Yehofa mpaka atukululuchile yakulemwa yetu kupitila mu mbopesi jakutuwombola jaŵapeleche Yesu. (Aef. 1:7) Nambope, Baibulo jikusati, “[Mlungu] ŵalosisyesoni kuwusimana mtima kwakwe pakwakululuchila ŵandu yakulemwa yawo yakala,” yayikugopolela yakulemwa yayatendekwe Yesu mkanaŵe kupeleka mbopesi jakutuwombola. (Alo. 3:25) Ana Yehofa jwatesile chamtuli yeleyi kwineku ali mkulolechesya kuti ngakukasa mfundo syakwe sya chilungamo?

Yehofa pajwagambile kulinganya pulani jakupeleka “mwanache” jwakwe kuti chiŵawombole ŵandu ŵakulupichika, kwa jwalakwejo yaliji mpela kuti yitendekwe kala. (Gen. 3:15; 22:18) Mlungu nganakayichilaga ata panandi yakuti pandaŵi jakwe Mwanache jwakwe jumopejo chachipeleka mbopesi jakwawombola ŵandu. (Agal. 4:4; Aheb. 10:​7-10) Mwamti Yesu pajwaliji pachilambopa jwakwete machili gakukululuchila yakulemwa atamose pajwaliji mkanaŵe kupeleka mbopesi jakutuwombola. Jwalakwe jwatesile yeleyi ligongo jwamanyililaga kuti mbopesi jachachipeleka jichikamula masengo gakukululuchila yakulemwa yawo.—Mat. 9:​2-6.