mwa abale ni alongo ŵakusatujamuka naga yikusosechela. Mwachisyasyo, mundaŵi ja ŵandumetume, Yehofa jwamkamulichisye masengo ndumetume Paulo kulemba yikalata yakwana 14 kwa ŵakulupilila achimjakwe. Kupitila mu yikalatayi, Paulo jwajamwiche Aklistu achimjakwewo mwangapita mumbali nambo mwachinonyelo. Ligongo chichi Yehofa jwamsalile Paulo kuti mu yikalatayo apwatichemo ngani syakwajamuka achimjakwewo? Yehofa ali Mtati jwambone, soni akusiŵajamuka ŵanache ŵakwe ‘ŵakusiŵanonyela.’ (Mis. 3:​11, 12) Myoyo, naga mundu jwine akutujamuka pakamulichisya masengo Baibulo tuyiwoneje kuti uli umboni wakulosya kuti Yehofa akutunonyela. (Aheb. 12:6) Ana ni yindu yine yapi yampaka yitukamuchisye kumanyilila kuti Yehofa akusangalala ni m’weji?

MAUMBONI GANE GAKULOSYA KUTI YEHOFA AKUSASANGALALAGA NI M’WEJI

15. Ana Yehofa akusapeleka msimu wakwe weswela kwa ŵani? Soni ligongo chichi yeleyi yili yakulimbikasya?

¹⁵ Yehofa akusiŵapa msimu weswela ŵandu ŵakusasangalala nawo. (Mat. 12:18) Myoyo, tukusosekwa kuliwusya kuti, ‘Ana ngwete sine mwa ndamo syakusakola mundu ligongo lya msimu weswela?’ Ana wawojo akusatenda yindu mwakuwusimana mtima ni ŵane kulekangana ni muŵatendelaga mkanaŵe kummanyilila Yehofa? Kulosya kwawo ndamo jele msimu wa Mlungu ukusatukamuchisya kukola, uli umboni wamachili wakulosya kuti Yehofa akusangalala ni wawojo.—Alole libokosi lyakuti “ Msimu Weswela Ukusamkamuchisya Mundu Kola Ndamo Mpela . . . ”

16. Ana Yehofa akusakamulichisya masengo ŵani kuti alalichileje ngani syambone? Ana yeleyi yikusiyatendekasya wawojo kuti apikaneje uli mumtima? (1 Atesalonika 2:4)

¹⁶ Yehofa ŵapele masengo gakulalichila ngani syambone ŵandu ŵaŵajitichisye jwalakwe. (Aŵalanje 1 Atesalonika 2:4.) Alole yakuyichisya yambone yaŵasimene nayo Mlongo Jocelyn ligongo lyakulalichila ngani syambone. Lisiku line jwalakwe jwajimwiche ali jwamtenguche. Jwalakwe jwatite, “Najimwiche ndili jwangali machili soni ndili mkulipikana kuŵa jwangali mate, chitamilecho naliji mpayiniya soni lyeleli lyaliji lisiku lyangusajinjila  mu utumiki. Myoyo, napopesile ni kwawula kukulalichila.” Kundaŵi kwa lisiku lyeleli, mlongoju jwasimene ni jwamkongwe jwine lina lyakwe Mary. Jwamkongweju jwakwete nganisyo syambone mwamti jwajitichisye yakutanda kulijiganya Baibulo. Pali pamasile myesi, Mary jwasasile kuti paŵapoposyaga Mlongo Jocelyn, jwalakwe jwaliji mkupopela kwa Mlungu kuti amkamuchisye. Pakuganichisya chakutendekwachi, Mlongo Jocelyn jwatite, “Nalipikene mpela Yehofa akusalila kuti, ‘Ngusangalala ni mmwejo.’” Yili yisyene kuti ngaŵa jwalijose jwampaka apikanile utenga watukusalalichila. Nambope mpaka tuŵe ŵakusimichisya kuti Yehofa akusasangalala ni m’weji naga tukutenda yampaka tukombole kuti tulalichileje utenga wambone kwa ŵane.

17. Ana alijiganyisye chichi pa yindu yajwasasile Mlongo Vicky pakwamba ya mbopesi jakutuwombola? (Salimo 5:12)

¹⁷ Yehofa akusakamulichisya masengo machili ga mbopesi jakutuwombola kwa ŵandu ŵakusiŵajitichisya. (1 Tim. 2:​5, 6) Nambi uli naga mtima wetu ngawukwikutila yakuti Yehofa akusangalala ni m’weji, atamose kuti twabatisidwe soni kuti tukusakulupililaga mbopesi jakutuwombola? Tukumbuchileje kuti ndaŵi sine yindu yatukusaganisya yikusaŵa yangadalilichika nambo mpaka tumdalileje Yehofa ndaŵi syosope. Jwalakwe akusiŵawona ŵandu ŵakusakulupilila mbopesi jakutuwombola kuŵa ŵakulungama pameso pakwe soni akusiŵapa upile jemanjaji. (Aŵalanje Salimo 5:12; Alo. 3:26) Kuganichisya ya mbopesi jakutuwombola kwamkamuchisye Mlongo Vicky. Lisiku line panyuma pakuganichisya mwakusokoka ya mbopesi jakutuwombola, jwalakwe jwasasile kuti, “Yehofa aŵele ali mkuwusimana mtima ni uneji kwa ndaŵi jelewu. . . . Nambo pandaŵi josopeji yaliji mpela ngumsalila jwalakwe kuti, ‘Chinonyelo chawo nganichiŵa chiyiche kwa une. Mbopesi jakutuwombola jaŵapeleche Mwanache jwawo nganijiŵa jisimasisye ulemwa wangu.’” Nambo panyuma pakuganichisya mwakusokoka ya mtuka wa mbopesi jakutuwombolawu, jwalakwe jwalipikene kuti Yehofa akusamnonyela. M’wejisoni mpaka tulipikane mwakulandanamo soni kuyiwona kuti Yehofa akusangalala ni m’weji patukuganichisya mwakusokoka ya mbopesi jakutuwombola.

18. Ana tukusosekwa kusimichisya ya chichi naga tukupitilisya kumnonyela Yehofa?

¹⁸ Atamose kuti mpaka tulinjilileje kukamulichisya masengo yatulijiganyisye munganiji, nambope ndaŵi sine mpaka tutenguche soni kutanda kukayichila yakuti Yehofa akusasangalala ni m’weji. Myoyo naga yeleyi yikwatendechela akumbuchileje kuti Yehofa akusasangalala ni “ŵandu ŵakusamnonyela Jwalakwe.” (Yak. 1:12) Kwende tupitilisye kumŵandichila Yehofa soni tuloleje matala gakusalosya jwalakwe kuti akusasangalala ni m’weji. Mwamti ndaŵi syosope akumbuchileje kuti Yehofa “nganaŵa kwakutalikangana ni jwalijose jwa m’weji.”—Mase. 17:27.