Kusala yisyene, masiku agano pangali mundu jwalijose jwampaka asale muŵawonecelaga Paulo. Yakwambula soni yakupeta yakwamba Paulo yatukusayiwona m’mabuku getu yigambile kuŵa yakuwanicisya. Yeleyi nganiyiŵa yakwambula yakala yapatile ŵakuwungunya.

Nambope, pana maumboni gane gakusala muŵawonecelaga Paulo. Mwambone, magasini ja Zion’s Watch Tower ja March 1, 1902, jasasile umboni umo kuti, “Buku jakuti ‘Acts of Paul and Thecla,’ jajalembedwe ciŵandika yaka ya m’ma 150 A. D., * jasasile muŵawonecelaga Paulo. Bukuji jasasile kuti, ‘Paulo jwaliji jwamjipi, jwalulasi, jwawuteje, jwamacili, jwa meso ga bulawuni, soni jwakwete lupula lwelewu.’”

Pakutajila mang’ombe pa yindu yayalembedweyi, buku jine jagopolela maloŵe jasasile kuti, “Yili yakomboleka kuti buku ja, ‘The Acts of Paul and Thecla,’ jikusala yindu yine yakala yayili yisyesyene.” Bukuji jakamulaga mnope masengo mu yaka 100 yandanda, soni umboni wakwe ukusasimanikwa m’mipukutu ja Cigiliki jakwana 80, jajasimanikwaga pandaŵijo, soni m’mabuku ga m’yiŵeceto yakulekanganalekangana. Kulola maumboni gelega ni kulola yatukusajambula m’mabuku getu yikusatutendekasya kuti tumanyilile muŵawonecelaga ndumetume Paulo.

Nambo tukumbucileje kuti pana yindu yakusosekwa mnope kulekangana ni kawonece ka Paulo. Atamose ndaŵi jaŵatendaga undumetume wakwe, ŵandu ŵane ŵakusisya ŵaŵecetaga kuti “jwalakwe pali pasikati petu akusaŵa jwangali macili soni yakusaŵeceta yikusaŵa yangakamula mtima.” (2 Akoli. 10:10) Nambo tukaliŵalila kuti Paulo jwaŵele Klistu kupitila mu yakusimonjesya yaŵatesile Yesu. Tukusosekwasoni ganicisyaga yaŵakwanilisye Paulo mpela “jwakusagulidwa jwa [Klistu] kuti alalicile ya lina lya [Yesu] kwa ŵandu ŵa mitundu josope.” (Mase. 9:3-5, 15; 22:6-8) Tuganicisyejesoni majiganyo gambone gampaka tupate kutyocela ku mabuku ga m’Baibulo gele Yehofa ŵamsalile Paulo kuti alembe.

Paulo nganalilapilila ligongo lya yindu yaŵakombwele kutenda mkanaŵe Mklistu, kapena kusala kawonece kakwe. (Mase. 26:4, 5; Afi. 3:4-6) Nambo m’malo mwakwe, jwasasile kuti, “Une ndili jwamnandi mwa ŵandumetume wosope, soni ndili jwangaŵajilwa kolanjikwa kuti ndumetume.” (1 Akoli. 15:9) Kaneko jwalakwe jwalembile kuti, “Une ndili mundu jwamnandi mnope pakulandanya ni ŵaswela wosope. Nambo napegwile umbone mtima wekulungwa kuti lalicile ngani syambone kwa ŵandu ŵamitundu josope syakusala ya cipanje cangamala ca Klistu.” (Aef. 3:8) Utenga welewu ni wawuli wakusosekwa mnope kulekangana ni yiliyose yakusasala ŵandu yakwamba muŵawonecelaga Paulo.