Kwendelecela Kuŵa Paunasi Atamose Yindu Payisawisye
Gianni ni Maurizio ŵaŵele ali paunasi kwa yaka ciŵandika 50. Nambo pandaŵi jine, unasi wawo wasigele panandi kumala. Maurizio ŵasasile kuti, “Ndaŵi jine, natesile cakulemwa cekulungwa yayatendekasisye kuti unasi wetu usokonecele.” Gianni ŵajonjecesye kuti, “Maurizio ni juŵanjiganyaga Baibulo panatandaga usyesyene. Jwalakwe ni juŵa ngamucisyaga mwausimu. M’yoyo, nganingulupililaga kuti jwalakwe mpaka atende yaŵatesileyi. Yaliji mpela kuti cilambo cosope cikugaŵikangana, ligongo namanyililaga kuti ngatujendelecela kuŵa paunasi. Nalipikene kuti ndili jika.”
KOLA mjetu jwambone, kuli kwapenani mnope, soni yangagamba kutendekwa kuti ukole mjakwe jwambone. Nambo, ana cici campaka citukamucisye naga unasi wetu ni mjetu ukuwoneka kuti ciwusokonecele? Mpaka tulijiganye yejinji kutyocela ku yisyasyo ya m’Baibulo ya ŵandu ŵaŵaliji paunasi wambone nambo mkupita kwa ndaŵi unasi wawo waliji pangosi.
MJETU PATESILE CAKULEMWECEKA
Daudi, juŵaliji mkucinga nambosoni mwenye, jwakwete acimjakwe ŵambone. Komboleka kuti jumo jwa acimjakwe jwampaka ayice munganisyo mwawo ali Yonatani. (1 Sam. 18:1) Nambo Daudi ŵakwete acimjakwe ŵanesoni, mpela jwakulocesya Natani. Baibulo jangasala ndaŵi jisyesyene jaŵatandite kuŵa paunasi. Nambope pandaŵi jine, Daudi ŵamsalile Natani yindu yamtemela mpela mwampaka atendele mundu jwalijose kwa mjakwe. Daudi jwaliji jwakusacilila kutaŵa nyumba ja Yehofa. Jwalakwe ŵasiweni nganisyo sya Natani kuŵa syakusosekwa ligongo lyakuti ŵaliji mjakwe soni ŵaliji mundu juŵakwete msimu wa Yehofa.—2 Sam. 7:2, 3.
Nambope, cindu cinecakwe cacasokonasisye unasi wawo catendekwe. Mwenye Daudi jwatesile cikululu ni Batiseba soni ŵalinganyisye yakuti Uliya juŵaliji ŵamkwakwe Batiseba awulajidwe. (2 Sam. 11:2-21) Kwa yaka yejinji, Daudi jwaliji jwakulupicika kwa Yehofa soni jwatendaga yacilungamo. Nambo jwalakwe jwatesile cakulemwa cekulungwa. Ana ligongo cici mwenye jwamboneju jwatesile yeleyi? Ana kapena nganamanyililaga ukulu wa cakulemwa cakweco? Kapena ana jwaganisyaga kuti Yehofa ngamanyilila kuti jwalakwe atesile cakulemwa?
Ana pelepa Natani akatesile cici? Ana jwalakwe nakamtumile jwine kuti ajawule kwa Daudi kukumsalila ya cakulemwaco? Nambotu ŵandu ŵane ŵamanyililaga yaŵatesile Daudi pakulinganya kuti Uliya awulajidwe. Nambi ligongo cici Natani ŵasosekwaga kutenda yindu yayikasokonasisye unasi wawo? Nambosoni umi wa Natani ukaliji pangosi akagambe kusala ya nganiji. Tukumanyilila yeleyi ligongo lyakuti pandaŵiji Daudi jwaliji ali am’wulajikasisye kala Uliya, juŵaliji jwangalemwa cilicose.
Nambo Natani jwaliji jwakulocesya jwa Mlungu. Jwakulocesyaju jwamanyililaga kuti naga ngakusala ya nganiji, unasi wakwe ni Daudi ngawuŵa mpela muwaŵelele pandanda, nambosoni cikumbumtima cakwe cikamsawusyaga mnope. Natani ŵamanyililaga kuti Daudi atesile yindu yayikamtendekasiye kuti akaŵasoni paunasi ni Yehofa. Mwenyeju jwasosekwaga cikamucisyo kuti aŵesoni paunasi wambone ni Yehofa. Kusala yisyene, pandaŵiji Daudi ŵasosecelaga mjakwe jusyesyene. Natani ŵaliji mundu juŵasosecelagadi pandaŵiji. Jwalakwe ŵasagwile kuti akamsalile mwenyejo ya nganiji pakamulicisya masengo ciwanicisyo cacaliji cakamula mtima kwa mundu jwele pandanda ŵaliji mkucinga. Natani ŵasasile yaŵamtumile Mlungu nambo m’litala lyalyamkamucisye Daudi kumanyilila ukulu wa yakulemwa yakwe soni kumlimbikasya kuti atendepo kandu.—2 Sam. 12:1-14.
Ana wawojo mpaka atende cici naga mjawo atesile cakulemwa cekulungwa? Mwine mpaka aganisye kuti kumsalila mjawojo ya cakulemwa catesileco mpaka kujonanje unasi wawo. Kapena mpaka aganisye kuti kusala ya cakulemwa catesile mjawojo kwa acakulungwa ŵa mumpingo ŵampaka amkamucisye mwausimu, mpaka kuŵe kumjimucila mjawojo. Ana wawojo mpaka atende wuli?
Gianni, jwatumkolasile kundanda kwa nganiji, ŵaŵecete kuti, “Namanyilile kuti cinecakwe cicenjile. Maurizio nganagopokaga mpela muŵatendelaga pandanda. Ni naganisisye yakuŵecetana najo, atamose kuti kutenda yeleyi kwaliji kwakusawusya kwa une. Naliwusisye kuti, ‘Ana mpaka namsalile cilicose cele ngakucimanyilila? Komboleka kuti jwalakwe ciyikamsakalisye!’ Nambo kumbucila yosope yatwalijiganyisye yalumo, yambele macili kuti mbecetane najo. Maurizio ŵatesilepo yeleyi pandaŵi jine janasosecelaga cikamucisyo. Nganisakaga kuti unasi wetu umale, nambo nasakaga kumkamucisya ligongo namganicisyaga mnope.”
Maurizio ŵajonjecesye kuti, “Gianni ŵasalaga yisyene. Namanyililaga kuti yakuyicisya ya yindu yakulemweceka yanasagwile, nganiyika ligongo lya jwalakwejo kapena Yehofa. M’yoyo, najiticisye camukoco, soni pali papite ndaŵi naŵelesoni jwakulimba mwausimu.”
MJETU PASIMENE NI YIPWETESI
Daudi ŵakwete acimjakwe ŵanesoni ŵaŵaliji ŵakulupicika kwa jwalakwe atamose pa ndaŵi ja yipwetesi. Jumo mwa acimjakweŵa jwaliji Husayi jwele Baibulo jikusamkolanga kuti, “mjakwe jwa Daudi.” (2 Sam. 16:16; 1 Mbiri 27:33) Jwalakwe jwaliji nduna soni mjakwe jwa mwenye, jwele ndaŵi sine ŵakamulaga masengo gamtemela.
Pandaŵi jele Abisalomu mwanace jwa Daudi ŵasumwile ucimwene, Ayisalayeli ŵajinji ŵaliji kumbali ja Abisalomu, nambo Husayi ŵaliji kumbali ja Daudi. Pele Daudi ŵatilaga, jwalakwe ŵalongene najo. Daudi yampwetece mnope ligongo lyakuti mwanace jwakwe jusyesyene soni ŵandu ŵane ŵaŵakulupililaga ŵamjimucile. Nambope, Husayi ŵaliji jwakulupicika mwati ŵaliji jwakusacilila kuŵika umi wakwe pangosi soni kwanilisya yaŵakamulene yakulekasya mapulani ga ŵandu ŵakwimucila. Husayi nganatenda yeleyi ligongo lyakuti ŵaliji nduna ja mwenye. Nambo ŵatesile yeleyi pakulosya kuti jwaliji jwakulupicika kwa mjakwejo.—2 Sam. 15:13-17, 32-37; 16:15–17:16.
Yili yakulimbikasya kwawona abale ni alongo masiku agano ali ŵakamulana mnope ligongo lya cinonyelo mwangajigalila kuti akwete ukumu watuli mumpingo. Kupitila mu yakutenda yawo, akusaŵa ali mkuŵeceta kuti, “Une ndili mjenu, ngaŵa ligongo lyakuti ngusosekwa kuŵa mjenu, nambo ligongo lyakuti mmwejo mli jwakusosekwa kwa une.”
Yeleyi ni yayamtendecele m’bale jwine lina lyakwe Federico. Antonio ŵamkamucisye mnope pa umi wake pandaŵi jele ŵasimene ni yakusawusya. Federico ŵasasile kuti, “Antonio paŵasamile mumpingo wetu, twaŵele paunasi. Wosopewe twaliji ŵakutumicila ŵakamucisya, soni twasangalalaga kutendela yindu ya mumpingo yalumo. Kaneko Antonio ŵaŵicidwe pa ukumu wa jwamkulungwa jwa mumpingo. Jwalakwe nganagamba kuŵa mjangu, nambo ŵalijisoni cisyasyo cangu causimu.” Kaneko Federico ŵatesile cakulemwa. Mwacitema jwalakwe ŵasosilesosile cikamucisyo causimu, nambo nganaŵajilwasoni kuŵa mpayiniya soni jwakutumicila jwakamucisya. Ana Antonio yamkwayiye mwatuli?
Federico paŵasimene ni cakusawusya, mjakwe lina lyakwe Antonio ŵampikanilaga paŵaŵecetaga soni ŵamlimbikasisye
Federico ŵaŵecetesoni kuti, “Nayiweni kuti Antonio yampwetece mnope. Jwalakwe ŵatesile yakomboleka kuti angamucisye. Ŵaganicisyaga mnope ya usimu wangu soni nganandeka jika. Jwalakwe ŵalimbikasisye kuti mbesoni jwakulimba mwausimu soni kuti ngawujila munyuma.” Antonio ŵasasile kuti, “Namalilaga ndaŵi jejinji ndili ni Federico. Nasakaga kuti jwalakwe aŵe jwagopoka kuŵecetana ni une cilicose soni muŵapikanilaga mumtima.” Pali papitile ndaŵi jwalakwe jwaŵelesoni jwakulimba mwausimu. Kaneko ŵasagulidwesoni kuti aŵe mpayiniya soni jwakutumicila jwakamucisya. Antonio ŵamalisisye kuti, “Atamose kuti apano nganituŵa mumpingo umo, nambo tuli ŵakamulana mnope kupunda pandanda.”
NAGA MJAWO ŴATENDELE YANGAKULUPICIKA
Ana mpaka apikane wuli naga mjawo jwapamtima ŵalesile jika pandaŵi jele wawojo akumsaka mnope kuti ŵakamucisye? Komboleka kuti mpaka yatengusye mnope. Nambo ana mpaka akombole kumkululucila? Ana unasi wawo mpaka uŵe wakulimba mnope mpela muwaŵelele pandanda?
Aganicisye yayamtendecele Yesu kumbesi kusyesyene kwa umi wakwe wapacilambo capasi. Kwandaŵi jelewu, jwalakwe ŵaliji ni ŵandumetume ŵakwe ŵakulupicika, soni ŵanonyelanaga mnope. Yesu ŵakolangaga ŵandumetumeŵa kuti acimjakwe. (Yoh. 15:15) Nambo, ana cici cacatendekwe pandaŵi jele Yesu ŵataŵidwe? Ŵandumetume wosope ŵamtisile. Petulo ŵaliji ali asasile pelanga kuti ngasamleka Mlongola jwakwe, nambo cilo celeci jwalakwe ŵamkanile Yesu kuti ngakum’manyilila.—Mat. 26:31-33, 56, 69-75.
Yesu ŵamanyililaga kuti caciŵa jika pacacisimanaga ni cakulingwa cakumalisya. Nambope, jwalakwe jwakwete magongo gakumtendekasya kutumbila kapena kutenguka. Nambo yaŵatesile ni ŵandumetume ŵakwe ali ajimwice ku ŵawe, nganiyilosya kuti jwalakwe ŵatumbile kapena kutenguka, kapenasoni kulijimba magambo. Yesu nganaganicisya yakwaŵalanjila yakulemwa yaŵatesile ŵandumetume ŵakwe kupwatikapo yaŵatesile cilo cele jwalakwe ŵataŵidwe.
Yesu ŵalosisye kumnonyela soni kumkulupilila Petulo ni ŵandumetume ŵane mwakwapa ukumu wakulolela masengo gakulalicila pacilambo cosope. Kwa Yesu, ŵandumetumeŵa ŵalijipe acimjakwe. Cinonyelo ca Yesu cakamucisye mnope ŵandumetumeŵa. Jemanjaji ŵasimicisye kutenda yakomboleka kuti akasamtengusyasoni Mlongola jwawo. Kusala yisyene, jemanjaji ŵakombwele kutenda masengo gele Yesu ŵasalile kuti agatende.—Mase. 1:8; Akolo. 1:23.
Mlongo jwine lina lyakwe Elvira akusakumbucila cenene pandaŵi jele ŵalekangene nganisyo ni mjakwe jwapamtima lina lyakwe Giuliana. Elvira ŵasasile kuti, “Paŵasalile kuti atengwice ligongo lya yindu yanatesile, yasakalisye mnope. Jwalakwe ŵakwete magongo gakupikanika gakutumbilila. Nambo cacasangalesye mnope caliji cakuti jwalakwe ŵaganicisyaga mnope ya une soni yakuyicisya ya yitendo yangu. Ndaŵi syosope ngusayamicila kuti nganagambaga kulola yakulemweceka yanatendaga. Mmalo mwakwe ŵalolagasoni muyangwayilaga yanatendagayo. Ngusinam’yamicila Yehofa ligongo lyakuti nakwete mjangu juŵanganicisyaga mnope.”
Ana mjetu jwambone mpaka atende wuli naga unasi wetu uli pangosi? Jwalakwe mpaka aŵe jwakusacilila kuŵecetana mwacinonyelo soni mwagopoka naga yili yakusosecela kutenda m’yoyo. Mjetu jwelejo mpaka aŵe mpela Natani soni Husayi, ŵaŵajendelecele kuŵa ŵakulupicika atamose pandaŵi jakusawusya. Mpaka aŵesoni mpela Yesu juŵaliji jwakusacilila kwakululucila ŵandumetume ŵakwe. Ana wawojo ali mpela jemanjaji?
