Mu 2012, ŵakuwukula m’masame ŵapatile mapale ga lulo lwine lwalwapanganyidwe yaka 3,000 munyumamo. Ŵakuwungunya yindu ŵatesile lung’wanu mnope ni yeleyi. Ngaŵa kuti jemanjaji ŵatesile lung’wanu ni mapalego, nambo ligongo lya maloŵe gagalembedwepo.

Ŵakuwukula m’masamewo paŵagalumbikenye mapalego ŵakombwele kuŵalanga maloŵe ga Cikanani gagalembedwe pa lulolo. Maloŵego galiji gakuti, “Eshba’al Ben Beda’,” kugopolela kuti “Esibaala mwanace jwa Beda.” Jeleji jaliji ndaŵi jandanda jele ŵakuwukula m’masame ŵapatile linali lili lilembedwe pa cindu cakala.

M’Baibulo mwanasoni mundu jwine lina lyakwe Esibaala, juŵaliji jumo mwa ŵanace ŵa acalume ŵa Mwenye Sauli. (1 Mbiri 8:33; 9:39) Namatetule jwine lina lyakwe Yosef Garfinkel, juŵaliji jumo mwa ŵandu ŵaŵawukwile mapale ga lulolu, ŵasasile kuti, “Yili yakutesya lung’wanu kuti lina lyakuti Esibaala likusasimanikwa m’Baibulo, soni apano likusimanikwa mu yakulemba yetu. Nambo wosopeŵa ali ŵa mundaŵi ja ulamusi wa Mwenye Daudi.” Ŵandu ŵane akusaganisya kuti linali lyaliji lyapajika mnope mu jele ndaŵijo. Celecitu cili cisyasyo cakusimicisya kuti yayili m’Baibulo yili yisyesyene.

Pamalo gane m’Baibulo lina lyakuti Esibaala akusalikolangasoni kuti Isiboseti, yayikulosya kuti ŵatyosisye maloŵe gakumbesi gakuti “baala” ni kuŵikapo “boseti.” (2 Sam. 2:10) Ligongo cici ŵatesile yeleyi? Ŵandu ŵakuwungunya ŵasasile kuti, “Juŵalembile buku ja Samueli jaŵili jwaŵambele kamulicisya masengo lina lyakuti Esibaala ligongo lyakumbusyaga ya mlungu jwa cimbungo jwa Akanani lina lyakwe Baala. Nambo lina lyakuti Esibaala likusasimanikwa mu buku ja m’Baibulo ja Mbiri.”