1. Ana acinangolo ŵa Ciklistu akusasaka kusimicisya ya cici ŵanace ŵawo mkanabatiswe?

MSIKANA jwine lina lyakwe Blossom Brandt, ŵaŵecete yayatendekwe paŵatendaga cisagula cakubatiswa. Jwalakwe ŵatite, “Kwa miyesi nditu naliji mkwasalila Baba ni Mama kuti ngusaka kubatiswa, soni jemanjajo ŵaŵecetaga ni une ndaŵi syejinji pangani ja ubatisoji. Ŵasakaga kulolecesya kuti ngumanyilila cenene ukumu wawukusayika ligongo lya yangusaka kutendayi. Kaneko pa December 31, 1934, lisiku lya cakutendekwa cakusangalasya mnope pa umi wanguci lyayice.” Masiku aganosoni, acinangolo ŵa Ciklistu akusakolasoni lung’wanu lwakwakamucisya ŵanace ŵawo kutenda yisagula yambone. Kulepela kapena kucelewa kubatiswa mwamele mpaka kukole yakusawusya mwausimu. (Yak. 4:17) Nambope, mwalunda acinangolowo akusasaka kuti aŵe ŵakusimicisya kuti ŵanace ŵawo mkanabatiswe, aŵe ŵakoseka kwanilisya ukumu wakuŵa jwakulijiganya jwa Klistu.

2. (a) Ana ŵakulolela mkuli ŵane akusadandawula ya cici? (b) Ana mungani ajino citutagulilane ya cici?

² Ŵakulolela mkuli ŵane akusadandawula kuti akusasimana ni ŵacinyamata ŵane ŵa yaka ya m’ma 18 kapena m’ma 20 ŵakulile m’maŵasa  ga Ciklistu nambo ŵanganaŵepe kubatiswa. Ŵacinyamataŵa, ndaŵi syejinji akusayika pamisongano soni akusalalicila nawo. Akusaliwona kuti ali kala Ŵamboni sya Yehofa. Nambope, pa magongo gane ŵangapeleka umi wawo kwa Yehofa ni kubatiswa. Ana akusatenda yeleyi ligongo cici? Ndaŵi sine, acinangolo akusiŵasalila ŵanaceŵa kuti akabatiswa citema. Mungani ajino, citutagulilane magongo gatatu gagakusatendekasya acinangolo ŵa Ciklistu kulepela kwakamucisya ŵanace ŵawo kuti abatiswe.

3. Ana acinangolo ŵa Blossom ŵadandawulaga ya cici?

³ Acinangolo ŵa Blossom, ŵatwakolasile mu ndime jandanda jila, ŵadandawulaga yisyene. Ŵasakaga kusimicisya naga mwanagwawo akusile mpaka kuyikana pakupikanicisya kusosekwa soni ukumu wawukusayika ligongo lya kubatiswa. Ana acinangolo mpaka amanyilile camtuli naga mwanace jwawo ayikene pakulipeleka yisyesyene?

4. Ana lilamusi lya Yesu lyalikusimanikwa pa Matayo 28:19, 20 mpaka lyakamucisye camtuli acinangolo pakwajiganya ŵanace ŵawo?

⁴ Aŵalanje Matayo 28:19, 20. Mpela mwatutagulilene mungani jipite jila, Baibulo jangasala msingu wakusosekwa kola mundu kuti aŵajilwe kubatiswa. Nambope, acinangolo mpaka yakamucisye ganicisya yayigopolela pangani jakupanganya jwakulijiganya. Maloŵe ga Cigiliki gaŵagagopolele kuti ‘akapanganye ŵakulijiganya’ pa Matayo 28:19, gakusagopolela kwiganya ni cakulinga cakupanganya ŵakulijiganya. Jwakulijiganya ali mundu jwakusalijiganya ni kupikanicisya yijiganyo ya Yesu soni ali jwakusacilila kuyikuya. M’yoyo, cakulinga ca acinangolo ŵa Ciklistu cikusosekwa kuŵa kwajiganya ŵanace ŵawo kutandila ali makandi pakusaka kwakamucisya kuŵa ŵakulijiganya ŵabatiswe ŵa Klistu. Likandi nganiliŵa liŵajilwe kubatiswa. Nambope, Baibulo jikusalosya kuti atamose ŵanace ŵacinandipile mpaka apikanicisye ni kuwuwonaga usyesyene wa m’Baibulo kuŵa wakusosekwa.

5, 6. (a) Ana mwajikusatagulila Baibulo pakwambaga ya Timoteyo yikututendekasya ganisya cici pakwamba ya ubatiso? (b) Ana acinangolo ŵakumanyilila mpaka ŵakamucisye camtuli ŵanace ŵawo mwakuŵajilwa?

⁵ Timoteyo jwaliji jwakulijiganya juŵawutesile usyesyene kuŵa wakwe ali jwacinandipile. Ndumetume Paulo ŵaŵecete kuti Timoteyo ŵalijiganyisye usyesyene wa m’Malemba kutandila ali likandi. Atamose kuti Timoteyo ŵakulile mu liŵasa lya ŵandu ŵa yikulupi yakulekangana, nambo mamagwe ni angangagwe ŵa Ciyuda ŵamkamucisye kuti agawoneje Malemba kuŵa gakusosekwa, mpela muŵagawonelaga Ayuda. Yeleyi yatendekasisye kuti cikulupi cakwe ciŵe cakulimba. (2 Tim. 1:5; 3:14, 15) Pandaŵi jaŵakwanisyaga yaka ya m’ma 19 kapena ya m’ma 20, Timoteyo ŵaliji ali jwakulijiganya jwa Klistu, jwaŵaŵajilwaga maundumetume gapajika mumpingo.—Mase. 16:1-3.

⁶ Nambope, mwanace jwalijose ali jwakulekangana ni mjakwe. Ŵanace akusalekangana kajawule kawo pasogolo mwausimu. Ŵane akusakomangala nganisyo soni lunda ali ŵacinandipile nikusacilila kubatiswa. Ŵane mpaka asosekwe akule kaje panandi mkanaŵajilwe kubatiswa. M’yoyo, acinangolo ŵakumanyilila ŵangacisya ŵanace ŵawo kuti abatiswe. Nambo akusamkamucisya mwanace kwawula pasogolo mwausimu mwakamulana ni mwaŵelele mwanacejo. Acinangolo akusasangalala naga mwanace jwawo akutenda yindu mwalunda. (Aŵalanje Miyambo 27:11.) Nambope, akusosekwa kwendelecela kola cakulinga cawo cakwakamucisya ŵanace ŵawo kuŵa ŵakulijiganya ŵa Klistu. M’yoyo, acinangolo mpaka atende cenene ganicisya ciwusyo cakuti, ‘Ana mwanangu akumanyilila usyesyene mwakwanila mwamti mpaka kuyikana pakulipeleka ni kubatiswa?’

7. Ana mundu jwakusaka kubatiswa akusasosekwa kuti alijiganye yosope yakwaya Baibulo? Alondesye.

⁷ Mpela ŵakwiganya mwiŵasa, acinangolo akusasaka kuti ŵanace ŵawo amanyilileje yindu yakwanila yakwakamucisya kulipeleka mwakuŵajilwa. Atamose yili m’yoyo, ngayikusosekwa kuti mundu alijiganye yosope yakwaya Baibulo kuti ayice pakubatiswa. Panyuma pakubatiswa, ŵakulijiganya ŵa Klistu wosope akusosekwa kwendelecela kukula mu umanyilisi usyesyene. (Aŵalanje Akolose 1:9, 10.) Sambano, ana mundu akusosekwa kumanyilila yejinji camtuli kuti aŵajilwe kubatiswa?

8, 9. Ana mpaka tulijiganye cici pangani ja Paulo ni jwakulolela nyumba ja akayidi?

⁸ Yakutendekwa ya liŵasa line lya m’yaka 100 yandanda mpaka yakamucisye acinangolo kumanyilila yakutenda. (Mase. 16:25-33) Paulo, paulendo wakwe waŵili, ca m’ma 50 C.E., ŵapite ku Filipi. Ali kweleko, jwalakwe ni mjakwe Sila ŵataŵile nikwaŵika mu ukayidi pamagongo gakwalambucisya. Cilo, cisicinya catenganyisye yilimbilimbi ya nyumba ja ukayidijo nikuwugula matanga gosope. Jwakulolela nyumba ja ukayidijo syamkamwile ndetemu paganisya kuti acikayidi atisile. Jwakulolela nyumba ja ukayidijo paŵasakaga kuliwulaga, Paulo ŵamlekasisye. Paulo ni Sila ŵamlalicile jwakulolela nyumba ja ukayidiji yimpepe ni ŵamwiŵasa mwakwe. Ana jwalakwe ŵatesile cici paŵayiweni kuti usyesyene waŵalijiganyaga wakwamba Yesu uli wakusosekwa? Ŵabatiswe mwangacelewa. Ana mpaka tulijiganye cici ku ngani jeleji?

⁹ Mwakamulana ni ndamilo ja ndaŵi jelejo, jwakulolela nyumba ja ukayidiju komboleka kuti ŵaliji msilikali jwakupumula pamasengo. Jwalakwe nganamanyililaga Malemba. M’yoyo, kuti akole cilimbilimbi cambone ca Malemba, ŵasosekwaga kulijiganya usyesyene wandanda wakusosekwa mnope wa m’Baibulo, soni ŵasosekwaga kupikanicisya yakusosekwa ya jwakutumicila Mlungu. Nambosoni ŵasosekwaga kuŵa jwakusacilila kupikanila yijiganyo ya Yesu. Mu ndaŵi jamnono, ligongo lyakumanyilila usyesyene wandanda wakusosekwa wa m’Malemba, soni kumanyilila kusosekwa kwakwe, yamtendekasisye kubatiswa. Mwangakayicila, jwajendelecele kumanyilila yejinji panyuma pakubatiswa. Mwakamulana ni cisyasyoci, ana acinangolo mpaka atende cici naga mwanagwawo akulosya kuti akukuwona kusosekwa kwa yijiganyo yandanda ya m’Malemba, kupwatikapo gopolela ni kusosekwa kwa kulipeleka ni kubatiswa? Acinangolo ŵa Ciklistu komboleka kumsalila mwanagwawojo kuti akasalile acakulungwa ŵa mumpingo kuti akalole naga akuŵajilwa kubatiswa. * Mpela mwakusatendela wosope ŵaŵabatiswe, jwalakwe cacijendelecela kumanyilila lisosa lya Yehofa pa umi wakwe wosope.—Alo. 11:33, 34.

10, 11. (a) Ana acinangolo ŵane akusaganisya yamtuli pakwamba ya kubatiswa? (b) Ana candanda acinangolo akusosekwa ganicisya yindu yapi?

¹⁰ Acinangolo ŵane akusasaka kuti mwanagwawo akabatiswa citema ni cakulinga cakuti alijiganye kaje majiganyo gapenani soni capate masengo gambone. Ligongo lyeleli mpaka liŵe lyakupikanika, nambo ana mpaka amkamucisye mwanacejo kola yakulinga yambone mnope? Cakusosekwasoni kuliwusya ni cakuti, Ana yeleyi yili yakamulana ni Malemba? Ana maloŵe ga Yehofa gakusatulimbikasya kutenda cici?—Aŵalanje Mlaliki 12:1.

¹¹ Tukusosekwa kumbucilaga kuti cilamboci soni yosope yayili mwelemu yili yakutindana ni nganisyo soni yakusasaka Yehofa. (Yak. 4:7, 8;  1 Yoh. 2:15-17; 5:19) Kuti mwanace akombole kulimbana ni Satana, cilambo cakweci, soni kaganisye kakwe, akusosekwa kuŵa paunasi ni Yehofa. Naga nangolo akusaka kuti mwanace jwakwe akuyeje yindu yakucilamboku, nikuti nangolojo akumjonanjila mwanacejo sogolo jambone. Ana acinangolo Ŵaciklistu ŵacinonyelo mpaka akunde kuti yakutendekwa ya kucilamboku yisokonasye yakulinga yausimu ya ŵanace ŵawo? Yisyesyene yakwe yili kuti, tukusapata cisangalalo cisyesyene naga tukumŵika Yehofa pamalo gandanda.—Aŵalanje Salimo 1:2, 3.

12. Ligongo cici acinangolo ŵane akusasaka kuti mwanagwawo akabatiswa citema?

¹² Jwamkongwe jwine Jwaciklistu paŵalondesyaga ligongo lyakwe ŵangamlimbikasya mwanagwe jwamkongwe kuti abatiswe, jwalakwe ŵatite, “Yili yakutesya sooni kusala kuti ligongo lisyesyene lili kutyosyedwa mu mpingo.” Mpela jwamkongweju, acinangolo ŵanesoni akusaganisya kuti mwanace jwawo akabatiswa citema kwikana mpaka ali akusile soni kuleka kutenda yawanace. (Gen. 8:21; Miy. 22:15) Jemanjaji mpaka aganisye kuti ‘pakuti mwanangu nganabatiswe, nikuti nganaŵa amtyosisye mu mpingo.’ Ligongo cici kola nganisyo syelesi kuli kulilambusya?—Yak. 1:22.

13. Ana kucelewa kubatiswa kukusamtendekasya jwine kuti Yehofa akamŵalanjilaga? Alondesye.

¹³ Yili yakupikanika kuti, acinangolo Ŵaciklistu ŵangasaka kuti mwanagwawo abatiswe soni kulipeleka mkanakule. Nambope, kuli kulemwa kuŵeceta kuti Yehofa ŵangamŵalanjila mwanace ligongo lyakuti nganabatiswe. Ligongo cici yili m’yoyo? Ligongo lyakuti Yehofa ŵangamŵalanjilaga mundu ligongo lyakuti abatiswe. M’malo mwakwe, mwanace akusaŵalanjilidwa kwa Yehofa naga akumanyilila cacili cambone soni cakusakala m’meso mwa Yehofa. (Aŵalanje Yakobo 4:17.) M’yoyo, m’malo mwakwatengusya ŵanace kuti abatiswe, acinangolo ŵalunda akusalingalinga kuŵa cisyasyo cambone kwa ŵanace ŵawo. Jemanjaji akusasaka kuti ŵanace ŵawo ayamicileje ni mtima wosope ndamo syambone sya Yehofa kutandila ali ŵacinandipile. (Luk. 6:40) Kuyamicila ndamo syelesi kuli kwakamucisya, ligongo kucimkamucisya mwanagwawo kuti asikamulicisye ndamo syakulungama sya Yehofa.—Yes. 35:8.

14. Ana acakulungwa ŵa mu mpingo mpaka ŵakamucisye camtuli acinangolo ŵakwakamucisya ŵanace ŵawo kuti abatiswe?

¹⁴ Mpela ŵakucinga ŵausimu, acakulungwa ŵa mumpingo mpaka ŵalimbikasye acinangolo mwakwasalila umbone wa yakulinga yausimu. Jwamkongwe jwine jwatumicile kwa yaka 70 ali mpayiniya, jwakumbucile maloŵe gamacili gaŵatagulilene ni M’bale Charles T. Russell pa msongano wine. Pa ndaŵiji mlongoju jwakwete yaka 6. Jwalakwe jwatite, “Twatemi kwa maminisi 15 tuli mkutagulilana yakulinga yangu yausimu.” Yisyene, maloŵe gambone soni gakulimbikasya mpaka gatame kwangamala. (Miy. 25:11) Acakulungwa ŵa mumpingo komboleka kwaŵilanjila acinangolo ni ŵanace ŵawo ku masengo ga pa Nyumba ja Ucimwene. Ŵanacewo komboleka kwapaga masengo gakamulana ni msingu soni macili gawo.

15. Ana matala gane gapi gampaka ŵane mu mpingo agakamulicisye masengo pakwakamucisya ŵacinandipile?

¹⁵ Ŵandu ŵa mumpingo mpaka ŵakamucisye ŵanace mwakwalosya lung’wanu. Yeleyi mpaka yipwaticepo kwalongolela ku yakulinga yausimu. Mpaka aliwusye kuti, ana jwacinyamata akusalipeleka ni mtima wosope pakujigala nawo mbali pa misongano ja mkati mwa cijuma? Ana akusayiwona kuŵa yakusawusya kapena akusawuwona kuŵa upile wakutendela umboni usyesyene pali ku sukulu? Aŵe ŵacitema  pakuyamicila mwakutyocela pasi pamtima. Ana mpaka tulosye kuti tukwete lung’wanu naga tukusapata ndaŵi jakuŵecetana ni jwacinandipile, mkanitutande kapena panyuma pa misongano? Kamulicisya masengo matala gelega soni gane, ŵacinandipile cacimanyilila kuti ali jumo mwa ŵandu ŵali mu “mpingo wekulungwa.”—Sal. 35:18.

16, 17. (a) Ana kupocela umi wangamala kukukamulana camtuli ni kubatiswa? (b) Ana acinangolo ŵa Ciklistu wosope akusasangalala kulingalinga kutenda cici? (Alole ciwulili cacili kundanda kwa nganiji.)

¹⁶ Mpela nangolo jwa Ciklistu akwete upile wekulungwa wakupeleka “camuko ca Yehofa soni kwajiganya kaganisye kakwe.” (Aef. 6:4; Sal. 127:3) Mwakulekangana ni mtundu wakala wa Ayisalayeli, ŵanace ŵa acinangolo ŵa Ciklistu ngakusapagwa ali kumbali ja ŵandu ŵapajika ŵa Yehofa. Nambosoni, yili yangakomboleka kuti acinangolo naga akunonyela Mlungu soni usyesyene nikuti mwanace catendejesoni m’yoyo. Kutandila pa lisiku lyakupagwa mwanace, acinangolo akusosekwa kola cakulinga cakumpanganya mwanacejo kuŵa jwakulijiganya jwa Klistu. M’yoyo akusosekwa kumkamucisya mwanacejo kuti alipelece, nikuŵa jwakutumicila jwa Yehofa jwam’batiswe. Ana cakusosekwa mnope cili cici? Cakusosekwa mnope cili cakuti kulipeleka, kubatiswa soni kulupicika kwa mundu ni kucikumtendekasya kulembedwa cimanyilo cakulupucila pa yisawusyo yekulungwa.—Mat. 24:13.

¹⁷ Blossom Brandt paŵasagulaga kubatiswa, acinangolo ŵakwe ŵakogopa Mlungu ŵasakaga kusimicisya kuti mwanagwawo akosece kutenda cindu cakusosekwa mnopeci pa umi wakwe. Acinangoloŵa paŵasimicisye kuti mwanagwawo akosece, ŵamkamucisye cisagula cakweci. Cilo cakuti malaŵi gakwe akubatiswa, babagwe ŵatesile cindu cine cambone mnope. Blossom ŵaŵecete kuti, “Ŵatusalile kuti tutindiŵale, kaneko ŵapelece lipopelo. Ŵamsalile Yehofa kuti ŵaliji ŵakusangalala ligongo lyakuti kamsikana kawo kasagwile kupeleka umi wakwe kwa Yehofa.” Yaka yakupunda 60 citendecele yeleyi, Blossom ŵaŵecete kuti, “Kusala yisyene, ngasindiŵalila yayatendekwe cilo celeco!” Acinangolo, nombe nawosoni mpaka asangalale, soni kuŵa ŵakwikutila ligongo lyakwawona ŵanace ŵawo ali mkuŵa ŵakutumicila ŵa Yehofa ŵakulipeleka soni ŵabatiswe.