1. Ana masengo ga Mlungu gaŵele gali mkutendekwa mwatuli?

KUTANDILA pandaŵi jele Yehofa ŵampanganyisye Yesu, jemanjaji aŵele ali ŵakamulana. Yesu jwali cakupanganyikwa candanda, ŵasasile kuti, “Naliji pambali pa [Yehofa] mpela namatetule. Lisiku ni lisiku, jwalakwe ŵaliji mkusangalala ni une.” (Miy. 8:30) Atati ni Mwanagwejo ŵakamwile masengo mwakamulana pakupanganya yindu yosope kupwatikapo yaumi. Ŵandu ŵa Yehofa ŵakamulanagasoni pamasengo gawo mpela gakutaŵa combo mundaŵi ja Nowa. Ayisalayeli ŵakamulanagasoni pakutaŵa, kupasulanya, soni kusamisya nyumba jakulambilila paŵaliji m’cipululu. Atamosesoni ku nyumba ja Mlungu ŵandu ŵajimbaga nyimbo syakumlumba Mlungu mwakamulana. Ŵandu ŵa Mlungu ŵakombwele kutenda masengo gosopega ligongo lyakuti ŵaliji ŵakamulana.—Gen. 6:14-16, 22; Num. 4:4-32; 1 Mbiri 25:1-8.

2. (a) Ana Aklistu ŵa m’yaka 100 yandanda ŵakamulaga mwatuli masengo gawo? (b) Ana citutagulilane yiwusyo yapi mungani ajino?

² Aklistu ŵa m’yaka 100 yandanda ŵakamulagasoni masengo mwakamulana pasi pa umtwe wa Yesu Klistu. Ndumetume Paulo  ŵasasile kuti, atamose kuti Aklistuwo ŵakwete “mituka jakulekangana,” ŵatendaga “undumetume wakulekangana” soni “masengo gakulekangana” nambo ŵaliji ŵakamulana ligongo wosope ŵaliji mbali ja “cilu cimo.” (Aŵalanje 1 Akolinto 12:4-6, 12.) Nambi wuli lelojino? Ana mpaka tutende wuli kuti tuŵe ŵakamulana patukukamula masengo gakulalicila? Soni, ana mpaka tutende wuli kuti tuŵe ŵakamulana mumpingo atamosesoni mwiŵasa?

3. Ana ndumetume Yohane ŵagaweni mesomkulola gatuli?

³ M’yaka 100 yandanda, ndumetume Yohane ŵagaweni m’mesomkulola malayika 7 gali mkwimba malipenga. Lilayika lya nambala 5 palyalisisye lipenga lyakwe, Yohane ŵajiweni “ndondwa” jili mkugwa kutyocela kwinani. Ndondwajo jajigele makiyi ni japite kukuwugula mlango wa lisimbo lyangali mbesi. Mwisimbomo mwakopwece lyosi soni kaneko mwakopwece likuga lya sombe. Likuga lya sombe lyakuwanicisyali nganilijonaga yakumela, nambo lyajimucile ‘ŵandu ŵanganakola cidindo ca Mlungu pawusyo pawo.’ (Ciu. 9:1-4) Mwangakayicila, Yohane ŵamanyililaga kuti likuga lya sombe likusajonanga mnope. Yeleyi yikutukumbusya mulyajonanjile ku Iguputo mundaŵi ja Mose. (Eks. 10:12-15) Likuga lya sombe lyaŵaliweni Yohane lyajimilaga Aklistu ŵasagulwe ŵaŵalalicilaga utenga wamacili wakwamba ya kwelusya kwa Yehofa. Apano ŵandu ŵajinji ŵakwembeceya kutama pacilambo capasi kwangamala akulalicila yimpepe ni ŵasagulweŵa mwakamulana. Masengo gelega gakamucisye ŵandu ŵajinji kuleka kulambila kwaunami soni kana kulongolelegwa ni Satana.

4. Ana ŵandu ŵa Mlungu akwete masengo gatuli, soni ana mpaka akombole catuli kugatenda?

⁴ Ŵandu ŵa Mlungu akwete masengo gamakulungwa gakulalicila “ngani syambone” pacilambo cosope mbesi mkanijiyice. (Mat. 24:14; 28:19, 20) Patukukamula masengoga tukusaŵa tuli mkwaŵilanjila “ŵandu ŵanjota” kuti camwe “mesi ga umi kwalulele.” (Ciu. 22:17) Ana mpaka akombole catuli kutenda masengo gelega? Cakusosekwa mnope cili kuŵa ‘ŵalumbikane cenene soni ŵakamulana.’—Aef. 4:16.

5, 6. Ana masengo gakulalicila gakusatukamucisya catuli kuŵa ŵakamulana?

⁵ Kuti tukombole kulalicila ngani syambone kwa ŵandu ŵajinji, tukusasosekwa kukamula masengoga mwadongosolo. Yakusatusalila Yehofa kupitila m’mipingo pacilambo cosope yikusatukamucisya kuti tukamuleje masengoga mwakamulana. Patukosecele kwawula mu undumetume wamumgunda, tukusajawula kukulalicila ngani syambone syakwamba ya Ucimwene kwa ŵandu. Tukusagaŵilasoni ŵanduwo mabuku gakusala ya m’Baibulo. Ndaŵi sine tukusakola ndaŵi japajika jakwagaŵila ŵandu tumapepala twakwaŵilanjila ku cikumbucilo kapena ku msongano. Ana tukusajigala nawo mbali pamasengoga? Naga tukusatenda yeleyi nikuti tukuŵa mu likuga lyakamulana lya abale ni alongo pacilambo cosope ŵakuwandisya utenga wa ‘lilayika lyalikuguluka mwinani,’ lyakusalikolanga pa Ciunukuko 14:6.

⁶ Yikusaŵa yakusangalasya kuŵalanga ngani syasikusasimanikwa mu buku japacaka syakwamba mwagakwendela masengo gakulalicila pacilambo cosope. Kugaŵila tumapepala twakuŵilanjila ŵandu ku misongano jaupande kukusatukamucisyasoni kuŵa ŵakamulana. Pamisonganoji tukusapikanila ngani soni tukusalolela maseŵelo ni yilosyo yakulimbikasya. Yindu yeleyi yikusagombelecesya yakusaka Mlungu yakuti tumtumicileje ni umi wetu wosope. Cindu cine cacikusatukamucisya kuŵa ŵakamulana cili kumbucila ciwa ca Yesu. Pakusaka kulosya kuti tukusayamicila canasa  cekulungwa caŵatulosisye Mlungu soni kuti tukusapikanila lilamusi lya Yesu, caka cilicose tukusasongana kuti tukumbucileje ciwa ca Yesuci. Cikumbuciloci cikusatendekwa lyuŵa lili likapile pa Nisani 14. (1 Akoli. 11:23-26) Ku Cikumbucilo kukusayika ŵandu ŵakulekanganalekangana. Pali pasigele yijuma yakuŵalanjika kuti Cikumbucilo citendekwe, tukusakamula masengo gakwaŵilanjila ŵandu ŵa mumkuli wetu kuti casimanikwe pa Cikumbuciloco.

7. Ana patukukamula masengo gakulalicila mwakamulana tukusapakombola kutenda cici?

⁷ Sombe limo ngaŵa mkonanga yindu yejinji. Mwakulandana ni yeleyi jwalijose pajika nganaŵa akombwele kwalalicila ŵandu wosope. Nambo patukamula masengo gakulalicila mwakamulana ni ŵane, tukusapakombola kwasalila ŵandu ŵajinji yakwamba Yehofa jwali jwakusosekwa kumlumba ni kumcimbicisya. Nambo konjecesya pamasengo gakulalicila, panasoni yine yayikusakamucisya ŵandu ŵa Mlungu kuti aŵe ŵakamulana.

8, 9. (a) Ana Paulo ŵakamulicisye masengo cisyasyo catuli pakusaka kulosya kusosekwa kwa kamulana? (b) Cici campaka citukamucisye kuti tuŵe ŵakamulana mumpingo?

⁸ M’cikalata cakwe caŵalembele Aklistu ŵa ku Efeso, Paulo ŵasasile ya mwawukusajendela mpingo soni ŵasasile kuti ŵandu wosope mumpingomo akusosekwa “kula mu yindu yosope.” (Aŵalanje Aefeso 4:15, 16.) Ana cici campaka citukamucisye kula mu yindu yosope? Paulo ŵakamulicisye masengo cisyasyo ca cilu pakusaka kulosya mkamulano wawukusasimanikwa mumpingo pasi pa umtwe wa Yesu Klistu. Jwalakwe ŵasasile kuti ‘mbindi jilijose jikusakamula masengo gakwe gakusosecela.’ Ana jwalijose jwetuwe mpaka akamucisye catuli kuti mpingo uŵe wakamulana?

⁹ Cindu cakusosekwa mnope cili kwapikanila soni kwacimbicisya acakulungwa ŵa mumpingo ŵele Yesu ŵapele ukumu wakuti alongoleleje mpingo. (Ahe. 13:7, 17) Nambo ndaŵi sine kutenda yeleyi kukusaŵa kwakusawusya. Nambope ni cikamucisyo ca Mlungu mpaka tuyikombole. Msimu wakwe mpaka utukamucisye kuti tukombole kwapikanila soni kwacimbicisya acakulungwaŵa. M’yoyo, naga ndaŵi sine tukusayiwona kuŵa yakusawusya kwapikanila acakulungwa ŵa mumpingo tukusosekwa tuganicisyeje mwampaka kupikanilako kukamucisye kuti mpingo uŵe wakamulana. Konjecesya pelepa, kupikanila mpaka kutukamucisye kuti tunonyelaneje mnope.

10. Ana ŵakutumicila ŵakamucisya akusakamucisya catuli kuti mpingo uŵeje wakamulana? (Alole ciwulili cacili kundanda kwa nganiji.)

¹⁰ Nombe nawo ŵakutumicila ŵakamucisya akusakamucisya mnope kuti mpingo uŵeje wakamulana. Abaleŵa, mwangajigalila ya msingu wawo, akusakamula masengo gakamucisya jwalijose mumpingo. Mwambone, akusakamucisya acakulungwa ŵa mumpingo pakulolecesya kuti pana mabuku gakwanila gagaŵila mu undumetume. Akusakamucisyasoni pakusamalila soni kulinganya yejonasice pa Nyumba ja Ucimwene, soni akusiŵapocela acalendo ŵakusayika pamisongano. Naga tukamulana ni ŵakutumicila ŵakamucisyaŵa, mpingo ucijenda cenene.—Awanicisye ni Masengo 6:3-6.

11. Ana ŵacinyamata mpaka akamucisye catuli kuti mpingo uŵe wakamulana?

¹¹ Acakulungwa ŵa mumpingo ŵane aŵele ali mkutumicila kwa yaka yejinji. Nambo ligongo lyakuti apano akukula nganaŵa atesile yejinji. M’yoyo, abale ŵacinyamata mpaka akamucisye mnope. Atamose kuti abale ŵacinyamataŵa ngakusamanyilila yejinji nambo naga akwajiganya mpaka akamucisye mnope pa maukumu gane ga mumpingo. Soni naga jwakutumicila jwakamucisya akusakamula masengo mwamtawu, msogolo mpaka aŵe  jwamkulungwa jwa mumpingo. (1 Tim. 3:1, 10) Acakulungwa ŵa mumpingo ŵane ŵali ŵacinyamata ajawile pasogolo mwati apano ali ŵakulolela mkuli. Jemanjaji akwakamucisya abale ni alongo ŵa m’mipingo jakulekanganalekangana. Tukusayamicila mnope ŵacinyamata pakulipeleka kwakamucisya abale ni alongo.—Aŵalanje Salimo 110:3; Mlaliki 12:1.

12, 13. Ana cici campaka cakamucisye ŵandu wosope mwiŵasa kuŵa ŵakamulana?

¹² Ana mpaka tukamucisye catuli kuti liŵasa lyetu liŵeje lyakamulana? Kutenda kulambila kwa peŵasa cijuma cilicose mpaka kutukamucisye mnope. Naga acinangolo ni ŵanace ŵawo akusapata ndaŵi jakulijiganya ya Yehofa, nikuti cinonyelo cawo kwa jwine ni mjakwe mpaka ciŵe cakulimba mnope. Pa ndaŵi ja kulambila kwa peŵasa tukusaganicisya mnope yindu yausimu. Yeleyi yikusakamucisya kuti liŵasa liŵe lyakamulana. Kosecela yacakaŵecete mu undumetume, mpaka kukamucisye mnope liŵasa kulalicila mwakamula mtima. Pakupikana jwine ali mkuŵeceta yakwamba usyesyene soni kulola kuti wosope mwiŵasamo akusamnonyela Yehofa, wosope akusaŵa ŵakamulana mnope.

¹³ Ana ŵalombane mpaka atende cici kuti aŵeje ŵakamulana? Naga wosope akusamnonyela soni kumtumicila Yehofa yimpepe, caciŵa ŵakusangalala soni ŵakamulana mnope mwiŵasa mwawo. Akusosekwa kunonyelana mpela muŵatendelaga Abulahamu ni Sala, Isaki ni Labeka, soni Elikana ni Hana. (Gen. 26:8; 1 Sam. 1:5, 8; 1 Pet. 3:5, 6) Kutenda yeleyi, kucakamucisya kuŵa ŵakamulana ni ŵamkwawo soni cacaŵandicila Atati ŵawo ŵakwinani.—Aŵalanje Mlaliki 4:12.

14. Naga ŵamkwawo ngakusamtumicila Yehofa, ana mpaka atende cici kuti alimbisye ulombela wawo?

¹⁴ Aklistu ngakusosekwa kulombana ni mundu jwangatumicila Yehofa. (2 Akoli. 6:14) Nambi wuli pakwamba ya Aklistu ŵali peŵasa ni mundu jwa dini jine? Ŵandu ŵane ŵakutumicila Mlungu akwete aciŵamkwawo ŵanganaŵa Ŵamboni. Yeleyi yili m’yoyo ligongo lyakuti ŵatandite kulijiganya usyesyene ali alombene kala. Nambope, kamulicisya masengo yajikusasala Baibulo mpaka kukamucisye kuti liŵasa lyati mpela lyeleli liŵe lyakamulana. Kutenda yeleyi kuli kwakusawusya nambo mpaka kuŵe ni yakuyicisya yambone. Kamulicisya masengo yajikusasala Baibulo mpaka kuŵe kwakusawusya naga jwine mwiŵasa alesile usyesyene. Yeleyi yamtendecele mlongo jwine lina lyakwe Mary. Jwalakwe ni ŵamkwakwe, David, ŵatumicilaga Yehofa yimpepe. Nambo yaka ciŵandika 25 yipiteyo David ŵalesile kusongana. Nambope Mary ŵajendelecele kwawula kumisongano ja mpingo soni jekulungwakulungwa. Jwalakwe ŵalinjililaga kamulicisya masengo yajikusasala Baibulo mwiŵasa mwakwe soni ŵajiganyaga ŵanace ŵakwe ŵakwana 6. Ŵanacewo ali akusile ni kutyoka panyumbapo, Mary ŵakamulwaga lipowo. Mkupita kwandaŵi David ŵatandite kuŵalanga magasini gaŵamlecelaga Mary. Kaneko jwalakwe ŵatandilesoni kwawula ku Nyumba ja Ucimwene. Cisukulu ca David ca yaka 6 casunjilaga angangagwewo malo gakutama. Naga David nganayika kumisongano, cisukuluco casalilaga kuti, “Anganga nasoŵile lelo kumisongano.” Apano David akumtumicila Yehofa mwakusangalala soni Mary akusangalala mnope ligongo lyakuti akumtumicila Yehofa mwakamulana ni ŵamkwakwe.

15. Ana Aklistu ŵacikulile mpaka ŵakamucisye catuli Aklistu ŵalombene kwene?

¹⁵ Ŵakutumicila ŵa Mlungu wosope akusosekwa kuŵa ŵakamulana mwiŵasa ligongo moŵa agano Satana akulimbana mnope ni maŵasa. Cinga atemi mu ulombela kwa ndaŵi jelewu catuli,  nambope Aklistu ŵalombane akusosekwa kuganicisya yampaka atende kuti alimbisye ulombela wawo. Aklistu ŵacikulile mpaka ŵakamucisye Aklistu ŵalombene kwene kulimbisya ulombela wawo. Mpaka atende yeleyi mwakwaŵilanjila kumangwawo ni kutendela yimpepe kulambila kwa peŵasa. Liŵasa lyasambanolyo mpaka liyiwone kuti kunonyelana soni kamulana kuli kwakusosekwa mnope kwa ŵandu ŵalombane.—Tito 2:3-7.

16, 17. Ana ŵandu ŵa Mlungu ŵakamulana akwembeceya cici?

¹⁶ Ayisalayeli pakwawula ku nyumba ja Mlungu ku Yelusalemu, ŵakamulanaga mnope. Jemanjaji ŵakosecelaga cenene ulendo wawowo, soni pakwenda ŵakamucisyanaga jwine ni mjakwe. Payice ku nyumba ja Mlunguko wosope ŵamlumbaga soni kumlambila Yehofa. Yosopeyi yakombolekaga ligongo lyakuti jemanjaji ŵaliji ŵakamulana. (Luk. 2:41-44) M’wejisoni patukwenda ulendo wakwawula m’cilambo casambano tukusosekwa kuŵa ŵakamulana. Nambo yeleyi kuti yikombolece pakusasosekwa mtawu. Ana cici campaka citukamucisye kutenda yeleyi?

¹⁷ Ŵandu ŵa m’cilamboci ali ŵangakamulana soni akusatindana nganisyo payindu yejinji. Nambo Yehofa akutukamucisya m’weji kuŵa pamtendele soni atujiganyisye usyesyene. Apano tukulola kwanilicikwa kwa yaŵalocesye Yesaya soni Mika, ŵaŵasasile kuti ŵandu ŵa Mlungu akwawula “ku litumbi lya Yehofa” mwakamulana. (Yes. 2:2-4; aŵalanje Mika 4:2-4.) Kusala yisyene, kulambila kwetu kuli kwapenani mnope ‘m’moŵa gambesi gano.’ Nambotu, msogolo tucisangalala mnope pandaŵi jele ŵandu wosope caciŵa ŵakamulana pakumlambila Yehofa.