1, 2. (a) Ana yikalamusyo yapi yayakamucisye ŵandu ŵajinji kulupusya umi wawo? (Alole ciwulili cacili penanipa.) (b) Ana Yehofa akusiŵakamucisya catuli ŵandu ŵakwe kuti akulupusye umi wawo?

“MJIME, MLOLE, MPIKANILE.” Maloŵe gakalamusyaga ŵagalembile yaka yakupunda 100 yipiteyo pa yikwangwani yekulungwa yayili pamalo pele msewu ukusajomboka njanji ja sitima m’cilambo ca United States. Ligongo cici ŵaŵisile yikwangwaniyi pamaloga? Ŵayiŵisile kuti magalimoto gakajombokaga panjanjipo sitima jili mkwika kogopela ngosi. Kupikanila yikalamusyoyi kukamucisye kuti ŵandu ŵajinji akulupusye umi wawo.

² Yehofa akusatenda cindu cakupunda kuŵika yikwangwani yakwakalamusya ŵandu. Jwalakwe akusiŵalongolela ŵandu kuti akapate umi wangamala soni kwaŵambasya ku yindu yakogoya. Yehofa akusatendasoni yindu mpela mkucinga jwacinonyelo jwakusasilongolela soni kusikalamusya ngondolo syakwe kuti siŵambale kupita matala gakogoya.—Aŵalanje Yesaya 30:20, 21.

3. Ana cici cacatendekwe kuti ŵandu atande kuwa?

³ Kutandila paŵapanganyikwe ŵandu, Yehofa aŵele ali mkwapa malamusi gakwalongolela. Mwambone, mumgunda wa Edeni, Yehofa ŵampele Adamu ni Hawa malamusi gagaliji gakamucisya kuti ŵandu wosope akole umi wangamala soni wakusangalala. (Gen. 2:15-17) Nambo Adamu ni Hawa nganapikanila malamusi gakutyocela kwa Atati ŵacinonyelo. Hawa ŵapikanile maloŵe gagawonekaga mpela gakutyocela kwa lijoka, soni kaneko Adamu ŵapikanile ŵamkwakwe. Yakuyicisya yakwe jemanjaji ŵawile soni nganakola cembeceyo cilicose. Konjecesya pelepa, yaŵatesile jemanjaji yatendekasisye kuti ŵandu wosope asimanikwe mundamo jakusawusya mnope jajikusalongolela ku ciwa.

4. (a) Ligongo cici Mlungu ŵasosekwaga kupeleka malamusi gane panyuma pa cigumula? (b) Ana malamusi gaŵapelecego galosisye catuli mwakusawuwonela umi Yehofa?

⁴ Mundaŵi ja Nowa, Mlungu ŵapelece malamusi gakamucisya kuti ŵandu akulupuce. Panyuma pa cigumula, Yehofa ŵalamwile ŵandu kuti akalyaga kapena kumwa miyasi. Ligongo cici? Ligongo lyakuti pandaŵiji Yehofa ŵakundile ŵandu kuti alyeje nyama. Pakuŵa yindu yaliji yili yicenjile, ŵanduwo ŵasosekwaga kwapa malamusi gasambano. Yehofa ŵalamwile kuti, “Mkasimlya nyama pampepe ni miyasi jakwe, jajili umi wakwe.” (Gen. 9:1-4) Lilamusili likulosya kuti Mlungu akusawuwona umi kuŵa wapajika ligongo uli wakwe. Ligongo lyakuti jwalakwe ni juŵatupanganyisye soni juŵatupele umi, akuŵajilwa kupeleka malamusi gakwayana ni umi. Mwambone, jwalakwe ŵalamwilesoni ŵandu kuti akawulagaga acimjawo. Mlungu akusawuwona umi soni miyasi kuŵa yapajika mnope, soni cacimpa cilango mundu jwalijose jwangakuyikamulicisya masengo mwakuŵajilwa.—Gen. 9:5, 6.

5. Ana mungani ajino citulijiganye cici, soni ligongo cici?

⁵ Panyuma pa masiku ga Nowa, Mlungu ŵajendelecele kupeleka malamusi gakwalongolela ŵandu. Mungani ajino citulijiganye yine mwa yisyasyo yakulosya yaŵatendaga Yehofa pakwalongolela ŵandu ŵakwe. Yeleyi ciyitukamusye kuŵa ŵakusimicisya mnope kuti tulongolelegweje ni Yehofa mpaka m’cilambo casambano.

6. Ligongo cici Ayisalayeli ŵasosekwaga kupikanila malamusi gaŵapele Yehofa kupitila mwa Mose?

⁶ Mundaŵi ja Mose, Yehofa ŵapele ŵandu ŵakwe malamusi gakwayana ni utame wawo soni kulambila. Ligongo cici? Ligongo lyakuti yindu pandaŵiji yaliji yili yicenjilesoni. Kwa yaka yakupunda 200, Ayisalayeli ŵatamaga ku ukapolo ku Iguputo kwele ŵandu ŵakwe ŵalambilaga ŵandu ŵawe, milungu jakupanganyidwa ni ŵandu, soni ŵatendaga yindu yejinji yangamcimbicisya Mlungu. Ayisalayeli paŵagopwece ku ulamusi wangalwe wa ku Iguputo, ŵasosekwaga malamusi gasambano kuti galongoleleje. Jemanjaji ŵasosekwaga kuya Cilamusi ca Yehofa. Mabuku gane gakusasala kuti maloŵe gacihebeli gaŵagagopolele kuti “cilamusi” gakusalandana ni maloŵe gagakusagopolela “kulongolela” soni “kwiganya.” Cilamusi ca Mose cakamucisyaga Ayisalayeli kuti akajigalila yitendo yakusakala soni kulambila kwa unami kuŵatendaga ŵandu ŵamitundu jine. Ayisalayeli paŵampikanilaga Mlungu, yindu yajendelaga cenene, nambo panganampikanilaga, ŵasimanaga ni yakusawusya.—Aŵalanje Deuteronomo 28:1, 2, 15.

7. (a) Ana Yehofa ŵapele Ayisalayeli malamusi gakwalongola paligongo line lyapi? (b) Ana Cilamusi calongolelaga wuli Ayisalayeli?

⁷ Palijisoni ligongo line lyele Ayisalayeli ŵasosocelaga malamusi gakwalongola. Cilamusi cakosecelesyaga jemanjaji ya cakutendekwa  capajika cacakwanilisyaga lisosa lya Yehofa. Cakutendekwaci caliji kwika kwa Mesiya, jwali Yesu Klistu. Cilamusici cakumbusyaga Ayisalayeli kuti ŵaliji ŵangali umlama. Cakamucisyagasoni kupikanicisya kuti ŵasosecelaga mbopesi jaciwombolo kuti jityosye ulemwa wawo wosope. (Aga. 3:19; Ahe. 10:1-10) Konjecesya pelepa, Cilamusi cakamusisye pakuteteya liŵasa lyaŵapagwile Mesiya soni kuti Ayisalayeli cammanyilile jwalakwe pacaciwonecela. Kusala yisyene, Cilamusi caliji mpela jwakwalongolela ŵandu kwa Klistu.—Aga. 3:23, 24.

8. Ligongo cici tukusosekwa kuganicisya songa syasikulongolela malamusi ga m’Cilamusi ca Mose?

⁸ Malamusi gakulongola gaŵapelece Yehofa kwa Ayisalayeli mpaka gatukamucisyesoni m’weji masiku agano. Catuli? Mpaka tuganicisye ya songa syasikulongolela malamusigo. Atamose kuti apano nganituŵa pasi pa cilamusi nambope malamusi gejinji gali gakamucisya paumi wetu soni pakulambila Mlungu jwetu jwamswela, Yehofa. Yehofa ŵasacile kuti malamusigo gasimanikwe m’Baibulo kuti gatujiganyeje, gatukamucisyeje kola ndamo syambone syakusosecela kwa Aklistu, soni kuti songa syasili m’malamusigo situlongoleleje. Yesu ŵasasile kuti, “Mwapikene kuti ŵatite, ‘Mkasimtenda cikululu.’ Nambo une ngumsalila kuti jwalijose jwakumlolecesya jwamkongwe mpaka kumkumbila, atesile najo kala cikululu mumtima mwakwe.” M’yoyo, konjecesya pa kuŵambala kutenda cikululu, tukusosekwasoni kuŵambala kumbila kutenda yakulemweceka.—Mat. 5:27, 28.

9. Ana kucenga kwapi kwakwatendekasisye kuti Yehofa apelecesoni malamusi gasambano?

⁹ Yesu paŵayice mpela Mesiya, Yehofa ŵapelece malamusi gane gasambano soni ŵasasile yindu yejinji yakwayana ni lisosa lyakwe. Ŵatesile yeleyi ligongo lyakuti yindu yacenjilesoni. Mu 33 C.E., Yehofa ŵawukanile mtundu wa Yisalayeli ni kusagula mpingo waciklistu kuti uŵe ŵandu ŵakwe.

10. Ligongo cici mpingo waciklistu wapocele malamusi gasambano, soni ana galekanganaga catuli ni gaŵapocele Ayisalayeli ŵakala?

¹⁰ Mundaŵi ja Mose Mlungu ŵapelece Cilamusi kwa Ayisalayeli kuti cajiganyeje yakwayana ni utame wawo soni kulambila. Nambo m’yaka 100 yandanda, ŵandu ŵa Mlungu ŵaliji ŵakutyocela m’mitundu jakulekanganalekangana ja ŵandu soni ŵakolanjikwaga kuti Yisalayeli jwausimu. Jemanjaji ni ŵaŵapanganyisye mpingo waciklistu soni ŵaliji pasi pa cilangano casambano. Yehofa ŵapele malamusi gasambano gakulosya yakusosekwa kutenda mu utame wawo soni pakulambila. Kusala yisyene, “Mlungu jwangali lusagu. Jwalakwe akusampocela mundu jwakutyocela mu mtundu wuliwose jwakusamjogopa ni kutenda cilungamo.” (Mase. 10:34, 35) Cilamusi ca Mose caŵacilembile pa maganga calongolelaga Ayisalayeli ŵakala ku Cilambo Celagucisye. Nambo Ayisalayeli ŵausimu ŵakuyaga “cilamusi ca Klistu” cacalongolelegwaga ni songa syasyalembekwe mumtima mwawo ngaŵaga pamaganga. Cilamusi celeci cikusalongolela Aklistu kulikose kwali.—Aga. 6:2.

11. Ana Yesu ŵapele Aklistu malamusi gaŵili gapi?

¹¹ Malamusi gaŵapelece Yehofa kupitila mwa Mwanace jwakwe gakamucisyaga mnope Ayisalayeli ŵausimu. Yesu mkanatandisye cilangano casambano, ŵapele Aklistu malamusi gaŵili gakusosekwa mnope. Lilamusi lyandanda lyaliji lyakuti alalicileje, soni lyaŵili lyasalaga ya ndamo syakusosekwa kola Aklistu soni mwakusosecela kutenda yindu ni ŵakulupilila acimjawo. Malamusi gelega gakukamulasoni masengo kwa Aklistu wosope moŵa agano, cinga ŵakwete cembeceyo cakwawula kwinani kapena cakutama pacilambo capasi.

12. Ana cici cacaliji casambano ni masengo gakulalicila?

 ¹² Kwende tutagulilane ya masengo gakulalicila ngani syambone gele Yesu ŵasalile ŵakumkuya ŵakwe kuti agatendeje. Ndaŵi jamunyuma, ŵandu ŵamitundu jine ŵayikaga jika ku Yisalayeli kukumtumicila Yehofa. (1 Maf. 8:41-43) M’yoyo, ŵandu pandaŵijo nganamanyililaga yakwayana ni masengo gakulalicila. Nambo kaneko Yesu ŵalamwile ŵakumkuya ŵakwe kuti “ajawule” kwa ŵandu ŵamitundu josope. (Aŵalanje Matayo 28:19, 20.) Palisiku lya Pentekosite mu 33 C.E., Yehofa ŵalosisye kuti ŵasakaga kuti ngani syambone silalicikwe pacilambo cosope. Msimu weswela wa Mlungu watendekasisye ŵandu ŵakwana 120 ŵaŵaliji mumpingo wasambano kuti atande kuŵeceta m’yiŵeceto yakulekanganalekangana kwa Ayuda soni kwa ŵandu ŵaŵapitikucile ku Ciyuda. (Mase. 2:4-11) Mkupita kwa ndaŵi, ngani syambone syatandite kwayicila ŵandu ŵa ku Samaliya. Kaneko mu 36 C.E., ngani syambone syayicile ŵandu ŵangawumbala. Yeleyi yikulosya kuti Aklistu ŵasosekwaga kulalicila pacilambo cosope.

13, 14. (a) Ana “lilamusi lyasambano” lyaŵapelece Yesu likusasala yatuli? (b) Ana tukulijiganya cici pa cisyasyo caŵapelece Yesu?

¹³ Yesu ŵapelecesoni “lilamusi lyasambano” lyakulosya mwatukusosekwa kutendela yindu ni ŵakulambila acimjetu. (Aŵalanje Yohane 13:34, 35.) Lilamusili likusalosya kuti tukusosekwa kwanonyela acimjetu ndaŵi syosope, soni tuŵeje ŵakusacilila atamose kuwa ligongo lya acimjetuwo. Lilamusi lyeleli nganaligombelecesya mnope m’Cilamusi ca Mose.—Mat. 22:39; 1 Yoh. 3:16.

¹⁴ Yesu ŵapelece cisyasyo cambone pakuya lilamusili. Jwalakwe ŵanonyelaga mnope ŵakumkuya ŵakwe mwati ŵakundile kuwa ligongo lya jemanjajo. Jwalakwe akusajembeceya kuti ŵakumkuya ŵakwe atendejesoni yakulandanayo. M’yoyo, wosope tukusosekwa kuŵa ŵakusacilila kusimana ni yipwetesi atamosesoni kuwa ligongo lya Aklistu acimjetu.—1 Ates. 2:8.

15, 16. Ana moŵa agano yindu yili wuli pacilambopa, soni ana Mlungu akutulongolela catuli?

¹⁵ Yesu ŵasagwile “kapolo jwakulupicika ni jwalunda” kuti apeleceje cakulya causimu kwa ŵandu ŵakwe pandaŵi jakuŵajilwa. (Mat. 24:45-47) Cakulya causimu celeci cikupwatikapo kutusalila yatukusosekwa kutenda mwakamulana ni kucenga kwa yindu.

¹⁶ Apano tukutama ‘m’moŵa gambesi,’ soni pacangakaŵapa cipatendekwe yisawusyo yekulungwa yanganiyitendekweje citandilile. (2 Tim. 3:1; Maliko 13:19) Konjecesya pelepo, Satana ni malayika gakusakala paŵagaponyisye pacilambo capasi, gakwatendekasya ŵandu kuti asimaneje ni yipwetesi yejinji. (Ciu. 12:9, 12) Apano tukukamulasoni masengo gaŵatulamwile Yesu gakulalicila ngani syambone kwa ŵandu ŵa yiŵeceto yejinji pacilambo cosope.

17, 18. Ligongo cici tukusosekwa kupikanila yakusatujiganya Yehofa apanopano?

¹⁷ Likuga lya Mlungu litupele yindu yakulekanganalekangana yakutukamucisya pamasengo gakulalicila. Ana tukusayikamulicisya masengo? Ana tukusakuya yatukusalijiganya pamisongano yakwamba mwampaka tukamulicisye masengo cenene yinduyi? Ana tukusayiwona yindu yeleyi mpela litala lyakutulongolelela Mlungu?

¹⁸ Kusala yisyene, kuti Mlungu atujaliweje, tukusosekwa kupikanila yosope yakusatujiganya pa misongano jaciklistu. Naga tukuŵa ŵakupikanila apano, yiciŵa yangasawusyasoni kuti citupikanile yacacitusalilaga Yehofa pa “yisawusyo yekulungwa,” pandaŵi jele cilambo cakusakala ca Satanaci cicijonanjikwa. (Mat. 24:21) Panyuma pa yeleyi, tucisosekwa malamusi gasambano gakuti tukuyeje m’cilambo casambano mwangasimupagwa yakusawusya yiliyose.

19, 20. Ana m’cilambo casambano tucipocela mipukutu japi, soni ana yakuyicisya yakwe yiciŵa yatuli?

 ¹⁹ Mu ndaŵi ja Mose, Ayisalayeli ŵasosekwaga malamusi gasambano gakwalongolela, m’yoyo Mlungu ŵapele Cilamusi. Kaneko mpingo waciklistu watandite kuya “cilamusi ca Klistu.” Mwakulandana ni yeleyi, Baibulo jikusatusalila kuti m’cilambo casambano tucipocela mipukutu jajicitusalila malamusi gasambano gatucisosekwaga kuya. (Aŵalanje Ciunukuko 20:12.) Mwangakayicila, mipukutu jeleji jicisalaga yindu yasambano yakusaka Yehofa kuti ŵandu catendeje pandaŵi jelejo. Ŵandu wosope kupwatikapo ŵacacijimuka ku ŵawe cacisosekwaga kulijiganya yayiciŵa m’mipukutu jeleji kuti cakomboleje kutenda yakusaka Mlungu. Mipukutuji jicitukamucisyasoni kuti citumanyilile cenene mwakusaganicisya Yehofa. Pandaŵiji tucipikanicisyasoni cenene yajikusasala Baibulo. Yeleyi yicitukamucisya kuti citunonyelaneje soni kucimbicisyana mnope. (Yes. 26:9) Tucikolasoni upile wakulijiganya yindu yejinji soni kwajiganya ŵane mwakulongolelegwa ni Mwenye, Yesu Klistu.

²⁰ Ŵandu ŵacacikuya ‘yindu yaŵayilembile m’mipukutujo,’ soni ŵacacijendelecela kuŵa ŵakulupicika patucilinjikwaga kakumalisya, Yehofa cacalemba mena gawo mu “mpukutu wa umi.” Jemanjaji cacipocela umi wangamala. M’yoyo, naga TUKWIMA ni kulijiganya Maloŵe ga Mlungu, KULOLA kuti tupikanicisye kusosekwa kwakwe, soni KUPIKANILA yakutusalila Mlungu apanopano, tucikulupuka pa yisawusyo yekulungwa. Konjecesya pelepa, tucisangalala ni kulijiganya yakwamba Mlungu jwetu jwali jwalunda soni jwacinonyelo mpaka kalakala.—Mlal. 3:11; Alo. 11:33.