1-2. Ana mundu akusapataga upile wamtuli panyuma pakubatisidwa?

 MUNDU akusasangalala mnope pabatisidwe ni kuŵa jwa Mboni sya Yehofa. Mwamti ŵandu ŵaŵalipeleche kwa Yehofa ni kubatisidwa mpaka ajitichisye yajwasasile jwamasalimo Daudi kuti, “Jwana upile mundu jwamsagwile ŵalakwe ni kwika najo kutama mu nganya jawo.”—Sal. 65:4.

² Yehofa jwangamwutilaga mundu jwalijose mu gulu jakwe. Mpela mwatwayiwonele mungani jipite jila, jwalakwe akusasagula kuŵa paunasi wambone ni ŵandu ŵalosisye kuti akusaka kumŵandichila jwalakwe. (Yak. 4:8) Wawojo palipeleche kwa Yehofa soni kubatisidwa, yikusaŵa kuti amŵandichile jwalakwejo m’litala lyapadela. Mwamti akusosekwa kulupilila yakuti panyuma pakubatisidwa Yehofa ‘chachawugulila yipata yakwinani ni kwagwichisya upile wejinji.’—Mala. 3:10; Yel. 17:​7, 8.

3. Ana Aklistu ŵalipeleche soni kubatisidwa akusakolaga udindo wekulungwa wapi? (Jwakulalichila 5:​4, 5)

³ Kubatisidwa kugambile kuŵa sitepe jandanda jakumtumichilila Yehofa. Mwamti panyuma pakubatisidwa, mundu akusasosekwa kutenda yiliyose yampaka akombole kuti akwanilisye chilanga chakwechi atamose pasimene ni yakusawusya. (Aŵalanje Jwakulalichila 5:​4, 5.) Ligongo lyakuti ali jwakumkuya jwa Yesu, chachisosekwa kujigalila muŵatendelaga yindu jwalakwe soni kupikanila malamusi gakwe. (Mat. 28:​19, 20; 1 Pet. 2:21) Mwamti nganiji chijakamuchisye kuti akombole kutenda yeleyi.

APITILISYE KUMKUYA YESU ATAMOSE PAKUSIMANA NI YAKULINGWA SONI YAKUSAWUSYA

4. Ana ŵakumkuya ŵa Yesu akusanyakula chamtuli “chitela chakwe chakulagasichila”? (Luka 9:23)

⁴ Akaganisyaga kuti panyuma pakubatisidwa nikuti chachipitaga mweswela. Yesu jwasasile mwakupikanika chenene kuti ŵakumkuya ŵakwe chachinyakula ‘chitela chakulagasichila.’ Mwamti  akusasosekwa kutenda yeleyi “lisiku lililyose.” (Aŵalanje Luka 9:23.) Ana pelepa Yesu jwagopolelaga kuti ŵakumkuya ŵakwe chachilagasidwaga ndaŵi syosope? Iyayi. Mmalomwakwe, pakusala mfundoji, Yesu jwasakaga kugombelechesya yakuti kupwatika pa yindu yambone yayikusiyatendechela ŵakumkuya ŵakwe, chachisimanasoni ni yakusawusya. Mwamti yine mwa yakusawusya yeleyi mpaka yiŵe yakupweteka mnope.—2 Tim. 3:12.

5. Ana ni yindu yambone yapi yaŵasasile Yesu kuti chachapa ŵandu ŵakusalijima yindu yine?

⁵ Komboleka wawojo ŵasimene kala ni yakulingwa mpela kulagasidwa ni ŵandu ŵa mwiŵasa mwawo ŵanganaŵa ŵa Mboni sya Yehofa. Mwinesoni ŵalesile kutenda yindu yampaka yapatikasye mbiya syejinji, ni chakulinga chakuti amtumichileje Yehofa mwakwanila. (Mat. 6:33) Naga ŵatesile yeleyi, amanyilile kuti Yehofa akusayiwona yosope yakusatendagayi mwamti ngasayiliŵalila. (Aheb. 6:10) Mwine apano ayiweni kuti maloŵe ga Yesu ga pa Maliko 10:​29, 30 gali gakuwona. Maloŵega gakusati, “Jwalijose jwalesile nyumba jakwe, achakulugwe, achapwakwe, achalumbugwe, mamagwe, babagwe, ŵanache ŵakwe kapena migunda ligongo lya lina lyangu soni ligongo lya ngani syambone, chachipata yindu kuwilisya ka 100 mu ndaŵi ajino. Jwalakwe chachipata nyumba, achakulugwe, achapwakwe, achalumbugwe, mamagwe, ŵanache, soni migunda pampepe ni yakusawusya, soni mu ndaŵi jajikwikajo, chachipata umi wangamala.” Kusala yisyene, yindu yambone yapatile wawojo yili yejinji mnope pakulandanya ni yindu yaŵalijimile.—Sal. 37:4.

6. Ligongo chichi akusosekwa kupitilisya kulimbana ni “yakumbila ya chilu” panyuma pakubatisidwa?

⁶ Panyuma pakubatisidwa chachisosekwa kulimbana ni “yakumbila ya chilu.” (1 Yoh. 2:16) Yeleyi yili yangasimonjesya ligongo lyakuti pandaŵi ajino ali chiŵela mundu jwangali umlama. Mwamti ndaŵi sine mpaka alipikaneje mpela muŵalipikanilaga ndumetume Paulo juŵalembile kuti, “Mumtimamu ngusinaganonyela nditu malamusi ga Mlungu. Nambo m’chilu mwangu likusayika lilamusi line lyalikusalimbana ni lilamusi lya mumtima mwangu. Lilamusili likusandaŵa une mpela mkayidi, ni kulongolela ku lilamusi lya ulemwa lyalili m’chilu mwangu.” (Alo. 7:​22, 23) Komboleka ndaŵi sine mpaka atengucheje ligongo lyakuti akulimbana ni nganisyo syakumbila kutenda yakusakala. Nambope, kuganichisya chilanga chaŵatesile kwa Yehofa paŵalipelekaga kwa jwalakwe, kuchapa machili gakwakamuchisya kulimbana ni yakulingwa. Yeleyitu yikulosya kuti chilanga chaŵatesile chakulipeleka kwa Yehofa ni chachichakamuchisya pasimene ni yakulingwa. Ana yeleyi mpaka yikomboleche chamtuli?

7. Ana kulipeleka kwawo kwa Yehofa kuchakamuchisya chamtuli kuti apitilisye kuŵa ŵakulupichika kwa jwalakwe?

⁷ Mundu palipeleche kwa Yehofa yikusaŵa kuti alesile yakusaka ya mtima wakwe. Yeleyi yikugopolela kukana kutenda yindu yiliyose yayikusamsakalisya Yehofa. (Mat. 16:24) Myoyo, pasimene ni yakulingwa, ngakusosekwa kulagasika nganisyo mwakuganichisya yakusosekwa kutenda. Tukuŵecheta yeleyi ligongo lyakuti ŵasagwile kala yakutenda kuti chachiŵa jwakulupichika kwa Yehofa. Mwamti pasimene ni yakulingwa chachigamba kusosekwa kutenda yindu mwakulimba mtima kuti amsangalasye Yehofa. Pelepo chachiŵa mpela Yobu. Atamose kuti Yobu jwasimene ni yakusawusya yekulungwa mnope, jwalakwe jwaŵechete kuti, “Tinjipitilisya kulupichika mpaka ndaŵi ja chiwa changu.”—Yob. 27:5.

8. Ana kuganichisya mnope ya lipopelo lyaŵapeleche pakulipeleka mpaka kwakamuchisye chamtuli kuti aŵambaleje yakulingwa?

⁸ Kuganichisya yaŵasasile m’lipopelo lyawo pandaŵi jaŵalipelekaga kwa Yehofa, kuchakamuchisya kupata machili kuti akombole kulimbana ni yakulingwa. Mwachisyasyo, nganaŵa atandite kukopana ni jwamkongwe kapena jwamlume jwamsyene. Yili myoyo ligongo lyakuti ŵamsalile kala Yehofa kuti nganaŵa atesile yindu mpela yeleyi.  Mwamti naga apano akusakombola kuŵambala ganichisya mnope yindu yakusakala, nikuti ngasalaga kumalana ni yakulingwa pachachisimana nayo kusogolo. Tukuŵecheta yeleyi ligongo lyakuti, ‘chachiŵambala’ kwenda ‘m’litala lya ŵandu ŵakusakala.’—Mis. 4:​14, 15.

9. Ana kuganichisya mnope ya lipopelo lyaŵapeleche pakulipeleka mpaka kwakamuchisye chamtuli kuŵika kumtumichila Yehofa pamalo gandanda?

⁹ Nambi mpaka atende uli naga ŵane ali ŵapatile masengo gampaka gatendekasye kuti akasimanikwaga pamisongano ja Chiklistu mwakutamilichika? Ngatukukayichila kuti akumanyilila yampaka atende panganiji. Yili myoyo ligongo lyakuti ŵasagwile chile yakuti nganaŵa ajitichisye masengo gampaka gatendekasye kuti akasimanikwaga pamisongano. Mwamti nganaŵa ajitichisye masengogo kaneko ni kusosagasosaga pulani jakuti aŵicheje pandanda yindu yakwayana ni kumtumichila Yehofa. Kuganichisya chisyasyo cha Yesu mpaka kwakamuchisye mnope. Ndaŵi syosope, jwalakwe jwaliji jwakusachilila kutenda yindu yakwasangalasya Atati ŵakwe. Myoyo, mwakulandana ni Yesu, nombe wawojo aŵeje ŵakusachilila kukana mwachitema kutenda chilichose champaka chimsakalisye Yehofa. Akusosekwa kutenda yeleyi ligongo lyakuti ŵalipeleche kwa jwalakwe.—Mat. 4:10; Yoh. 8:29.

10. Ana Yehofa chachakamuchisya chamtuli kupitilisya kumkuya Yesu “ndaŵi syosope” panyuma pakubatisidwa?

¹⁰ Pelepa mfundo jakwe jili jakuti, yakulingwa soni yakusawusya yampaka asimane nayo, mpaka yape upile wawojo wakulosya kuti akusachilila ‘kumkuya [Yesu] ndaŵi syosope.’ Mwamti pakutenda yeleyi, chachiŵa ŵakusimichisya kuti Yehofa chachakamuchisya. Baibulo jikusati, “Mlungu ali jwakulupichika, soni nganaŵa akundile kuti mlinjidwe mpaka kuyikana pakulepela kupilila. Pandaŵi jimkulinjidwa, jwalakwe chachimpatila litala lyakumkamuchisya kuti mkombole kupilila.”—1 Akoli. 10:13.

 YAMPAKA ATENDE KUTI APITILISYE KUMKUYA YESU

11. Ana ni litala limo lyapi lyampaka lyakamuchisye kupitilisya kumkuya Yesu? (Alole chiwulili.)

¹¹ Yesu jwamtumichilaga Yehofa ni mtima wakwe wosope soni jwapopelaga ndaŵi syosope kwa jwalakwe. (Luk. 6:12) Chindu chimo champaka atende kuti apitilisye kumkuya Yesu panyuma pakubatisidwa chili kutenda yindu yampaka yakamuchisye kuŵa paunasi wambone ni Yehofa. Baibulo jikusati, “Mulimose mwatujawulile pasogolo, kwende tupitilisye kwenda chenene m’litala lilyolyo.” (Afil. 3:16) Ndaŵi ni katema chapikaneje yindu yakusangalasya yasimene nayo abale ni alongo ŵakombwele kutenda yejinji pakumtumichila Yehofa. Komboleka jemanjaji ŵajinjile nawo Sukulu ja Ŵakulalichila ya Uchimwene kapena ŵapite kukamuchisya kudela kwakusosechela ŵakulalichila ŵajinji. Naga wawojo mpaka akombole akusosekwa kukola yakulinga yeleyi. Ŵakutumichila ŵa Yehofa akusatenda yampaka akombole kuti atendeje yejinji pakumtumichila jwalakwe. (Mase. 16:9) Nambi uli naga apano wawojo nganaŵa akombwele kutenda yeleyi? Ngakusosekwa kuliwona kuti ali ŵakulepela. Chakusosekwa mnope chili chakuti wawojo akupitilisya kupilila. (Mat. 10:22) Amanyilileje kuti Yehofa akusasangalala mnope wawojo pakutenda yampaka akombole pakumtumichila jwalakwe mwakamulana ni mwayiŵelele yindu paumi wawo. Lyeleli lili litala lyakusosekwa mnope lyampaka lyakamuchisye kupitilisya kumkuya Yesu panyuma pakubatisidwa.—Sal. 26:1.

12-13. Ana mpaka atende chichi naga ayikopochele kuti ngakusangalalasoni pakumtumichila Yehofa mpela muŵatendelaga pandanda? (1 Akolinto 9:​16, 17) (Alolesoni libokosi lyakuti, “ Apitilisye Kuwutuka Pampikisano.”)

¹² Ana mpaka atende uli naga ayikopochele kuti ngakupopela kutyochela pasi pamtima soni ngakusangalala ni utumiki wawo mpela muŵatendelaga pandanda? Nambi mpaka atende uli naga ngakusangalalasoni ni kuŵalanga Baibulo mpela muŵatendelaga kala? Naga yeleyi yikwatendechela  panyuma pakubatisidwa ngakusosekwa kulipikana kuti msimu wa Yehofa ulesile kukamula masengo pa wawojo. Ligongo lyakuti wawojo ali mundu jwangali umlama kaganisye kawo mpaka kachenjeje ndaŵi ni katema. Naga atandite kuwujila munyuma pakumtumichila Mlungu, akusosekwa kuganichisyaga chisyasyo cha ndumetume Paulo. Atamose kuti jwalakwe jwalingaga kumsyasya Yesu, nambo jwamanyililaga kuti ndaŵi sine nganaŵa akombwele kukamula masengo ganegakwe mwakusachila. (Aŵalanje 1 Akolinto 9:​16, 17.) Jwalakwe jwatite, “Atamose ngamuleje ndili ngangusaka, nambo udindo wanapochele wakuŵa jwakulolela nganiwuŵa umasile.” Yeleyi yikugopolela kuti Paulo jwaliji jwakusachilila kukwanilisya utumiki wakwe atamose kuti ndaŵi sine nganakolaga mtima wakusaka kukamula masengogo.

¹³ Mwakulandana ni yeleyi, nombe wawojo ngakusosekwa kwambaga kutenda yindu pakujigalila mwakupikanila. Mmalomwakwe aŵeje ŵakusimichisya kutenda yindu yambone atamose yili mkuti ngakusaka kuyitenda. Mwamti pakulingalinga kutenda yambone, mkupita kwa ndaŵi chachitanda kusangalala ni yakutendayo. Panyuma pakuti abatisidwe yindu mpela lijiganyo lyapajika, kupopela, kusimanikwa pamisongano soni kulalichila yichakamuchisya kuti apitilisye kumkuya Yesu. Mwamti abale ni alongo pachachilolaga kupilila kwawo pakumtumichila Yehofa yichalimbikasya mnope.—1 Ates. 5:11.

‘APITILISYE KULILINGA’

14. Ana ni yindu yapi yakusosekwa kuliwungunya ndaŵi syosope, soni ligongo chichi? (2 Akolinto 13:5)

¹⁴ Panyuma pakuti abatisidwe, mpaka atendeje chenene kuliwungunyaga ndaŵi ni katema. (Aŵalanje 2 Akolinto 13:5.) Ndaŵi syosope mpaka atende chenene kulola naga akupopela lisiku lililyose, kuŵalanga soni kulijiganya Baibulo, kusimanikwa pamisongano, nambosoni kujigala nawo mbali pamasengo gakulalichila. Alinjeje kupata matala gakwakamuchisya kuti asangalaleje soni apinduleje mnope pakutenda yindu yeleyi. Mwachisyasyo, mpaka aliwusyeje kuti, ‘Ana mpaka nalondechesye ŵane yijiganyo yandanda ya m’Baibulo? Ana pana yampaka ndende kuti sangalaleje pangulalichila? Ana mapopelo gangu gakusalosya chamtuli kuti ngusinamdalila mnope Yehofa? Ana ndaŵi syosope ngusasimanikwa pamisongano ja Chiklistu? Ana mpaka ndendeje yamtuli kuti njigaleje nawo mbali pandili pamisonganoji?’

15-16. Ana yaŵasimene nayo M’bale Robert yajiganyisye yamtuli pangani ja kukana yakulingwa?

¹⁵ Mpaka atendesoni chenene kuliwungunya mwakuwona mtima kuti amanyilile yakulepela yawo. M’bale jwine lina lyakwe Robert jwasasile yiŵasimene nayo. Jwalakwe jwatite, “Ndili ngwete yaka 20, napatile masengo. Lisiku line ndili mbelwiche, jwamkongwe jwine jwanakamulaga najo masengo jwambilanjile kunyumba jakwe kuti tukakunguluche. Jwalakwe jwasalile kuti chitukasangalale mnope ligongo chitukaŵe ŵandu ŵaŵilipe. Pandanda nagambaga kumsalila  kuti chinjawuleko lisiku line. Nambo kaneko namsalile kuti nganimba mbite kunyumba jakwe mwamti namsalile ligongo lyakwe.” Tukuyamichila mnope kuti M’bale Robert jwakombwele kuŵambala chakulingwachi. Pajwatandite ganichisya yayamtendecheleyi, jwayiweni kuti aketesile chenene kupunda mujwatendele pandaŵijo. Jwalakwe jwatite, “Jwamkongweju pajwambilanjile kumangwakwe nganingana mwachitema mpela muŵatendele Yosefe pakwakana ŵamkwakwe Potifala. (Gen. 39:​7-9) Mwamti yaliji yakusawusya kuti njiche pakana kwawula kumangwakwe jwamkongweju. Yayatendekweyi yangamuchisye kumanyilila kuti ngusosekwa kulimbisya unasi wangu ni Yehofa.”

¹⁶ Kuliwungunya mpela mujwatendele Robert mpaka kwakamuchisye mnope. Atamose pakombwele kulimbana ni yakulingwa yineyakwe, akusosekwa kuliwusya kuti, ‘Ana papitile ndaŵi jelewu chamtuli kuti njiche pakombola kukana chakulingwachi?’ Akadandawulaga naga ayiweni kuti akusosekwa kuputila ngondo pambali jinejakwe. Asangalaleje ligongo lyakumanyilila mbali jakusosekwa kongolela. Amsalileje Yehofa mbali jakusosekwa kongolelajo, soni atendeje yindu yampaka yakamuchisye kola mtima wakusachilila kumpikanila jwalakwe.—Sal. 139:​23, 24.

17. Ana yajwasimene nayo Robert yakwayiye chamtuli lina lya Yehofa?

¹⁷ Panasoni chindu chine chatukulijiganya kwa Robert. Jwalakwe jwasasilesoni kuti, “Panakanile kwawula kunyumba kwa jwamkongwe junakamulaga najo masengo jula, jwalakwejo jwatite, ‘Mpundile chakulingwa.’ Ndili namwusisye yajwagopolelaga, jwasasile kuti mnyamata jwine jwakusakungulukaga najo jwele munyumamo jwaliji jwa Mboni sya Yehofa, jwamsalile kuti ŵachinyamata wosope ŵa Mboni akusatenda yakusakala mwakusisa papatile upile wakutenda yeleyo. Ni jwamkongweju jwamsalile mnyamatajo kuti akusaka alinje yeleyo mwa une. Kusala yisyene, nasangalele mnope kumanyilila kuti natesile yindu yayatendekasisye kuti lina lya Yehofa lichimbichikwe.”

18. Ana akusachilila kutenda chichi panyuma pakuti abatisidwe? (Alole libokosi lyakuti, “ Ngani Syampaka Syakamuchisye.”)

¹⁸ Palipeleche kwa Yehofa soni kubatisidwa, akusalosya kuti akusaka kuswejesya lina lyakwe atamose ali asimene ni yakulingwa yamtuli. Ndaŵi syosope akulupilileje yakuti Yehofa akusamanyilila yakusawusya soni yakulingwa yakulimbana nayo. Mwamti jwalakwe chachapa upile ligongo lyakulingalinga kwawo kuti aŵe ŵakulupichika kwa jwalakwe. Akulupilileje kuti kupitila mwa msimu weswela, jwalakwe mpaka ŵape machili gakwakamuchisya kuti akombole kutenda yeleyi. (Luk. 11:​11-13) Mwamti ni chikamuchisyo cha Yehofa, chachikombola kupitilisya kumkuya Yesu ndaŵi syosope panyuma pakuti abatisidwe.