1-2. (a) Ana Paulo jwaliji mu ndamo jamtuli pajwalembelaga chikalata Aefeso soni ligongo chichi jwalembile chikalatachi? (b) Ana chitukambilane yiwusyo yapi?

 NDUMETUME Paulo jwalinganyisye yakwalimbikasya Aklistu achimjakwe atamose kuti pandaŵijo jwaliji ali pa ukayidi wa panyumba ku Loma. Jwalakwe jwalembile yikalata yakwalimbikasya achimjakwewo ligongo lyakuti ngamkanakombola kuja kuwonegana nawo meso ni meso. Mwamti chikalata chakwe chakwawula kwa Aefeso jwachilembile cha mma 60 kapena 61 C.E.—Aef. 1:1; 4:1.

² Mkanalembe chikalatachi, chiŵandika yaka 10 munyuma mwakwe, Paulo jwajawulaga ku Efeso kukulalichila soni kukwiganya ngani syambone. (Mase. 19:​1, 8-10; 20:​20, 21) Jwalakwe jwanonyelaga mnope Aklistu achimjakwewo mwamti jwasakaga kwalimbikasya kuti akaleka kuŵa ŵakulupichika kwa Yehofa. Ligongo chichi Paulo jwalembele Aklistu ŵasagulwe yakwamba chipi soni lilanguka? Ana Aklistu wosope mpaka alijiganye chichi pa yajwalembile Pauloyi? Kwende tukambilane kwanga kwa yiwusyoyi.

KUTYOKA MU CHIPI KWAWULA MU LILANGUKA

3. Ana Paulo jwakamulichisye masengo maloŵe gapi mchikalata chakwe chakwawula kwa Aefeso?

³ Paulo jwalembele Aklistu ŵa ku Efeso kuti, “Pandanda mwaliji chipi, nambo sambano mli lilanguka.” (Aef. 5:8) Palilembali, Paulo jwakamulichisye masengo maloŵe gakuti “chipi” soni “lilanguka” pakusaka kulondesya muŵaŵelele pandanda ŵandu ŵa ku Efeso. Kwende tulole yayamtendekasisye Paulo kusala kuti pandanda ŵandu ŵa ku Efeso ‘ŵaliji m’chipi.’

4. Ana ŵandu ŵa ku Efeso ŵaliji achikapolo ŵa dini jaunami m’litala lyapi?

⁴ Dini jaunami. Mkanatande Chiklistu, ŵandu ŵa ku Efeso ŵaliji  achikapolo ŵa dini jaunami. Jemanjaji ŵajitumichilaga milungu jaunami soni ŵakulupililaga mnope yamasenga. Mu msinda wa Efeso mwapali nyumba ja mlungu jwaunami lina lyakwe Atemi. Nyumbaji jaliji jakumanyika mnope soni ŵandu ŵakala ŵajiwonaga kuti jaliji jimo mwa yindu 7 yakusimonjesya mnope pachilambopa pandaŵijo. Ŵandu ŵajawulaga ku nyumbaji kukujitindiŵalila milungu jakusepa. Mwamti ŵandu ŵaŵasepaga soni kusumisya yiwanichisyo ya milungu jaunami ŵapataga mbiya syejinji. (Mase. 19:​23-27) Kupwatika pelepa, ŵandu ŵajinji ku Efeso ŵatendagasoni yamasenga.—Mase. 19:19.

5. Ana ŵandu ŵa ku Efeso ŵamanyikaga ni ndamo syakusakala syapi?

⁵ Ndamo syakusakala. Ŵandu ŵa ku Efeso ŵamanyikaga ni ndamo sya chikululu soni yitendo yangali sooni. Ndaŵi syosope, ŵandu ŵa mu msindamu pasongene pampepe pa yakutendekwa yakulekanganalekangana, ŵatamilaga kukambilana ya chikululu. (Aef. 5:3) Mwamti ŵandu ŵajinji ŵa ku Efeso ‘nganamanyililagasoni ndamo syambone,’ yayikugopolela kuti jemanjaji nganadandawulagasoni ni ndamo syawo syakusakala. (Aef. 4:​17-19) Mwamti ŵandu ŵa ku Efeso mkanatande kulijiganya malamusi ga Yehofa pakwamba ya chachili chambone soni chakusakala, jemanjaji nganalagasikaga mumtima patesile chakulemwa. Nambosoni nganasamalaga yakuti yitendo yawo yikumkwaya chamtuli Yehofa. Ligongo lya yeleyi, Paulo jwasasile kuti “nganisyo syawo sili mu chipi soni ali ŵakutalikangana ni umi wakusapeleka Mlungu.”

6. Ligongo chichi Paulo jwasalile Aefeso kuti “sambano mli lilanguka”?

⁶ Nambope papali ŵandu ŵane ŵa ku Efeso ŵaŵatyosile mu chipi. Mwamti pakwamba ya jemanjaji, Paulo jwalembile kuti ‘sambano ali mu lilanguka ligongo lyakwakuya Ambuje.’ (Aef. 5:8) Pandaŵi jelejo, jemanjajo ŵatendaga yindu mwakamulana ni Maloŵe ga Yehofa, gagaliji mpela lilanguka lyakwalongolela. (Sal. 119:105) Ŵandu ŵeleŵa ŵalesile yitendo ya dini syawo syaunami soni ndamo syawo syakusakala. Mwamti ŵatandite ‘kumsyasya Mlungu’ soni ŵatendaga yakomboleka kuti amtumichileje Yehofa nambosoni kutenda yindu yakumsangalasya jwalakwe.—Aef. 5:1.

7. Ana mwayiŵelele yindu ni m’weji masiku agano yikulandana chamtuli ni muyaŵelele yindu ni Aklistu ŵajinji ŵa ku Efeso?

 ⁷ Mwakulandana ni jemanjaji, m’wejisoni mkanitutande kulijiganya Baibulo twaliji mu dini jaunami soni twatendaga ndamo syakusakala. Mwamti ŵane mwa m’weji, twatendaga nawo yisangalalo ya dini jaunami soni ndamo sine syakusakala. Nambo kaneko twachenjile umi wetu patwalijiganyisye malamusi ga Yehofa pangani ja yindu yayili yambone soni yakusakala. Kaneko twatandite kutenda yindu yakusasaka Yehofa, yayatendekasisye kuti yindu yitande kutujendela chenene. (Yes. 48:17) Yisyene kuti apano tukusalagape ni yakusawusya yatukusasimana nayo. Atamose kuti yili myoyo, tukusasosekwa kutalikangana ni chipi chatwachilesile ni ‘kupitilisya kwenda mpela ŵanache ŵa lilanguka.’ Ana mpaka tutende chamtuli yeleyi?

TUŴAMBALEJE KWENDA M’CHIPI

8. Mwakamulana ni Aefeso 5:​3-5, ana Aefeso ŵasosekwaga kuŵambala chichi?

⁸ Aŵalanje Aefeso 5:​3-5. Pakusaka kutalikangana ni ndamo syakusakala, Aklistu ŵa ku Efeso ŵasosekwaga kupitilisya kuŵambala kutenda yindu yayikusamsakalisya Yehofa. Mwamti kupwatika pa kuŵambala ndamo sya chikululu, jemanjaji ŵasosekwagasoni kuŵambala maloŵe gakutukana. Paulo jwasalile jemanjaji kuti akusosekwa kuyiŵambala yindu yeleyi naga akusaka kwinjila “mu Uchimwene wa Klistu soni wa Mlungu.”

9. Ligongo chichi tukusosekwa kuŵambala chilichose champaka chitutendekasye kutenda yakusakala?

⁹ M’wejisoni tukusosekwa kusamala kuti tukatendaga “yindu yangakamuchisya yakutendekwa m’chipi.” (Aef. 5:11) Maumboni gejinji galosisye kuti yikusaŵa yangasawusya mundu kutenda ulemwa naga akusatamila kulolela, kupikanila kapena kuŵecheta yindu yakusakala yakwamba chikululu. (Gen. 3:6; Yak. 1:​14, 15) M’chilambo chine, abale ŵajinji ŵapanganyisye gulu jakuti akunguluchileje yimpepe pa intaneti. Pandanda jemanjaji pakukunguluka ŵaŵechetaga yindu yakwamba Yehofa. Nambo kaneko ŵatandite kambilana yindu yayikusamsakalisya Yehofa. Mwamti ndaŵi syejinji ŵakambilanaga ngani sya chikululu. Mwamti ŵajinji mwa abalewo ŵasasile kuti ngani syakusakala syaŵakambilanagasyo syatendekasisye kutenda chikululu.

10. Ana Satana akusatuloŵesya chamtuli? (Aefeso 5:6)

¹⁰ Chilambo cha Satanachi chikulingalinga kututendekasya kuti tutande kuyiwona yindu yakusakala kuŵa yambonembope. (2 Pet. 2:19) Tukasimongaga yeleyi payikutendekwa. Kutandila kalakala, Satana aŵele ali mkwasokonasya ŵandu kuti akamanyililaga chachili chambone soni chakusakala. (Yes. 5:20; 2 Akoli. 4:4) Mwamti tukasimongaga patukuyiwona kuti mafidiyo gejinji, ma pologalamu ga pa TV, soni yindu ya pa intaneti yikusalimbikasya ndamo syakusakala syakusaŵengana nasyo Yehofa. Satana akulingalinga kututendekasya kuti tuyiwoneje yindu yakusakala yayiwandile m’chilambochi kuŵa yakusangalasya soni yangajogoya.—Aŵalanje Aefeso 5:6.

11. Ana yajwasimene nayo Angela yikulosya chamtuli kusosekwa kwakukamulichisya masengo malangiso ga pa Aefeso 5:7? (Alole chiwulili.)

¹¹ Satana akusasaka kuti tusyoŵekaneje ni ŵandu ŵampaka atutendekasyeje kuti tuyiwoneje kuŵa yakusawusya kupikanila malamusi ga Yehofa. Ni ligongo lyakwe Paulo ŵakalamwisye ŵandu ŵa ku Efeso kuti, ‘Akatendaga nawo yindu’ ŵandu ŵakusatenda yindu yakumsakalisya Mlungu. (Aef. 5:7) Myoyo, m’weji masiku agano tukusosekwa kuŵa ŵakusamala mnope kupunda ni muyaŵelele ni ŵandu ŵakala ŵa ku Efeso. Yili myoyo ligongo lyakuti masiku agano mpaka tukunguluche ni ŵandu mmatala gejinji kupwatika pa intaneti. Mlongo Angela a  jwakusatama ku Asia jwakuweni kogoya kwa kunguluka pa intaneti. Jwalakwe jwatite, “Ukusatanda kuchenga kaganisye kakwe mwapanandipanandi. Mkanipapite ndaŵi nalesile kudandawula ya kunguluka ni ŵandu ŵangakuya malamusi ga m’Baibulo. Kaneko natandite kuyiwona kuti pangali chakusawusya kutenda yindu yakusaŵengana nayo Yehofa.” Nambo mwaupile, achakulungwa ŵane ŵamkamuchisye mwachinonyelo Mlongo Angela kuti achenje ndamo syakwe. Mlongoju jwatite, “Apano ngusaganichisya mnope yakwamba Yehofa mmalo mwaganichisya ya yindu yayikusasimanikwa pamalo gakunguluchila ga pa intaneti.”

12. Ana chichi champaka chitukamuchisye kwendela malamusi ga Yehofa gakwamba chachili chambone soni chakusakala?

¹² Tukusosekwa kulimbana ni kaganisye ka chilambochi kakuti kutenda yakusakala nganikuŵa kulemwa. Nambotu yisyesyene yakwe yili yakuti kaganisye keleka kali kakulemwecheka. (Aef. 4:​19, 20) Mwamti mpaka tutende chenene kuliwusyaga kuti, ‘Ana ngusaŵambala kusyoŵekana ni achimjangu ŵakumasengo, ŵakusukulu, kapena ŵandu ŵane ŵakusatenda ndamo syasikusamsakalisya Yehofa? Ana ngusaŵa jwakulimba mtima kupikanila malamusi ga Yehofa atamose yili mkuti ŵane chambone kuŵa jwakulinonyela?’ Mwakamulana ni 2 Timoteyo 2:​20-22, tukusasosekwasoni kuŵa ŵakusamala patukusagula achimjetu pasikati pa abale ni alongo ŵetu. Mwamti tukumbuchileje kuti ŵane mwajemanjaji nganaŵa atukamuchisye kuti tupitilisye kumtumichila Yehofa mwakulupichika.

MPITILISYE KWENDA “MPELA ŴANACHE ŴA LILANGUKA”

13. Ana “kwenda mpela ŵanache ŵa lilanguka” kukusagopolela chichi? (Aefeso 5:​7-9)

¹³ Paulo jwalimbikasisye Aklistu ŵa ku Efeso kuti apitilisye kuchikana chipi ni ‘kupitilisya kwenda mpela ŵanache ŵa lilanguka.’ (Aŵalanje Aefeso 5:​7-9.) Ana yeleyi yikugopolela chichi? Yikugopolela kuti ndaŵi syosope tutendeje yindu mpela Aklistu ŵasyesyene. Mpaka tukombole kutenda yeleyi patukulipeleka mnope pakuŵalanga soni kulijiganya Baibulo soni mabuku gakulondesya ya Baibulo. Patukulijiganya tukusosekwa kulolechesyaga mnope chisyasyo  soni yakwiganya ya Yesu Klistu jwali “lilanguka lya chilambo.”—Yoh. 8:12; Mis. 6:23.

14. Ana msimu weswela ukusatukamuchisya chamtuli?

¹⁴ Tukusosekwasoni chikamuchisyo cha msimu weswela wa Mlungu kuti tukombole kutenda yindu “mpela ŵanache ŵa lilanguka.” Yili myoyo, ligongo yili yakusawusya kuti tukole ndamo syambone m’chilambo chakusakalachi. (1 Ates. 4:​3-5, 7, 8) Msimu weswela ni wampaka utukamuchisye kuti tukajigalila kaganisye ka chilambo chakusakalachi, yayikupwatikapo lunda lwa ŵandu ŵa ku chilambo soni yitendo yakutindana ni yakusasaka Mlungu. Nambosoni msimu weswela ni wampaka utukamuchisye “kutenda yiliyose yambone.”—Aef. 5:9.

15. Ana tukusosekwa kutenda chichi kuti tupochele msimu weswela? (Aefeso 5:​19, 20)

¹⁵ Mpaka tukole msimu weswelawu naga tukumŵenda Yehofa mwipopelo. Yesu jwasasile kuti Yehofa ‘chachipeleka msimu weswela kwa wosope ŵakumŵenda.’ (Luk. 11:13) Tukusapochelasoni msimu weswelawu patukumtumichila Yehofa pamisongano jetu ja Chiklistu. (Aŵalanje Aefeso 5:​19, 20.) Msimu weswela ni wawukusatukamuchisya kuti tutendeje yindu yakumsangalasya Mlungu.

16. Ana ni chichi champaka chitukamuchisye kuti tusaguleje yindu mwalunda? (Aefeso 5:​10, 17)

¹⁶ Pandaŵi jatukusaka kusagula yindu yakusosekwa mnope, tukusasosekwa chandanda kumanyilila “yakusaka Yehofa” ni kusagula mwakukamulana ni yeleyo. (Aŵalanje Aefeso 5:​10, 17.) Kumanyilila mfundo sya m’Baibulo syakutukamuchisya pa yindu yatukusaka kusagulayo kukusalosya kuti tukumkunda Mlungu kutulongolela pa nganijo. Patukukamulichisya masengo mfundosi ni patukusakombola kusagula yindu mwalunda.

17. Ana mpaka tukamulichisye masengo chamtuli ndaŵi jetu mwalunda? (Aefeso 5:​15, 16) (Alole chiwulili.)

¹⁷ Paulo jwakalamwisyesoni Aklistu ŵa ku Efeso kuti akamulichisyeje masengo ndaŵi jawo mwalunda. (Aŵalanje Aefeso 5:​15, 16.) Mdani jwetu Satana, jwali “jwakusakalajo” akusasaka kuti tutanganidweje ni kusosasosa yindu ya m’chilambomu ni chakulinga chakuti tulepeleje  kupata ndaŵi jakumtumichilila Mlungu. (1 Yoh. 5:19) Mwamti Mklistu mpaka atande kusosasosa chandanda yakusosekwa ya paumi, soni majiganyo mmalo mwakulongosya kumtumichila Yehofa. Yeleyi mpaka yilosye kuti Mklistujo atandite kujigalila kaganisye ka kuchilambo. Yili yisyene kuti yinduyi pajika nganiyiŵa yakulemwecheka, nambo ngayikusosekwa kuŵa pamalo gandanda paumi wetu. Myoyo, kuti tupitilisye kwenda “mpela ŵanache ŵa lilanguka,” tukusosekwa ‘kukamulichisyaga masengo chenene ndaŵi [jetu],’ mwakuganichisya yayili yakusosekwa mnope.

18. Ana Donald jwatesile yamtuli kuti akamulichisye masengo ndaŵi jakwe mwalunda?

¹⁸ Tutendeje yiliyose yakomboleka kuti tulipelecheje mnope pakumtumichila Yehofa. Yeleyi ni yaŵatesile M’bale Donald, jwakusatama ku South Africa. Jwalakwe jwatite, “Nawungunyisye mwayaŵelele yindu paumi wangu ni namŵendile Yehofa mwakumchondelela kuti angamuchisye kuti ngombole kutenda yejinji pakumtumichila. Namŵendile kuti angamuchisye kupata masengo gampaka gangamuchisye kupataga ndaŵi jakwanila jakulalichila. Yehofa jwajanjile lipopelo lyangu. Mwamti une ni ŵamkwangu twatandite utumiki wa ndaŵi syosope.”

19. Ana mpaka tupitilisye chamtuli kwenda “mpela ŵanache ŵa lilanguka”?

¹⁹ Mwangakayichila chikalata cha Paulo chaŵalembele Aefeso chakamuchisye jemanjaji kupitilisya kumtumichila Yehofa mwakulupichika. Malangiso gakutyochela kwa Yehofaga mpaka gatukamuchisyesoni m’weji masiku agano. Mpela mwatuyiwonele, malangisoga mpaka gatukamuchisye kusagula mwalunda yakusangalasya soni ŵakunguluka nawo. Mpaka gatukamuchisyesoni kuti tupitilisye kwenda mu lilanguka lya yisyesyene mwakulijiganya Baibulo mwakutamilichika. Malangisoga gagombelechesyesoni kusosekwa kwa msimu weswela, wampaka utukamuchisye kukola ndamo syambone. Kukamulichisya masengo malangisoga mpaka kutukamuchisye kuti tusaguleje yindu mwalunda, yakamulana ni yakusasaka Yehofa. Kutenda yeleyi ni kwampaka kutukamuchisye kuŵambala chipi cha m’chilambochi ni kupitilisya kuŵape mu lilanguka.