1. Ana gane mwa malamusi ga m’Baibulo gali gapi, soni ana kugapikanila kukusatukamucisya catuli?

YEHOFA atupele malamusi gakwe kupitila m’Baibulo. Mwambone, jwalakwe akusalekasya yamsese, kulambila milungu jakupanganyikwa, wiyi, soni kolelwa. (1 Akoli. 6:9, 10) Konjecesya pelepa, Mwanace jwa Mlungu, Yesu Klistu, ŵalamwile ŵakumkuya ŵakwe kuti, “Ajawule akajiganye ŵandu ŵa mitundu josope kuti aŵe ŵakulijiganya ŵangu. Ŵabatisyeje m’lina lya Atati, ni lya Mwanace, ni lya msimu weswela, ni kwajiganya kuti asunjeje yindu yosope yanalamwile. Amanyilile kuti une ndili pampepe ni jemanja moŵa gosope mpaka kumbesi kwandaŵi ajino.” (Mat. 28:19, 20) Malamusi gelega gakusatucenjela. Kupikanila malamusiga kucitukamucisya kulisamalila cenene acimsyewe, kola cilu cambone, soni kola liŵasa lyakusangalala. Kupunda yosope kupikanila malamusiga kupwatikapo lyakuti tulalicileje, kukusatendekasya kuti Yehofa atunonyeleje soni kuti atupeje majali.

2, 3. (a) Ligongo cici Baibulo jangapeleka malamusi pa cakutendekwa cilicose ca paumi? (b) Ana citujanje yiwusyo yapi mungani ajino? (Alole ciwulili cacili penanici.)

² Nambope Baibulo jangapeleka malamusi pacakutendekwa  cilicose. Mwambone, m’Malemba mwangali malamusi gakusala ya yakuwala yakuŵajilwa kwa Aklistu. Ana yeleyi yikusalosya catuli kuti Yehofa ali jwalunda? Masitayilo soni misyungu yikusaŵa yakulekanganalekangana soni yikusacenja payikupita yaka. M’yoyo, Baibulo jikasale kawale soni kalisalalisye kakuŵajilwa, apano yikawonekaga yacikala mnope. Ni ligongo lyakwesoni Maloŵe ga Mlungu gangapeleka malamusi gakuti Aklistu agakuyeje pangani ja masengo, mtela soni yakusangalasya. Mklistu jwalijose pajika kapena mitwe jamaŵasa jikwete ufulu wakusagula yakutenda pangani syelesi.

³ Ana yeleyi yigopolela kuti yatukusasagula kutenda payindu yekulungwakulungwa pa umi wetu yangamkwaya Yehofa? Ana Mlungu akusajiticisya cilicose catusagwile naga ngacikukasa malamusi ga m’Baibulo? Naga Baibulo jangapeleka lilamusi pangani jine jakwe, ana mpaka tusagule catuli yindu yampaka yimsangalasye Yehofa?

4, 5. Ana yakusagula yetu yikusakwaya catuli ŵane?

⁴ Ŵandu ŵane akusayiwona kuti mpaka atendeje cilicose cakusaka. Nambo kuti tusagule yakutenda yampaka yimsangalasyesoni Yehofa, tukusosekwa ganicisya soni kamulicisya masengo songa soni malamusi ga m’Malemba. Mwambone, kuti Mlungu atunonyeleje tukusosekwa kutenda yindu mwakamulana ni lilamusi lyakwe lyakwayana ni miyasi. (Gen. 9:4; Mase. 15:28, 29) Kupopela mpaka kutukamucisyesoni kuti tusaguleje yakutenda mwakamulana ni songa soni malamusi ga m’Malemba.

⁵ Yakusagula yekulungwakulungwa yikusakwayasoni usimu wetu. Naga tukusagula yindu mwalunda yicitukamucisya kuti tuŵe paunasi wambone ni Yehofa. Nambo kusagula yakutenda mwakulemweceka kukusajonanga unasi wetu ni jwalakwe. Konjecesya pelepa kusagula yakutenda mwakulemweceka, mpaka kukwayesoni usimu wa ŵane. Yakusagula yetuyo mpaka yasokonasye kapena kwakuŵasya ŵane soni mpaka yisokonasye mkamulano wa mumpingo. M’yoyo, tukusosekwa kusagula yakutenda mwalunda.—Aŵalanje Aloma 14:19; Agalatia 6:7.

6. Ana cici campaka citulongolele patukusagula yakutenda?

⁶ Ana tukusosekwa kutenda cici pa yindu yakuti m’Baibulo mwangali malamusi gakwe? Pa yindu mpela yeleyi, ngatukusosekwa kwamba kusagula yatukuyinonyela nambo tukusosekwa kuwungunya cenene ni kusagula yampaka yimsangalasye Yehofa soni yampaka ayijaliwe.—Aŵalanje Salimo 37:5.

7. Naga pangali lilamusi lya m’Baibulo pangani jine jakwe, ana mpaka tumanyilile catuli yampaka yimsangalasye Yehofa?

⁷ Nambope, mpaka aliwusye kuti, ‘Ana mpaka tumanyilile catuli kuti yatusagwileyo ciyimsangalasye Yehofa naga Maloŵe gakwe gangapeleka lilamusi lililyose panganijo? Lilemba lya Aefeso 5:17 likusati, “Ajendelecele kumanyilila lisosa lya Yehofa.” Naga pangali lilamusi lya m’Baibulo pangani jine jakwe, ana mpaka tumanyilile catuli lisosa lya Mlungu panganijo? Tukusosekwa kupopela kwa jwalakwe soni kunda kuti atulongoleleje ni msimu weswela.

8. Ana Yesu ŵalosisye catuli kuti ŵamanyililaga yaŵasakaga Yehofa? Apelece cisyasyo.

⁸ Yesu ŵamanyililaga yaŵasakaga Atatigwe. Mwambone, kwa maulendo gaŵili, Yesu ŵapele mwakusimonjesya cakulya ŵandu ŵasala. Nambo mkanatende yeleyo ŵapopelaga kaje.  (Mat. 14:17-20; 15:34-37) Nambope, pandaŵi jele Satana ŵamlingaga Yesu m’cipululu, jwalakwe ŵakanile kugalawusya maganga kuŵa mkate atamose kuti jamkwete sala. (Aŵalanje Matayo 4:2-4.) Jwalakwe ŵakanile kutenda yeleyi ligongo lyakuti ŵamanyililaga nganisyo sya Atatigwe. Yesu ŵamanyililaga kuti nganiliŵa lisosa lya Mlungu kuti akamulicisye masengo macili gakwe pakutenda yindu yakulisangalasya msyene. Kana kwakweko kwalosisye kuti ŵamjegamilaga Yehofa kuti amlongoleleje.

9, 10. Ana cici campaka citukamucisye kusagula yindu mwalunda? Apelece cisyasyo.

⁹ Kuti tusaguleje yindu mwalunda mpela muŵatendelaga Yesu, tukusosekwa kwegamila kwa Yehofa kuti atulongoleleje. Tukusosekwa kutenda yindu mwakamulana ni maloŵe aga, “Mumkulupilile Yehofa ni mtima wenu wosope, soni mkajegamila pa lunda lwenu. Mumcimbicisyeje m’matala genu gosope, soni jwalakwe cacijongola kajende kenu. Mkaliwonaga jika kuŵa jwalunda. Mumjogopeje Yehofa ni kuŵambala cakusakala.” (Miy. 3:5-7) Kumanyilila nganisyo sya Yehofa kupitila pakulijiganya Baibulo kucitukamucisya kumanyilila yampaka Mlungu asace kuti tutende pa cakutendekwa cinecakwe. Patukulijiganya yejinji yakwamba nganisyo sya Yehofa, tuciŵa ŵakusacilila mnope kulongolelegwa ni jwalakwe.—Ezek. 11:19.

¹⁰ Yeleyi mpaka tuyiwanicisye m’yi: Tujile kuti jwamkongwe jwine jwamlombegwe apite ku msika kukusuma yindu. Ali kweleko akusiwona sapato syakusalala nambo syakatala. Ni akuliwusya jika kuti, ‘Ana ŵamkwangu mpaka apikane wuli ndili sumile sapato syakatalasi?’ Jwalakwe akumanyilila mwampaka ŵamkwakwewo apikanile mumtima atamose kuti nganaŵa yimpepe kumsikako. Cici cacimkamucisye jwamkongweju kumanyilila yeleyi? Ligongo lyakuti jwalakwe akumanyilila nganisyo sya ŵamkwakwewo pakwamba ya mbiya syamnono syakwete. Mwakulandana ni yeleyi, naga tukwendelecela kulijiganya nganisyo soni matala ga Yehofa, tucimanyilila yampaka Atati ŵetu ŵakwinani asace kuti tutende payakutendekwa yakulekanganalekangana.

11. Patukuŵalanga kapena kulijiganya Baibulo, ana mpaka tuliwusyeje yiwusyo yapi? (Alole libokosi lyakuti “Pakulijiganya Maloŵe ga Mlungu Aliwusyeje Kuti.”)

¹¹ Kuti tumanyilile nganisyo sya Yehofa, tukusosekwa kutenda lijiganyo lyapajika mwamtawu. Patukuŵalanga kapena kulijiganya Maloŵe ga Mlungu, mpaka tuliwusyeje kuti, ‘Ana nganiji jikunjiganya cici ya Yehofa, matala gakwe gakulungama soni kaganisye kakwe?’ Tukusosekwa kola mtima waŵakwete jwamalumbo Daudi juŵajimbile kuti, “Amanyisye matala gawo wawo Yehofa. Anjiganye matala gawo. Anjendesye mu usyesyene wawo ni kunjiganya. Pakuŵa ŵalakwe ali Mlungu jwangu jwacikulupusyo. Cembeceyo cangu cili pa ŵalakwe lisiku lyosope.” (Sal. 25:4, 5) Pakuganicisya mwakusokoka ya ngani jine jakwe ja m’Baibulo, mpaka aganicisye yiwusyo ayi, ‘Ana mpaka ngamulicisye masengo catuli yeleyi mwiŵasa mwangu? Ana mpaka nayikamulicisye masengo kwapi? Kunyumba? Kumasengo? Kusukulu? Kapena mu undumetume?’ Patusimene ni cakutendekwa cine cakwe yiciŵa yangasawusya kumanyilila mwampaka tukamulicisye masengo yatulijiganyisyeyo.

12. Ana mabuku soni misongano jetu mpaka yitukamucisye catuli kumanyilila nganisyo sya Yehofa pangani syakulekanganalekangana?

¹² Yalikutujiganya likuga lya Yehofa kupitila m’Baibulo yikutukamucisyasoni kumanyilila  nganisyo syakwe. Mwambone, likuga lyakopwesye buku ja Watch Tower Publications Index soni Kabuku Kakamucisya Kuwungunya Ngani ka Mboni sya Yehofa, kuti gatukamucisye kulijiganya nganisyo sya Yehofa payakutendekwa yakulekanganalekangana yampaka tusimane nayo. Kusimanikwa soni kujigala nawo mbali pamisongano kukusatukamucisya mnope. Ganicisya yatukulijiganya pamisonganojo mpaka kutukamucisye kumanyilila nganisyo sya Yehofa soni mwampaka tusikamulicisyeje masengo paumi wetu. Naga tukamulicisya masengo yindu yausimu yakusatupa Yehofa tucijendelecela kumanyilila matala gakwe. Yakuyicisya yakwe, tucipakombola kusagula yindu yakuŵajilwa m’meso mwa Mlungu.

13. Apelece cisyasyo cakulosya kuti kumanyilila nganisyo sya Yehofa mpaka kutukamucisye kusagula yakutenda mwalunda.

¹³ Kwende tulole cisyasyo cakulosya kuti kumanyilila nganisyo sya Yehofa mpaka kutukamucisye kusagula yakutenda mwalunda. Tujile kuti akusaka kutenda upayiniya wakutamilicika. Kuti akombole kutenda yeleyo, candanda mpaka asosekwe kutama ni umi wangasaka yejinji. Ndaŵi sine mpaka atande kayicila naga caŵepe ŵakusangalala pasagwile kutama ni umi welewo. Mpaka aganisye yakwendelecela kuŵa jwakulalicila jwakulupicika ligongo m’Baibulo mwangali lilamusi lyakuti tutendeje upayiniya. Nambope, Yesu ŵasasile kuti ŵandu wosope ŵakusalijima yindu yine ligongo lya Ucimwene cacipocela majali gamajinji. (Aŵalanje Luka 18:29, 30.) Konjecesya pelepa, Malemba gakusalosya kuti Yehofa akusasangalala ni yatukusapeleka mwakusaka kwetu pakwawusya pasogolo kulambila kusyesyene. (Sal. 119:108; 2 Akoli. 9:7) Naga tukujipolela soni kujiganicisya mwakusokoka nganijo mpaka yitukamucisye kusagula yakutenda mwalunda soni yampaka Yehofa ayijaliwe.

14. Ana mpaka tumanyilile catuli naga sitayilo jinejakwe ja yakuwala mpaka jimsangalasye Yehofa?

¹⁴ Kwende tulolesoni cisyasyo cine. Tuwanicisye kuti atandite kunonyela sitayilo jine jakwe ja yakuwala jampaka jakuŵasye ŵane mumpingo. Nambo akumanyilila kuti pangali lilamusi lililyose lya m’Baibulo lyakulekasya sitayilojo. Ana mpaka amanyilile catuli nganisyo sya Yehofa panganiji? Yaŵalembile ndumetume Paulo mpaka yitukamucisye pangani jeleji. Jwalakwe ŵatite, “Acakongwe alisalalisyeje ni yakuwala yakuŵajilwa, pakuwala mwaucimbicimbi soni mwalunda, ngaŵaga kulisalalisya ni masitayilo gakutiŵila umbo, golidi, yuma, kapena yakuwala  yapenani. Nambo alisalalisyeje mwakamulana ni mwakusalisalalicisya acakongwe ŵakusati akusamcimbicisya Mlungu. Alisalalisyeje ni masengo gambone. (1 Tim. 2:9, 10) Maloŵe gelega ngagakusagamba kamula masengo kwa acakongwepe nambo ni kwa acalume ŵakwe. Mpela ŵakutumicila ŵa Yehofa, ngatukusagamba ganicisya yetupe, nambo tukusalolasoni mwampaka kawale soni kalisalalisye ketu kakwayile ŵane. Ligongo lyakuti tukusanonyela soni kwacimbicisya ŵakulambila acimjetu, tucipikanila nganisyo syawo kuti tukakuŵasya. (1 Akoli. 10:23, 24; Afi. 3:17) Ganicisya yagakusasala Malemba mpaka kutukamucisye kumanyilila nganisyo sya Yehofa pangani ja kawale ni kalisalalisye. Soni Malemba mpaka gatukamucisye kusagula yindu yampaka yimsangalasye Yehofa.

15, 16. (a) Ana Yehofa akusapikana wuli naga tukuganicisya mnope yamsese (b) Patukusagula yakusangalasya, ana mpaka tumanyilile catuli yampaka yimsangalasye Yehofa? (c) Ana tukusosekwa kusagula mwatuli yakutenda pangani syekulungwakulungwa?

¹⁵ Baibulo jikusasala kuti naga ŵandu akwendelecela kutenda soni ganicisya yakusakala yikusam’nyalaya Yehofa. (Aŵalanje Genesis 6:5, 6.) Yeleyi yikulosya kuti ganicisya mnope uli mkutenda yamsese kuli kulemwa ligongo mpaka kumlimbikasye mundu kutenda cakulemwa cekulungwa soni yili yakutindana ni nganisyo sya Yehofa. Ndumetume Yakobo ŵalembile kuti, “Lunda lwakutyocela kwinani, candanda luli lweswela, kaneko lwamtendele, lwakundilila, lwakoseka kupikanila, lwegumbale ni canasa ni yisogosi yambone, lwangali lusagu, nambosoni lwangali cinyengo.” (Yak. 3:17) Kumanyilila yeleyi mpaka kutukamucisye kuŵambala yakusangalasya yakulimbikasya nganisyo syakusakala. Aklistu ŵakusamanyilila nganisyo sya Yehofa, ŵangaŵalanga mabuku, kulolela mafilimu kapena kutenda mang’asi gakola yindu yakusayiŵenga Yehofa. Yehofa ŵasasile mwakupikanika cenene nganisyo syakwe panganisi m’maloŵe gakwe.

¹⁶ Ndaŵi sine mpaka tusagule yakutenda yakulekanganalekangana pangani jine jakwe nambo yakusagula yosopeyo mpaka yimsangalasyejepe Yehofa. Nambo naga tukusaka kusagula yindu pangani jekulungwa mnope ndaŵi sine mpaka yiŵe cenene kwawusya acakulungwa ŵa mumpingo kapena Aklistu ŵakomangale mwausimu. (Tito 2:3-5; Yak. 5:13-15) Nambo ngatukusosekwa kwaŵenda ŵane kuti atusagulile yakutenda. Tukusosekwa ganicisya yajikusasala Baibulo panganijo ni kusagula yakutenda mwakamulana ni yeleyo. (Ahe. 5:14) Wosopewe tukusosekwa kutenda yindu mwakamulana ni Maloŵe ga Paulo gakuti, “Jwalijose akusosekwa kunyakula ndundu syakwe.”—Aga. 6:5.

17. Ana tukusapata umbone watuli patukusagula yindu yakumsangalasya Yehofa

¹⁷ Naga patukusagula yakutenda tukusakunda kuti Yehofa atulongoleleje, tucim’ŵandicila mnope. (Yak. 4:8) Jwalakwe cacitunonyela soni kutujaliwa. Yakuyicisya yakwe cikulupici cetu pa jwalakwe ciciŵa cakulimba. M’yoyo, kwende tukamulicisyeje masengo malamusi soni songa sya m’Baibulo ligongo sikusalosya nganisyo sya Mlungu pangani syakulekanganalekangana. Yili yisyene, kuti ngasitumalisya kulijiganya yakwamba Yehofa. (Yobu 26:14) Nambo naga tukola mtawu wakulijiganya ya jwalakwe, tucisagula yakutenda mwalunda. (Miy. 2:1-5) Nganisyo soni yakutenda ya ŵandu yikusacenga nambo Yehofa jwangacenga. Baibulo jikusati, “Yakulinga ya Yehofa yicitamilicika mpaka kalakala. Nganisyo sya mumtima mwakwe siciŵapo ku mbagwilo ni mbagwilo.” (Sal. 33:11) M’yoyo, kuti tusagule yakutenda mwalunda tukusosekwa ganisya soni kutenda yindu mwakamulana ni kaganisye ka Mlungu jwetu jwalunda losope, Yehofa.